رحلتي اللندنيه ( 2013 )

هداوه · 02-02-2015, 12:43 AM

السلام عليكم

شوا أخباركم حبايبي

اليوم حبيت أعطيكم من أرشيفي تفاصيل رحلتي اللندنيه لما فيها فايده

واتمنى تنال رضاكم

الفهرس

بترك هالجزء للفهرس بعد ما أخلص من التقريران شاءالله

هداوه · 02-02-2015, 12:50 AM

المسافرون

انا وبناتي كوكي وتوتو الله يحفظهم ، وبنت عمي فوفو

تاريخ رحلتنا

من 29 / 3 الى 12 / 4

الطيران

حجزت ع طيران الامارات

حصلت التذكره بـ 2800 ع السياحيه في شهر 1 وعقبها بأسبوع أرتفعت التذاكر وصارت 4200

( حركات بعد طيران الامارات )

والمشكله الوحيده اللي صادفتني اني ماحصلت ترفيع ع البزنس ولا حتى شراء تذكره

لا في السيره ولا في الرده

وطول الوقت وانا أحاتي لأني متعوده اسافر ع البزنس وهالشي ضايقني

وكان عندي أمل أحصل وانا في المطار

لأنه عندي البطاقه الفضيه من سكاي وورد فأقدر أترفع من المطار ولكن

ماحصلت والبزنس فل

استخلفت الله وقلت خلاص هذا نصيبي ، وكانت طيارتنا 380 الايرباص

والحمدالله انه هاي الطياره كراسي السياحيه فيها مريحه وابدا ماتضايقت...

بالنسبه للسكن

كانت هاي أصعب مهمه

لأنه كنا نحتاج شقه تكون قريبه من سكن أخويه يعني نبا في الأجوررود

في البدايه كنت ناويه بسكن في فندق ثيستل أنا وبناتي كوكي وتوتو الله يحفظهم

ولكن انضمت معانا في الرحله بنت عمي فوفو

وشفنا لازم ناخذ شقه لأنها أوفر وبعد عشان اذا بغينا نطبخ

وبدأت عمليه البحث

بذلت جهد كبير وانا ابحث عن سكن مناسب وكنت ابا نظام شقق

فندقيه ويكون في أجوررود أو قريب منه

وبعد البحث لقيت شقق عجبتني ولكن كانت غاليه وكانوا اغلبهم في منطقة ماي فير

ولقيت غيرهم بس بعيد عن أجور رود

ولقيت قريبين من أجور رود بس ماعجبوني

ولقيت شقق عجبوني وسعرهم مناسب بس ماحصلت فيهم حجز

وعقب لغيت فكرة اني أدور شقق فندقيه

وبدأت مرحله ثانيه وهي البحث عن شقه عن طريق السماسره

لجأت للخيار الثاني وهو البحث عن شقه عن طريق السماسره

ماقصر اخويه موادع عطاني رقم سمسار وصديقتي عطتني بعد كم سمسار

وأخويه القطري عطاني رقم مريم

جمعت أرقامهم وقمت أتصل وأراسلهم

حد مارد عليه

وحد قاللي قبل ماتوصلين بيومين خبريني

ومريم هاي هي اللي لعوزتني

بعد اتصالات ومراسلات لاحظت انها ماتتجاوب بسرعه ع مسجاتي وتتأخر في ردودها

ومره طرشت لي صور لشقتين أخترت وحده بس قلتلها

هاي شرات شقة اخويه بس عندج السعر أغلى ممكن تنزلينا شوي

قالت بتكلم وياراعي الشقه وبخبرج

واتريا واتريا وماردت وقمت أطرش مسجات ع الواتس اب وعقب قالتلي

الشقه انحجزت

الصراحه قهرتني وقلتلها كيف انا قلتلج اوكي بس شوفي اذا في مجال تنقصين السعر

وقالت بشوفلج غيرها ، وبعد نستني

وانا أطرش لها مسجات واتصل ع مكتبهم ولما يأست منها تركتها

وعقب كلمت سمسار ثاني وقاللي

عنده شقه فخمه بس غاليه تقريبا بـ 20 الف درهم

قلتله بشوفها وانا باجر يايه لندن واذا عجبتني بآخذها

وقبل سفري بيوم تفاجات انه مريم مطرشتلي صور لشقه أم غرفتين وعن طريق مكتبها

والشقه أعتقد بـ 1200 باوند في الأسبوع

وكلموني المكتب وقالولي اذا تبينها الحين حولينا المبلغ كله عشان نحجزها لج

قلتلهم الحين ليل عندنا والصرافيين سكروا وباجر انا يايه لندن

ومن اوصل بتصل عليكم وبنسير الشقه وبعطيكم سعرها كامل اذا عجبتني

بيني وبينكم قلت بعد افضل أشوفها يمكن ماتناسبني

ومن ناحيه ثانيه عندي فرصه أشوف الشقه الغاليه

وكان هذا اتفاقنا

عقب بخبركم بالتفاصيل ..

الجو

في الفتره اللي سافرنا فيها كان الجو واااايد باااارد وحتى هم مستغربين انه السنه طول الشتاء عندهم

وطبعا كنا ماخذين ثياب غليظه وهاي ماتاخذ وزن ولكن تاخذ مكان

وانتوا تعرفون كيف نحن نحتاج المكان ورانا سوق لندن مب أي سوق

استعدادات السفر

لأنه بنسكن في شقه في الأجوررود فكان أهم شي ناخذ معانا ...

1- مخدات يديده ( طبعا انا هنيه أقصد حقي وحق بناتي وبنت عمي )

وشراشف ولحافات ولبس الكفرات والمخدات وفوط كبيره وصغيره

وكلهم هاذيل خذيتهم مستعمل وقديم عندي عشان اتركهم هناك وما أرجعهم

ماعدا المخدات فخذيتهم من كارفور وهم مضغوطات ومشفوط عنهم

الهواء مجرد نقص البلاستيك بالمقص وينتفخون ...

2- خذيت عزكم الله نعله للحمام ومن غير نعله حق الشقه ( سليبرات )

3-خذيت 2 قوز ما أعرف شو تسمونه المهم اللي نستعمله حق الغسول في الحمام

ولكن ما استعملناهم لأنه حصلنا هناك 2 الظاهر حد من الخليجين تركهم ، وكان فيه شطاف وماكان لهم لازمه

4-خذيت بعض الأكل حق الطبخ

عيش + علب تونه + علب جبن كرافت + كاسات جبن كرافت وبوك + بهارات + حليب رينبو وشاي وزعتر وزنجبيل مطحون

الصراحه ماكثرت لأني عارفه انه كل شي هناك متوفر

ولأني عارفه انه مابنطبخ وايد أكثر شي بيكون اعتمادنا ع المطاعم

5-غير شنطنا الكبار انا خذيت معاي 3 هاندباك وهاذيل بنحتاجهم حق مشترياتنا وحق السوق

لأنه لما نسير السوق لازم ناخذ هاندباك عشان نحط مشترياتنا فيها وندزها ماعنثرنا ع الشل ...

بنت عمي من غير شنطتها يابت هاندباكتين ..

ع فكره أضطريت أشتري من غير شنطه وهاندباك

دي لندن ياجماعه

تقريبا هاي اهم الاشياء اللي حسيت انه لازم أخبركم عنها والباقي عادي ...

تابعوني ...

أبن السلطنةمعجبون بهذا.

هداوه · 02-02-2015, 01:07 AM

يوم المغادره ووصولنا لندن

كانت طيارتنا الساعه 9.40 صباحا

لما وصلنا حاولت أشوف اذا في ترفيع لي ع البزنس فقالولي انه فل

سوينا اجراءات الدخول ودخلنا وتيلسنا في الكوفي وتريقنا

وعقب ركبنا طيارتنا والحمدالله كانت رحلتنا مريحه

شوفوا كراسي السياحيه محلاتها

وطلبت من المظيفه تعطينا كروت لأنهم نسوا يعطونا ياهم

وهاي الكروت مهمه نعبيها قبل لانوصل مطار هيثرو

فلاتنسون تاخذونها من المظيفين وترفقونها ويا الجواز عند الدخول

لأنه اذا ماشافوا الكارت ومعبأ بكامل بياناته بيخلونكم تطلعون من

الطابور وتسيرون تعبونه

الحمدالله تمت اجراءات الخروج بكل سهوله

وعقب ماطلعنا استقبلنا السواق اللي حاجزين عنه السياره

( كان أخويه حاجزلنا السياره 9 راكب بـ 70 باوند )

وهنيه بدأت مشكلتي

بعد ماركبنا السياره قمت أتصل ع السماسره

أتصلت بمكتب مريم وتلقيت أول صدمه

قاللي الموظف :

الشقه انحجزت

قلتله كيف الشقه انحجزت وانا أمس مكلمتنك فليل وخبرتك اني اليوم يايه

قال خلاص بحاول اشوفلج غيرها

وعقب اتصلت في السمسار الثاني اللي قال بيعطينا الشقه الفخمه الغاليه

وعطاني الصدمه الثانيه

الشقه انحجزت

لاحول ولاقوة الا بالله

ياريال انا أمس مكلمتنك فليل واليوم تقوللي انحجزت وانا الحين طالعه من المطار

تأسف وقال ماعنده شقه ثانيه

وقمت اتصلت في سمسار ثالث وهذا اللي قاللي اتصلي فيني قبل

لاأتين بيومين

وكنت متصله فيه احتياطي قبل لا أسافر

اتصلت ورد عليه وقلته أنا توني وصلت وانا في الطريج

قال عندي شقه من توصلين براويج ياه

الحمدالله فرجت

قلتله خلاص من أوصل بخبرك

المشكله شقة أخويه صغيره ( غرفتين وصاله )

قلت لبنت عمي أسوأ الظروف بنحجز في أي فندق وبندور شقه اذا هاي الشقه ماناسبتنا

واتفقنا ع هذا الرآي

طبعا نحن سرنا ع طول عند أخويه

والحمدالله انه نحن عندنا مكان نسيرله

يعني لو كنا يايين وبدون مايكون أخويه موجود

وين كنا بنسير وبنلفلف بأغراضنا وشنطنا ومن غير نحن تعبانين من الرحله ...

وصلنا عند أخويه ونزلنا شنطنا في شقتهم وبعد الاستقبال الحار قلت لأخويه

تعال معانا أنا مكلمه سمسار بيراوينا شقه

قال : ليش تكلمين حد أنا مرتبلج شقه مع السمسار اللي اتعامل وياه

صباح الخير بو أحمد وليش مارمست من قبل

( انا ماطلبت من أخويه يدورلي شقه الصراحه

مابغيت أضغط عليه بهاي الشغله وهو مضغوط هناك مع مراجعات المستشفى )

قلتله أتصل عليه الحين وبنشوف الشقه اللي عنده

وبعد بنشوف الشقه اللي مجهزنها السمسار الثاني

قال أوكي بس اول ايلسوا ارتاحوا وتغدوا وعقب بنسير نشوفهم

قلتله لابرتاح ولا بآكل لين أتطمن وين برقد اليوم

وطلعنا أنا وأخويه وبنت عمي ويانا السمسار ( ابو سامح ) ريال طيب

والنعم فيه من السودان وودانا الشقه
الموقع ممتاز

الشقه أثاثها حلو بس

عيبها انه فيها حمام واحد وصغيره وايد

والمطبخ في الصاله

وأجارها 900 باوند في الاسبوع

قلناله يابوسامح اسمحلنا بعد بنشوف شقه ثانيه وعقب بنقرر

(وهو مصادق أخويه ووايد يعزه )

قال شوفوا الثانيه واذا حبيتوا هاي خبروني وعشان أخوج انا بعد مابآخذ تأمين

رجعنا وطلعنا من عمارتنا وطلعت الشقه الثانيه قريبه من هاي العماره

والسمسار الثاني اسمه بو أحمد من العراق

شفنا الشقه الثانيه

موقع ممتاز

3 غرف

واعتقد حمامين

مطبخ مستقل

نظيفه بس

أثاثها عادي وشكلها قديمه وأجارها 1200 في الاسبوع

حسينا انه شقة ابوسامح لو انها أصغر هي الاشرح واللي تفتح النفس

وقررنا ناخذها ونقبل بحمام واحد

والحمدالله نحن كلنا كبار ومابيننا غريب ولا أطفال يعني بنقدر نتكيف ويالوضع

أرتاحت النفوس وهدأت وردت الابتسامه ع ويهي

ورجعنا شقة أخويي بعد ماكلمنا ابوسامح نبشره انه بناخذها

وسرنا هجمنا ع الأكل اللذيذ وريحنا

واستسمحناهم انه نبا نسير شقتنا ونرتاح

وبدأت مرحلة التعب الحقيقي

أول شي أخويه قال سيروا شقتكم وانا بييبلكم الشنط

وماقصر بوسامح حمل الشنط في سيارته وتعاونوا ويانا شباب العيله

وعقب ماوصلت شنطنا واستقرينا في شقتنا بدأت مرحله ثانيه من التعب ماتوقعناها

تابعوني ...

في تفاصيل هذا اليوم المتعب

أبن السلطنةمعجبون بهذا.

هداوه · 02-02-2015, 01:14 AM

أول يوم في لندن

بعد مايابولنا الشباب كل الشنط عقبها ع طول طلعنا نحن الاربعه أنا وبنت عمي وبناتي

بطاقة الموبايلات

أول شي سويناه انه سرنا محل الموبايلات وخذينا

بطاقة من شركة 3G بـ 20 باوند حقي وحق بناتي لأنه كلنا عندنا آي فون

وفيها خدمة النت مدة شهر وتشمل ..

مكالمات داخليه

و 300 مسج

بس للاسف مانقدرنستخدمها للمكالمات الدوليه

وفي هاي الحاله كنت أحتاج موبايل ثاني عشان أحط بطاقة ليبارا ولكن

انا يايبه بس موبايلين

واحد آي فون عشان خدمة النت ورقم لندن

والثاني موبايل سامسونج عادي حق بطاقة الامارات وللاسف

موبايلي السامسونج نسيت أييب جارجه

في الأخير ظليت بس بالاي فون وتلعوزت شوي عشان ماكنت أقدر

أجري أي اتصال دولي وكانوا هم يتصلون بي

ولكن عوضني الواتس أب وأحيانا كنت أتصل من البي بي مال بنت عمي

أما بنت عمي فنسيت شو اسم بطاقتها وكانت بـ 10 باوند وكان فيها خدمة البي بي

بطاقة الاويستر للمواصلات

عقب سرنا محطة الأندرجراوند ( الماربل ىرش ) واشترينا بطاقة

أويستر لكل واحد منا مدة أسبوعين

تشمل زون 1 و 2 بـ 65 باوند

وعقب اسبوع ضيعت بنتي بطاقتها

ومارضوا يعطونا بدل فاقد واضطريت أشتري غيرها حق اسبوع

ودفعت شي و30 ما أذكر بالضبط

وهاي البطاقه نقدر نستعملها حق القطارات والباصات وهي أوفر لنا حق التنقلات

السوبرماركت

وعقب مرينا ع سوبرماركت تيسكو اللي عدال شقتنا

وتشرينا بعض الضروريات وعقب ردينا شقتنا

شقتنا

وعملية التنظيف والترتيب

طبعا في هاليوم كنا وايد منهكين وفوق هذا اكتشفنا انه الشقه رغم جمالها الخارجي

الا انها مغبره والفراش مغبر ومواعين المطبخ في شي منه محطوط

في الكبت ( الخزانه ) وفيه بقايا أكل

انا توليت تظيف المطبخ وغسل كل المواعين من صحون وأكواب وكاسات

وكل وحده منهم تولت شي في الشقه

( تنظيف الارضيه تبديل الشراشف واللحافات والمخدات ، وترتيب أغراضنا الخاصه

طبعا أنا فضيت شنطتي ورتبت أغراضي عقب ماخلصت غسيل)

صدق صدق هلكنا هذا اليوم

صور شقتنا

عمارتنا هي اول عماره مقابله حبيب بنك وتقريبا ع شارع أجور رود

وكل شي عدالنا وتعتبر عمارتنا في بداية شارع أجور رود

وانتوا يايين من شارع أكسفورد

اتذكر اني مصوره عمارتنا من برع ولكن ماحصلت الصوره

والعماره فيها لفت ( مصعد ) بس يزيغ

نظامه قديم مال أول

شقتنا في الطابق الأول ورقم شقتنا 1

باب الشقه عدال باب المطبخ ع طول في ويهكم

عيبني مطبخنا صغير وحليو

تكسرت ايديه أول يوم من الغسيل

ولكن باقي الأيام قسمنا الشغل علينا

كل يوم ع وحده

كل يوم نتريق ع هاي الطاوله

صالتنا المحندأه يعني الصغيره وفيها حمامنا الوحيد

نظره ع صالتنا من داخل حمامنا عزكم الله

وهنيه لقطه من داخل غرفتنا

حمامنا الوحيد

غرفتي أنا وبنت عمي

وسريرنا قبل مانغير الفراش

سريرنا عقب ماغيرنا الفراش وحطينا فراشنا اللي يايبيينه ويانا

غرفة البنات

ع فكره سرير البنات كان وايد يعور الظهر لأنه السبرينجات

أو الحدايد اللي في الدوشك ( يعني المرتبه ما أعرف شو تسمونها )

بارزه وتسبب الم ، وكلمت ابو سامح عن هاي المشكله

ويابلنا لحافات يديده وحطيناها تحتهم وصارت النومه أفضل

وانتهى هذا اليوم

أبن السلطنةمعجبون بهذا.

هداوه · 02-02-2015, 01:25 AM

بداية صولاتنا وجولاتنا اللندنيه

صحينا الصبح ع راحتنا لأنه كنا منهكين من أمس

جهزنا ريوقنا البيتي وتريقنا وطلعنا

لندن في هالايام كانت وايد بارده

عملنا حسابنا في اللبس المناسب

ولأنه اليوم سبت قررنا اليوم نسير شارع شعبي واسمه

شارع بورتبيللو

لقاء صديقتي الغاليه أحلى من العقد

( اسم معروف في السياحه والسفر )

أول ماطلعت كلمتها عشان أشوف ظروفها اذا بقدر أشوفها

ع فكره هذا مب أول لقاء ، وكنا مخططين ع هذا اللقاء من الامارات

وهي أخت وصديقه أعتز فيها وبمعرفتها الطيبه

بعد ماتكلمت وياها عرفت انه طيارتها العصر وعندها وقت

فقلتلها شو رآيج اتين ويانا

تمشينا في الجو البارد لين الاندرجراوند في اتجاه شارع اكسفورد

وتلاقينا عند محطة ( أندرجرواند ) ماربل آرش

كان لقاء جميل وعرفتها ع بناتي وع صديقتي وتوأم روحي وبنت عمي فوفو

وانطلقنا الى سوق شعبي في شارع اسمه

شارع بورتبيللو

PORTOBELLO ROAD

أول جولاتنا في شارع بورتبيللو

خذينا الخط الأحمر ونزلنا في محطة نوتنق هيل جيت

( Notting Hill Cate )

من وصلنا هناك وطلعنا من المحطه سألنا عن هالشارع والناس تدلينا وين الاتجاه ونحن نمشي

شفنا شارع طويييل ومزحوم من الناس وفيه محلات من الجانبين

مشينا مسافه طويله وأحلى مافيه انه أنا وعواش سوالف وضحك

ومشينا وايد نتحسب انه المكان اللي نباه عقب هالشارع

وبعد ماسألنا الناس قالوا انه هو هذا الشارع المكان اللي تبونه

الصراحه ماعجبنا وايد

وداع احلى من العقد

وهنيه عواش اعتذرت انه بترجع عشان بتخلص مشوار عندها قبل المطار

وسلمنا عليها وراحت

ونحن نمشي شفنا مطعم متخصص في البيتزا وكانت حلوه دعايته

مشيت مع قروبي وبعد شويه قلتلهم :

أشوف المكان ممل ومايشجع خلونا نرجع شارع أكسفورد أو نشوف مكان ثاني

قالوا : اوكي وهنيه ذكرت عواش

واتصل عليها واقولها اصبري نحن راجعين وياج

وفرحت برجعتنا ، وسرنا نركض ولقيناها تتريانا

كان يوم جميل كله ضحك ووناسه

شارع ريجنت

اتفقنا انه نسير وياها مشوارها في شارع ريجنت ودخلنا شارع فرعي اسمه

مشينا في هالشارع ، وعقب ماخلصت عواش حاجتها قررنا نسير نتغدى

وأختارتلنا عواش مطعم ناندوز

( هذا المطعم له فروع في لندن واحد منه موجود في مول ويستفيلد

قلتلها أوكي

هذا من المطاعم اللي حاطتنهم في بالي أجربهم

ومشينا مسافه لين وصلنا المطعم

موقعه ع النت

http://www.nandos.co.uk/

أكله حلو ويلسته حلوه وعليه أقبال

الوداع الثاني للغاليه أحلى من العقد

وعقب ماتغدينا هنيه عاد ودعتنا عواش لأنه خلاص لازم ترجع الفندق

يتريونها هناك عشان تطلع ع المطار

وفعلا زعلنا ع فراقها وكنا نتمنى لو يلسنا معاها كم يوم يوم جان

صدق استانسنا وياها

وعقب ماتغدينا طلعنا نتمشى بروحنا ونستكشف المنطقه

هذا نفس المحل اللي دخلته في جنوب فرنسا

(( للاسف في هاليوم نسيت كيمرت بنتي في المطعم وماتذكرناها الا ثاني يوم

ومارجعنا ندورها وبنتي غرمتني قيمتها

بتحرم تعطيني كيمرتها مره ثانيه

عشان جذي ماعندي صور وايد لهاليوم لأنه الكيمرا ضاعت بالصور اللي فيها ))

شارع أكسفورد

عقب طلعنا بالباص ع شارع أكسفورد ودخلنا بعض المحلات

وشافوا بناتي بريمارك وقالوا يبون يدخلونه

ودخلناه ولكن هنيه أنا حسيت بالتعب ومالي خلق حق التسوق من أول يوم

خليت البنات مع بنت عمي في بريمارك وقلتلهم

انا برجع الشقه خلاص مافيي حيل أبا أرتاح

وصار اللي ماتوقعته ...

حادثة الشقه

رجعت الشقه بروحي واول مافتحت باب الشقه فتح شويه بس وعلق

احاول ادزه وماشي فايده

خفت قلت يمكن حرامي داخل وهو ميود الباب

اتصلت في أخويه بس مارد

رجعت أدز الباب بكل قوتي وابدا مب راضي يفتح أكثر من هاي الفتحه الصغيره

عقب يتني فكره فقمت ودخلت ايدي ودخلت الاي فون

وشغلت الكاميره ويلست اشوف شو واللي ورا الباب

بس يبين انه ورا الباب فاضي

عقب اتصلت في ابوسامح وخبرته عن المشكله

(( ع فكره ابوسامح وايد تبرضلي كل ماأبا شي ولاما أعرف شي في

الشقه اتصله واغلب مشاكل الشقه حليتها وياه بالفون ))

بوسامح قاللي انا في البيت وبيتي بعيد بس اذا يحتاج الامر بآييج الحين
قلتله اصبر

في هاذيج الساعه أسمع صوت شباب خليجيين ينزلون من ع الدري

فقمت وناديتهم :

لوسمحتوا

ضربوا بريك وصدولي

قلتلهم : ممكن تساعدوني

ماوعيت الا اشوف جدامي 4 او 5 شباب خليجين من قطر والامارات والسعوديه

الظاهر واحد منهم ساكن مع أهله فوقنا وصادف هو وربعه طالعين

ومن حظي اني شفتهم

وسالوني شو مشكلتي ؟

خبرتهم مشكلة الباب

في البدايه دزوا الباب شراتي وانفتح شويه مب شراتي

المهم واحد دز الباب وحاول يدخل عمره من الفتحه وقدر يدخل

( الحمدالله الشقه كنا مرتبينها وتلمع قبل لانطلع )

تخيلوا شو كانت المشكله

كبت المطبخ اللي ورا الباب جزء من الخشب وهو غطا للجزء التحتي من ديكور الكبت

ماكان ملصق مجرد مساندينه ، وفجأه طاح ومسك الباب من ورا

ولما كنت أدزه كانت الخشبه ماسكتنه وهي ثابته من طرف الديكور

ولما الشباب دزوا الباب بقوه وانفتح شويه في هالوقت

انكسر الديكور الخشب اللي ماسك الخشبه

وعقب مادخل الريال شال القطعه وفتحلي الباب وقاللي تفضلي

كانوا جدا محترمين وماقصروا شبابنا

شكرتهم وايد والله يجزيهم خير ويحفظهم وين ماكانوا

عقب رجعوا البنات ويلست أخبرهم عن اللي صار

طبعا بوسامح سكرت عنه لما كلمت الشباب وعقب اتصلي وطمنته انه الامور تمام

واتصل أخويه وخبرته القصه

وعقب طلعنا وسرنا شقة أخويه وكانت عندهم يمعه كبيره حسينا كأنه في الامارات

لأنه في الفتره اللي كنا فيها هناك كانوا في عائلتين من أهلنا من

صوب بيت عمي موجودين

وتقريبا يوميا في آخر اليوم نتجمع عندهم وأحيانا نتعشى وياهم

وفي مره من المرات دخلنا عليهم وهو يالسين يخبزون خمير ( خبز اماراتي )

العيال حاطين الصوره في الانستغرام قمت وخذيتها عنهم

ومره كانوا يخبزون خبز رقاق

طبعا هاي بنت عمي الكبيره هي اللي متوليه هالسوالف

نحن شعب مانيوز أبدا عن أطباقنا وأطباعنا الحلوه

وانتهى هاليوم الجميل

تابعوني ...

أبن السلطنةمعجبون بهذا.

هداوه · 02-02-2015, 01:36 AM

اليوم الثاني في لندن

في السفر عموما أحب أصحى بدري ، واستمتع بالجو والطبيعه

وأستغل اليوم من بدايته

في هذا اليوم وكعادتي صحيت أول وحده والكل نايم

بديت أجهزلهم الريوق ووعيتهم عشان يتريقون

وسويتلهم ( بيض وطماط ) وفي ناس يسمونها شكشوكه

حادث صغير

وانا أجهز البيض والطماط ، بنت عمي كانت تجهز الشاي

وفتحت اللولب ( صنبور الماي ) ع الحار وبعدين سكرته بدون ماتعدل حرارة الماي

وييت أنا فتحت الماي وفي نفس الوقت حطيت ايدي

وينزل عليه ماي حار وأصرخ من الالم

ع طول وبدون تردد نشفت ايدي وكسرت بيضه ودهنت ببياض البيض وين الحرق

نصيحه

الله يبعد عنكم الحروق ، بس انا مجربه البيض وعلاجه سحري

لاتحطون ع المكان المحروق أي شي

لاثلج ولاماي بارد ولاكريم ولا أي شي بس بيض واتركوه لين ينشف

وبتحسون بالحراره شويه شويه تبرد

واتركوه فتره بعد ماينشف وعقب أغسلوا مكان الحرق

بتشوفون العجب

ماشي أي احمرار ولا انتفاخ ولا أي أثر للحرق

افطار نا

الجو

وبعد ماتريقنا شيكنا ع الجو ، وعملنا حسابنا في الملابس

الجو دافي

برنامج اليوم

اليوم لأنه الأحد ابتعدنا عن الاماكن السياحيه مثل المتاحف وغيرها

قلنا أكيد زحمه وأخترنا مكان شعبي قلنا نستكشف ونشوفه

وانطلقنا الى

كامدن داون

سرنا محطة الاندرجراوند ماربل آرش وخذينا الخط الحمر الى محطة

( سامحوني نسيت اسمها )

وعقب نزلنا وبدلنا القطار وخذينا الخط الأسود ( Northern )

الى كامدن تاون لاين 3

ملاحظه

في الاندر جراوند بتشوفون لوحات مكتوب عليها اسم المحطه

وشو هي المحطات اللي بتمرون عليها

وصلنا المنطقه المطلوبه وطلعنا نتمشى في المكان

جوله في شارع كامدن تاون

هو بعد شارع طويل وع الجانبين محلات

وأكثر المحلات تبيع تذكارات لندن وهاي بتحصلونها في وايد أماكن

وفي نهاية الشارع في أكشكاك ومطاعم وغيره

لابد لنا من هاي الوقفه

مبسوط وايد

يالا قام حظك حطيناك في المنتدى

كريب بشوكولاتة النوتيلا

قرمت منها وعقب تذكرتكم

نكمل جولتنا عقب ماجرجنا عمارنا

تشوفون هذا المبنى الزجاجي

هذا كله فيه ماكينات خياطه مال أول اللي عند امهاتنا

زوووم

هذا المحل الوحيد اللي عجبنا وفرحنا يوم شفناه وبقولكم ليش ؟

الله يسلمكم في الفتره اللي كنا فيها في لندن ورغم الجو البارد اللي عندهم

الا للاسف كانوا شالين كل اللبس الشتوي وبمنزلين اللبس الصيفي

وهذا عرفنا أمس لما لفينا شوي في شارع ريجنت وشارع أكسفورد

لأنه كنا ندور بالطوات اللي يايبينه مب كفايه

ولما شفنا هالمحل فرحنا فيه وتشرينا منه ، ولكن عقب فتره لما سرنا
الاوت ليت طحنا ع بالطوات حلوه وأرقى

واشترينا منهم

للاسف لليوم الثاني مانتوفق باختيار المكان ولعدة أسباب :

* الجو وايد بارد والمكان مفتوح

* ماعجبتني المحلات اللي فيه

* مافيه شي غير محلات ومطاعم بعد ماعجبتني

مشينا وايد وتوقفوا العيال يتشرون

(طبعا عيالي من أي مكان يتشرون المهم يتشرون )

وانا كنت اوقف برع المحل أترياهم وفي الأخير مليت وهم بعد ماعجبهم

ونحن نمشي في هالمكان شفت مطعم كبير ( فيش أند شيبس )

وقلتلهم خاطري أجربه ، وياريت ماجربناه

أكله ابدا مب حلو

موقعهم ع النت

http://www.londonfish-chips.com/pro_lfc/frontend_en/menu.php#

خروجنا من الكامدن تاون

بعد ماكلينا رجعنا لمحطة القطار

طلعنا من منطقة كامدن تاون ورجعنا فريجنا وكملنا باقي اليوم

في الشقه

وزيارة قوم أخويه

وختمناها بسندويشات من ماروش

وانتهى هذا اليوم الجميل

كل يوم أعتبره جميل في لندن حتى لو ماتوفقنا في اختيار المكان

كم يسوى لمتنا مع بعض

وضحكنا وسوالفنا

والمشي والبروده وكل شي حلو

رأي الشخصي في كامدن تاون

ما أنصح فيها

بالنسبه للتنقل بالقطار ( الاندرجراوند )

تراه وايد سهل وأمان والشرطه منتشرين في كل مكان

ولا مره والحمدالله صادفنا أي شي زعجنا

والناس وايد متعاونه ومرحبانيه

واول يومين للي مايعرف استخدامه بيتعب شوي وعقب بيشوف

الموضوع وايد سهل

من أول يوم عطيت بناتي الخريطه وعلمتهم كيف نسير وكيف ناخذ الخطوط

لو لاسمح الله لو وحده منهم ضاعت تعرف كيف ترجع

وكل وحده تذكرتها في شنطتها

وبعد يومين صرت أعتمد عليهم

في البدايه كنت أقولهم وين بنسير وأي محطه نباها

وعقب قمت اترك القياده لهم ، مع متابعتي لهم

والحمدالله صاروا أفضل عني

خصوصا اللغه عندهم ممتازه

الله يحفظهم ويباركلي فيهم

تابعوني

أبن السلطنةمعجبون بهذا.

فيصل · 02-02-2015, 04:12 AM

شكرا علي اعاده التقرير
الشقق مشكله وحقيقه السمسارين ما تضمنهم للأسف
يمكن من أكثر البلدان تخوف بحجز الشقق دون سمسار هي لندن
الكامدن رااائع أذكر كم مره تمشيت فيه حلو وفيه مطعم مغربي مكانه بعد المطاعم اللي تأخذ الأكل وتجلس علي الدباب ( الدراجه الهوائيه ) يكون هو يسار

سوسو الصغيرة · 02-02-2015, 10:16 AM

مشكورة ام عيسى على إعادة التقرير
يعطيج العافية

هداوه · 02-02-2015, 12:14 PM

اقتباس:
المشاركة الأصلية كتبت بواسطة فيصل
شكرا علي اعاده التقرير

الشقق مشكله وحقيقه السمسارين ما تضمنهم للأسف
يمكن من أكثر البلدان تخوف بحجز الشقق دون سمسار هي لندن
الكامدن رااائع أذكر كم مره تمشيت فيه حلو وفيه مطعم مغربي مكانه بعد المطاعم اللي تأخذ الأكل وتجلس علي الدباب ( الدراجه الهوائيه ) يكون هو يسار

فعلا سماسرة لندن بالذات وشققهم اعتبر التعامل معاهم مغامره ولازم الواحد يسكن في فندق اول يومين وهناك يدور الشقه المناسبه من هاذيل السماسره او الافضل يسكن في شقق فندقيه أأمن واضمن

اقتباس:
المشاركة الأصلية كتبت بواسطة سوسو الصغيرة
مشكورة ام عيسى على إعادة التقرير
يعطيج العافية

الله يعافيج ياسوسو
وعفوا حبيبتي
لابد من اعادة هذا التقرير اول شي عشان فيه وايد معلومات وصور وثاني شي عشان اضمه في الموسوعه بس المشكله بيحتاج مني وقت هالنقل لانه وايد ولانه بعض الاجزاء بضطر انزل الصور فيهم مره ثانيه

Azzam · 02-02-2015, 12:28 PM

بارك الله فيك يا ام عيسى تقرير مهم جدا لكل سائح

شكرا لكي من القلب

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي 5 نجوم الى زيزا يونيو و يوليو 2013	himzmz	بوابة ماليزيا	56	25-08-2018 09:55 AM
كامــــيرون هايـــــلاند ..* هولنـــدا الشـرق *.. هكذا أسميـــها ( رحلتي في آب 2013 )	A.Alsubhi	ماليزيا	17	19-08-2015 08:53 AM
رحلتي الى سيريلانكا ( ديسمبر 2013) ملاحظات ونصائح	الإماراتي	بوابة الهند وسيرلانكا	14	15-04-2015 11:39 AM