|
بالتوفيق ورحلة سعيدة تروح وترجع بالسلامة |
السلام عليكم ايها العرب الجميلين المتناثرين في مدن الخليج الجميله كاللآلي في سماء الاوطان >>> شاعرية :24: من هنا من سمرقند اليوم الاثنين يحييكم ابولجين فهدوف عندي صور كثيره ولكن كالعاده مااعرف ارفعها مع اني ابحاول اذا رجعت ان شالله … من اللابتوب اكثر اريحيه من الايفون انطباعات عامه : - المطار بسيط وشويات وانت معدي الجوازات والصاله فيها كل شي - شركة تكاسي آمنه خصوصا اذا نزلت البلد اخر الليل .. بعشره دولار - نفس الشركه يبيعونك شريحه افضل الشركات هنا وهي ucell .. مع باقه 14 قيقا بعشره دولار ايضا - في صاله المطار اجهزه ذاتيه تضع فلوسك اللي معك تختار العمله والمبلغ ثم تودعه ويطلع لك الجهاز سوم اوزبكي الميه دولار = مليون وخمسه الاف ههههه وووااااو مبلغ والفنادق يصرفون لك الميه دولار مليون وخمسين الف - الشعب ودود بشكل ملحوظ ليس حالات فرديه - الشعب مسلم لكن مافيه مساجد وقوقل يعطيك المساجد 3 و 4 كيلو تباعدها عن بعض .. بلد مسلم الاذان مااا تسمعه للاسف / - الطعام متنوع واسعاره جدا جدا معقوله وممكن نقول بشكل عام رخيصه - المواصلات في طشقند متنوعه ورخيصه من دولار واقل عندهم تطبيق اسمه yandex go مثل اوبر تدلع بس .. - المشي ليلا ااامن جدا ماخليت شارع مامشيت فيه بحكم اني كائن يعيش ويترعرع في الجو البارد … :24: - البازار في طشقند ( سياحة لحاله) سوق خضار ومطاعم شراء مفتوحه وسوق شعبي واكلات مختلفه وعروض بهلوانيه وانواع المخبوزات .. خبز مزخرف وصحون من خبز وانواع التشكيلات …. تندهش من جد من روعه المكان وماحوله ( ثقافه شعبيه مختلفه) موقف لطيف : * فيه عجوز اجوديه من ملامحها مثل اللي نشوفهن بمكة ….كلمتني اوزبكي مارديت قلبت روسي ماضبطت قالت عربستان قلت وصلتي :24: وهي تطلع مصحفها قالت قران كريم وثلاثون اربعون ( الاعداد بالعربي )مع ابتسامه ظافره …. قلت ابولجين ابوها …. والله ما ارد هقوتك والخساره خبزه ..جيبيها.. ( وشريت خبز نصف قطره 30سم هههههههه .. هي انبسطت وانا انبسطت والخبزه انبسطت وسليم الله يسلم / المولات والتسوق في طشقند ليس هناك انخفاض في الاسعار قياسا لمولات الخليج ( اقصد المولات وليس الاسواق الشعبيه) وللحديث بقيه عن مطاعم طشقند الجميله وتجربتي في المطعم المطل على النهر وحكاوي الشرق كونوا قريبين |
عذرا الرد الطويل اعلاه ممكن بعض اجزائه مكرره .. تلخبط شوي وعدلت فيه ( من الايفون الكتابه مزعجه) |
جهز نفسك لصعوبه حقيقيه في اللغه الانجليزيه لايتكلمها احد ابدا الا نادر تلقاه حتى في المطاعم الجيده مااا تلاقي واحد يتكلم انجليزي لكن جوجل والصور ماخلت شي .. واذا مره تشابكت الامور استخدم المترجم / المحلات والمولات والللافتات كل شي بلغتهم |
ياهلا فهدوف ... الحمد لله على السلامة أهم شي أكلت لحم الحصان ولا لسا ؟ |
المصداقيه والمرجله ( حكايات عريبيا ) سكنت لي بفندق وتهاوشت مع موظفهم ..سي بشكل غريب تعامل ببرود كالروسيين .. ورفض يغير الغرفه .. والصوت ازعاج .. المهم قلت لاطلعت ابكتب تعليق في بوكنق وسيكون هو الوحيد بالعربي ابنصح العرب مايجون … والتعليق العربي يغير وجهة نظر الياحث عن الفندق خصوصا لاصار مافيه تعليقات عربيه كثير ( المهم …..اصبحنا ) وجاء شايب وقور يوم شافني جاء وسلم قال عربستان قلت نعم ويهلي ويرحب وينادي موظف الرسبشن ( غير السيء) حتى يترجم لي للانجليزيه وان الشايب هو صاحب الفندق وانه يرحب واعطاني سجاده وطاقيه :14: ووش تبي بس .. ويوريني نسخ للقران بالعربي والترجمه للروسي وللغتهم و و و يتحفى الرجل .. ومن ضمن سوالفنا طلب ان اكتب تعليق جيد في بوكنج واليوم يوم مشيت طلع يودعني ويقول لارجعت طشقند اسكن عندنا ( منها طيب اخلاق وتسويق لفندقه ) هنا وقعت بين المرجله ( الرجل يتحفى بي بشكل خاص) وبين مصداقيتي اللتي اعمل بها دائما خصوصا في تعليقات بوكنج لانها تعتبر شهاده يستفيد منها للناس والحقيقه اني ومن باب ( الطناخه البحته ) ابكتب ان الفندق احسن فندق بالعالم وابغمض عن الازعاج وعن تعامل الموظف :24: / وضعت القوانين لتُخرق … وسليم الله يسلم / |
اقتباس:
|
معلومات سياحيه سريعه : - اذا خرجت من الفندق لازم تاخذ مشهد بالايام اللي قضيتها وهكذا في كل فندق تسكن فيه … لان بالمطار عند للمغادره سيسالونك وين قضيت مدة العشرة ايام مثلا .. فلازم تعطيهم مشاهد الفنادق = عشر ليالي سكن !!! اجراء غريب … حسب ماقرات في الانترنت من تجارب المسافرين ان حاله التدقيق هذه حدثت للكثير منهم !!! / تويـــتر محظووووور تماما في شبكه الانترنت لديهم وكذلك التيك توك ( شعب محافظ ماشالله ) ادركوا خطر هذه التطبيقات على المراهقين |
عربستااااان معروفين انهم يحبون العرب ويرحبون فيهم وايد ويقدرونهم هذا اللي اسمعه من اللي يسافرون لها حرام الشايب يبي يرقع حق الموظف ما ينلام حلاله الانطباع وايد حلو من كلامك ناطرين بعدين الصور ان شاء الله |
الله يعطيك العافية يابولجين على هاليوميات المميزة من شخص مميز ..:63: والحمد لله على سلامة الوصول .. و يومياتك جميلة جدا .. ولكن ما جبت سيرة دخولك للكويت و المغادره .. نبي التفاصيل الله يرضى عليك .. و مستمتعين معك في هالتقرير الجميل للاخر يابولجين .. و بالنسبة للفندق من وجهة نظري انه الواجب تكتب كل شي بصراحة تامة .. خل غيرك يستفيد و تتكون عنده خلفية سليمة عن الفندق مثل ما تستفيد انت من تعليقات غيرك .. وبكل صراحة وتجرد من المشاعر ..:63: |
بلغت صاحب الفندق عن ملاحظاتك عالموظف السيء ؟ وشنو كان رد فعله ؟ |
اقتباس:
والله الانطباع الاولي عن البلد جميل جدا ولازالت نظرتهم نقيه عن العرب … الصور بحاول انزلها اذا رجعت ان شالله |
اقتباس:
والله دخول الكويت كان صباح الجمعه والمنفذ كان غير مزدحم عديت البوابه الاوليه بهدوء وفي الثانيه رحعوني بمكتب الصحة ودخلت عليهم .. قال الموظف عبيت النموذج قلت لا قال رح خذه من المكتب اللي جنبنا .. رحنا للبركس المجاور مجموعه اشخاص واذا فيه نموذج على الطاولات ( معلومات الحجر المنزلي للقادمين ) !!!!!!!!! تعقدت صراحه توقعت ان الكويت رجعوا سالفه الحجر .. اخذته دون مااعبيه ورجعت للموظف قلت يارجل انا ماني مقيم بالكويت الظهر بالمطار .. قال بآليه عب النموذج ووقعه.. خربت.. كتبت رقم جوالي تحت واسمي رباعي وتوقيعي وعطيته اياه فاضي وانا اتوقع يرجعوني . اخذه وطلب المسحة عطيته التقرير .. دبسه وحطه على مكتبه وعطاني ورقه للدخول ؟!!!! طبعا مايرد … قلت صور الpcrv وعطني اياها احتاجها نظر ببرود وفكها من الدبوس وعطاني الاصل ههههههه ولاصورها ودخلت الكويت … |
الله يحييك مغامرنا البطل .. و الحمد لله على التساهيل .. متابعين معك بكل شوق يابولجين للاخر ..:69: |
بدأت اخبار كورونا تصبح مزعجة قليلا … الله ييسر الامور … وعسا الكويت مايعلقون الرحلات القادمه تطور الامور بسرعه …. القاعدة رقم سبعة ( لاتسافر اثناء كورونا ومتحوراته) القاعده رقم سته ( لاتسافر قبل مااا اشوفك ) >> هذي اغنيه لفرقه الامارات :32: |
بالفعل السفر خلال كورونا مقلق الاشتراطات تتغير باستمرار القاعدة رقم 8 اذا لقيت شي في طريقك وأعجبك شله مثل حضرمي :1: |
الاخوة اللي بيسافرون اثناء كورونا- الله لايعيد كورونا - يجب ان تعمل البي سي ار قبل سفرك بوقت كافي .. لايوجد مختبرات سريعه هنا .. اقل ماوجدته النتيجه يعد 8 ساعات وفي سمرقند لو تاخرت بالنهار عااادي يقولك بكره الساعه 5 عصرا …. . والسعر 22 دولار حوالي 80 ريال * |
السلام عليكم و رحمة الله و بركاته ... متابع بصمت هكرنا جوال أبو لجين و طلنا منه هالصورة مأخذها ذكريات في سمرقند https://www.albayan.ae/polopoly_fs/1...mage/image.jpg |
🤣🤣🤣🤣🤣🤣🤣🤣 بدعت بومعتز |
اقتباس:
هههههههههههه |
اقتباس:
اهلا ابومعتز اهلا بالرفاااااق والله على قولتك من كثر مادخلت متاحف واضرحه لو تناديني ( تيمور ) قلت لك سم :14: دخلت ضريح بيبي خانوم وحزنت ( دخلت الجو) ياولد ههههه ==== فيه سالفه تضحك .. ( حقيقيه ) لقيتها مكتوبة .. يقولك الحاكم العثماني ارسل لتيمورلنك رساله غاضبه يقول فيها : علي الطلاق من حريمي اني ( لأقتلك ان غزوتنا ) و ( لعنة الله عليك وعلى اتباعك ليوم الدين ) … قادح التركي :1: / المهم الخواجه تيمور ماعنده وقت … يوم جته الرساله ويشلع من سمرقند ويطبح بتركيا ويجتاحها وياخذ الخليفه العثماني معه ( اسير ) ولاااا ها مدبره على التركي الحكم راح والحريم تطلقت المهم مات رحمه الله بالأسر بعد سته اشهر عند تيمور لاعادت هكالرساله :17: |
اقتباس:
|
اقتباس:
يا هلا بالخواجة أبو لجين .. قصدي تيمور :32::32::32::32: أجل الخواجه تيمور طلع قادح ما ينتحارش أبد |
اقتباس:
|
اقتباس:
|
راح تيمور لنك من چيس اهله |
ماشاء الله |
اقتباس:
|
الكويت والهندية الصارمه ( حكايه من الادب النكباني ) -1 الحلقات الاخيرة من تقرير اوزباكسان ديسمبر 2021 :17: :::: مطار طشقند الدولي .. (حمدت الله على نعمة دول الخليج ) وانا انظر للفوضى في المطار الناس مكدسه ولا طوابير ولايحزنون والموظفين والله مادروا وقفنا بسراء طويل والحقيقه ان له عده روافد من كل جهه يدخل 300 شخص المهم وصلنا وراحت الشنطه .. مريت بعسكري وسألني معك دولارات قلت ( ميبي ) بلعانه لانها طاقه الكبد قال ( ميبي !!.. واشار بيده رح ) اثره خابر بلا:17: عديته وانا شاك بالموضوع ..نظرته بها تشفي مااعجبتني .. سألت شخص اخر قلت فيه ( بنك ) بعد هالنقطه قال لا ( ابك ابك ابك ) ههههههههه اثر الاوزبكي خابر بلا وكان بينصحني اغير عمله لكني قبست به رجعت قبل الجوازات ورحت للبنك قالت الموظفة (وين الايصال) اللي غيرت به عمله اول ماجيت قلت مامعي ايصال قالت ( والله ماتشد ولا دولار الا بايصال ) (اغرب الانظمه في العالم ) ؟؟!!! قلت هي متساويه يافلانه وفرقاكم عيد والسوم اللي معي اشري فيه من السوق الحره * المعلومه هنا : احفظ ايصال الصرف اللي تغير به عمله اول ماتجي حتى ماتبلش بقروشهم الخبله المهم 2- احسن النيه بالعسكري اللي يقول معك بلهجه دفشه ( سير يو هاف دولارز) ان مالقيت عسكري يسألك لاتدقق اقفز الخطوة 2 :17: |
الكويت والهندية الصارمه ( حكايه من الادب النكباني ) -2 الحلقات الاخيرة من تقرير اوزباكسان ديسمبر 2021 :17: وصلت الرحله مطار الكويت .. الامور هادئه .. النازلين للكويت 4 اشخاص بقيه المسافرين صرفوهم ترانزيت / وقفنا انا وسعودي واحد ..طلع ورقه واعطاها الموظفه ومشى .. وصلت الهنديه " صارمه الملامح " اعطيتها الـ pcr قالت ابي اشوف توكلنا افتحه !!!!!! قفزت هالنقطه وكأني ماادري وش تقول ( ذهانه استراتيجيه مانفعت ) ذس pcr قالت ادري ابي ( توكلنا ) او ورقه مطبوعه من توكلنا .. او صورة للشاشه !!! / ( بديت احس اني بلشت ) جوالي مايشتغل هنا وتوكلنا لازم له رمز قفل .. قالت مافيه ماوالله تعداني :17: عندكم حل لمثل هالحالات والناقل الجوي ماكتب هالكلام في صفحته و و و ( والاخت ماتهزهزت) .. قلت ابي المدير هنا ( الى الان مسوي فيها ثابت وانا صراحه قلق جدا ) ادري ان مافيها قطع روس بس دريت انهم بيرزعوني كم ساعه بالمطار واببلش ..الساعه الان 4 فجرا وانا مواصل وابي الطلعه بس قالت بنفاذ صبر : انا المديره هنا مافيه احد غيري .. رحت لموظفين الجوازات لعل عندهم حل ..يالربع السالفه كذا وكذا قالوا والله هذي مشرفه الصحه ومستحيل انها تطلعك لان النظام مشدد قال واحد طيب افتح جوالك .. قلت ماااش ماهو معمم قال افتحه لعلها تفرج .. ركبت الشريحه وانا ميأس .. وووووااااااو .. انهالت الرسائل الراجحي والاهلي و و و ورساله ( الفرج ) ( توكلنا ) ... الحمد لله وانا ادخل الرقم ويفتح توكلنا وعلى هنديتي مشي اشبه بالركض وريتها توكلنا واعطتني الورقه وهي تقول ( الفكه من هالمسافر البلشه) وانطلقت راجع للجوازات وختموا جوازي وانعتقت من الهنديه / طلعت من المطار وكنت ( مسافر ذكي ) محمل خرائط قوقل اوفلاين ( للكويت ) .. اضغط الجوال وترفض تفتح ههههههههههه :17: توكلت على الله وسريت .. مريت مسجد وصليت الفجر والجو ثلج وعلى اللوحات ( الجهراء ) و ( الطرق السريعه بالكويت رايقه ) تساعد على الممشى .. المهم يبو الحبّيب جاز الخط ومريت مخرج الرقعي مشووت طبلوني :e42e: شوي وحسيت اني تعديت اللفه .. من الحماس .. سألت احد الاخوة يالبناخي .. وين خط المنفذ ( السالمي) قال متعديه الله يجزاك خير .. ارجع .. وارجع اعد الكباري ( بدون قوقل الحياة ولا بقرش ) المعــــــــــــــــــــــــــــــلومه هنا : في وقت كورونا الله لايعيده .. خذ حذرك لكل شي وخذ بي سي ار وصورة من توكلنا ( الجواز الصحي) باللغه الانجليزيه ومقبول لدى دول الخليج التي يكون الترانيت فيها غالبا ..خذ احتياطاتك واقرا كل التفاصيل في صفحه الناقل الجوي حتى ماتتوهق 2- اذا مسكت خط سريع لاتشغل شي حماسي تراك بتعدا اللفه :7: 3- لاتثق بخرائط قوقل الاوف لاين والا جهز نفسك تعد الكباري عند مخيمات اهل الجهراء ههههههههه ::::: وانتهت حكايتنا بكوكب اوزباكستان في رحله سريعه لطيفه حشرتنا فيها المدارس والدوامات .. والحمد لله رب العالمين |
نفس الشي بالنسبه للعمله صار في مطار تونس بس كانت العكس لازم ما اطلع من تونس ومعاي عملتهم واشوه اني كنت حافظه الايصال |
اقتباس:
اهلا ضفهد .. تيسرت ابشرك والصبح ومحدثك جاي مشوت باتجاه الحفر ويدعي على ساهر :14: |
اقتباس:
غريبه هالانظمه بصراحه .. وتونس طلعت اغرب من ربعي ذولي يعني وش باستفيد من عملتهم اذا طلعت بها من تونس ؟!! مافيه مبرر منطقي ..حتى للحمايه من التزوير ماهو مبرر .. عموما الفكره في هالبلدان ان اي ايصال احفظه بالشنطه معك لين تغادر يمكن باي لحظه يطلبونه .. من انظمه اوزباكستان كلما طلعت من فندق ( يعطيك وصل ) به باركود سكن لدينا من ...... الى ....... احيانا يطلبونه بالجوازات ولو كان مامعك للفتره كلها يبهذولنك !!! \ عش وتشوف تحياتي لك |
صباح الخير فهدوف ..... كيف كذا ؟ انهيت التقرير من دون تفاصيل وأنت تقول أبي ابلشكم بالتفاصيل؟ حتى ما ندري أكلت لحم حصان أو لأ ؟ كنت أبي أسألك على الخاص عن طعم ومفعول لحم الحصان إن كان أكلته ، لكن قلت فهدوف رجل على الفطره ما تفرق معه خاص أو عام وفي النهاية بيجلع عن مقفاي هنا قدام الخلق :10:... علشان كذا يابن آخي سألتك هنا بموضوعك . |
اقتباس:
اهلا وسهلا ... والله ياااخي سالم اني اكتب بكثره هنا وانا اقول لنفسي ( اني كثرت التفاصيل عليكم ) ... اما لحم الحصان فما انتبهت لسوالك والله والحقيقه اني مااكلته مع انه يباع في البازار ومنتشر عندهم لكن سبحان الله ممكن تقبل اي اكله ( غريبه شوي ) في الدول التي تزورها ان كانت خضار او معجنات وحول كذا .. لكن اللحوم ماااااش .. عجزت .. لذلك قلبتها هناك ( بلوف) مع لحم غنم (البلوف اكله شهيره لديهم تشبه الكبسه عندنا بالضبط ) |
عموما الحمد لله على سلامتك وننتظر منك صور متى ما فضيت . |
الحمد لله على السلامة والتياسير ابو لجين .. الغريب ان ما معك نسخة من التطعيمات . والاغرب ان قوقل ماب ما اشتغل اوف لاين .. وانا دائما بكل سفراتي استخدمه .. تسلم حبيبنا على هالمعلومات الجميلة عن اوزبكستان .. و عندي سؤال لو تكرمت يابولجين .. ما هو افضل شي حصلته عندهم .. و هل تعتقد انك راح تسافر لها مرة اخرى .. |
و كيف امان مواقف السيارات في الكويت .. وهل هي مضلله .. يعني لو سيارتك غاليه توقفها فيه .. لانه بيني وبينك لو بغيت اضرب هالمشوار للكويت لازم اروح بسيارة مريحه .. |
اقتباس:
معي طال عمرك صوره من الجواز الصحي عند المغادره ويوم شفت ما احد طلبه ووصلت طشقند واشقق الاوراق ( الجواز الصحي والبي سي ار وحجز الفندق وتذكره الكويت دبي ) :1: اما الاوفلاين فيمكن لحقته القراده .. انا داخل بواسطته اول .. ويوم فتحته امس واذا به يطلب ( تحديث) .. حاله هههههه - افضل ماحصلته ( التاريخ) للامانه .. المتاحف والمباني هذه الصفه الغالبه للبلد.. ثم الامان التام.. ثم رخص الاسعار ..تشعر انك تمشيت بوجهة مدهشه وجديده بميزانيه معقوله جدا . - والحقيقه لا اعتقد انني سازور البلد مره اخرى لانها تفتقد الى جمال الطبيعه اللي يجعلك تزور البلد مرات متعدده كاندونيسيا مثلا او ارياف اوربا . وشي اخر حاجز اللغه الرهيب بيننا ..واخيرا هناك وجهات اسميها وجهات يتيمه ( وشلون ؟! ) ؟! وهي البلاد التي يكفيك في حياتك الاطلاع عليها دون ان تجذبك لزيارتها مره اخرى لان بنفس الميزانيه التي تستفر لها يمكنك الذهاب لوجهة اخرى ومتعه جديده .. ومن هالبلدان اذربيجان مثلا واوزبكستان ورومانيا ومصر عربيا :1: وفي الاخير هي وجهات نظر قد نختلف حولها |
مواقف الكويت مضلله وامنة ( داخل المطار ) ولما تقول داخل المطار فهو آمن مكان بالعالم :24: / اليوم بدينارين 25 ريال سعودي \ حسب موقعك بالسعوديه يتحدد من وين بتسافر انا اخترت الكويت لان وقت رحلتي مافيه رحلات لطشقند من الرياض الا بترانزيت ساعات طويله الى عشرين ساعه واكثر ( شي مزعج ) لذلك كان الاختيار للكويت ::: رحلتي كلها ثمان ايام فتخيل اروح عبر دبي يوم رايح و28 ساعه راجع حكااااااايه:24: |
| الساعة الآن 11:32 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO