شبكة و منتديات العرب المسافرون - تفاصيل رحلتي العائلة الى جورجيا مايو 2022

اليوم الخامس 5 مايو

كوتايسي

طبعا ببدأ كلامي عن السكن ولو ماشفت في كوتايسي الا العم زازا صاحب الفندق لكفاني :e022::e022::e022:

HOTEL HARMONY

السكن عبارة عن بيت عائلي حوله السيد زازا المالك له الى فندق وشغال
حاليا على توسعته ..
السعر لغرفتين ليلتين 550 ريال ( 420 لاري )
يعني سعر الفرفة الوحدة ليلة وحدة 138 ريال
انا لو يحصل لي افطر عندهم بس ب 138 ريال قلت موافق موافق موافق ..:3:
نرجع للعم زازا حنون لدرجة تحس انك ساكن عند اهلك ..
تشتغل برا وراجع الديره ساكن عن اهلك وفرحانين بوجودك , خدوم نصوح كريم ..
بقولكم موقفين صارو لي معه الاول كان عندي ملابس تحتاج غسيل وسألته اذا فيه
مغسلة قريبة حولنا قالي عطني اياهم انا ارتبك عطيتهم اياه وعند استلامهم اسأله
كم المبلغ مارضى ياخذ مني ولا ريال واجلس معه في حلفان ومو راضي في الاخير قالي
خلاص عطهم بنتك الصغيره اعتبرهم هدية مني ..
الموقف الثاني وقت الفطور طبعا الفطور الغرفه الوحده تقريبا 15 لاري وهو مو بوفيه لا هم
يجهزون لك اطباق وياخي نفس اللي تطبخ شقولكم مو ط ب ي ع ي ة اللذاذاه ..
ولا كل ناس يسون لهم اطباق مختلفه حسب جنسيتهم يعني صادفت انا سكان من
الجنسية الهندية وناس اوربين فطورهم في اختلاف عنا كأنهم عارفين كل شعب وش يفطر ..
تخيلو واقف طول الصبح بس شغلته يشيل الصحن الفاضي ويجيب لك طبق جديد ياعم خلاص
لاتجيب شي شبعنا يقول لا اكلو وراكم مشاوير وخلاص لا تتغدون :14:
ويختمها لك بفاكهه وحلويات ..

السكن مريح و مليان حب , غير غرف النوم فيه صالة في نفس الدور بين الغرف فيها كنب
وطاولة ممكن تستغلونها مثلنا تتعشون او تتقهون فيها ..

خلصت غزل في زازا ادخل لكم في الفعاليات ..

طبعا انا على الرغم من اني مبسوط من رحلتي بس مع الاسف خربت علي شوي الاجواء
كان هاليوم ماطر بعنف :4:
كنت مجهز جدول فعاليات بطلة لكن مع الاسف بعض كان مسكر بسبب الامطار ..
بعد الفطور جلست اسولف مع زاز وان جدولي اني اروح نهر مارتفيلي قريت عنه وشفت
له صور جدا بطلة تنصحكم فيه قالي هالاوقات مع المطر ترا يسكر ..

قلت له طيب وكهف بروميثيوس قالي مفتوح لانه مو مكشوف وفعلا توجهت والوصول له سهل
بس اكتب في الخرايط قوقل يطلع ..
يبعد تقريبا نص ساعه ومفتوح طول ايام الاسبوع عدا يوم الاثنين حطو هالشي في حسباباتكم ..
رسوم الدخول للكهف للشخص 25 لاري ~
طول الكهف تقريبا 11 كيلو تدخلونه كقروب مع مرشده تتكلم الانجليزية والروسية ..
في نهاية الطريق راح يسون عرض ضوئي جميل ..
عندهم جولة بالقارب لكن بعد مع الاسف وقتي كان مسكرين الجوله بسبب المطر ..

في نهاية الجولة طبعا تطلع من بوابة ثانية تركب باص يرجعك للبوابة اللي دخلت منها ..

وانا انتظار الباص ونصور وكذا تعرفت على قروب عرب جاين من دبي وعندهم مكتب سياحي
وجاين يكتشفون المكان علشان بينضمون شكلهم جوالات سياحية ورحلات مع السوالف معهم
قالو لي انهم بيروح نهر مارتفيلي اللي قلت لكم عنه ان العم زاز قالي هالوقت مقفل شجعوني
قلت اجل انا خويكم بلحقكم ..

وفعلا حطيت العم قوقل على الموقع ( أخدود أو نهر مارتفيلي ) وانطلقت المسافه تقريبا 45 د
بعد الوصول لنقطة تجمع هناك فعلا حصلته مسكر لكن فيه شباب من اهل المنطقة واقفين
وعندهم سيارات دفع رباعي يعرضون عليك ياخذونك في جولة في بعض المناطق في النهر
مو كلها هو عبارة تقريبا عن 8 مناطق يقولك بسبب الامطار اقدر اخذك 4 اماكن ..

انا بالنسبة لي كنت مشيك على الطقس لليوم الثاني كان برضو مطر ..

فقلت انك تزور 4 اماكن احسن من ولاشي :3:

قلت له اوك وانا عندي مبدأ في الحياه والسفر على وجه الخصوص ربي ارزقني وارزق مني ..

طالما هو بيقدم لي خدمة ماحب اني اوقف في السعر على الحبة قالي باخذك الجولة هذي

ب 300 لاري قلت له اوك بتسألوني هل يسوى بقولكم لو كل المناطق مفتوحه ومافي مطر

يسوى ونص المكان جنة ..

بس في وضعي اللي رحت فيه اقولكم حده اذا بتكرمونه 200 لاري ..

طبعا ركبنا معه في سيارته وانطلقنا بين الجبال والخضار والشلالات تشوف الشلالات الصغيره

تمشي تحت السيارة والطبيعه الخلابه سبحانك ربي ..

الى وصلنا لمنطقة لازم ننزل نمشي برجولونا عبرنا جسر متجهين لشلال كبييررررر

تدفقه يروق راسك الصوت ياخي الصوت بس راحه نفسية ..

وطبعا لازم تعبر جريان النهر مشي برجولك علشان نكون قريب منه ..

واعتقد في الصيف الناس تسبح هناك .. :e348:

اضطرينا الله يكرمكم نفسخ جزمنا ونمشي الموية ثلججججج :yolks00780:

ومع كذا جميل بس والله لو رايح في الصيف مايكفيني فيه 6 ساعات ..

كان فيه هناك عشه صغيره لعجيز ينقال انه كافتيريا من شافتنا مقبلين ياحليلها وهي

ناشبة الا تاخذون مني , تبون خاشبوري ..

الخاشبوري اكله مشهوره عندهم ورخيصه ب 3 لاري تقريبا ومتوفره في كل مكان
بس ماذقت مثل لذذتها عند هالعجيز :3:

قلت لها طيب خلاص جهزي لنا اثنين و5 كوفي وبنرجع لك قلت على الاقل شي يدفي
لان كان برد برد اتعب اقول برد ..

بعد ماخلصنا الجولة رجعنا لها ياحليلها مجهزة لنا السفره وفارشه قماش وحاطة طقم اكواب مشجر

وحاطين السكين والشوكه ومجتهده الله يطول عمرها ..

جيت ىحاسبها ينقال اني بكرمها عطيتها 50 لاري قلت حساب سريع سعر الخاشبوري 5 الاثنين 10
والكوفي الواحد 5 وحنا طالبين 6 مع المرشد حقنا 30 لاري وهذي اسعار البلد الطبعيه :14:

الا توريني الدفتر محسبتهم وجامعتهم طلعت تلحقني ب 25 زيادة يعني حسابنا 75 لاري ههههههه

اكثر ناس متحيلين عندهم العواجيز :14:

قلت بشري والله على هالتجهيز تستاهلين سمي ..

وطبعا ذاك الوقت ماكان في اقبال بسبب الامطار كنا حنا بس وفي قروب شباب سعودين او خليجيين

بعدها خذنا لشلالات نياجرا الجورجية على قولته حقتهم تبعد تقريبا 10 د ..

وكان باقي مكان بعد بس العيال خلاص ثلجو واستسلمو قالو نبي نرجع خلاص ولان المطر مازال مستمر ..

وغير كذا المدام احترقت شاشة جوالها بسبب المطر وعاد خلاص تعررفون اهم شي الجوال :25:

مافي جوال كنسل يامدير :e201:

وقلت له خلاص رجعنا واخذت السيارة ونشغل لهم المكيف الحار ونرجع الديرة ..

اخذت لفه ادور محل يصلح جوالات وفعلا حصلت محل بس كان نهاية الدوام حقهم الساعة

10 تقريبا وبيسكر والتفاهم معه بقوقل مايعرف لاعربي ولا انجليزي وركب الشاشه فعلا

وجا بيسكرها طلعت ماتضبط لانه اعتقد في اختلاف بسيط في الاشاشات في مكان البلوط
او شي زي كذا وانا مافهم في الجوالات قلت له طيب اجيك بكرا وتجيب لي قالي اي اوك وهو مكانه
قريب من سكنا يبعد تقريبا 10 د او اقل وبحط لكم الموقع وصورته ’ لاني لاحظتهم يشتغلون
بضمه وضمير ومصداقيه .. ويهتمون بالتفاصيل مايشتغل لك شغل تلفيق ..

المهم بعدها خلاص رجعنا السكن قلت نغير ملابسنا ونطلع نتعشى بس الربع خلاص تعبو مافيهم حيل طلعه ..

وكنا شايفين مطعم ماك في الطريق قالو بس جب لنا من ماك مو طالعين ..

طلعت لحالي ورحت ماك عندهم وجبات تختلف عن الوجبات اللي عندنا حتى ايسكريمهم يفرق ..

بس والله يالربع اتعب اقولكم لذذذيذذ وسعره اقل منا طلبت منهم 5 وجبات و3 ايسكريم بـ 80 لاري

ورجعت وتكينا في الصالة اللي قلت لكم عنها في الفندق وتعشينا ..

وكذا خلص يومنا بحاول اجمع لكم كم صورة وفيديو لان المكان يستحق تشوفونه مايكفي الكلام في الوصف ..

بالاضاقة انكم ممكن تزورون هناك شلال الجسر المعلق لو مامعكم اطفال هذا من ضمن الامكان الثمانية
اللي تشمل النهر اللي قلت لكم عنه اسمه ( Okatse Canyon ) وبحثو عنه قبل اذا من اهتماماتكم ..
برضو عندهم الحي التراثي يقولون كويس بس مازرته بسبب المطر ..
نافورة كولشين ..
سوق توكايسي الشعبي ..