|
شركات النصب والإحتيال السياحية في الرياض وقعت ضحية شركات نصب واحتيال سياحي وهذه قصتي باختصار : كنت بأحد المولات الكبيرة بالرياض انا وعائلتي وعند خروجنا قابلنا احد مندوبي الشركات بالبدلة والكرفته والكلام الحلو يعرض علينا عرض مغري وخصومات كبيرة سياحية واخذ معلوماتنا وحدد لنا موعد في شركتهم وحضرنا في الموعد بعد اسبوع وعرض علينا عرض اشتراك لديهم تدفع مبلغ يكون رصيد وعندما ترغب بالسفر هم يحجزون لك واشتركنا دفعنا عربون نصف السعر فقط ... بعد شهر حبيت اسافر واتصلت عليهم وحجز لي بسعر نفس سعر الفندق ونفس سعر المواقع الالكترونية المشهورة لحجز الفنادق ولما سألتهم ليش مافيه خصم قال هذا السعر الي عندنا ولما رجعت لهم ابغى الغي الاشتراك واستلم فلوسي قال انت موقع على العقد البند الرابع منه ينص على انه لا يمكنك استرجاع اموالك الا بطريقة واحدة وهي ان الشركة تحجز لك فنادق باموالك الي عندنا العربون اذا ماتبغى تدفع باقي الفلوس نحجز لك فنادق حسب اختيار الشركة وليس حسب اختيار الزبون لاعادة فلوسك لك فقط هذا الي عندنا . اولا احب ان احذر من هذه الشركات النصابة حيث ان خصوماتهم وهمية ثانيا ابغى ارجع فلوسي منهم افيدوني كيف الطريقة علما باني قدمت بلاغ لوزارة التجارة عن طريق النت ولم يصلني اي جواب كيف ارجع فلوسي الي دفعتها ؟ ثالثا ارجوا الافادة هل استطيع ذكر اسماء الشركات واسماء الاشخاص والمعلومات التفصيلية وارقامهم هنا في المنتدى لكي يحذر منهم الجميع . والله يحفظكم من شركات النصب والاحتيال السياحي سواء بالداخل او الخارج . |
لاحول ولا قوة الا بالله الحادثة واجهتني مرتني الأولى في الأردن كنت في سوبرماركت مشهور ونفس كلامك عندنا وعندنا وعندنا وننتظرك تشرفنا بالحفل وتشوف قلت ابشر و سحبت عليه والمره الثانيه قبل شهر كنت بالرياض وتحديداُ في حياة مول جاني واحد مصري ياباشا انت كسبت معانا ==== ايش الأستخفاف بالعقول هذا الواحد لو كان في عقله شي بسيط من التفكير يعرف انهم نصابين قلت تفضل قال لك عرض سياحي للدمام فنادق وسيارة قلت ممتاز ههههههههه == كيف افوز قال عبي البرشور وننتظرك بمقر الشركة تنورنا قلت ممتاز اجل انتظرني وسحبت عليه === الكلام هنا كيف المولات تصرح لهم يعملون ويستغلون الناس وهم عارفين انهم نصابين |
وايد حذروا من هالشركات و من نصبهم و للاسف للحين الناس تصدقهم و تتعامل معاهم بس فعلاً شلون للحين يشتغلون بالمجمعات المشهورة ؟ |
للأسف مازالوا يعملون بأكبر المولات الشهيرة بالمدن الكبيرة ويلعبون على أحلام الناس حسبي الله عليهم نتمنى احد الاعضاء يدلنا على الطريقة الصحيحة لتقديم شكوى على وزارة التجارة لايقافهم . |
هذه الشركات من اكثر من عشر سنوات يشتغلون بهالطريقه وياما حذرنا منهم ومستمرين هم بصيد الزباين ديروا بالكم منهم حتى لو تشوفونهم بارقى المحلات واكبرها |
الكثير من الاخوة حذر من هذه الشركات النصابة من فترة طويلة واصبحت حليهم لا تنطبق على احد لكن الشي الله يقهر انهم يسرحون ويمرحون بدون ما يحسابهم احد لذلك المفروص ان الواحد يكون ذكي وحريص لانه في الغالب ما فيه احد يحمية اذا تعرض لعملية نصب والدليل تحرك هذه الشركات طول هذه السنوات بدون حسيب او رقيب |
اقتباس:
احجز من عندهم لسفرات قادمة و الله يعينك |
أعتقد في هذا الزمن الواحد مش محتاج لشركات سفر وسياحة تقدر تحجز سكن وطيران وسيارات عن طريق النت ، وترتب جدولك حسب المعلومات المتوفرة في المنتديات وإذا احتاج الواحد ، يروح للمكاتب القديمة والمعروفة أما اللي يعرضون خدماتهم في المراكز فهؤلاء أغلبهم نصابين صادفني مرة شركة من البحرين تعرض خدماتها خلال معرض سوق السفر العربي في دبي ، وعندهم بطاقة تقدم خصومات على كل الفنادق في العالم ، فقط تعمل إشتراك سنوي عندهم بتقريبا 500 درهم وبعدها كل ما حبيت تسافر تحجز عن طريقهم في أي فندق في العالم بخصم خاص لهم أشتركت عندهم وأرسلوا لي البطاقة مع كتيب والموقع الإلكتروني واكتشفت أن الخصم فقط على فنادق محدودة في بعض الدول وليس كل الفنادق في العالم كما قالوا ، المهم ما استفدت من البطاقة نهائيا نصيحة الخصومات غير المباشرة لاتثقون فيها ، الشركات السياحية إذا وفرت تذاكر رخيصة فممكن السكن يكون غالي أو الموقع غير مناسب ، المهم في شي في البكج ماراح يعجبكم |
جزاك الله خير |
الله يكون بعونك استغرب تجاهل وزاره التجاره لهم لابد يراجعون عقودهم الي يوقعونها مع الناس بحيث انهم يضمنون للعميل سعر ارخص من المواقع الالكترونيه |
| الساعة الآن 11:47 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO