|
الجميع له بداية وانا بدايتي بـ/ مشورتكم السلام عليكم ورحمة الله وبركاته ويعطيكم الف عافية أخواني من أدارة واعضاء على الصرح العظيم الذي أفاد كثير من الناس وانا أولهم أخواني الأعزاء ما ادري اذا موضوعي بالمكان الصحيح أو لا وانا اخترت فرنسا لأنها أول وجهاتي زي ماهو مكتوب بالعنون أن أول بداية لي بـ السفر إلى أوروربا ولابد أن أخذ مشورتكم أولاً هي سفرة عباره عن جولة والحقيقة أول خطاء بديت فيه حجزت قبل أحدد الدول بالشكل الدقيق :2: أولاً : عددنا 4 اشخاص كلنا أول مره نسافر شباب طبعاً ثأنياً : حجزنا على تاريخ 30/6 والعودة 14/7 بأذن الله .. محطة الوصول باريس والعودة فيينا تخطيطي وأبي رايكم والتعديل عليه وأقتراحاتكم التخطيط السريع بالدول وليس المدن .. شفت بالخريطة وأفضل طريق سير وأريح من ناحية المسافة فرنسا > بلجيكا > هولندا > المانيا > النمسا المدن لسى ماحددت بس طبعاً الأساسيات عندي باريس وزيلامسي .. أبي رأيكم يا أخوان والي له تجارب أفضل المدن الي بالطريق يمكن زيارتها وهل تنصحوني أسكن بالعواصم ولا في مدن افضل جمبها او على طريقها مثل أمستردام وميونخ وباقي الدول طبعاً من ناحية الفعاليات وانا أتقبل ارائكم واقتراحاتكم من ناحية الدول او خط السير أو اي شيء .. لو تبوني الغي السفرة الغيها :24: المواصلات :طبعاَ راح نستأجر سيارة شيء أكيد ولا نستغني عن ارائكم من ناحية السياراة وانا أفكر أن اول ايام نجلس فيها بباريس نخليها مترو واذا بغينا نمشي ناخذ سيارة طبعاً مع حجز مسبق .. ولا ناخذ سيارة من بدري .. مع العلم انا عندي صبر مع الزحمة شوارع الرياض علمتنا الصبر :24: السكن : انا افضل شقق لأن عددنا كبير وانا اشوفها أوفر .. والي عنده أقتراح من ناحية الشقق ولا الفنادق يقول لي وشاكر لكم مقدم أخواني |
١٤ يوم ب خمس دول زحمة عشان تسهلون الموضوع اختصروا و قللوا الدول ٣ باريس ٢ جنيف ٤ انترلاكن ٤ زيلامسي ١ فيينا او ٣ باريس ٣ فرايبورغ ٦ زيلامسي ٢ فينا معليش هولندا بتصير شمال فوق عن باريس يعني بتصعد و بترجع تنزل استثنيها و بلجيكا مافيها زود |
اقتباس:
كلام جداَ جميل شاكر لك أختي, |
وعليكم السلام الله يحييك يا غالي بيننا راح انقل الموضوع لاستفسارات السياحية فهي البوابة الانسب لتخطيط الرحلات ممكن توضح قولك انك حجزت ؟ هل قصدك حجزت طيران من والى باريس ؟ الوصول باريس 3 ايام تستخدم المترو ثم قطار الى جنيف تستلمون منها السيارة وتقضون فيها 1 يوم على البحيرة ثم بالسيارة الى لوزان الصباح تزورون البحيرة وكافيه مطل عليها وايسكريم موفنبيك من الفندق ومنها بالسيارة الى مونترو تتمشون على الشاطئ وتجلسون بمطعم او كافيه ومن هناك انترلاكن تريحون فيها 4 يوم تزورون المعالم الشهيرة ثم الى زيورخ 1 يوم تزورون الشلالات ومنها الى زيلامسي 4 يوم والمزارات معروفة ثم الى ميونخ 2 يوم ومنها التسوق للهدايا والعودة * بما ان رحلتكم بالصيف لابد من التخطيط الدقيق والحجز بناء على هذا التخطيط ولا راح تواجهوا مشكلة في ايجاد سكن في مدن مثل انترلاكن و زيلامسي * تاكدوا ان السيارة تكفي 4 اشخاص مع 4 شنط يعني السيارات الاقتصادية الصغيرة ماتنفع لكم وغالبا تذكر الشركة هذه المعلومة فانتبهوا لها * لابد يكون معكم بطاقة فيزا عادية وهذا افضل والبعض يقبل مسبقة الدفع وافضل لكم في هذه الرحلة عدم حمل كاش واستخدام بطاقات الصراف والفيزا * اذا اتفقتوا ابداوا في اجراءات التاشيرات من الان والله يوفقكم لاتنسون تكتبون لنا تقرير عن هذي الرحلة |
اقتباس:
ياهلا بـ أخوي أخر فرصة شاكر لك نقل الموضوع وشاكر لك مشاركتك ونصائحك الي مانستغني عنها بالنسبة للفيزا .. وش عرفهم هل هي مسبقة الدفع ولا لا ؟ وانا سويت تغير بالرحلة .. راح اكتبه برد ثاني .. ولابد من مشورتك بالتعديل الجديد |
تــم تعـديل مسار الرحلـة وتعـديل التذاكر بعد قرائة اكثر وتعمق اكثر شفنا أن التعديل لا بد منه التعديل صار الوصول الى ميـونخ والـعودة من باريس التاريخ نفس التاريخ والجدول راح يكون كـ الأتي ميـونخ > زيلامسي > أنترلاكن > باريس وانا شفت ان استئجار سيارة من المانيا ارخص بــكثير , بالنسبة للمدن أخترنا المتعارف عليه مابغينا نروح عنها .. بس الي عنده أقتراح أفضل يتفضل يقوله لي بالنسبة لـ عدد الأيام بالمدن لسى ماحددنا .. وابي رأيكم بعدد الأيام .. انا اخاف اطول بـمكان يطلع ممل وانا اشوف بالنسبة ل زيلامسي وانترلاكن .. في قرى او مدن صغيرة جمبها يعني ماتتعدا ال 10 كيلو .. وارخص .. قلت دام معنا سيارة لو نستأجر بالأماكن هذي ونروح للمكان الي نبي .. وش رايكم ؟ |
نسيت أذكر شيء .. انا تقريباً اخر اربع ايام .. راح اكون ب فرنسا ورجعتي من هناك هل أفضل ان اول ما اصل فرنسا اسلم السيارة واستخدم المترو يعني اذا وصلت فرنسا أروح للمطار واسلمها .. ولا أخلي السيارة معي لين نهاية الرحلة واسلمها ؟ |
نعم اول ماتوصل تسلم السيارة وتستخدم المترو والجدول حلو ما عليه غبار الفيزا مسبقة الدفع لا تقبل التفويض |
| الساعة الآن 11:20 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO