اشياء تنرفز في شوارعنا_نضحك والا نبكي من اللي نشوفه؟!😞من قلب الحدث!!💔
 

السلام عليكم..

حبيت اشارككم موضوع مهم جدا في هذا الفيديو.. المقطع يتكلم عن الاشياء اللي نواجهها في شوارعنا ونعاني منها ..

https://www.youtube.com/watch?v=3Lk_ghsT8kw

تعبنا والله من المصايب اللي نشوفها في الطرقات, الكل مسؤول مو شخص بعينه ..

اترك لكم التعليق ..

صحيح الشباب هم الفئة الاغلب .. لكن من وجهة نظري ان كل الفئات الثانية مشاركة في هالمشكلة

الشياب (مو فاهمين ان قدراتهم تناقصت ويكابرون)
الآباء ( نقص في توعية وتدريب الابناء ومنهم اصلا المستهتر حاله حال الشباب)
الشباب (استهتار وطيش وحب التجربة)
البنات (جديدين في هالمجال)

بدون تكاتف الكل .. هذي المصايب راح تظل موجودة وما بتتغير مع الاسف

بكل أسف صحيت اليوم على خبر وفاة شخص عزيز بحادث مروري .. 💔
ومع الاسف انه كان بسبب واحد من السلوكيات الخاطئة اللي ذكرتها في المقطع ..

واللي يغبن اكثر اني كنت راسل المقطع في قروب واتساب قبل كم يوم وهو كان موجود فيه وعلق علي بتعليق استهزائي لما شافه .. تتعب وانت تتكلم لكن ماحد يسمع ويتعظ .. والواقع في النهاية واحد ما راح يتغير مهما حاولت تغيره 💔

الله يرحمك ويرحم كل موتانا ويغمد روحكم الجنة ...

حياك الله عزيزي ..

وجهة نظرك على عيني وراسي يا بعدي ..

صحيح انها منتشرة حول العالم لكن المقطع كان يتكلم عن المشكلة بشكل عام .. انتشارها ما يبرر انها صح ويمنعنا ان نقول هالشي خاطئ ..

حتى الاحصائية في نهاية المقطع كانت لكل دول العالم وبعدها خصصت للسعودية ..
يعني قصدي من المقطع ان المشكلة مو محصورة عندنا .. هذي آفة عالمية وانا نقلت فقط الصورة من منظور المكان اللي عايش فيه ..

بس ياليت لو تعلمني أي جزء من المقطع كان فيه اسقاط على فئة معينة ؟ لأني ما انتبهت للامانة لهالشي عشان ممكن أعدله.. ولو تلاحظ ردي السابق قلت ان جميع الفئات تتشارك من الشياب الى الصغار وهذي مسؤولية الكل مو فئة معينة .. فياليت توضح لي هالنقطة :)

شكرا على التوضيح والتبيه .. فعلا الجملة ممكن تفسر وتفهم بشكل خاطئ اذا الشخص حط في باله اني اقصد النساء واعتذر عن هالشي ...

لكن الحقيقة اني كنت اقصد في ذيك الدقيقة جميع الفئات اللي تستخدم الجوال .. لأن الكل عارف ان الرجال والنساء يستخدمون الجوال وهالشي مو لفئة الحريم بس ..

ومدري اذا بتصدقني بس للامانة وربي شاهد علي .. هذي بيني وبين ربي:) لما جبت لفظ زبالة ما كنت اقصد الحريم اساسا, المقصد كان اني اشبه الشخص اللي يستخدم الجوال (رجال ونساء) وهو يسوق بالزبالة , وبما ان الزبالة مؤنث صارت الجملة زي ما سمعتها ( كانت تتصل .. صديقاتها ..) وبكذا السامع فهم غلط اني اقصد النساء مع الاسف .. لكن الموضوع كان فقط تشبيه بدليل اني ذكرت بعد كم دقيقة "هالمرة ما تشوف كيس زبالة .. تشوف سيارة الزبالة بكبرها" وهالشي يبين لك ان لفظ الزبالة ذكر للتشبيه وليس المعنى منه النساء

الخلاصة اني كنت اقصد بلفظ زبالة .. الزبالة نفسها .. مو الحريم ... شوي لحسة مخ هههههههههههههه
واعتذر مجددا للجميع :)