شاركونا سولفوا انا عن اول رحلة لكم في الحياة
 

انا اول مرة اسافر خارج المملكة رحت تركيا عام 1411 لوحدي وقبلها كنت اسمع اللي يسافرون يقولون رحنا الديسكو وبس ما صدقت اوصل هناك الساعة 8 مساء ودخلت الفندق وتعشيت حول الفندق ورجعت عشان انام بدري عشان اصحى الصباح بدري واروح الديسكو والله انام للصبح واصحى وافطر وانزل الشارع على الساعة 9 ص واول تاكسي واشر ووقف وركبت على طول قلت له ديسكو والله الا واسمعه يبربر ما ادري ايش يقول بالتركي واكلمه عربي ما يفهم وانجليزي ما يفهم وش هالورطة وكنت افكره ينصحني يقول لا تروح واثاريه يقول مافيه ديسكو فاتح الان مايفتحون الا في الليل وكل ما قال لي شي قلت له ديسكو ولا تطولها وهي قصيرة وانشي له لين وداني عند ديسكو الباب مقفل وانا لازلت مصر على الديسكو والله وينزل يدق عليهم الباب دق دق دق لين واحد فتح الباب وتكلم معه شوي الا وقال لي يالله انزل ويجلسني على طاولة ويروح يصحي وحدة روسية وتجي تجلس معنا وهي تتكلم انجليزي وتسألني من وين وايش جابك الان وبعدها جلست تشرح لي ان الديسكو ما يفتح الا في الليل متأخر وهي هذيك اول مرة واخر مرة ادخل ديسكو لان وقته ما يناسبني لأني احب اصحا الصباح الى المغرب وخلاص سواء في المملكة او خارج المملكة.

كانت اول لي سفرة في حياتي سنة 1413 هجري كنت في ثاني متوسط

إلى الأردن وسوريا بالسيارة كنا مجموعة عوائل بقيادة أبوي الله يرحمه

كان معانا جدي الله يرحمه وأخو مرة جدي وحرمته وبنته

وابوي الله يرحمه أخذ عيال عمتي المتوفيه بنت وولدين

الرحلة كنا مراهقين عمة اكبر مني وبنت عمتي قدي وعماني ماشاء الله 5 أصغرهم سادس

أنواع الضحك زي طاش ماطاش ههههههههه

الموقف اللي سار لما وصلنا المنفذ رفضو يطلعون عيال عمتي لان ماكان معانا تصريح وزمان التصريح ورقي

جدي عصب قال خلاص نرجع مو لازم لكن الله يرحمه أبوي قال خلي نروح حقل ونريح بعدين نرجع

لما وصلنا حقل أبوي راح كلم من التليفون الثابت زوجي عمتي وقاله يسوي تصريح ويرسله مع أي كداد

زمان مافي أي وسائل تواصل جلسنا يومين خايفين مانسافر الحمدلله جاء التصريح ورحنا وكانت رحلة ما اقدر أنساها

جميلة وذكرياتها إلى الآن بالنا ودايم أتذكرها مع عماني وعمتي وبنت عمتي

ان شاء الله سوريا تعود إلى افضل حال ونرجع نعيد الذكريات بأذن الله