|
استفسار عن القطار من لندن الى ويندرمير السلام عليكم ورحمة الله وبركاته احتمال كم راح تكون اسعار تذاكر القطار من لندن الى ويندرمير من شباك التذاكر في محطة ايستون لشخصين ذهاب 13 أغسطس والعوده 15 أغسطس لاني خايف احجز عن طريق النت وتروح علي الرحله بسبب اني اللخبط في المحطه لاني ما قد استخدمت القطارات في بريطانيا او اني اتاخر في الوصول لمحطة ايستون وكم سعر التذاكر من النت لاني ماعرفت استعلم عن اسعار التذاكر في تواريخ سفري افيدوني الله يحفظكم |
رد: استفسار عن القطار من لندن الى ويندرمير وعليكم السلام ورحمه الله وبركاته ياهلا ومرحبا اخوي ارخص تذكره ممكن تحصلها ذهاب وعوده لشخص واحد بسعر 53.5 باوند بس غير مرنه يعني ماتقدر تغير الوقت او اي شي يتحرك القطار من ايستون الساعه 1 ونص ظهرا ويوصل ويندرمير الساعه 4:41 مساء الرحله مب دايركت تبديل قطار في Oxenholme Lake District والعوده اختار من بين الاوقات الاتيه : الساعه 13:44 - 15:50 - 19:58 تبديل قطار واحد ومده الحرله تقريبا 3 ساعات ونص National Rail Enquiries - Journey Planner - Trains Times and Fares بالتوفيق اخوي |
رد: استفسار عن القطار من لندن الى ويندرمير الله يعطيك العافية ويوفقك مشرفنا الغالي qa6ar911 السعر هذا من شباك التذاكر ام من موقعهم على النت وهل الذهاب رحله واحده فقط ام يوجد اكثر من رحله واذ بحجز من النت فيزا تسوق الراحجي او الاهلي تنفع ولا لا والف شكر لك |
رد: استفسار عن القطار من لندن الى ويندرمير السلام عليكم ماقصر مشرفنا ابوسعد جعل عمره طويل بالنسبة للبطاقة نعم مقبولة ويمديك تحجز منها واعتقد السعر اللي افادك فيه مشرفنا من الموقع وكل ماحجزت بدري لقيت الاسعار ارخص لكن انا بعطيك من خبرتي شوي اخوك في الله نظامه نظام شيبان مال اول ماعرف احجز من النت اروح للمحطة واحجز واخذ تذاكري معاي لكن حط في بالك ان الاسعار بتصير اغلى شوي من النت لكن علشان اتفادى الاسعار الغالية اروح للمحطة اول مااوصل لندن وقبل رحلتي المفترضه بمده كافيه يعني قبلها باسبوع مثلا واشوف الاسعار زينه يعني ومقبوله ووانت لو تعلمهم وتقولهم ابي ارخص الاسعار بيعطونك اياها لكن تأكد من وقت الرحلة عادةَ تكون الاسعار الرخيصة في اوقات غير الذروة يعني الصبح بدري او العصر مثلا وبعد كل هذا ارجع وانصحك تحجزها من النت من موقعهم الرسمي وتختار انت بنفسك السعر والوقت المناسب لك والله يوفقك |
رد: استفسار عن القطار من لندن الى ويندرمير الله يعافيك اخوي الغالي عاشق لندن العفو الله يسلمك انت تامر ياهلا ومرحبا مشرفنا بوعبدالله حلو نظامك يا الشايب هههههه ارحم الله والديك على الافاده اخوي عاشق لندن نعم بطاقتك مقبوله والبطاقات المقبوله لحجز القطار 1- فيزا 2- فيزا دلتا 3- ماسترد كارد 4- امريكان اكسبرس الاسعار طبعا من موقعهم طبعا راح تكون الاسعار حاليا ارخص اذا كان من النت والحجز صار بدري بالنسبه لرحله الذهاب الا في رحلات كثيره بس انا حطيت لك رحله واحده لانها الارخص هذا رابط الحجز من الموقع اضغط عليه بتطلع لك الاوقات والاسعار تحت جدول الاوقات بتحصل على اليسار مكتوب later train تضغط عليه بيعطيك الاوقات الي بعدها الجدول الي فوق لرحله الذهاب بتاريخ 13 - 8 والجدول الى تحت لرحله العوده بتاريخ 15 - 8 National Rail Enquiries - Journey Planner - Trains Times and Fares واي استفسار حاضرين لك الجميع ماراح بقصر معك ان شاء الله |
رد: استفسار عن القطار من لندن الى ويندرمير وعليكم السلام ورحمة الله وبركاته والله حلو نظام الشياب عندك اخوي هههههه الله يعطيكم العافية اخواني مشرفينا الغالين فارس الجبيل و qa6ar911 ما قصرتم أفدتموني بكل شيء كنت ابي اعرفه الله يجعل كل حرف كتبتموه في ميزان حسناتكم والله يسعدكم ويوفقكم |
رد: استفسار عن القطار من لندن الى ويندرمير الف شكر لكم جميعاً |
رد: استفسار عن القطار من لندن الى ويندرمير جزاك الله خير وحاضرين طال عمرك بخدمتكم واتمنى لك سفرة سعيدة وموفقه ان شاء الله |
| الساعة الآن 08:27 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO