تحذير يا اخوان من السائق بروبات سيرلنكا
 

تحذير يا اخوان من السائق بروبات سيرلنكا

بسم الله الرحمن الرحيم
اخواني احذركم من التعامل مع السائق بروبات - سيرلنكا رقم جواله 0094773535124
بداية بحثت في الانترنت عن سائق في سيرلانكا وحصلت اكثر من رقم وتم التواصل مع اول رقم حصلته وهو رقم بروبات وتم الاتفاق على 8 ايام 400 دولار شامل كل شيء سكن, اكل ,وقود ,ضرائب طريق, طبعا تم تقسيم الايام كالاتي يومين في كاندي ويومين في نورياليا ويومين في بنتوته ويوم في كولمبو وتم إعطائه جميع البيانات وحجوزات السكن ليتأكد من الجدية حسب كلامه وفعلا اتصل بالفنادق وتأكد من الحجوزات طبعا نحن شخصين فقط , وتم وصولنا بتاريخ5/9/2015م الساعة10 صباحا على الخطوط السعودية وفعلا حصلنا بروبات في استقبالنا وكانت السيارة هوندا من الحجم الصغير وموديل حديث , البداية كانت ممتازة وكلها حسب الاتفاق نبداء بالمشاكل سوف اختصرها على شكل نقطتين ليسهل فهمها:
1- المشكلة الاولى ونحن بالطريق كرر علينا اننا نحجز ركوب الفيلة طبعا الفيل ب250 دولار وبحكم اننا ركبناها سابقا فرفضنا العرض واخذ1 بالتكرار اكثر من مره ونفس الرد يجية وبعدها اوقفنا عند مزرعة الزيوت والبهارات هي على الطريق بين المطار وكاندي ونزلنا في المزرعة كانت صغيره وبدا يشرح لنا صاحبها مكونات الاشجار مثل الفانيليا والقرفة وغيرها كثير المهم في اثناء الشرح جانا بروبات وقال معاكم مفتاح السيارة احنا استغربنا قلنا وش يجيبه معانا انت توك موقفها ونزلنا المهم قام بالبحث عن المفتاح ولم يجده فقال انتظروا قليلا ببحث في الاماكن الي وقفنا عندها بالطريق وتركنا تقريبا 3 ساعات طبعا اصحاب المزرعة بدو بعرض منتجاتهم وكانت غاليه بشكل لا يصدق اكياس صغيره لا توصل50 جرام ب6000 روبية وعلب شامبو ب35000 الف ربية فرفضنا اننا نشتري وانتظرنا السائق وكل ما اتصلنا به يقول5 دقائق وبعد3 ساعات اتى على دباب وقال ما حصلت المفتاح فاتفق مع صاحب باص وودانا للفندق ومن بكرا جانا بسيارة قديمة نيسان صني تقريبا موديلها قديم وبلغنا انه بكرا بيجي مفتاح الجديدة وبجيبيها المهم كل يوم بكره لي اخر يوم وجاب السيارة الجديدة اخر يوم يعني5 ايام يودينا بالسيارة القديمة واحنا ساكتين مراعين ظروف فقدان المفتاح ما جانا شاك انه مسوي حركه فينيا عشان يوفر قيمة الاجار
2- المشكلة الثانية وهي الي عليها الكلام اخر يوم طلبنا منه اننا بنشتري بعض الاغراض مثل عسل وفواكه وقرفه وبعض الزيوت شفناها في الطريق وهو قال لنا خلوها اخر يوم اجيب لكم شي جديد وطازج وقلنا اوكي, اخر يوم ودنا للسوق عشان نتأكد من الاسعار وبعدها قال وش تبون وعلمناها طلبنا منه عسل وقرفه وزيت قرفه وانواع معينه من الفواكه ووريناها حجمها وسعرها تقريبا الاجمالي 18000 الف ربية وقال عطوني المبلغ عشان بكرا الصبح وانا جاي اخذكم للمطار اجيبها معاي مغلفه جاهزة في كراتين قلنا اوكي (طبعا حنا واثقين فيه لان باقي له مبلغ عندنا قلنا لو اخذ الفلوس هذي بتكون نفس المبلغ الي له فما فرقت معانا) جاء الصبح ومعاه6 كراتين ومغلفها وقال كل الي طلبتو موجود فيها وقال الكراتين الي عليها علامه فيها العسل والقرفة والزيت وما امدانا نفك ونتأكد من الموجود لضيق الوقت ولأنها مغلفه
ما نبي نحوسها عشان الشحن المهم ودانا للمطار وحاسبناه على باقي فلوسه واكرمناه زياده من عندنا وودعناه ووصلنا للرياض يوم فكينا الكراتين تفاجئنا بالموجود فيها العسل غير موجود والقرفة حاط تقريبا 100 جرام وحنا طالبين كيلو والزيت غير موجود الفواكه اتوقع جايبها من الزبالة كلها خربانة وصغيره
وكلمته ومارد علي وارسلت له وات ساب ومارد ورد علي بعد يوم وقال ما عرف وش تقول واتصلت على جواله وخلا حرمة ترد علي وقام يصرف وعرفت انه نصاب
المسئلة مو انه سرقنا المبلغ تقريبا 130 دولار بس انه لعب علينا اولا بالسيارة ثانيا اننا تفشلنا بالأغراض الي جايبينها لأهلنا
(معلومة للجميع تقريبا كل السائقين في سيريلانكا يأخذون عموله على كل الأماكن السياحية الي يودون الناس لها عشان كذا اغلب الاماكن السياحية اسعارها غاليه لان تقريبا نص المبلغ يأخذه السواق )
وهذا الي حصل معاي مع السائق بروبات وانا مجرد انبه اخواني وخاصه ان السائقين في سيريلانكا كثر ونفس السعر واكيد بيجي ناس يمدحونه لأني انا اخذته من النت بعد مدح الاخوان بس هذي تجربتي اعرضها عليكم والله خير الشاهدين والي له علاقه معاه يكلمه ويساله عن الي سواه معانا عشان نعرف
* نسيت اقول لكم انه يرفض يودينا مشاوير طويله داخل المدينة بحجة ان الشركة محددين له كيلو مرت معين ووقود معين
طبعا بعرض صورته عشان تعرفونه

* فيه مشكله في رفع الصور

صحيح الرقم موجود في الانترنت من تقارير بعض الشباب

وفيه ناس ما ينتبهون لطريقة السواقين في الاماكن السياحية لاني استغربت الاسعار البلد رخيص في كل شي الا الاماكن السياحية مثل ركوب الفيله والشلالات والبحيرات والقوارب ومحلات البهارات والاحجار
واستغربت الاجانب يشترون ويرحون وياخذون باسعار اقل مننا فعرفت السبب ان النسبه الكبيره للسائق طبعا بعد الاتفاق مع المشرفين على الماكن السياحية

صباح الخير
صادق اخوي بس الواحد يتعلم من السفر وينبه اخوانه

صباح الخير
هو قال لنا الفيل ب250 دولار سوا كنتو واحد او عشرة
وترى دايم يرددون ان الاوربيين يدفعون لهم زياده وهم كذابين انا شفت الاوروبين وقروباتهم وعشت معاهم يجون قروب من10 الى20 شخص ويجتمعون كل4 او3 في غرفه وياخذون باص سياحي رسمي ويرحون مع بعض ويرجعون مع بعض ولا يصرفون شي وياخذون بالاسعار العادية لانهم حاجزين بنفسهم الاماكن السياحية
* سيريلانكا بلد سياحي جميل ونظيف والطبيعه فيها خلابها واهلها طيبين مره ونظيفين بس ما يمنع من وجود ناس تستغل السياح

صحيح كلامك اخوي