|
مشورتكم لاول سفرة لاوربا السلام عليكم النيه هالسنه الاجازه بتكون في المانيا ان شاء الله وبما انها اول مرة وحنا عائله 7 اشخاص 6 كبار وطفل بحثت في الاستفسارات وحصلت هالمخطط للرحله عجبني ميونخ 2يوم فرايبورغ 4ايام انترلاكن وقراها 5ايام قارمش 3ايام ميونخ 2يوم وعندي استفسارات اهمها السكن ياليت ترشحون سكن في كل مدينه ينفع للعايله وشركه موثوقه لاستئجار سياره من مطار ميونخ واذا رغبت بزياره ملاهي يورب بارك هل الاقرب لها فرايبورغ وهل يكفي يوم نروح ونرجع في نفس اليوم وبارك الله فيكم |
وعليكم السلام ورحمة الله وبركاته بداية اذا انتم مو سعوديين المخطط حلو مع تعديل بسيط قارمش اول يومين بدلا عن ميونخ وعند العودة بيرتساو بدلا من قارمش اما اذا انتم سعوديين فيتغير خط السير عشان ما تمرو بالنمسا قارمش اول 3 ايام كونستانس يومين انترلاكن 5 ايام فرايبورغ 4 ايام ميونخ يومين بالنسبة للسكن الأفضل تدورون شقق عشان عددكم ما شاء الله السيارة ابحثي في الشركات المعروفة مثل يوروب كار - افيس - بدجت وغيرها ملاهي يوروبا بارك في مدينة رست الالمانية وتبعد عن فرايبورغ 35 كم تقريبا (فرايبورغ خيار مناسب جدا) |
بارك الله فيك خبيرنا وحنا سعوديين وياليت تجارب الاعضاء عن السكن وافضل الشقق |
ياهلا ومرحبا فيج اختي ماقصر خبيرنا ابو مهاب ان شاء الله راجع لج لوضع المخطط بالتفصيل تحياتي |
بارك الله فيك بانتظارك |
qa6ar911 مازلت بالانتظار |
جدولكم ممتاز جدا افضل لكم وصول ميونيخ استلام سياره من يورب كار من واقع تجربه ممتازه جدا الذهاب مباشره الي قارمش او شوانجاو او فوسن ثلاث ايام انترلاكن او ضواحيها 5 ايام فرايبورغ 4 ايام ( تزورون الالعاب وغيرها الكثير ميوينخ 4 ايام تسليم السياره في اقرب فرع للسكن عددكم كثير ابحثوا عن شقق اهم شيء في ميونيخ يكون قريب منها مترو والشيء الثاني حاولوا قدر المستطاع ان لاتسكنوا حول محطة القطار حتى لو بلاش سواء في ميونخ او غيرها من المدن عشان تعم الفايده اكثر بوره للفساد مخدرات دعاره عصابات سرقات الشقق ابحث في بوكينق افضل لكم استخدم خرايط قوقل في تحديد العنوان وللتجوال ايضا استخدم قوقل ايرث لمعرفه المنطقه اللي حولينك اكثر وفقك الله وسفره هنيئه |
جزاك الله خير يالجوكر وماقصرت على معلومة عدم السكن بجوار محطة القطار اول مرة اعرف عنها ورايك نسلم السياره اول مانوصل ميونخ او نخليها لاخر يوم في الرحله وبارك الله فيكم جميعا |
اذا وصولكم ميونخ الافضل السكن يكون اول ثلاث ايام في قارمش ومنها زيارة فوسن ويكفى المتعة اللي بتشوفونها في الارياف القريبه من قارمش وفوسن + بحيرة قارمش والقمة الثلجية اذا حبيتي والتلفريك اللي يودي للقمة قريب من البحيره ومواقف السيارات يومين كونستانس افضل من تروحون دايركت انترلاكن ومنها تزورون شلالات الراين وقرية هايدي 6 ايام انترلاكن وهناك اماكن كثيرة وانشطه سياحية ممكن تشوفين في بوابة سويسرا موضوع مثبت للاخ مقدام فيه كل الاماكن اللي يمكن زيارتها في انترلاكن مع الاحداثيات ويوم المغادرة الى انترلاكن ممكن تستفيدين وتزورين لوسرن مدينة جميلة تتغدون فيها وتاخذون جولة وتكملون طريقكم الى انترلاكن يبقى عندك 5 ايام في انترلاكن يمديكم تستمتعون بكل الاماكن والنشاطات السياحيه فيها 4 ايام فرايبورغ+يورب بارك + الغابات السوداء+ بازل+ ستراسبورغ الفرنسية +كولمار طبعا كل هالاماكن قريبه من بعض رتبي لك جدول للاماكن اللي تحبي زيارتها اخر ثلاث ايام ميونخ للراحه والتسوق لو حبيتي وهناك شارع التسوق وساحة مارين بلاتز الشهيره ويمكن زيارة الحديقة الانجليزية والمنتزه الاولومبي والبرج ------------------------------ 3 ايام قارمش 2 يومين كونستانس 6 انترلاكن 4 ايام فرايبورغ 3 ايام ميونخ |
السيارة اول ماترجعون ميونخ سلميها ماعاد تحتاجون لها كلام الجوكر مو شرط صحيح وينطبق على كل محطات القطار اكثر المسافرين يفضلون السكن قريب من الخدمات زي محطة القطار واماكن التسوق وسنتر المدينة واغلب المدن تكون محطة القطار في السنتر واما السرقات فتحصل في كل مكان والحرص واجب حتى واحنا في بلدنا تحصل ودائما نحاول نتجنب من يكلمنا بالعربية او يحاول يعرض علينا سلعه وخدماته وفي القطارات بقدر الامكان الابتعاد عن من يحاول الاحتكاك بنا هذولا نشالين ونصابين ولاتخافي امان اوروبا ولكن الحرص واجب نتمنى لكم رحلة ممتعه وموفقة بإذن الله |
| الساعة الآن 10:10 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO