|
الدراسة في ألمانيا , من طق طق للسلام عليكم السلام عليكم ورحمة الله وبركاته كيف الحال إن شاء الله الكل بخير ؟ نبلش بالموضوع على طول على بركة الله رح أشرح بهاد الموضوع الدراسة بألمانيا بشكل مفصل سواء اللي عايش بألمانيا أو اللي بده يجي من برا ألمانيا يدرس , إقرأ للآخر وإذا ما لقيت جواب على إسفسارك إسألني وبإذن الله برد عليك وبعرف إن هالقسم قسم سياحي بس حبيت فيدكم وأختصر عليكم خبرة سنين بموضوع واحد , لعل الله ينفع فيها الناس الدراسة بألمانيا , ليش الواحد يدرس بألمانيا ؟ لأنها لا تزال من أفضل الدول في التعليم سواء التدريب المهني أو الدراسة الجامعية , لا يزال كلمة صنع في ألمانيا لها إحترامها في أنحاء العالم طيب شو هي أنواع الدراسة في ألمانيا ؟ بألمانيا فيه أكثر من نوع دراسة لكن أشهرها التدريب المهني اللي يسمى بالألماني Ausbildung والدراسة الجامعية اللي يسموها بالألماني Studium قبل ما نبدى فيهم لازم نفهم أول نظام المدرسة الألماني للي حابب يرسل أولاده يكملو مدرسة في ألمانيا وبعدها جامعة أول شي الروضة ثم المدرسة العادية من الصف الأول إلى الصف الثامن أو كما يسمى في سوريا الثاني إعدادي أو السعودية الثاني متوسط هي مدرسة عادية يروحولها الأطفال ويدرسو لكن الجد يبدا من التاسع أو اللي هو الثالث إعدادي بسوريا أو الثالث متوسط بالسعودية بعد ما تاخذ شهادة التاسع تنفتحلك بعض فروع التدريب المهني , بعدها تاخذ العاشر تفتحلك فروع أكثر وأكثر لكن لا تزال غير مؤهل للجامعة التاسع يسمى Hauptschulabschluss 9 العاشر يسمى Hauptschulabschluss 10 بعدها يجي الحادي عشر لكن يسمى Realschulabschluss كل ما تخرجت من صفوف أعلى تفتحلك فروع تدريب مهني أكثر لكن لا زلت غير مؤهل للجامعة طيب كيف بدي أدخل الجامعة ؟ بعد الحادي عشر بتجي الثانوية لكن في ألمانيا تختلف قليلا فيك تاخذها بسنتين أو ثلاث سنين بس طبعا الثلاث السنين تفتحلك كل التخصصات بس لو حابب مثلا تخصص ببالك محدد بتاخذ السنتين بنفس توجه مجالك وبعدين بتدخل شي مثل الجامعة ومعترف دوليا لكن ماهي الجامعة اللي نعرفها كلنا يعني رح سهلكم ياها بعد الحادي عشر بيجي الFachabitur وهي سنتين تدرس فيها مواد عامة لكن لازم تختار مواد خاصة تدرسها حسب شو بدك تدرس بعد الثانوي مثلا أنا بدي أدرس علاج فيزيائي بالجامعة فبدخل سنتين الثانوي تخصص صحة بدرس المواد العادية زائد مواد الصحة وبيولوجيا وهيك بعد هالسنتين بقدر أدخل جامعة عادية في مجال الصحة (غير الطب طبعا) أو المدرسة العليا ( اللي هي معترف فيها دوليا ك شهادة جامعية لكنها مدرسة أكثر عملية وغالبا فيها عملي أكثر من النظري وهي أفضل للتخصصات اللي لازمها خبرة فيه تخصصات لازم تكمل سنة بعد سنتين الثانوي عشان تاخذ الثانوية الكاملة مثل الطب والمحاماة وغيره طيب نجي للتكوين المهني Ausbildung شو يعني التكوين المهني؟ بكل بساطة يعني تتعلم حرفة أو مهنة عن طريق العمل فيها ودراستها بآن واحد , بشكل بسيط أكثر , شخص بده يصير نجار , بروح عند محل نجارة أو محل صناعة خشب وبقدم عليها ولو بينقبل بيدخل التكوين المهني وغالبا بكون 3 أيام شغل عندهم ويومين مدرسة يدرس النجارة نفسها نظري طيب شو هي التخصصات المتاحة بالتكوين المهني؟ كل شييي حرفيا , من عامل في محل تسوق إلى باني سكك حديدية , إلى تمريض أو علاج طبيعي وغيره , كل شي بيخطر ببالك حتى عمال مصانع السيارات موجودة طيب شو متلطبات التكوين المهني؟ هون حطنا الجمّال , تختلف من مهنة لأخرى , بس القاسم المشترك هو اللغة مطلب أساسي طبعا ( لا يا شيخ ) وكل مهنة لها متطلباتها على سبيل المثال المهن اللي الدراسة النظرية فيها بسيطة مثل المزارع ومحاسب مراكز التسوق بيطلبو منه غالبا تاسع بس وكل ما كانت المهنة أصعب كل ما بيطلبو منك تكون دارس أكثر يعني التمريض ما بتقدر تدخل بتاسع لازم أقل شي عاشر لتقدر تدخل فيه تخصصات حلوة بالتدريب المهني وفيها نقص حاد في ألمانيا خصوصا القطاع الطبي والمهن اليدوية , والرواتب فيها حلوة على فكرة بالتدريب المهني بيجيك راتب , صحيح مو مثل راتب العامل النظامي بس يضل في بعض التخصصات يجيك راتب يكفيك وزيادة لأنك تشتغل ولازم يجيك راتب عليها , بالتمريض مثلا في السنة الأولى بعض المستشفيات أو مراكز المسنين تعطيك 1400 يورو وتزيد كل سنة !! بسبب النقص السؤال الأهم , شو فينه الواحد يكمل بعد التكوين المهني؟ ما بتقدر بالجامعة لأنك لسا مو مؤهل بالجامعة كلنا بنعرف إنه فينك تدرس ماجستير وبعدها دكتوراة وبعدها زمالة وبورد وهيك بالتدريب المهني الموضوع مختلف شوي بعد ما تخلص ثلاث سنين تدريب مهني بتتخرج بشهادة معترف فيها من الدولة الألمانية , وبتقدر تباشر عملك سواء كان ممرض , مزارع , عامل في مصنع بناء سيارات , باني سفن , باني سكك حديدة ,صائغ مجوهرات و صانع ساعات , صانع حلويات , اللي هو فيه شي بعد التكوين المهني إسمه مايستر, مو ماجستير ركز مدته سنة اذا بدك تخلصه دوام كامل أو سنتين اذا بدك تشتغل وتخلصه وأنت عم تشتغل بدوام مسائي أو بعطلة نهاية الأسبوع أصحاب المايستر في ألمانيا وخصوصا المهن الحرفية رواتبهم الأعلى في ألمانيا فيه طريق ثاني بدل المايستر اللي هو شي يسمى التشنيك Technik بس هذا نظري أكثر من عملي وكمان بيفتحلك مجالات مثل المايستر طيب أنا خلصت مايستر شو فيني كمل كمان ؟ هون صار فينك تدخل جامعة بنفص تخصصك وحتى تدرس وأنت عم تشتغل ومكمل حياتك طبيعي وبعدها تسلك الطريق اللي نعرفه بعد الجامعة فيه ألمان بحبو يسلكو هالطريق أسهل وأسرع وأفضل يعني مثلا شخص بده يدرس الهندسة الزراعية بس ما بده يكمل ثانوي لانها صعبة وضياع وقت بيخلص تاسع بسن 14 أو 15 سنة , بيدخل التكوين المهني ثلاث سنين ( مع إمكانية تخليصه بأقل إذا كنت متفوق) وبيتخرج بعمر 17 أو 18 وبعدين بيدرس سنة مايستر وبخلص بعمر ال18 أو 19 بعدها تفتحله الجامعة وبيدرسها وهو بيشتغل وبيتخرج بنفس عمر وسن الخريجين العاديين بس الفرق إنه راتبه رح يكون أعلى بكثير لأنه جمع الخبرة العملية والنظرية والفرق كمان إنه من عمر 15 بدت حياته وصار يجيه راتب وعلى عمر 18 صار يجيه راتب فوق الألفين يورو صافي وهو عم يكمل حياته المهنية والدراسية شي ثاني إذا سويت تكوين مهني بس ما عجبك شغلك وحبيت تغير بشي نفس المجال بس أحسن , مثلا بدل مزارع حابب تشتغل بالبيوت المحمية اللي هو تخصص البستنة , تقدر تختصر البستنة بدال 3 سنين ممكن تدرس أقل بكثير لأنك كنت داخل تخصص مشابه بالنسبة إذا بدك تفتح محل خاص فيك بألمانيا خلينا نقول محل مجوهرات أو صياغة ذهب أو مصنع للساعات صغير أو معمل تعويضات سنية , هل مسموح لي أفتح وأجيب عمال وأسوي هيك ؟ الإجابة لا , حتى حلاق ممنوع تفتح على كيفك لازم تعمل تكوين مهني 3 سنين بالمحل أو الشغل اللي حابب تفتحه وبعدين تعمل مايستر سنة بنفس التخصص لحتى تقدر تفتح صحيح إنه الوضع تعقيد شوي لكن لتقليل الخطأ والجودة المتدنية وبالنهاية نحنا بشر وكلنا نخطأ ولكن نفعل الأسباب وكل شي بإيد الله سبحانه وتعالى شو أفضل مهن بألمانيا؟ صناعة المجوهرات (لكن الأماكن محدودة) صناعة الساعات الفاخرة بس كمان صعب دراسة بناء السكك الحديدة وعليها طلب كثير وأي واحد فينه يدرسها حتى لو بالتاسع بناء الطرق والبنية التحتية وعليها طلب مهول كمان الشحن واللوجستيات عليها طلب كبير وفيه كثير وكثير مهن لا تعد هذا اللي خطر على بالي بالنهاية حابب قول شي من تجربتي كشخص عشت بكثير دول حوالين العالم , بآسيا وأفريقيا وأوروبا وعشت بجنوب أفريقيا وروسيا وماليزيا وغيره الشعب الألماني ودود ومن أفضل الشعوب اللي عاشرتها , اللي بتسمعه بالإعلام شي وبالطبيعة شي ثاني , من أفضل الشعوب اللي تختلط فيها وبحبو يساعدو بس ما بحبو حدا يخالف القانون أو الصوت العالي , غيره بالعكس من أفضل الشعوب اللي ممكن تعاشرها وأي سؤال أو إستفسار إكتبوه وبإذن الله أجاوبكم عليه تقبلو تحياتي |
شكراً يا غالي على هذا الملخض الجميل بس برأيك كم سنة عشان تتعلم اللغة الالمانية ؟ تبدو لي صعبة لأني عاشرت المان كثير ومثل ما قلت لطفاء وتعتمد عليهم |
شكرا على الافادة الجميلة |
اقتباس:
العفووو , ولو ما سوينا إلا الواجب شوف اللغة بحر وتحتاج السنين للإتقان التام بس أنا لحتى بلشت إحكي وزبط أموري من أربع شهور بلشت يعني المحادثات اليومية , وبعد سنة إلى سنة ونص كنت متقن وبخلص كل أموري لحالي وما عدت أستخدم المترجم بس أنا شخص إجتماعي وبدحل بالناس وتعرفت على ألمان وزيارات وننام عند بعض وعلمتهم عالضرب بالخمسة والمناسف ههههههه اللغة الألمانية سهلة صعبة , صعبة فيها أفعال مركبة , وسهلة لأنه لما تحفظ وتعرف تصرف خلاص فهمتها , والألمانية لغة تكتب وتنطق مثل العربية عكس الفرنسية والإنجليزية اللي تكتبه تنطقه تعلم كيف نطق الحروف , مبروك صرت تقرأ ألماني |
اقتباس:
العفو , شكرا لمرورك |
| الساعة الآن 08:54 AM |
Powered by vBulletin® Copyright ©2000 - 2026, Jelsoft Enterprises Ltd.
Search Engine Friendly URLs by vBSEO