شبكة و منتديات العرب المسافرون - للطلبة المبتعثين والخاصيين

العرب المسافرون
الابتعاث واللغات

بسم الله الرحمن الرحيم

السلام عليكم ورحمة الله وبركاته

شلونكم وشخباركم يا شباب ان شاء الله الكل بصحه وعافيه ...

اليوم ان شاءالله ناويه اكتب لكم عدة نقاط ممكن تكون مهمه للطلبه اللي ناويين يدرسون في بريطانيا او دول اخرى بس انا بأخص اهني بريطانيا لاني كنت طالبه فيها وان شاء الله تستفيدون منها ..

ابتدي معاكم النقاط :

1- قبل كل شي والاهم اللغة الانجليزيه

أ- للطلبه اللي لغتهم زينه وما يحتاجون كورس لغه هذيل ماعليهم كلام كل اللي عليهم يكون معاهم قبول الجامعه ويبدون دراسه .
ب - للطلبه اللي لغتهم نص ونص ومحتاجين كورس لغه نصيحه الاولى يدخلون المعهد البريطاني اللي في ديرتهم ويقوون روحهم وبعدها يمتحنون IELTS وياخذون درجه زينه ويبتدون دراسه على طول.
ج - للطلبه اللي يبون كورس لغه في ديرتهم يبتدون دراسه في المعهد البريطاني وبعدها يروحون بريطانيا ويكملون 3-6 اشهر اهناك ويمتحنون IELTS وياخذون درجه زينه ويكملون امورهم .

د- للطلبه اللي يبون يدرسون في بريطانيا اللغه انصحهم يروحون اول شي المعهد البريطاني وياخذون منه ليست بأحسن المعاهد او الجامعات ويختارون اللي مافيها وايد عرب ويمتحنون اهناك.

الدرجه اغلب الجامعات اقل شي4.5 - 6 للبكالريوس ومن 6- وفوق للماجستير وفوق وهذي الدرجه تختلف من جامعه لي جامعه ومن تخصص لي تخصص ..

2- مراسله معاهد اللغه او الجامعات واخذ القبول :

الطلبه اللي بيدرسون في بريطانيا لغه لازم يراسلون المعهد اللي اختاروه او الجامعه واهم يفيدونكم بالمده اللي تبونها وتكلفتها 3 شهور او 6 اشهر او سنه وتختلف التكلفه من معهد عن الثاني ، بعد ماترسون على المده اللي تبونها ، تختارون السكن اذا مع عايله اومع زملاء طبعا انا انصح عايله لانكم راح تتقنون اكثر اتسولفون ويصححون لكم اذا في اخطاء وشي مهم لازم تحتكون في طلبه الاجانب اي كانت جنسيتهم على شان اتكلمون انجليزي حتى لو غلط لازم ولا اشلون بتعلمون وبعدوا عن العرب حتى لو كنتوا عرب حاولوا انكم اتكلمون بعض بالانجليزي لاتستحوووووون..

تقريبا تكاليف الدراسه اسبوعيا 200 باوند تقريبا و 120 باوند اسبوعي سكن مع عايله ..

3- الفيزا :

بعد ماخذيتوا القبول وامنتوا السكن تروحون المكتب الخاص للسفاره البرطانيه وتطلعون الفيزا الدراسيه .

الاوراق المطلوبه:

أ- كشف حساب لاخر 6 اشهر وفيه مبلغ بحدود 3000 دينار او اكثر ، لدراسه الجامعات اقل شييكون 5000 دينار للطلبه الخاصيين،المبتعثين كتاب من وزاره التعليم العالي .
ب- صوره شخصيه خلفيه بيضه 4*5 واضحه من غير نظاره شمسيه مكشوفه الراس لوول ..
ج - الجواز .
د- رسوم الفيزا 70 دينار لدراسه اللغه والمده تعتمد على المده الموجود في القبول واكثر شي سنه.
ه - رسوم الفيزا للجامعه تقريبا 200 دينار مده اطول ، دراسه الماجستير 70 دينار او اقل .
- نفس الطلبات بالنسبه لدراسه الجامعات.
خلصنا من الفيزا ان كانت لغه او دراسه جامعيه ..

سايت الفيزا من السفاره البريطانيه:

https://www.gov.uk/apply-uk-visa

4- ملف وزارةالتعليم العالي:

- للطلبه الخاصين تقدرون تفتحون ملف في الوزاره للمتابعه مع الملحق الثقافي في بريطانيا ويكون فيه كشف درجات وكل شي لفتح الملف لازم تحطون فيه اقل مبلغ 9000 دينار ما ادري اذا قل المبلغ او مثل ما اهو وهذا المبلغ يشمل مصاريف دراسه والمصروف الشخصي ،، ويعتمد على حسب الجامعه والمده الدراسيه هذا المبلغ للماجستير ممكن يكون اكثر مثل ماقلت لكم يعتمد مده الدراسه والجامعه..
- للطلبه المبتعثين مايحتاجون لان اساسا عندهم ملف في الوزاره بس ..

5 - الاعتـــــــــــرااااف بالجــــــامعه:

- اهم شي اتأكدون من اعتراف الوزاره من الجامعه اللي اتبونها لان وزارتنا الميمونه كل يوم لهم اعتراف والغاء اعتراف واهم شي الطلبه الخاصين المبتعثين ماعليهم كلاام .. لما تاخذون القبول والجامعه معترف فيها تاخذون من التعليم العالي كتاب بالاعتراف على شان لا سمح الله والغواالاعتراف الا انتوا عندكم كتاب منهم ومايلغون دراستكم . وقبل ماتبدون دراسه لازم تعتمدون قبولكم وتسجلون في الملحق الثقافي في لندن .

* مواقع للجامعات المعترف فيها للبكالريوس undergraduate :

UCAS Search tool - Home

اتوقع دول الخليج نفس الشي بس ممكن يكون في اختلافات بسيطة وان وجدت يرجى ذكرها للاستفادة

ولاي ملاحظات واضافات
كتبوها بالتعليقات