|
البوسنة الجميلة 2025 السلام عليكم ورحمة الله وبركاته على متن خطوط فلاي ناس سافرت أنا والمدام من جدة إلى سراييفو مباشر بسعر الشخص 2700 ريال يوم 7/15 إلى 7/23 ثمانية أيام عيب الرحله تصل متأخره حول الساعه تسعه بالليل فغالب المطاعم مقفله المحلات والمطاعم في البوسنه حدها الساعه 11 مطار سراييفو مطار صغير جدا 90% من المسافرين سعوديين :24: توجهنا لمكتب تأجير السيارات اسمه 387rent a car لاستلام السياره .. مكتب لا انصح به طلعوا نصابيه وحراميه .. المعروف عند استلام السياره تحط وديعه ماليه كالمتبع أو تدفع تأمين شامل .. أنا اخترت الوديعه فطلب مبلغ كبير جدا 1200 يورو .. ووافقت على مضض وقلت لنفسي ماشي هي اصلا الفلوس حترجع لي .. وعند الاجراء تفشل العمليه ويدعي ان بطاقتي الائتمانية مافيها رصيد او ما تفعلت دوليا .. وهذا غير صحيح .. وعاودنا الإجراء مره ثانيه وثالثه وتفشل كلها .. وقال انه مايقدر يكمل لان النظام عنده حيقفل !!! فاجبرني على التأمين الشامل وطلب 480 يورو !!! يعني حوالي 2100 ريال !!! اصلا انا مستأجر السياره بسعر 1300 ريال .. وبعد مفاوضات خصم 40 يورو .. ماقصر والله . الغريب العجيب ان البطاقه الائتمانية اشتغلت وتم خصم مبلغ التأمين الشامل !!! فلذلك احرص عند استئجار سياره تكون من وكاله محترمه معروفه . |
كيف احمل الصور اخوكم نسي :24: انا أنشأت ألبوم وحطيت فيه الصور لكن لما ابغى احمل صوره يطلب مني رابط !! انا هنا هنق مخي |
مرحبا ... معوض خير إن شاء الله . تواصل مع البنك بخصوص عملية النصب ووضح لهم التفاصيل وإذا كان عندك إثباتات تساعد كثير باسترجاع المبلغ .واضح أن شركات تأجير السيارات أكثر جهة يصير فيها النصب . مره أضفت بطاقتي الإتمانية بموقع تأجير سيارات شهير تم إيقاف البطاقة وقتها. وصلتني رسالة بعملية مشبوهة . ماذكرت نوع تأشيرة السفر عندك ؟ موضع سؤال كثير من رواد المنتدى بخصوص تأشيرة البوسنة . |
البوسنه بدون تأشيره ها الثلاث شهور للسعوديين من 1 يونيو إلى 30 سبتمبر خدمه من البوسنه وتشجيع للسياحه عندهم |
حياك الله اخي نجم السياحة معوض خير الفلوس ويعرفون جيدا ان توقيتك متاخر ومظطر انك تدفع |
بالنسبة لتحميل الصور في اعلى الصفحة مكتوب تحميل الصور اظغط علية وحمل الصور وانسخ رابط المكتوب للانترنت |
بعد تحميل الصور ورفعها وين احصلها ؟ |
أنا سكنت في منطقة السوق القديم (بشارشيا) شقه اسمها city center old town من موقع بوكنج غرفة نوم وحده وصاله كبيره اثاث جديد فخم بسعر ٣٥٠ ريال بالليله . وفيها ميزه مهمه وجود موقف للسياره .. اغلب شقق السوق القديم بدون موقف للسياره .. وكان موجود شخص لتسليمنا مفتاح الشقة. (بشارشيا) تعتبر قلب سراييفو النابض كلها محلات تجاريه وبنوك وصرافين وكافيهات ومطاعم وخمسين محل ايسكريم وحركه واكشن وكل شئ جنبك .. بالاضافه لذلك فهي تسمى بالحي العثماني فراح تحصل العديد من المحلات والمطاعم التركيه والبقلاوه والايسكريم حقهم . اليوم الأول/ زياره سريعه خفيفه في (بشارشيا) وغالب المحلات مغلقه لان وصولنا سراييفو كان بالليل .. حصلنا مطعم يقدم الاكل البوسني .. طلبنا الاكله المشهوره عندهم وهي كباب مع نص خبز .. كباب حاف لا معاه سلطه ولا صوص ولا خس ولا بقدونس ولا حمص ولا طحينه ينشف في الحلق .. طلبت لبن يمشي الأمور .. والمدام طلبت شرائح فيليه دجاج مشوي الأكل عموما يعتبر زين .. لكن ما كررناه . ملاحظه/ المغرب عندهم الساعه 8.30 يعني تأخذ راحتك في التمشي وتقضي يوم ممتع لحد ما تشبع . |
اليوم الثاني/ 1/ سراييفو مرتفعه وحولها تلال وجبال وعلى ها التلال توجد مطاعم .. أحدها أجمل مطاعم سراييفو مطعم اكسجين .. وهو جنب ملاهي صن لاند .. بوفيه مفتوح فطور وغداء .. ومنظر جميل خرافي من الأعلى لمدينة سراييفو .. انصح بها المطعم وبقوه . لقيت عندهم رز ولحم مكتوب عليه مندي 100 ريال .. وطلبته وكان عادي مو بطال .. والمدام اخذت بيض وكرواسون وعسل وجبنه وشاي .. الوجبه كلفتنا حول 200 ريال.. لان المطعم يعتبر مطعم راقي وغالي . 2/ رجعنا لاستكشاف المدينة القديمه بأزقتها ومحلاتها الجميله .. تاخذ منك نص يوم تقريبا ما ابغى افصل فيها من مشاهدات وتروح ذا وذا .. لأنك أنت حتشوف كل الأماكن السياحية اللي هناك فهي جنب بعض . الجلسه لحالها في الكافيهات ممتعه وفرجه على السياح من مختلف دول العالم. 3/ العشاء في نفس المكان (بشارشيا) مطعم بحريني اسمه زعفران . وصاحب المطعم موجود بنفسه .. طلبنا برياني دجاج .. الدجاج كان زين لكن الرز مو بطال .. اصلا الرز ما تحصله في مطاعم البوسنة .. الله يعين اللي يحب الرز حيتعب هناك .. كلفة العشاء 90 ريال . |
برنامج اليوم / الفطور في مطعم اكسجين . بقية اليوم في منطقة السوق القديم (بشارشيا) |
بحاول انزل بعض الصور |
مافي فايده حاولت انزل الصور ماعرفت عطونا الطريقه بالتفصيل تكفون |
إليك أخي نجم السياحة الطريقة وهي بسيطة جدا : تذهب للأعلى وتضغط على مركز التحميل تسجيل الدخول بنفس اسمك ورقم السري ثم ترفع الصور كالتالي بعدها تنسخ الرابط كما هو موضح بعدها تضعه ضمن الموضع هكذا |
في حاجه ناقصه سؤالي الصور بعد رفعها وين تروح ؟ لازم يكون في خانه مجلد عشان احفظها مو معقوله كل مره اعمل ها الطريقه شغله متعبه |
اليوم الثالث/ 1 / صبحنا على امطار خير وبركه ولذلك كان من الصعوبه الذهاب لزيارة القرى المجاوره . ماتضمن الشوارع زلقه ولا طين .. وحتى الحدائق ماتعرف تجلس . فلذلك توجهنا نحو اكبر مول في سراييفو مول scc تابع لمجموعة الشدي السعودية مول مكون من سبعة ادوار يتضمن ماركات عالمية ومحليه وكافيهات ومطاعم وملاهي فطرنا فيه معجنات مع شاي وتمشينا بالنسبه للمنتجات البوسنيه الملابس والماركات كانت عاديه. 2/ بعد المول وانتهاء المطر توجهنا نحو تلفريك سراييفو تلفريك جميل مطل على سراييفو الشخص ٣٠ مارك رايح جاي حوالي ٧٠ ريال ويعتبر سعر غالي في الأعلى كافي مطل جميل وجلسه ولا احلى خصوصا مع انخفاض درجة الحراره بسبب المطر . 3/ نزول المطر خلى الجو بارد ونزلت درجة الحراره إلى 16 تقريبا مع المغرب . وعشان نزول التلفريك يكون بجوار منطقة (بشارشيا) فكملنا ليلتنا فيها والعشاء عندها في مطعم تركي بجوار مجسم السبيل .. طلبنا إسكندر ودجاج فيليه مشوي .. وكانت التكلفه 120 ريال لشخصين . وكان الأكل جيد . |
برنامج اليوم الثالث/ مول scc تلفريك سراييفو منطقة (بشارشيا) والعشاء فيها |
هلا يا نجم مركز التحميل اتوماتيك يحط الصور كلها تحت معرفك حكاية الالبوم قديمة هذي أحدث بحيث تلقى كل الصور في المركز شوف الموضوع هذا https://www.arabtrvl.com/vb/t50538.html |
هلا ابوغسان انا رفعت الصور وموجوده في ملفي الشخصي لكن بعدين اضغط على الصوره ما يطلع لي الرابط !!! عشان احطه في المشاركه يمكن عشان من جوال ؟ لازم لاب توب ولا كمبيوتر ؟ |
اليوم الرابع / 1/ ذهبنا للفطور في واحد من أجمل وارقى مطاعم سراييفو مطعم حديقة الأمراء مطعم على مطل جميل على سراييفو الفطور للاسف طلع ضعيف .. فقط بيض ولحم مارتاديلا ناشف وجبنه ولما لاحظ عامل المطعم انزعاجنا من الفطور رشح لنا صنف .. وطلبناه طلع سميد وعليه لبن .. اكله كذا غريبه وطعمها ماعجبنا . عموما الجلسه في المطعم تسوى وتنسيك الفطور الضعيف .. تكلفة الفطور 70 ريال. 2/ بعدها انطلقنا نحو جبل (ايقمان) الطريق أخضر في أخضر ومناظر جميله رائعة إلى ان تصل للقمه تقريبا ويجيك منتزه (ايقمان) بساط أخضر كبير فيها العاب اطفال وجلسات ناس تجري وناس حاطه فرشه وناس تطبخ وناس تشوي انصح تاخذ معاك فرشه وشاي وقهوه وتمدد رجليك هناك واذا بتطبخ خذ راحتك جلسه جميله جدا ورائعه والجو بارد منعش .. بعدها تلاقي فندق فخم اسمه فندق (مونتي) أغلب استخدامه للنزلاء في وقت الشتاء للتزلج .. وبعدها تروح لتلفريك ايقمان عند جبل (بيلا شنيستا) وهناك تلاقي مجموعه من الفنادق والشقق .. برضوا اساسا موجوده لوقت التزلج لكن مفتوحه للي حابب يسكن فيها ياخذ يوم او يومين المنطقة هادئه بزياده ولا فيها خدمات او تمشيات كثيره يوجد كافيه ومطعم حقها يوم فقط من وجهة نظري .. جلسه جميله وجو بارد ممتع .. وفي دبابات اللي يحب يتمشى ويأخذ جوله حول المكان مكان يستحق الزياره . 3 / بعد اللفلفه بين الطرق الخضراء الجميله والمناظر الخلابه رجعنا لشقتنا ورحنا تعشينا برقر في مطعم اسمه (سماش برقر) في السوق القديم (بشارشيا) 50 ريال الشخصين وكان برقر ممتاز . |
برنامج اليوم الرابع/ الفطور في مطعم حديقة الأمراء جبل ايقمان وجبل بيلا شنيستا العشاء في سماش برقر |
متابعين يا غالي :e032: انا استعمل اللابتوب ممكن أهل الجوالات يفيدوك لكن مركز التحميل هو الحل |
اليوم الخامس/ اليوم الوجهه خارج سراييفو وبالتحديد لقريتين جميلتان ترافنييك .. ياييسي الأولى تبعد حول ساعه عن سراييفو والثانيه حول ساعه ونص عبينا بنزين ٢٠٠ ريال تقريبا الطريق خلاب جميل وتوجهنا نحو ترافنييك قريه صغيره فيها نبع ماء يتدفق بقوه .. وحول النبع مطاعم اذا تحب تتغدى .. اللي جالس فتره طويله في سراييفو يروح يزورها ويتمشى فيها .. الحقيقه القريه مافيها ذاك زود تخلصها كلها في نص ساعه . وبعدها نحو المدينة الأروع من وجهة نظري ياييسي .. بحيره (بليفا) كبيره حولها مطعم وكافي وقوارب للنزهه .. ثم بحيره ثانيه للسباحه وعندها معلم سياحي مشهور اسمه الطواحين المائية جلسة البحيرتان رووووعه وبعدها رحنا قلعة ياييسي .. عشرات المطاعم والكافيهات فيها الجو كان شوي حار وشوي زين ياييسي تستحق تبات فيها .. لا تهجول نفسك رايح جاي .. زورها من بدري وتمشى واستمتع وبات .. وثاني يوم ارجع سراييفو احنا رجعنا في نفس اليوم وكانت متعبه في نص الطريق مرينا مطعم مشهور اسمه (سيميشنيكا) يقدم اللحم المشوي .. كان لذيذ والتكلفة 200 ريال .. ولأن وصولنا كان متأخر حول الساعه تسعه بالليل فما استمتعنا بالمطعم وجلسته الحلوه وتصميمه الجميل .. ولذلك انصح بالبيات في ياييسي .. والغداء ثاني يوم في ها المطعم .. وارجو الانتباه عند التوجه لها المطعم لانه على مرتفع وقوقل ماب يعطيك طريق ترابي سئ .. فالأفضل انك تسأل عن الطريق الجيد . |
برنامج اليوم الخامس/ ترافنييك ياييسي العشاء في مطعم (سيميشنيكا) |
اليوم السادس / الفطور في البوسنه متعب شوي واحنا متعودين على الفطور الشامل بيض وخلافه من جبنه وزيتون وعسل وشاي وبحثنا ولقينا موجود في مطعم اسمه ( ماما أمينه ) مطعم تركي يقدم وجبة الفطور والغداء اكل ممتاز والتكلفة كانت 80 ريال لشخصين وبعدها توجهنا لسوق شعبي اسمه سوق الأحد يقام كل يوم أحد فقط سوق شعبي ينباع فيه كل شئ تقريبا اكل .. ملابس .. أجهزة كهربائية .. أدوات سباكة .. أجهزة كمبيوتر .. جوالات .. وغيره وغيره البضاعه الموجوده ماهي بالحيل لكن توجد بعض الملابس الشعبيه الجيده والفواكه طيبه أخذنا فيه حول ساعتين ثم رجعنا للمنطقة القديمه ( بشارشيا ) وبعدها قبل الغروب بساعه توجهنا للعشاء في مطعم حديقة الأميرات طلبنا دجاج وسلمون وكان العشاء ممتاز والتكلفة 170 ريال الجلسه في المطعم حول الغروب جلسه رائعه وممتعه وانت مطل على سراييفو والجبال الخضراء من حولك .. والجو في المساء صار افضل . |
برنامج اليوم السادس / الفطور مطعم ماما أمينه سوق يوم الأحد الشعبي العشاء في مطعم حديقة الأميرات |
| الساعة الآن 12:20 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Friendly URLs by vBSEO