|
ماهي اعلى منطقة في بونشاك ؟ السلام عليكم ورحمة الله وبركاته بداية انا حجزت بتاريخ 20-09-2016 من دبي لجاكرتا على طيران الخطوط القطرية ، 3 شباب ، راح اوصل تاريخ 21-09-2016 العصر الساعه 3 ونص بطلع من المطار وبركب مع سواق اتفقت معه عن طريق صديق لي ، وع طول على الجبل بقعد 9 ايام بعدها برجع لجاكرتا طيارة على بالي بخطوط اير اسيا حجزتها الشخص ب 520 ريال تقريبا ، وحجزت 4 ايام ببالي بمنتجع اينا جراند كوتا بالي بيتش ب 2060 تقريبا من موقع المسافر مع فطور وبعدها العودة الى جاكرتا والمكوث فيها يومين بفندق ميديا هوتيل اند تاور ب 570 ريال مع فطور ثم العودة لارض الوطن . حطينا ميزانية كل شخص 4000 ريال يعني 12000 ريال شاملة سكن مواصلات اكل شغالة بما تقدم ، اريد ان اسأل اهل الخبرة في هذا المنتدى الموقر التالي : 1- انا احس اني متمشكل ببونشاك لاني ماحجزت سكن ، وكل اللي اريدة ثلاثة اشياء اولها المنطقة لازم ولازم تكون اعلى منطقة لكي تتميز بالاجواء الضبابيه >> مسافر عشان الضباب ، ثانيا فيلا نظيفة ثالثا تكون مناسبة للشباب فهل احد يقدر يفيدني باسم افضل واعلى منطقة ببونشاك تكون متوفره فيها اللي ابيه ؟ واذا يعرف في نفس هذه المنطقة فيلا لو يعطيني اسمها . 2- حجزت تذكرة داخلية ب 520 ريال الشخص الواحد هل سعرها مناسب او راح القى ارخص بالجبل ؟ مع العلم الذهاب يصادف يوم جمعة والعودة يوم ثلاثاء . 3- منتجع اينا جراند كوتا بيتش بالي 4 نجوم ، هل احد جربه وما رأيكم فيه ؟ خصوصا انه غالي الليله ب 500 ريال تقريبا مع انه على البحر 4- هل الميزانية وافيه ؟ وهل في اشيا اساسية نسيناها ؟ مع العلم ان كل واحد بياخذ معه 4000 لجيبة من غير القطه . 5- هل في نصائح تفيد جدولنا ؟ اعتذر على الاطالة وشاكر لكم وللقائمين على المنتدى الموقر |
عليكم السلام حياك اخي الكريم لا تتمشكل ولا شي الامر بسيط جداً احجز اول يوم فندق في بونشاك اصلاً ما توصل الا المغرب او بعد المغرب للجبل الصباح روح دور فلة على كيفك وتختار اللي تناسبك لان الفلل ما تجي دائماً كيفك اما تجي غير نظيفة او مكانها غير مناسب لذلك يفضل انك تحجز اذا وصلت ووقت سفرك ما فيه زحمة والكثير من الفلل فاضي اما الضباب غالباً يكون في ساعات الصباح الاولى بقية قليل او لا يوجد سعر تذاكر السفر يعتمد على الحجز المبكر كذلك وقت اقلاع الرحلة فمثلاً رحلات الفجر واخر الليل ارخص من رحلات الصباح او الظهر والسعر الذي وجدت جيد لكن يمكن اتجد ارخص بس هل الوقت مناسب لك لا اعلم لذلك اطلع على هذا الموقع يعطيك جميع الرحلات وخطوط الطيران ويمكن الحجز عن طريقة Tiket Pesawat & Hotel Murah - Tiket Kereta Api dan Promo | Tiket.com اينا جراند كوتا فندق معروف مطل البحر وله عدة فروع في بالي لكن عندي وجهة نظر اخرى بما انكم شباب اشوف انكم ما تحتاجوا فندق على البحر لسبب بسيط لان معظم وقتكم راح يكون خارج الفندق والفندق للنوم فقط وهذا تفرضه عليكم الناشطات والبرامج السياحية في بالي لذلك افضل انكم تسكنوا في فندق داخلي بحيث يوفر عليكم جزء من التكلفة شوف هذي فنادق في شارع كوتا الحيوي نظيفة جداً وموقعها رائع البحر 7 دقائق مشي Bintang Kuta Bali , EDEN Kuta Bali وفيه غيرهم كثير اما الميزانية حسابها يختلف من شخص الى اخر بحيث اذا كنت اقتصادي راح تكفي اما اذا كنت متوسط الصرف اشوفها تنقص عليكم مبلغ حدود 4000 ريال تقريباً اذا كنتم تبغوا تفلوها على قولنا اما الجدول جيد لكن افضل انكم تعدلوا عليه بشكل بسيط بحيث يكون 8 بونشاك و 5 ايام بالي النصائح 1- حجز سكن لكامل الرحلة في اندونيسيا مطبوع باللغة الانجليزية تحتاجه في المطار عند الجوزات 2- تذكرة مغادرة اندونيسيا مطبوعه باللغة الانجليزيه تحتاجها في المطار ايضاً 3- اسعار السواقين في بونشاك حدود 500 الف لليوم الواحد والتوصيل بين بونشاك وجاكرتا في 600 الى 700 بالكثير 4- السواقين في بالي 350 الف الى 450 الف لليوم الواحد 5- في جاكرتا انصحك تستخدم تطبيق اوبر او go jek او grab او تستخدم التكسي الازرق بلو بيرد والتسعيرة بالعداد 6- في جزيرة بالي لا تصرف عملة من الاكشاك الموجودة في الشوارع 7- النشاطات السياحية ولو تشتري تذاكرها من الاكشاك في شارع كوتا تكون ارخص ولازم تكاسر في السعر اي استفسار انا في خدمتك |
| الساعة الآن 10:00 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO