|
تخطيط الرحلة و تنظيمها و اقتراحاتكم السلام عليكم و رحمة الله و بركاته محتاج ل تنظيم رحلتي و تخطيطها علما اول مرة اروح ل اندونيسيا رحلتي بتكون في 16 نوفمبر و الوصول 17 نوفمبر بيكون الجمعه الظهر و العودة ب 28 نوفمبر الثلاثاء الظهر تقريبا يكون 12 يوم علي الخطوط السيرلانكية و اتمني تعطوني رايكم فيها لاني ما جربتها من قبل واعجبني فيها ترانزيت ساعه بالذهاب و العودة سمعت عن الجبل كثير و اتمني اني ازوره طبعا قررت يكون بين جاكرتا و الجبل واستبعدت التنقلات الكثيرة و يا ليت تفيدوني من ناحية الفنادق و المطاعم و مناطق او الحي المناسب للسكن في جاكرتا و الجبل طبعا احنا عائلة شخصين و طفل هاذي اول زيارة لي ل اندونيسيا مع اني من عشاق ماليزيا و زرتها كثيررر بس بعد ضغوطات الاخوان و الزملاء قررت تجربة اندونيسيا برحلة قصيرة لاني كنت غير مقتنع بسبب سمعتها سابقا و قررت تجربة اندونيسيا عندي خلفية عن حجوازت من المواقع و كل شي بس ناقصني خبرة الاعضاء ما شاء الله و تجارب الاخوان فيها و قريت كذا تقرير اسف علي الاطالة و ننتظر رددودكم و مشورتكم وشكرا مقدما للمنتدي و الاعضاء علي ما تقدمونه من معلومات تفيد الجميع اخوكم عبدالهادي أرسلت بواسطة iPhone بإستخدام Tapatalk |
اقتباس:
عليكم السلام حياك اخي عبدالهادي واهلاً وسهلاً بك في بيتاً الجميل فضاء العرب المسافرون اندونيسيا بلد جميل جداً ورائع و مع الاسف الشديد الجزء المكتشف منه والمخدوم سياحياً لا يمثل سوا 1% فقط اما باقي الاماكن فهي غير معروفه للكثير من الناس رغم انها جميلة جداً وربما لن تشاهد مثلها الا قليل في هذا العالم الكبير بالنسبة للخطوط السيرلانكية فهي ممتازة بستثناء الطعام المقدم على متنها فهو غير جيد عدد ايامك الفعلي هو 10 ايام فقط لان يوم الوصول والمغادرة لا تحسب ضمن الرحلة انا اخالفك الرأي في البقاء في مكان واحد التنقل ممتع جداً خصوصاً للاشخاص الخفيفين مثلك وانت وعائلتك لذلك اقترح عليك تقسم الجدول بهذا الشكل 5 ايام بونشاك 3 ايام باندونق 2 جاكرتا ولو انك تزيد الرحلة يومين يكون افضل بالنسبة للجدول والاماكن السياحية نرتبها لك بعد اعتماد الجدول وراح نعطيك اسماء مطاعم وفنادق و كل شي اتمنى لكم التوفيق |
اقتباس:
هلا و غلا فيك اخوي الردادي بالنسبة المدة هذا اللي اقدر احصله من العمل للاجازة ولا اخفيك سرا كنت ناوي العودة ل ماليزيا بس بعد الحاح الزملاء لزيارة اندونيسيا قررت اكتشافها و تجربتها بعد اكثر من 7 مرات زيارتي ل ماليزيا و سنغافورة قررت التغيير والتجربة لاجل اغير كل مفهوم في داخلي عن اندونيسيا وبالنسبة للتنقلات استبعدت جزيرة بالي و كذا منطقة لاجل استفيد من الوقت و اخذ فكرة عن اندونيسيا بس باندوق قريت عنها و لا اعرف عنها بس حبيت امزج بين الطبيعة و المدينة المتطورة ولا اكثر التنقلات كثير اذا كانت باندوق مثل الجبل و كنت اتوقعها كذا من الزملاء اكتفيت ب الجبل لتقاربها بالفعاليات او الطبيعه و طبعا حبيت يكون اكثر من يومين ل جاكرتا لاجل اكتشف اسواقها و شوارعها طبعا ليس للتسوق احب الاكتشاف أرسلت بواسطة iPhone بإستخدام Tapatalk |
الجبل منطقة ريفية صغيرة يغلب عليها العشوائية ويكثير فيها السائح العرب بشكل ملفت حتى اسماء المحلات الكثير منها عربي والكثير من السكان يتحدث العربية الطبيعة فيها جميلة فيها شلالات رائعه وحدائق جميلة جداً وجوها رهيب اما باندونق فهي مدينة كبيرة فيها اسواق ومولات وملاهي وبحيرات و براكين وحدائق وشلالات واذا كنت من محبي التسوق فيها الكثير من حلات الاوت لت تبيع ماركات بأسعار جيدة بالنسبة لتقسم اشوف ان توزيعي للايام جيد بحسب خبرة في تلك البلاد والرأي لك في الاول والاخر احنا نساعدك بس واي سؤال او استفسار احنا في الخدمة راح نوضح بحسب ما نعرف والجميع هنا ما راح يقصر معك بأذن الله |
حمستني كثير ل باندوق اني اشوفها و اكتشفها طبعا انت الاخبر مني في اندونيسيا وابي اعتمد جدولك ب اذن الله بس حبيت اوضح لك ميزانيتي وامكن تزود بعد سفرتي ب ايام او تبقي مثل ما هي طبعا ميزانيتي بتكون ب حدود 15 الاف من غير تذاكر الطيران الدولي الصافي بيكون 15 الاف بين فنادق و مصاريف كاملة بنظرك او برائيك بتكون كافيه للرحلة و اضافت باندوق او لا وان كانت كافيه اتمني ان تبدا بترتيب الرحلة لان كثير اشوف ردودك و اتحمست ب افكارك و جزاك الله خير علي كل شي تقدمه للمنتدى أرسلت بواسطة iPhone بإستخدام Tapatalk |
ما شاء الله ميزاتيتك حلوة واذا ما فيها تسوق راح توفر الكثير منها الاسعار حلوة في وقت سفرك ما فيه سياح كثير وبأذن الله اليوم او غداً راح نضع لك جدول مقترح ونعدل عليه على حسب رغبتك والشي المهم جداً في ترتيب الرحلة انك تسأل عن كل شي لانه ممكن انا يعجني شي واشوفه حلو لكن ممكن ما يعجب اشخاص كثرين غيري لذلك السؤال والاستفسار للتوضيح اشوف انه مهم |
الحمد لله علي كل شي و الشكر لله فوق كل شي بالنسبه للرحلة تخطيطنا يغلب عليه الكثير من الراحة و الاستجمام والاجواء صحيح متعبه شوي رطوبة ماليزيا بس سياحتها ممتعه و متطوره سريعه اكثر من قبل وبالنسبه للتسوق و مغريات التسوق ما تغرينا و لله الحمد علي قد الحاجه او المناسب و متفهمين الوضع لان السفر مو جديد علينا و عشنا تجربة السفر كثير بس خصصت تجربة اندونيسيا اكتشاف و استجمام و روقان اكثر من التسوق و لا هو الهاجس الكبير او الشي الضروري لدينا و خاصة ان معنا طفل عسى الله يحفظه بيكون له النصيب الاكبر اذا فيه تسوق و الا اذا علينا محتاجين للراحة و الاستجمام و الاكتشاف لاجل اشوف بعد الرحلة ب اذن الله هل تستحق اندونيسيا الزيارة و التكرار مثل ماليزيا او لا ما راح اكون مجحف في حقها بس حبيت اكتشفها و اشوف سر الاعجاب فيها و شكرا علي كل شي وانتظر ترتيباتكم و تنظيم الرحلة و الخيارات والنصائح من الجميع أرسلت بواسطة iPhone بإستخدام Tapatalk |
ونشاك اليوم الاول : حديقة تامان سفاري يوم كامل ولا يفوتك عرض الكابوي رائع جداً (الساعة 2 م) اليوم الثاني : حديقة شيبوداس فيها جلسات حلوة وشلال رهيب بس يحتاج جهد حتى تصله يستحق العنوة ثم زيارة منطقة الشلالات السبعة (شلمبير) منطقة جميلة جداً وسهل الوصول لها اليوم الثالث : مزارع الشاي ومسجد التعاون ومطل البرشوت وبحيرة الألوان ركوب الخيل بجانب مطل البرشوت ثم النزل من اعلى الجبل الى مطعم و مزرعة شيموري اليوم الرابع : ومصنع الشاي وحديقة الزهور و مزرعة الفرولة وبحيرة فينيسيا في كوتا بونقا و مقهي اسمه RAJA l موقعه قريب من كوتا بونقا اليوم الخامس : مغادرة الى باندونق المطاعم في بونشاك المطاعم في الجبل كثير وكل شي متوفر انصحك بمطعم السندباد راااائع وعندك مطعم ريدان وكمال ننا و فيه مطاعم عالمية كنتاكي وبيتزا هت وغيرها الفنادق منتجع بيسونا علم (هذا المنتجع هو الافضل لا تفوته) فندق ساهيد باندونق يوم الوصول : يفضل انك تطلع من الجبل بدري وتضع شنطك في امانات الفندق وتروح ملاهي ترانس ستديو رائعه جداً للكبار قبل الصغار اليوم الاول : منطقة تشيبودي : مزارع الشاي وبركان كواه بوتيه بحيرة سيتو باتنجن و بحيرة الضباب الكثيف بادنقان اليوم الثاني : زيارة بركان تانكوبان براهو و منتزه تشياتر للمياة الكبريتيه ومزارع الشاي وفيه مطعم رهيب كمكان فقط اما الطعام فهو عادي كامبو دون واذا توفر معك وقت ممكن تزور السوق العائم اليوم الثالث : مغادرة الى جاكرتا عندك طريقتين اما بالسيارة سائق خاص تكلف عليك 700 الف ربية او انك تخوض تجربة جديدة وتروح عن طريق القطار وتحجز اعلى درجه واسمها Executive وسعرها حدود 60 او 80 الف ربية ما افتكر بالضبط بس قريب من هذا السعر افضل الرحلات في الصباح او الظهر باندونق فيها محطة واحدة للقطارات اما جاكرتا فيها محطات كثيرة لذلك انت احجز من محطة باندونق الى محطة اسمها قمبير في جاكرتا تذاكر القطار تباع في تموينات اسمها الفا مارت او اندو مارت بقالات منتشرة في كل مكان في اندونيسيا مشابهه لبقالات ميد عندنا (للامانة انا جربت القطار ما عجبني بس فيه ناس كثرين جربوا بعدي يقولون انها كانت تجربة جميلة جداً) الفنادق في باندونق في باندونق توجد الكثير من الفنادق وتحصل على حسب ميزانيتك انا انصحك بهذه الفنادق فندق سنسا (احجز هذا النوع من الغرف تنفيذية سينيور) فندق ذا بافليون فندق نور اما اذا تبغى تدلع المدام وتجدد شهر العسل احجز في هذا الفندق ذه ترانس لوكسري باندونغ رااائع جداً يوجد مقهى في الادوار العلوية جميل جداً ويمكن زيارة حتى لو لم تكن نزيل في الفندق المطاعم افضل المطاعم العربية هناك هو مطعم الجزيرة كذلك يوجد مطعم اخر اسمه قهوة جاكرتا يوم الوصول : بقية اليوم تقضية تسوق اليوم الاول : تروح انشول لمدة يوم كامل ( توجد انشطة وملاهي والعاب مائية وتلفريك و عالم تحت الماء ومطاعم واشياء اخرى) اليوم الثاني : في الصباح تروح لحديقة تامان ميني وبعد الظهر تسوق (الخيار الثاني كيدزانيا جاكرتا للاطفال متعه من الاخر بقية اليوم تسوق) الفنادق في جاكرتا كثيرة جداً وعلى حسب ميزانيتك تحصل شوف هذا الفندق ممتاز بولمان سنتر بارك اما اذا تبغى شقق فندق وسيعه وراقية شوف هذي الشقق فريزر بليس سيتيابودى جاكرتا الاسواق هناك اسواق عصرية ومعظم بضاعتها جيدة وماركات عالمية مثل (اندونيسيا بلازا , تمان انقري ,جراند اندونيسيا، سنتر بارك ،بوري انداه mall puri indah ، Lippo Mall Puri ليبو بوري ، بلوك ام بلازا) كذلك توجد اسواق رخيصة مثل منقادوا و شباكاماسا وغيرها كثير الموصلات في جاكرتا التكسي متوفر في كل مكان وانصحك بتكسي لونه ازرق اسمة بلو بيرد ولو تستخدم تطبيق اوبر او قراب راح يكون السعر افضل ملاحظات عند الوصول للمطار راح يسلونك عن تذكرت المغادرة مطبوعة باللغة الانجليزية كذلك حجز اقامة في اندونيسيا لكامل مدة اقامتك ( سوي حجز من بوكنق واطبع الحجز والغية وخذ معك ورقة الحجز) التنقلات من مطار جاكرتا الى بونشاك يكلف 700 الف ربية سيارة خاصة ولو استخدمت تطبيق اوبر او قراب ربما يكلف عليك حدود 350 الف ربية ورسوم الطريق عليك ممكن 6ريال بس مارح يقدم لك اي خدمه غير التوصيل يعني ما راح فرضاً يوقف لك عند مطعم او تموينات وهكذا اما السائق الخاص يوصلك للجبل ويوقف عند اي مكان تبغاه بنفس السعر والعودة من الجبل الى جاكرتا بنفس السعر 700 الف ربية اما التنقلات في الجبل يكلف اليوم 12 ساعة 500 الف ربية كل شي عليه ما عدا رسوم المزرات السياحية فهي عليك التوصيل من الجبل الى باندونق 700 الف ربية واذا تبغاه يجلس معك في باندونق وهو من سكان الجبل راح تكون التكلف 600 الف ربية اما اذا كان من سكان باندونق فهي 500 الف ربية في اليوم 12 ساعة شرائح الجوال افضل شركة هي سمباتي سعرها فيها 4 جيجا نت حوالي 100 الف ربية 28 ريال بدون الاستخدام العادل اما اذا تبغى فيهااستخدم العادل سعرها 65 الف ربية وفيها 30 جيجا صالحة لمدة شهر محلات صرف العملة افضل سعر صرف يكون في بونشاك عند صراف بافقية او الاكبر اما في جاكرتا فهو VIP هو الافضل بطاقات الصراف السعودية لا تعمل في اندونيسيا الا بعد ان تتصل على البنك ويفعل لك الصرف هناك هذا ما في ذاكرتي الان واي شي ما هو واضح اسأل عنه نحن في خدمتك بعد التعب هذا كله لازم تتقهوى هنا في هذا الكفي https://www.arabtrvl.com/up/uploads/...5935989271.jpg اتمنى لكم التوفيق |
[emoji106][emoji106] تتقهوى بالعافيه بالنسبه للبطاقات التفعيل سهل و عارف طريقته بس كيف الوضع ب اندونيسيا و خاصة في الجبل و باندوق لاني متعود استخدمها في ماليزيا و اخذ معي مبلغ بسيط كاش للاحتياط و متعود استخدم الشبكة في البقالات مثل سفن الفن و ماركت 24 و هل متوفرة في المطاعم و البقالات مثل الجبل و باندوق و متابع لترتيباتك [emoji106][emoji106][emoji106] أرسلت بواسطة iPhone بإستخدام Tapatalk |
نعم الشبكة متوفرة في المحلات الكبيرة حتى في الجبل لكن في اماكن النشاطات السياحية الاغلب يكون الدفع كاش كذلك السائق راح تحاسبة كاش وحسب رائي المتواضع اشوف ان الدفع كاش افضل من الشبكة بكثير وافرق في سعر صرف العملة افضل بنوك تسحب من صرافتها هي بنك HSBC و MY BANK |
يعني احمل ربع المبلغ كاش او النص أرسلت بواسطة iPhone بإستخدام Tapatalk |
خذ معك 5000 ريال كاش والباقي في البنك |
ممتاز و بالنسبه ترشيحكم للفنادق لكل منطقة ابي ترشيح ل كذا فندق لاجل اطلع علي جميعها و اشوف المناسب و اخذ رائيكم اخوي الردادي فيه شي يدور بخاطري بصراحة و خاصة الجبل الفلل وش وضعها شفت مقاطع كثيرة لفلل بالجبل اطلالة و مسبح خاص و شي فوق الخيال ما ادري وش وضعها هل هي مناسبة و افضل و مدري كم اسعارها المشكله اكثرهم قسمين ناس تمدح و ناس تذم طبعا شفت اكثر من فله و اشوفها لوحدها فوق جبل بس احسها كبيرة بزيادة بس اطلالتها و ترتيبها روعه ما ادري كيف يا ليت توضحون لي كيف طريقتها اما بالنسبه ل باندوق الي الان احس متردد اكثر اللي اشوفه يغلب عليها التسوق كثير و ما ادري عن فعالياتها هل مثل الجبل و من ناحية الطبيعه نفس الجبل هل الغيها علشان اخفف التنقلات لان الايام قليله يهمني رايكم أرسلت بواسطة iPhone بإستخدام Tapatalk |
شفت سؤالك من امس بس قلت لعل احد الاخوة يعطيك رائ اخر بحيث انك تحصل على اراء مختلفه لكن خفت اني انسى الموضوع وتقول طنشني فلل بونشاك تحدثت كثيراً عنها وكنت دائماً اقول فلل بونشاك افضل حل لها هو حجزها عند الوصول لاسباب كثيرة وابرز تلك الاسباب النظافة والموقع لذلك اذا تبغى تحجز فله اول يوم احجز فندق واذا وصلت بالسلامة دور الفلة اللي تناسبك ولا تعتمد على الصور وتقع في خطأ وقع فيه كثير قبلك بالنسبة لباندونق فهي مدينة جميلة وفيها وفي اطرافها مواقع سياحية اكثر من بونشاك وفيها التسوق ان رغبت به واضافتها الى الرحلة او عدمه هذا راجع لك انت احنا دورنا نوضح ونعطي المعلومات فقط |
هلا و غلا ي الردادي شكل الاخوة منشغلين تعرف عمل و مدارس احس استقريت علي جدولك لاني ارتحت فيه كثير بعد تفكير بيكون الجبل ثم باندوق ثم جاكرتا وزعته طلع 5 ايام الجبل 4 ايام باندوق زودت باندوق علشان اكون اكثر اريحية من اوصل ولا احب كل شي سريع سريع ادور الفعاليات تعرف فيني برود شوي 2 يومين جاكرتا حسبتها من يوم الوصول 17 الظهر الي العودة 28 الظهر والفنادق عجبني بيسونا علم و ساهيد بس بيسونا علم ابنتظر رد ابو تميم لانه لا يوجد حجز بوقتي و بالنسبه ل ساهيد متوفر الحجز بس باقي فنادق باندوق من ناحية النظافة و ابشوف اللي رشحتها و كأنك طريت شهر العسل للتدلع قلت ابشوف الفندق اللي اخترته بس بالنسبه للقطار و الوصول ل جاكرتا كيف منطقة الوصول المحطة فيها تعب و عرقلات و مشاوير لان معي عائلة و ثلاث شناط من ناحية حمل الحقائب و كذا و شكرا الردادي علي سرعة التجاوب عسى الاخوة الباقين يشاركون ل نشوف ارائهم وشكرا لكم أرسلت بواسطة iPhone بإستخدام Tapatalk |
هلا اخوي عبدالهادي طيب ممتاز وبما انك زدت يوم في باندونق راح نعطيك مكان جميل تضيفة للجدول منتزه تمان جواندا و الكهوف اليابانيه والهولندية و شلالات ماربيا وتضيفه معه ملاهي ترانس ستوديو في وقت بعد الظهر بسيونا علم ممتاز اذا حصلت فيه واذا ما حصلت احجز شاهيد من تطبيق المسافر عارضينه بسعر حلو مره ارخص من جميع المواقع الاخرى في باندونق خذ فندق سنسا حلو جنب السوق ونظيف راح يعجبك بأذن الله اهم شي تاخذ غرفة تنفيذية جونيور بالنسبة للفطار انا صريح معك استخدمت ما عجبني بس فيه كثير من الاخوة استخدومه اعجبهم مره ويثنوا عليه قلت ممكن انا اكون معقد :1::1::1: عموماً الشنط لا تشيل همها يارجل انت في اندونيسيا الجميع يخدمك العمال متوفرين ياخذوا لك الشنط من السيارة الى داخل القطار ومن القطار الى السيارة وانت ما تشيل شي الا ممكن تطلعها من داخل العربة في الوصول فقط يعني المسافة 3 الى 4 امتار فقط وبعدين تحصل العمال في كل مكان تعطيه 50 الف 14 ريال يسوى لك كل شي يجيب لك تكسي ويشيل الشنط اهم شي درجة الحجز لازم تكون executif يعني مثل درجة الاعمال في الطائرة اما اذا حجزت الدرجة العادية راح تكون غطلة عمرك :1::1::1::1: شوف هذا الموضوع راح يفيدك كثير عن محلات الاوت لت في باندونق وهي كثيرة جداً ما يمديك تغطيها بس هذي المهم فيها https://www.arabtrvl.com/vb/t28801.html |
يعطيك العافيه ما قصرت يا الردادي بالنسبه للسواقين كيف طريقة الاتفاق و التعامل معهم و تنقلاتهم طبعا جاكرتا ما اتوقع احتاجه ل توفر البرامج التنقل مع ان البرامج الحاليه ما قصرت مثل اوبر و قراب فادتني كثير ب ماليزيا و استغنيت حتي عن التكاسي و تجربتها حلووووة مع الموصلات العامه لان ماليزيا ما شاء الله البنية التحتيه مكتملة الخدمات و ما شاء الله من ناحية الامان بعد الله و جربت البرنامج عن طريق قوقل ماب ممتاز جدا وانصح اي احد يسافر ل شرق اسيا يستخدمه افضل برنامج عرفته قراب أرسلت بواسطة iPhone بإستخدام Tapatalk |
الله يعافيك السواقين خلاص اسعار ثابته في الجبل 500 الف ربيه لمدة 12 ساعة كل شي عليه ما عدا رسوم دخول السيارة في المزارات السياحية هذي عليك وفي باندونغ نفس الشي الا اذا السواق جاء معك من الجبل وجلس معك في بادندوق في العادة راح ياخذ 600 الف ربيه اما اذا كان من سكان باندونق سعره 500 الف ربية في جاكرتا اوبر وقراب هي الخيار الافضل واسعارهم حلوة حتى في باندونق التطبيقات تشتغل بس المزرات السياحية البعيدة الافضل سواق خاص لان سواقين التطبيقات يوصلك فقط ما يستناك وبعد الخروج من المزار او الفاعلية ربما لا تجد من ياخذ خصوصاً البعيدة منها لكن داخل المدينة التطبيقات تعمل بشكل ممتاز |
يعطيك العافيه اخوي الردادي و الحمد لله علي كل شي تقريبا انتهيت من 80 من امور الرحله ما قصرت معي و اتعبتك ب اسئلتي ان شاء الله حجزت الرحلة من 17 نوفمبر الجمعه و الوصول نفس اليوم الظهر الساعه 2 و العودة ب 29 نوفمبر زودتها يوم ما عاد باقي الا احجز الفنادق اللي اقترحتها و قسمت الرحلة 6 ايام الجبل بونشاك 4 ايام باندونق 2 جاكرتا ابي رايكم و اقتراحاتكم واذا فيه تعديلات او شي من ناحية التقسيم و الترتيب في تقسيم الايام بعد ما زودتها يوم كان العودة ب 28 و صارت ب 29 الفنادق ابحجزها من النت و السواقين انتظر معلوماتكم و تجربتهم معكم و شكرا للجميع أرسلت بواسطة iPhone بإستخدام Tapatalk |
التقسيم لو يكون 6بونشاك 3باندونق 3جاكرتا افضل لاتفوت باندونغ جوها عجيب ومزاراتها متنوعه واسواق اسعارهم حلوه |
| الساعة الآن 12:25 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO