|
ابي فزعتكم لرحلة شبابية لاندونيسيا السلام عليكم ورحمة الله وبركاته ابي اقتراحكم لجدول الرحلة تاريخ الوصول الاحد ٧ يوليو لجاكرتا الساعة ٣:45 وتاريخ المغادرة ٢١ يوليو الساعة 00:40 للمعلومية اول مرة نروح اندونيسيا وتقبلو تحياتي تم الإرسال من SM-N960F باستخدام Tapatalk |
عليكم السلام عندك ياطويل العمر 13 يوم راح نقسهم على 3 مناطق 6 ايام بونشاك 5 ايام بالي 2 يوم جاكرتا طبعاً يوم الوصول غير محسوب في الجدول ويوم المغادرة كذلك 7 يوليو يوافق يوم احد مستحيل تستطيع الذهاب الى بونشاك انصحك تناموا تلك الليلة في جاكرتا والصباح تروح بونشاك او تجلس في جاكرتا الى بعد المغرب ثم تروحوا بونشاك مع العلم ان بونشاك يبعد 90 كم عن جاكرتا الجدول ان شاء الله نرتبه مع بعض بس بعد ما تعتمد لنا التقسيم اللي ذكرته لك في الاعلى او اذا عندك تقسيم اخر اذكره لنا |
الله يعطيك العافية عالجدول اخوي الردادي اعتمده . بس ما ادري هل باندوق تستاهل الزيارة ولا المدة قليلة ما تسمح للتنقل ؟ تم الإرسال من SM-N960F باستخدام Tapatalk |
تستاهل الزيارة يابو فيصل بس المدة قليله وبما أنه زيارتكم الأولى اشوف انكم تكتفوا بالمناطق اللي ذكرت لك و اذا تبغى نضع لك باندونق في الجدول ما فيه مشكله انت بس عطنا التقسيم اللي تبغى وابشر |
أهلاً أبو فيصل ... حبيبنا الردادي ... لا رأيٌ يعلو على رأيه ... ولكن من باب المشاركة بالرأي ... عندي ملاحظتين .. الأولى .. الاكتفاء بخط السير الذي وضِع دون إضافة باندونق .. طبعاً السبب كما ذكرتم ( قصر المدة ) الثانية .. التبديل بالليالي بين بونشاك وبالي .. بحيث تكون البونشاك 5 وبالي 6 .. أشوف بالي فعالياتها أكثر ومناسبة جداً للشباب .. |
تمام اعتمد الجدول اللي ذكرته اخوي الردادي وبيض الله وجهك . والله يجزاك خير اخوي كتكات على الملاحظات تم الإرسال من SM-N960F باستخدام Tapatalk |
خيراً فعلت ... ثم تأكد حبيبنا .. بأن البلد لا تكفيه زيارة واحدة ... جماله وروعته وبساطته .. حتماً ستجبرك على العودة له يوماً ما .. :) |
اقتباس:
ابشر يابو فيصل بس اصبر علي شوي حايسين في العيد :32::32::32: |
الله يبشرك بالجنة انت ومن يقرأ خذ راحتك وكل عام وانتم بخير تم الإرسال من SM-N960F باستخدام Tapatalk |
المعذرة يابو فيصل تاخرت عليك كثير لكن مع حوسة العيد وعندي رحلة بعد اسبوع والنوم ملخبط وخلها على الله بس في التقسم ذكرنا ان بونشاك 6 ايام وصولك الساعة 3 العصر قدامك حلين اما تجلس في جاكرتا الى الساعة 8 في الليل بعد تطلع بونشاك او انك تنام في جاكرتا والصباح تطلع الجبل وانا اشوفه هو الافضل بونشاك اليوم الاول : بحيرة الالوان + مزارع الشاي ومناحل العسل + مطل الباراشوت ( جدول خفيف لانك يمكن تنام في جاكرتا وتطلع الجبل الصباح) اليوم الثاني : حديقة تمان سفاري اهم شي لا تفوت عرض الكابوي الساعة 1.30 تقريباً اليوم الثالث : حديقة تشيبوداس (لازم تروح لشلالال البعيد وخذ معك قهة وشاي وفرشه) + بحيرة فنيسيا + متجر اوت لت راجا فيه مقهى في نفس المتجر حلو فترة العصر والمغرب اليوم الرابع : بحيرة الليدو (لا تشترى اكل من عندهم) + الشلالات السبعة + مزرعة ومطعم شيموري اليوم الخامس : مسجد التعاون (صلاة الجمعه) +حديقة الزهور + مزرعة الفراوله اليوم السادس : مغادرة الى بالي عبر مطار جاكرتا (الساعة 6 صباحاً ركز جيداً على هذه النقطه) المطاعم المطاعم في الجبل كثير وكل شي متوفر انصحك بمطعم السندباد و مطعم كمالننا المواصلات في بونشاك التنقل في الجبل سيارة خاصة اسعار السائقين للسيارة المخصصة الى اربع اشخاص هي 500 الف ربية لمدة 12 ساعة في اليوم تقريباً ملاحظات : يومي السبت والاحد حركة السير صعبة جداً في بونشاك لذلك اذا كان يوم مغادرتك او صولك يوافق احد هذه الايام احسب حسابك من هذه الناحية بالي يوم الوصول : شاطي جيمباران او ما يسمى شاطئ الغروب تتوفر الكثير من المطاعم البحرية على نفس الشاطئ مباشرة اليوم الاول : التجديف في نهر Telaga + مزارع القهوة ( افضل شركة لتجديف اسمها BMW السعر حوالي 230 الى 250 الف ربية للشخص ولا تنسى خذ معك ملابس غيار) اليوم الثاني: بحيرة براتان + مزرعة الفراولة + الحديقة النباتية Bali Botanic Garden (تذاكر اللنش في بحيرة براتان 122 الف تشتريها من داخل حديقة المعبد في الكشكات الخارجية تحصلها حوالي 300 الف) اليوم الثالث : غواصة بالي + رحلة دبابات الدفع الرباعي ومزارع الأرز (رحلة الدبابات خذ معك ملابس غيار) اليوم الرابع: العاب بحيريه شاطي نوسا دوا + الالعاب المائية ووتر بوم في شارع كارتيكا اليوم الخامس : مغادرة الى جاكرتا المطاعم المطاعم العربية في في بالي مطعم الخيمة و مطعم شيشه ومطعم كوين تندوري الهندي كذلك المطاعم العالمية كلها متوفرة ملاحظات : تذاكر رحلة الغواصه والدبابات والتجديف و الالعاب البحرية كلها تشتريها من الاكشاك في شارع كارتيكا في كوتا وهذا الشارع يقع امام فندق بينتانج كوتا مباشرة وكاسر في الاسعار قد ما تقدر وجرب روح اكثر من كشك راح تحصل فرق كبير في الاسعار واحذر من ان السائق يحجزها لك او تشتريها مباشرة من مكان الفعاليات مباشرة راح تتضاعف عليك القيمة كثير السكن في بالي انصحك تسكن في شارع كارتيكا في كوتا كل شي جنبك تروح له مشي هذا الفندق جيد فندق بينتانج كوتا كذلك فندق ايدن امامه مباشرة واسعارها اقتصادية التنقل في بالي الافضل سيارة خاصة مع سائق سعرهم حوالي 400 الى 450 الف ربيه لليوم 12 ساعة جاكرتا كلها تسوق والتنقل في جاكرتا بتطبق قراب هو الارخص او تكسي البلو بيرد التسعيرة بالعداد الطيران الداخلي مرتب حسب الافضليه الجارودا خطوط ستي لنك وخطوط بتيك نفس المستوى خطوط الطيران الاخرى انفذ بلدك لا تقرب منها هذا ما في ذاكرتي الان واذا فيه شي ما هو واضح او شي نسيت اذكره اسأل عنه كلي اذن صاغيه لك يابو فيصل واعذرني على القصور وياطويل العمر |
| الساعة الآن 06:47 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO