|
رحلة عمل 3 أشهر ارجو المساعدة السلام عليكم ورحمة الله وبركاته انا رايح للبحرين لمدة 3 أشهر محتار صراحة بعدة أشياء 1. السكن .. (وين أسكن وكم الاسعار التقريبية للشقق علماً اني لحالي). 2. الوضع الأمني .... (كيف الوضع الأمني خصوصاً اني بروح بسيارتي الخاصة). 3. كم تكلفة المعيشة اليومية هناك ... ( هل 4000 ريال بدون فسفسة تمشيني هناك لمدة شهر). 4. الإنترنت .. (الاشتراكات والاسعار .. ابي الأوفر). 5. هل البلد مريحاً نفسياً ؟؟؟ .... وكيف الأجواء خلال الثلاثة أشهر القادمة؟ اتمنى اجد اجابات تنهي الحيرة اللي براسي. شكراً لكم جزيلاً .. تحياتي |
مساء الخير في البدايه تروح وترجع بالسلامه بالنسبه للسكن انصحك تاخذ شقه بدل فندق وارشح لك شقق هانى رويال بس انتبه اختر الشقق مو الفندق في منطقه السيف والمنطقه جد روووعه ،، شقق رامي ٢-٣ فى منطقه الجفير بعد ممتازه *الوضع الامني كويس ومافيه خووف ابد * تكلفه المعيشه حسب تقديرك وصرفك بس المبلغ كويس * الانترنت خذ لك اشتراك خدمه زين ممتازه * البلد يجنن واهله طيبين ومتسامحين * الاجواء بدا جو الخريف وهو مقارب لجو الخبر والدمام رحله موفقه صموته |
يا هلا ومرحبا فيك في بلدك الثانيه البحرين بالنسبه لاسئلتك : السكن : يعتمد على مكان عملك او الغرض الي راح تكون بالبحرين له . هل تبغيه قريب من هذا المكان ؟ اذا لا اذا اتحب اجواء المنتجعات عندك منطقه امواج قريبه من المطار ومنطقه المحرق ممكن تحصل شقق مفروشه او استيديو . اذا ما يهمك البحر ممكن تسكن بمنطقه الجفير منطقه حيه بس مليانه اجانب مايسكنونها اهل البحرين . وكمان منطقه السيف والمنطقه المقابله لها (منطقه مجمع البحرين - السنابس ) فيها شقق مفروشه واسعار معقوله . وفي منطقه الريف شقق مفروشه وقريبه من المنامه والسيف حلو وعلى نهج امواج . وفي منطقه ام الحصم كمان شقق مفروشه اسعارها تكون ارخص نسبيا . الوضع الأمني : البحرين امن وامان وراحه بال ولا تخاف من اي شي . وبالغالب اذا بتسكن بشقه مفروشه اطلب منهم يعطونك موقف لسيارتك . 3. كم تكلفة المعيشة : السكن طبعا يعتمد على المنطقه وحجم الشقه _ الاستديو المفروش بالغالب لا يقل عن 300 دينار بالشهر وممكن يزيد طبعا على المنطقه والمميزات والحجم . بالنسبه للبنزين اغلى من السعوديه اشوي . الاكل كل مستويات الاسعار موجوده ممكن تتغدى ب دينار ونص وومكن تتغدى ب15 دينار انت وخياراتك . 4. الإنترنت عندنا ثلاث شركات بالبحرين Batelco - Zain _ Viva وكلهم عندهم شرايح مسبقه الدفع وشرايح شهريه مع انترنت ادخل صفحاتهم وشوف العرض الي يعجبك . بالمناسبه دايما اهل السعوديه يقولون النت والمكالمات عندنا ارخص من عندكم 5. هل البلد مريحاً نفسياً : بحكم اني بحرينيه بتكون شهادتي مجروحه ببلدي بس عندنا اهل من الرياض لما يجون يقولون احلى ما في البحرين الروقان بالناس والسياقه والاماكن ... ماعندنا توتر والناس تحب الضيوف وترحب فيها . وكيف الأجواء خلال الثلاثة أشهر القادمة: بالنسبه للجو انت جاي باحسن جو بالبحرين .. شهر 11 و12 و1 الجو يكون معتدل يميل للبروده احسن موسم لزراعة الورود وشهر 12 تكون البحرين مزينه بمناسبه العيد الوطني والشعب يحتفل فالاجواء سعيده . اتمنى لك اقامه سعيده واذا عندك اي استفسار او محتاج اي تفاصيل لاتتردد في السواء حاضرين لك . |
اقتباس:
أشكرك جدا جدا ... على معلوماتك المفيدة :) |
اقتباس:
اول شي أشكرك صراحة .. على معلوماتك القيمة والرائعة ... كفيتي ووفيتي. تفصيل رائع وشامل. انا عملي بيكون في الرفاع ... هل الاستيديو المفروش بمنطقة الرفاع.. ممكن احصل ايجاره بالشهر بحدود 200 دينار؟ وبما انك من اهل البحرين .. ف تحمليني شوي .. اسالتي كثيرة .. هل من الممكن اتواصل معاك في حال كان عندي اي استفسار مستقبلاً؟ شكرا جزيلا |
حاضرين لك اخوي بالنسبه للشقق المفروشه في الرفاع انا ماعندي فكره عن اسعارهم بالضبط بس احتمال اتحصل بحدود 200-250 . لانها تعتبر منطقه سكنيه مو سياحيه . اذا اتحب تبعث لي رساله بكل استفساراتك انه حاضره ارد عليك ان شاء الله واساعدكم كثر مااقدر . الله يسهل امورك ويوفقك |
شكرا للمعلومات القيمه .. و ياريت كل الاستفسارات تكون هنا و ليس في الخاص ..لفائده الجميع .. و عدم تكرار الاسئله .. جزاكم الله خير |
اشكركم بصراحة على اهتمامكم الواضح والجميل:e32c: |
وعليكم السلام ورحمة الله وبركاته 1. السكن .. (وين أسكن وكم الاسعار التقريبية للشقق علماً اني لحالي). بخصوص السكن تقدر تسكن في شقق مفروشة .. لكن أتوقع أنك راح تحصل بعض صعوبة في إيجاد شقق مفروشة في منطقة الرفاع أما الشقق العادية فهي كثيرة في هذه المنطقة وراح تكون التكلفة بين (150 إلى 250) على حسب الحجم والنظافة والموقع 2. الوضع الأمني .... (كيف الوضع الأمني خصوصاً اني بروح بسيارتي الخاصة). الوضع الأمني ولله الحمد ممتاز ومافي أي خوف من هذه الناحية. 3. كم تكلفة المعيشة اليومية هناك ... ( هل 4000 ريال بدون فسفسة تمشيني هناك لمدة شهر). التكلفة ليست عالية .. بالعكس إذا كنت لحالك (4000) تقدر تمشيك لمدة شهر بدون السكن طبعاً .. فلو قسمنا (4000) على الشهر راح تصرف (1000) كل أسبوع وهذا شيء جيد .. 4. الإنترنت .. (الاشتراكات والاسعار .. ابي الأوفر). طبعاً بخصوص الإنترنت هناك 3 شركات (فيفا + بتلكو + زين) من وجهة نظري الشخصية الأفضل في التغطية هي فيفا .. وعندهم نظامين نظام مسبق الدفع ونظام آجر الدفع (الفواتير) .. ولك حرية الأختيار .. وطبعاً تكلفة الانترنت ما راح تتعدى (15) دينار شهريا .. 5. هل البلد مريحاً نفسياً ؟؟؟ .... وكيف الأجواء خلال الثلاثة أشهر القادمة؟ الحمدلله البلد مريح نفسياً وفيه أشياء كثيرة .. منها المجمعات والأسواق والمطاعم والكافيهات .. وخصوصاً أننا مقبلين على فصل الشتاء فإن الجلسات في الأماكن المفتوحة راح تكون رائعة مثل جزر أمواج والريف والكافيهات المفتوحة في الهواء الطلق .. وتقدر ترتب لك برنامج أسبوعي لزيارة الأماكن السياحية والأثرية في البلد .. |
بالتوفيق ويارب تلاقي مين يساعدك |
| الساعة الآن 04:46 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO