|
هذه مجموعة نصائح عن كاليفورنيا ولوس انجلوس بعد زيارتي لها اعتذر الموضوع بدون صور فقط مجرد نصائح شخصية قد تفيد الي بيسافرون ل كاليفورنيا بداية اشكر المشرفين واعضاء المنتدى استفدت من نصائحهم بخصوص امريكا 1-اول نصيحة لاتسكن في لوس انجلوس ابداً,المدينة زحمة جداً طول الوقت والمشوار ابو 10 دقايق احيانا ياخذ ساعة,افضل منطقتين للسكن هوليود وبيفرلي هيلز ونفس الشيء زحمة وغالية ورعب ماتقدر تطلع بليل بعكس اورانج كاونتي كنا نجلس للساعة 11 خارج البيت والوضع طبيعي جداً 2- افضل منطقة للسكن هي اورانج كاونتي ممثلة بعدة مدن متلاصقة ( انهايم-فولرتون هذي الي سكنت فيها وكان خيار موفق جداً-سانتا انا-لاغونا هيلز-ارفين انهايم+ارفين منطقة يكثر بها العرب خاصة انهايم فيها محلات عربية كثيرة مدن هذه المقاطعة كثيرة جداً ومتلاصقة وبعضها صغير جداً يعني افضل مدن للسكن حسب ماشفته وتمشيت به فولرتون+انهايم+ارفين+سانتا انا وكلهن جمب بعض Fullerton Irvine Santa Ana Anaheim 3-يفضل تبحث عن شقق وانا ارشح موقع airbnb بتلقى شقق مع غسالة ملابس وصحون وهذه بتحتاجها لانك بتوفر فلوس الغسيل وبتكون ارخص من فنادق بوكينق 4- لاتسكن في لوس انجلوس نصيحة 5-ثاني يوم توصل فيه للولاية اول شيء تتجه الى wall mart وخذ احتياجات الشقة والاهم تأخذ من عروض ربطات الماء علبة 500 مل بتحصل عروض ممتازة اخذت من عندهم ربطة 40 علبة 500 مل ب 2.5 دولار سعر مميز جدا بالسوبر ماركت علماَ ان سعر علبة 500 مل بالبقالات برا العلبة الوحدة ب 90 سنت يعني دولار الا شوي 6-لاتسكن في لوس انجلوس نصيحة 7-لاتحرص كثير على المطاعم العربية مطاعم كاليفورنيا بشكل عام ممتازة والنظافة جيدة جداً لدى الكل واذا تبي شيء لذيذ وسعره رخيص مطعم in-out-burger هذا شبه يومي ناكل منه اكله لذيذ جدا ورخيص ارخص واحلى من ماك وبرقر كنق بكثير 8-لاتسكن في لوس انجلوس نصيحة 9- جلست 12 يوم في فولرتون رحت ل سان دييغو مرتين ولوس انجلوس مرتين وموقع المدينة متوسط بينهم المشوار ياخذ حوالي ساعة ونصف ل سان دييغو وساعة تقريبا ل لوس انجلوس وقدرت اخلص كل الفعاليات الى درجة زرت جبل big beer lake وتزحلقنا بالثلج مع انه كان اطول مشوار بسبب الطرق الجبلية الي جابت لنا الدوار والدوخة ههههه لكن كان مشوار جميل جدا والتزحلق ممتع ورخيص 20 دولار لكل شخص وابني عمره 3 سنوات دخل مجانا والميزة تلعب لين تتعب 10- افضل موسم لزيارة كاليفورنيا هو الربيع والشتاء لاتفكر تزورها بالصيف كنا بعض الاحيان نشغل المكيف البارد في اول ايام يناير الظهر فما بالك بالصيف كيف بيكون الوضع؟ هههههه شكلها بتكون شواية مثل الرياض والنصيحة الاخيرة هي لاتسكن في لوس انجلوس نصيحة واسكن في اورانج كاونتي شوارع اوسع-اقل زحمة-مدن مرتبة وجميلة-اللون الاخضر بكل مكان-الناس لطفاء اكثر من لوس انجلوس-الامن افضل من لوس انجلوس استغرب كثيراً من المواضيع الكثيرة عن هذه المدينة التي كرهتها بشكل كبير بسبب زحمتها وكثرة الهوملس والشوارع المخيفة |
شكرا على النصايح و ياليت تقولنا ايش كان المخطط في لوس انجلوس وين رحت و حبذا لو تدعم بالصور افضل |
عادي اسكن في اي منطقة اهم شي ما فيها عرب |
نصائح رائعة وصحيحة 100% أخ سلطان:e335::e335::e335: أحييك عليها بالرغم من زياراتي المتكررة للوس أنجلوس لم أسكن قط في الشمال فدائما إقامتي في الجنوب وما احب أروح للشمال إلا نادر لمطعم معين او سوق او شي وأتوتر يومها وأتعب من الزحمة وطول الطريق وندرة الباركنات وغلاء أسعارها نصائح جميلة لمن يزور الغرب للمرة الأولى ..والنصائح أغلى من الصور .. يهمني كتابة تجارب الأعضاء و نصائحهم لإخوانهم اكثر من الفرجة على الصور لأن الكل حافظها خلاص والمواضيع الأخرى مليانة صور أهم شي لاتبخل بالنصيحة على إخوانك وخواتك حتى لو ماعندك صور من زيارتك فتجاربك تنفعهم أكثر من صورك.. شكرا لك وبوركت جهودك:e030: |
قواك الله اخوي سلطان على هالنصايح المهمة |
مشكور أخوي sultan على المعلومات المفيدة .. المشكلة كثيرين عندما يقرر يسافر يأخذ النقطة الأولى من الوجهة و يعتمد مخطط رحلته عليها و يصدم عندما يصل بأن كل شئ مخالف لما هو يعتقد .. على سبيل المثال .. كثيرين يعتقدون أن السفر إلى الغرب الأمريكي لابد من السكن في لوس أنجلوس بينما مدينة لوس أنجلوس كما تفضلت لا تسكن بأي شكل من الأشكال .. |
طيب مو مشوار يوميا رايح جاي لوس انجلوس خاصة مع الزحمة . رحلتي في مارس وللان ماقررت على منطقة للسكن . |
شكرا على النصائح المهمه |
اقتباس:
الله يسعدك الصور كلها عندي عائلية خاصة لاني بالسفر ما اصور الا سيلفي لي ولعيالي ولا احب تصوير الاماكن وهذه طبيعة فيني بكل سفراتي الفعاليات كالتالي يونفيرسال سيتي جبل بيق بيير ليك سان دييغو عالم البحار وجزيرة كونراد واوت لت على الحدود مع المكسيك والداون تاون باقي الفعاليات كلها تقريبا في اورانج كاونتي عالم ديسكفري للفضاء -- الي معه اطفال ضروري يزوره ممتع جدا لهم وتعليمي تثقيفي ترفيهي ولايحتاج لغة كلها شرح باللمس والتحريك شاطئ لاغونا بيتش-هذا الشاطئ سحرني انا وزوجتي وعشقناه كثيرا اجمل شاطئ في كالفيورنيا شاطئ لونغ بيتش جميل ومرتب لكن مزدحم اكثر من لاقونا مول سبيكتروم ارفين زرنا حديقة الفروالة ب سان دييغو لكن كان المحصول توه يطلع وقالو القطف يبدا بمنتصف فبراير لكن رضاوة عطونا 4 حبات وكان طعمها لذيذ زرنا ايضا كهف كلاب الماء بقرية على مدخل سان دييغو وكان المنظر جميل جدا خاصة المطل المشهور الي باعلى الجبل وهذه الفعالية حبوها عيالي خاصة لما تجمعت حولنا الطيور بالشاطئ كان المنظر جميل |
اقتباس:
ليه ياخي والله اني انبسط اذا شفت العرب واسلم عليهم انا واهلي احلى واجمل ناس الله يحفظ العرب والمسلمين |
اقتباس:
اقتباس:
اقتباس:
الله يسعدكم |
جزاك الله خيرا وحمد لله علي سلامتكم عندي استفسار انا ان شاء الله سوف اسكن في سانتا انا هل التحرك فيها بالاوبر افضل ولا بالسيارة كسيدة لحالي لان زوجي عندة مؤتمر وما هيكون معي اغلب الوقت |
اقتباس:
ياعزيزي ليه تروح يوميا لوس انجلوس في 12 يوم ماجيت لوس انجلوس الا مرتين فقط مرة لزيارة يونفيرسال سيتي - انصح بها بقوة واطلعو بدري واساسا هي تفتح 10 يعني لوتقومون 8 وتحركون 8 ونص توصولون قبل الافتتاح بنصف ساعة بالويك اند تفتح 9 الصباح بس زحمة المرة الثانية لزيارة سانتا مونيكا وشارع المشاهير بصراحة ما استمعت كثير المحلات غالية جدا محلات الاوت لت افضل وارخص منهم اسكن في اي مكان ب اورانج كاونتي لاتسكن شمال بلوس انجلوس راح تتحسف ولو تبي تقتنع الساعة 7 مساءا بتوقيت السعودية افتح قوقل ماب على كاليفورنيا وشوف حركة المرور فوق لوس انجلوس كل الطرق السريعة حمراء اورانج كاونتي جميلة جدا خاصة المدن الي ذكرتها وشوارعها كبيرة فسيحة افضل مكان للبحث تروح تقرب ل ديزني لاند وتسوي دائرة تبحث عن افضل الشقق والفنادق شوف حول ديزني لاند فيه عمائر كثيرة فنادق وشقق وفيه كافيهات ومطاعم وجميلة المنطقة لكن ممكن تكون غالية شوي لو تبعد يمين شوي جهة فولريتون الي سكنت بها او تحت جهة ارفين او يسار جهة سانتا انا كلها مناطق ممتازة |
اقتباس:
كاليفرونيا كبيرة مرة مشاوير اوبر بتكون غالية وسعره اعلى من التعرفة عندنا بالسعودية خاصة ان الضرائب بالولاية من اعلى الضرائب بامريكا ارى انه خيار غالي جدا ايجار السيارات عندهم رخيص اذا انتي تسوقين افضل لك تستاجرين اذا ماتقديرن مالك الا اوبر والله يعينك غالي جدا الا للمشاوير البسيطة حول سانتا انا مثل ديزني ومول سبيكتروم ولونغ بيتش هذي بتكون متقاربة بيكون اسعارها تقدرين عليها |
جزاك الله خيرا ان شاء الله باخذ بالنصيحة |
انا رحلتي لكاليفورنيا في مارس ومخصصه ٥ ايام لشمال لوس اننجلس .. هل المنطقه سيئه لهاذي الدرجه |
يعطيك العافيه اخوي على النصائح وذكر تجربتك انا مادري ليش نتهرب في السكن مع العرب مع ان احنا عرب مثلهم شكراا للنصائح |
اقتباس:
و الله يا أختي أم حسين .. أنا لي تعقيب على هالموضوع "بعد أذن أخوي sultan" القصد مو السكن مع العرب .. المقصد بصراحة التعامل مع العرب في السفر لأنه حصلت لنا مواقف كثيرة من البعض منهم و لا نعمم .. دائماً الأستغلال يكون هدف مقدم عند بعضهم عندم يعلم أنك عربي و تحديداً خليجي .. لا زلت أتذكر موقف في أمريكا حصل لي مع شركة تأجير بسبب شخص مرر لي معلومة من أجل مصلحته الشخصية للحصول على عمولة من شركته ... و بعد أكتشاف خلل في السيارة و أعادتها و تقديم شكوى وردني أتصال و أعتذار من مسئول بالشركة مع تقديم خصم عن مدة عدم أستفادتي من السيارة و أعادة فرق المبلغ الذي تجاوز 800 دولار |
اقتباس:
شكرا علي النصائح اخي الكريم هل تاجير السياره بالرخصه السعوديه ام لابد من وجود رخصه دوليه هل يوجد تطبيق معين ام الذهاب الي محل التاجير افضل مع الشكر |
اقتباس:
انا اخذت الرخصة الدولية بس ماطلبوها اكتفو برخصتي السعودية واعتقد انهم متساهلين بالنقطة اكثر من اوروبا الحجز عن طريق المواقع افضل من الوسطاء يعني احجز من الشركة نفسها avis عروضهم حلوه يعطونك السيارة مع تامين شامل وضد الغير واسعارهم مناسبة اخذت تاهو 2020 فل كامل بريموم مراتب مفصولة 12 يوم ب 500 دولار مع التامين الشامل 0 تحمل الفيزا حقت الاستثمار بطاقة السفر ام العملات رفضتها الموظفة قالت هذي ديبت كارد لازم كريدت وللاسف مامعي قالت مانقدر نأجرك قلت زوجتي معها كريدت قالت ممنوع لازم نفس الاسم طبعا شرحت لها ان احنا جايين من رحلة 23 ساعة وتعبانين وشقتنا بعيدة وشافت معي اطفال راحت كلمت المديرة الي وافقت تخلي الوديعة على بطاقة زوجتي وبصراحة موقف غريب والحمد لله تسهلت معنا |
اقتباس:
أنا سكنت في لوس انجلوس السكن في المدينة ليست سيئة لهذه الدرجة اخذنا فيلا في شارع واسع ونظيف وفي العودة شقة مرتبه عن طريق تطبيق Airbnb صحيح السكن في اريفاين مثلاً أفضل وأكثر آمان ولكن لا يمنع من تجربة السكن والسياحة في لوس انجلوس :72: شكراً لك على النصائح |
شكراً على النصائح الثمينة يا سلطان أنا برضه سكنت في هوليوود وكانت جميلة لكن اتفق معكم في كثرة الهوملس شئ غير معقول أما المشاوير كنت استخدم Lyft وكانت الأسعار عادية مش غالية لوس انجلوس راح تكون المحطة القادمة في تقريري لذا راح أتكلم عن السلبيات والايجابيات الله يسعدك |
شكرا على النصائح المهمه |
شكرا على النصايح |
اتفق معك اخ سلطان اغلب النقاط مهمة جدا |
تسلم اخوي على النصايح الهامة🌷 |
مرحبا لوس انجلوس صحيح مزدحمة لكن فيها فنادق جميلة جدا واغلب الفنادق فيها shuttle تنقل السياح لجميع الاماكن السياحية ببلاش والسكن فيها افضل من اورانج كاونتي ( لان اورانج كاونتي منطقة سكنية مو سياحية ) واسهل بالتنقل لازيارة الاماكن السياحية ( هوليود ويونفيرسل استديو وديزني لاند والمولات وبعض الاماكن السياحية ) الافضل بلوس انجلوس السكن في الفنادق ( لوس انجلوس فيها الكثير من فنادق عائلية ). وكاليفورانيا بالصيف حارة بعض الاشهر ( 8 و 9 فقط حارة ) |
| الساعة الآن 03:02 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO