|
6 مرفق السلام عليكم ورحمة الله وبركاته شهركم مبارك وكل عام وانتم بخير ،، وأسال الله ان يرفع عن الأمة البلاء والوباء ويمتعنا بالصحة والسلامة:e022: ترددت كثير اني انزل تقرير رحلتي الأخيرة الى شرق أمريكا ولكن بحكم اني اغلب الوقت في البيت وكان لازم ارد بعض الجميل للمنتدى اللي استفدت منه كثير في كل رحلاتي السابقة فأتمنى ان التقرير ( الخفيف ) ينال بعض رضاكم. المسافرين: انا وزوجتي وولدي بدر ( 6 سنوات ) اختياري للشرق الأمريكي كان لسببين: أولا/ إن الأجواء الطف من الغرب بحكم انه اغلب الأوقات مطر ثانيا/ انا سافرت لوس انجلوس في 2011 وجلست 5 شهور في معهد لغة فقلت لازم اغير واشوف ولايات ثانية ونجربه جديدة. تاريخ الرحلة: 28 يوليو الى 14 أغسطس 2019 طبعا السفرية كانت سريعة وخفيفة ومفاجاة والهدف منها تغيير جو قبل الدوام الطيران: الخطوط السعودية طيران الإتحاد ( أول واخر مره ان شاء الله ) دلتا سير الرحلة: جيزان - جدة - أبوظبي - نيويورك نيويورك - أورلاندو ميامي - نيويورك نيويورك - أبوظبي - جدة - جيزان طبعا لانها رحلة سريعة وتنقلاتها كثير فاكيد بتكون متعبة ولكن الحمد لله ماحسينا باي تعب. للأسف التقرير مافيه صور كثير لاني مااحب التصوير والصور كلها خاصة فاعذروني وبسم الله اقلعنا لنيويورك بعد انتظار 6 ساعات في مطار أبوظبي وللأسف وجبات طيران الاتحاد سيئة جدا ( الحمد لله على النعمة ) وصلنا مطار نيويورك بعد رحلة طويلة والمطار زحممممة وللأسف هنا الصدمة الشنط ماوصلت :15: طبعا اتجهنا لمكتب العفش سجلنا بياناتنا وبيانات الفندق وقالو ان شاء توصلكم بكره وانطلفنا بتاكسي لفندقنا في تايمز سكوير ( سوفيتل نيويورك ) صراحة الفندق حلو وموقعة حلو والموظفين متعاونين وكان مطر واجواء روعة ملف مرفق 5247 طبعا ريحنا دقايق ونزلنا اكلنا في مطعم شيبوتلي ( يعجبني من أيام لوس أنجلوس ) واكيد اول مشوار في نيويورك للأسف كان للتسوق احتياط في حال اذا الشنط ماوصلت :26: دخل علينا الليل واحنا تعبانين جدا من الرحله والتسوق ورجعنا الفندق ملف مرفق 5246 وثاني يوم صحينا على امل ان الشنط وصلت ولكن زي ماتوقعت وطبعا راسلتهم ايميلات وتويتر واتصال وقالو بكره قلنا خير الحمد لله اننا عاملين حسابنا وتسوقنا اول يوم. المهم افطرنا ماادري وين ههههه صراحه نسيت والله وطلعنا تمثال الحرية حجزت التذاكر اونلاين وكان يوم ممطر ومن احلى الأيام ملف مرفق 5250 ملف مرفق 5248 واخذنا حوله سياحية بالباص وبعدها رجعنا التايمز سكوير وكمان للأسف تسوقنا للاحتياط وتعشينا في مطعم الرحلة ( ماك ) وجلسنا في براينت بارك وحلينا بوافل ورجعنا الفندق. وثالث يوم لا جديد الشنط ماوصلت وطبعا ايميلات وتويتر ومافي فايدة المهم وطلعنا فطرنا ماادري وين برضو ههههه وانطلقنا على سنترال بارك واخذنا جوله كاملة فيها وكان يوم حار جدا وانا بصراحه كنت متنرفز يومها من طيران الاتحاد ( مالي نفس اصور شي ) وبعدها كان لازم ناخذ صورة مع فندق بلازا ونسترجع ذكريات هوم الون والطفولة :) ملف مرفق 5249 وبعدها تغدينا في مطعم إيطالي في التايمز سكوير Olive Garden لذييييذ وكالعادة تسوقنا ورجعنا الفندق نريح عشان بنحضر عرض The Lion King عرض إبداااااااااع حاجه خيال صراحه ويستاهل قيمة التذكرة الشي الوحيد اللي كنت ابغى اصوره وكان ممنوع :) ملف مرفق 5245 وبعدها حلينا في براينت بارك ورجعنا الفندق وان شاء الله الجزء الجاي بيكون لاخر أيام نيورك واورلاندو :) |
شهر مبارك وكل عام وأنت بصحة وسلامة بداية جميلة يابو بدر اختيارك للسكن موفق و براينت بارك رائعة خاصة دروس التمارين اليومية بس طيران الاتحاد مصخوها 3 أيام بدون شنط والله مشكلة بداياته كانت ممتازة بس بعد كذا كثير يشتكي منه متابعين معاك :58: |
و عليكم السلام و رحمة الله و بركاته .. الشهر مبارك علينا و عليك أخوي أبو بدر .. أمريكا خيار موفق دائماً .. و السكن في التايم سكوير روعة .. و مع الآسف طيران الأتحاد فقد الكثير من عملائه بسبب التجارب السيئة .. و أتذكر بأني سافرت معهم سفرة وحيدة قبل سنوات إلى شرق أسيا و بعد العودة قررت أن لا أكرر التجربة مهما كانت المغريات و الحمد صمدت و لم و لن أعيد تجربتي السيئة ... بأنتظار أستكمال التقرير متابعين |
حياك الله أخي بو بدر في بوابة أمريكا..واختيار موفق إنك قررت تستغل فترة البقاء بالمنزل هالأيام وتمتعنا بتقرير جميل عن الجميلة أمريكا :2: ربي يرفع هالغمة عاجلا غير آجل عن جميع دول العالم ونرجع نزورها ونستمتع فيها.. الله يعينك تجربة ضياع الشنط تنكد على الواحد وتخرب موده لأن صعب الواحد يحصل كل احتياجاته اللي جايبها ومرتبها للسفرة هذي وخاصة لو في أدوية كمان ..لأن حتى أبر الأنسولين لازم وصفة هناك وراح تدخل مستشفى وتحجز موعد ومقابلة طبيب وكتابة روشتة وشوف كم تدفع عاد لهذا كله .. يالله الحمدلله على كل حال.. مستمتعين بالمتابعة يا بو بدر بس ياريت تكبر الصور.. |
خط السير طويل جدا والله الشنط مشكلة كبيرة اذا تاخرت تخيل فيها علاج مشكور على التقرير الطيب |
تقرير جميل وجا بوقته جزاك الله خير الاتحاد كل واحد يشتكي منها مع ان يقولون ابوظبي افضل للتخليص الجمركي لامريكا الجناط مشكلة الواحد يدخل جناطه معاه يعني جولات جميله واشوف الصور جمييله جداا حسافه ماكو وايد صور متابعين باستمتاع |
حياك الله اخي ايمن ومشكور على طرح تجربتك للسفر الى امريكا بسلبياتها واجابياتها الاتحاد الاماراتية معاناه جدا مع المسافرين اسوء شركة في التعامل مع الشكاوي لا احد يرد عليك ولاتقدر توصل معلوماتك في انتظار الجزء الثاني من الرحلة تحياتي لك |
اقتباس:
هذا يا ام حسين الى يخلينا نختار طيران الاتحاد الاماراتي لان هناك في مطار ابو ظبي التخليص الجمركي لكن ان شاء الله يفتحون في جدة وفي الكويت على ما اسمع |
ان شاءالله يسهل على الكثير |
الله تقرير أمريكي مستمتعين في السرد الحلو والله يسامح الاتحاد على مستواها اللي للاسف وايد تغير للاسوء |
| الساعة الآن 10:38 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO