|
ملاحظات على مطار الملك عبدالعزيز الدولي في جده السلام عليكم ورحمه الله وبركاته بتكلم اليوم عن ملاحظاتي على مطار الملك عبدالعزيز الدولي في جده في ايجابيات وفي نقاط تحسين واتمنى توصل لاداره المطار بتكلم عن رحله المغادره من جده اولا: اول ما وصلنا المطار كنا ندور حمالي يشيل عنا الشنط وللاسف ما لقينا نقطة التحسين : التعاقد مع شركة لحمل شنط المسافرين دخلنا المطار وماشاء الله عليه كبير وايد ولان اول مره ندخله تمينا واقفين لحظه نبي نعرف وين نروح وهني المفروض يكون في موظفين من المطار يدلون المسافرين وين يروحون لان بعدين اتضح ان فيه كاونترات للرحلات الدوليه وكاونترات للرحلات المحليه على الطيران السعودي ثانيا:وقفنا ننطر دورنا عشان ندخل الشنط وللاسف وايد انتظرنا على بال ما يوصل دورنا مع العلم ان جدامنا ٢ مسافرين بس الملاحظه: اجراءات التشيك ان وايد طويله ، يطلب منك الموظف تحط الشنطه الاولى على سير الوزن وبعدها تشيلها وتحط الشنطه الثانيه وياخذ وزنها وتنزلها وتحط الثالثة وهكذا طبعا انا اعترضت على هالاجراء وقلت للموظفه ليش كل هذا؟ قالت عشان اخذ وزن كل شنطه واذا في زياده تدفعون؟! نقطه التحسين: احسبي وزن كل شنطه على حده وحطي التاق ودخليها واذا كان في وزن زياده اطلبي من المسافر يدفع ، بس سالفه دخل شنطه ورجع شنطه حركه متعبه خصوصا للعوائل اللي عندهم شنط وايده ومافي حمالي يساعدك في الشنط ٢.ممكن يسون كاونترات للمسافرين اللي مسوين تشيك ان اون لاين لتسهيل اجراءات دخول الشنط 3. ما انه مطار يديد من الممكن يحطون اجهزة التشيك ان الذاتية ادخل رقم حجزي واطبع التاق واحطة على الشنطة واتجهه الى كاونتر ادخال الشنط وبجذي اظن بتقل الزحمه في نقطه ايجابيه : قالت لي الموظفه انتي مسويه اون لاين تشيك ان وعندج البوردنيغ باس على الايميل فما يحتاج اطبعه لج , كل نقطة بتمرين عليها ويطلبون البوردينغ طلعيها من الايميل وبيسون لها SCAN وهذي نقطه ممتازه ونقلل الورق ونحافظ على البيئه ثالثا: دخلنا عند الجوازات وكان في كاونتر لدول مجلس التعاون بس للاسف اللي واقفين فيه كلهم معتمرين من الفئه الاسيويه بدون ذكرالجنسيه تمينا واقفين وقلت بتخلص المسافره وبتنادي علينا الا انها كملت واخدت المسافره اللي بعدها وشوي صار هجوم من نفس الجاليه على كاونتر الجوازات الوقت يمشي ويقترب وقت طيارتنا ( تاخير في ادخال الشنط والجوازات!) فسالت الموظفه مافي كاونتر خاص لمسافري مجلس التعاون وقالت لي ابشري بخلص هالمسافره وبخلصج دخلنا صوب التفتيش ونفس المعاناه من نفس الجاليه ونفس المعاناه اكثر من وحده تكون تحت بوابه التفتيش والاجهزه جدا حساسه لانواع المعادن، انا رجعوني اكثر من مره وفصخت الجوتي الله يعزكم واخر شي تحولت للتفتيش الذاتي الملاحظه موظفات الجوازات والتفتيش يبذلون جهد وطاقه كبيره مع هذي الجاليه وصراخ وغيره بس مايفهمون على الموظفات وهل يضيع جهدالموظفه وصحتها ووقت المسافرين نقطه التحسين : اعطاء دوره للموظفين بعده لغات ويتعلمون كلمات بسيطه مثل اوقف ورى الخط ، حط الابهام على جهاز التبصيم، ارجع ورى الخط ..الخ وهالشي بيسهل عليهم ويبوفر جهد كبير على الموظفات او اداره المطار توظف عامل يتكلم بالاوردو لتنظيم صفوف المسافرين على الاقل يفهمون عليه رابعا: بعد التاخر في الجوازات والتفتيش نركض عشان نوصل للبوابه شفت رقم البوابه من الشاشه وبعدين نسيته مشينا لين وصلنا صوب القطار وفي خيارين يا تركب القطار او تكمل سيده وتروح على التيرمنال ولاني نسيت رقم البوابه استفسرت من واحد من الشباب اللي يشتغلون بالمطار وواقفين عن باب القطار وخبرني مشكور اني لازم اركب القطار واتجهه للبوابه رقم A41B وماشاء الله عليهم مدربين على مساعده المسافرين ولبقيين في التحدث خامسا: ركبنا القطار وماشاء الله عليه سريع ونظيف وصلنا الترمينال ومشينا على حسب اللافتات للبوابه الملاحظه : المطار يحتاج يزيدون فيه محلات duty free لان المطار كبير وتمشي تحس بالمسافه كبيره ولو في محلات وكشكات للتسوق مابتحس بالمسافه الطويله منطقه المطاعم ما لحقت اروح لها لان مافي وقت رحت لمحل W smith وللاسف مافي موظف وشفت احدى الموظفات وسالتها عن الموظف لان ابي اشتري واحاسب واللي بشتريه موجود بس في هالمحل, قالت لي هم دايما جذي ما يتواجدون في المحل قلت لها انزين اتصلي بمسؤول يشوف وين مكانه قالت لي هذي شركه خارجيه منفصله عن المطار نقطه التحسين : المطار بحاجه شركه قويه لادارته وتشغيله واستيعاب اعداد المسافرين عليه لينجح وينافس المطارات العالميه ماشاء الله تبارك الرحمن كل شي موجود من مبنى جديد ومعدات الا ان الاداره جدا ضروريه لانجاح سير عمل المطار اخيرا: الحمامات عزكم الله ما تتواجد عند البوابات وغير نظيفه ومافي عامله نظافه لتنظيفه على طول نقطه التحسين : التعاقد مع شركه نظافه للاهتمام اكثر بنظافه الحمامات وعمل الصيانه اللازمه لها ساعتين تقريبا قضيتها بين ادخال الشنط والجوازات والتفتيش وهذا وقت كبير جدا متعوده واذا في زحمه على التفتيش في المطار اخلصها في نص ساعه على اقصى تقدير |
وعليكم السلام ملاحظات في مكانها والمطار لازال جديد ومع الوقت راح تتحسن الخدمات أكيد 1 مهم جداً تواجد حمالين وبأسعار ثابتة نقطة تستحق الاهتمام 2 الموظفات جدد ولا زالوا تحت التدريب بس لازم يكون وراهم مشرف يتابع 3 الجنسيات الآسيوية عموماً متعبة في التعامل ما لهم حل لكن المفروض الواحد يتعداهم طالما مخالفين ولا ينتظر خلفهم والموظف ملزوم يخدمك قبلهم 4 نقطة ايجابية تحسب للشباب المدربين 5 المفروض ادارة المطار تلزمهم بمستوى معين من الخدمة لأن هذي سمعة المطار ولا تفسخ العقد معهم 6 فيه من يهتم بنظافة دورات المياه بس يبدو أن ما عليهم رقابة شديدة أخيراً ساعتين كثير والمفروض أتممة الخدمات تماشياً مع رؤية 2030 وتقليص العامل البشري في عملية التشيك ان لضمان سرعة الاجراءات كما يجب الاعتماد على عمالة ذات جودة معروفة في المطار سواء خدمات نظافة أو عفش لا العمالة الرخيصة اللي تسحبك لأسفل شكراً على ملاحظاتك النابعة من قلب محب للبلد هدفها تحسين الخدمات للأفضل الله يسعدك |
و عليكم السلام و رحمة الله و بركاته .. نشكرك على ذكر هذه النقاط و التى تصب جميعها في جانب النقد البناء و الذي هدفه الوصول للمستوى المرجو من مرفق يعتبر هو الواجهة التى ترحب بالزائرين من السواح و المعتمرين و الحجاج .. فعلاً كان هناك بعض القصور و لوحظ في الفترة التى سبقت رحلات عودة المعتمرين نهاية الموسم بعد رمضان و قد صدر خلال تلك الفترة قرار تصحيحي شمل إقالة الرئيس التنفيذي لـ مطارات جدة و تم أتخاذ خطوات تصحيحية سريعة و أن شاء الله قريباً جداً سيكون مطار جدة من أوائل المطارات في الخدمة و أن شاء الله أختي بحرينية زيارتك القادمة للسعودية ستلاحظين بالتأكيد زوال كل السلبيات و زيادة في التحسينات الأيجابية |
حياك الله اختنا البحرينية وشكرا من القلب لك على هذا الاسلوب الراقي والطرح مطار الملك عبدالعزيز للاسف كثرة الشكاوي علية ووصلت حتى الى الاعلام المرئي خاصة في موسم العمرة والمغادرة واكتضاض المسافرين وتم عزل مدير المطار وطلب شركة مختصة بالمطارات للمساعة والان الشركة تعمل على تحسين الخدمة للمسافرين وخاصة معا موسم الحج ان شاء الله تتحسن الامور تحياتي لك |
ما شاء الله على النقد البناء المفيد |
| الساعة الآن 09:05 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO