|
جدول 12 يوم في ايطاليا السلام عليكم ورحمة الله وبركاتة كل ماقلت إني راح أجهز جدول بنفسي أرجع وأقول لازم نستعين بالخبراء وبدخل في الموضوع على طول بحمد الله تم حجز التذاكر مبدئيا لشخصين وطفل الذهاب إلى روما في تاريخ 03/11/2015 والعودة من ميلان في تاريخ 14/11/2015 كذا صار عندنا 12 يوم و 11 ليلة طبعا أنا قد سافرت إلى ميلان قبل فترة وجلست فيها ليلتين فقط وهذه السفرة أول سفرة أخذ فيها مهند وعمره الحين سنتين وهو الي مخليني اركز وأدقق في ترتيب الجدول ومبدئيا خليت توزيع الأيام 4 ليالي روما 3 فلورنسا ومنها زيارة بيزا 4 ميلان ومنها زيارة فينيسا ولوقانو وسيرفالي اوت لت رايكم بتوزيع الأيام علما اني أفكر استجأر سيارة بعد روما والانطلاق بها الى باقي المناطق وهل عندكم اقتراحات ثانية بحكم الأجواء في نوفمبر دمتم سالمين :(125): |
تخطيطك حلو ابو مهند خلك على ترتيبك |
تخطيطك ممتاز وممكن اقترح تخلون روما 3 ايام وميلان 5 فلورانس ممكن ايضا تزورون منها اوت لت ذا مول الاجواء في شهر نوفمبر بتكون باردة خصوصا ميلان وفلورانس والافضل تثقلون شوي بالملابس خصوصا لمهند الله يحفظه لكم ولاتنسون تاخذون غطاء لعربية الاطفال تحميه من الامطار والهواء البارد وبالتوفيق |
أخوي أبو طلال وأخوي مقدام شاكر لكم والفضل بعد الله يعود للتقارير والمواضيع الموجودة في هذا المنتدى الي خلتني أوزع الأيام على كذا طيب أنا الحين أنتظر الفيزا تنتهي وبعدها راح أبدأ أحجز الفنادق في المناطق كلها ولي رجعة بعدها عشان اخذ رايكم فيها بالنسبة الحين للجدول راح اعتمد نفس ترتيب الأيام 4 روما 3 فلورنس 4 ميلان نبغى نبدا نرتب أماكن التمشية بحيث ان وصولي لروما راح يكون على الساعة 3 العصر تقريبا وراح اعتمد على المترو في تنقلاتي في روما واخر يوم راح استجأر سيارة لباقي المدة وأسلمها في مطار ميلان شاكر ومقدر لكم :(125): |
بما انكم بعد روما بتستأجرون سيارة فمقترحي لكم بعد فلورانس تطلع للبندقية وممكن تبات فيها او بعد ماتتمشى فيها تطلع لفيرونا تحجز فيها ليلة لان الطريق من ميلان الى البندقية ذهاب واياب متعب نفس اليوم والمسافة تقريبا 279 كم والمسافة من فلورانس الى البندقية حوالي 258 كم والوقت ساعتين و 45 دقيقة ومن البندقية الى فيرونا حوالي 120 كم روما من وجهة نظري يكفيها 3 أيام وممكن تخلونها 4 أيام وكله يعتمد على الجدول والأماكن اللي بتزورونها في روما وافضل وسيلة لاستكشافها هي الباص السياحي ويمر بكم على اغلب الأماكن السياحية وممكن تنزلون منه في أي مكان تتمشون وترجعون تركبون الباص مرة ثانية لاكمال الجولة وفيه تذاكر للباص ليوم واحد ويومين المسافة من روما الى فلورانس حوالي 282 كم 3 ساعات تقريبا وممكن قبل ما توصلون فلورانس تمرون على اوت لت ذا مول لانه بيكون على الطريق قبل ما توصلون فلورانس ب حوالي 40 دقيقة وبالتوفيق |
.. وعليكم السلام ورحمة الله تخطيطك ممتاز جدا ويكفي الاشاده من خبراء مثل ابو طلال ومقدام ولاقصور في البقيه بما ان معك اطفال ماشاء الله تبارك الله يتربون بعزك ويحفطهم الخالق لك اقترح عليك تغير الجدول على الشكل الاتي روما 4 اهم معالمها السياحيه على السريع : الكولوسيوم المدرج الاسباني بياتزا نافونا ... نافورة تريفي البانثيون الفاتكيان روما القديمه قلعة سانت انجلو حديقة ومتحف بورجيزي فوري امبريالي ساحة الزهور حدايث تيفولي مدينة الملاهي لونا بارك شارع فينيتو وهناك الكثير فهذي روما هناك اوت لت خارج روما وممكن الذهاب له في القطار Castel Romano ريتشوني 2 على السريع : هناك اكوا لاند حدبقه مائيه وهناك ملاهي ومدينه فيها مجسمات مصغره لمعالم ايطاليا وهناك الشواطي جميله شارع السيتي سنتر شارع مشاه وحلو ممكن زبارة مدينة سان مارينو فلورنس 2 بعض الاماكن السياحيه على السريع : ساحة سان لورنزو قصر ميديشي ريكاردي معرض الأكاديمية حديقة بوبولي سـاحـة مايكل انجلو جسر سانتا ترينيتا القصر القديم متحف سان ماركو ساحة الجمهوريه ساحة السياده بينويكو للاطفال زيارة برج بيزا المايل وهناك الاوت لت Barberino del Mugello ميلان 3 يوم لفينيسيا ويوم لوقانو ويوم اخلي في ميلان اخليه للتسوق مثلا او اروح الاوت لت او عشان الاطفال ممكن اروح حديقة castello sfor zeseo ومتحف Canneto sull'Oglio اتمنى لك عودة سليمه وسفره هنيه هذي اشياء بسيطه عن المعالم السياحيه ودايم اول ماتوصل خذ خرايط المدينه واستخدم قوقل ماب جدا روعه نسيت ماذكر هذي ارقام تهمك في ايطاليا السفارة السعودية : من داخل ايطاليا ( 0684485228 ) ... من خارج ايطاليا ( 00390684485228 ) ... الشرطة ( 112 ) ... الاسعاف ( 118 ) ... الاطفاء ( 115 ) ... الطوارئ ( 113 ) الكهرباء ( 220 فولت ) رمز الهاتف الدولي ( 39+ ) رمز الانترنت ( .it ) شركات الاتصالات : -( TIM ) شركة الاتصالات الايطاليه -فودفون -WIND وفقك الخالق |
مقدام & شخص ثاني مشكورين على تجاوبكم معاي وتم توزيع الايام على 4 روما 3 فلورنس 1 فيرونا 3 ميلان تم حجز فندق روما وفلورنس وفيرونا وباقي لي ميلان جاري البحث وتم حجز السيارة للانتقال بها من روما الى فلورنس وتكون معاي باقي المدة والتسليم في مطار ميلان الان نبي نرتب الجدول اليومي بحيث اني احاول اغطي اكثر من مكان وتكون قريبه من بعض في يوم واحد نبدأ في روما وصولي الساعة 2 ظهرا والسكن راح يكون في حي أسبانيا قريب من الميدان ومترو Spagna روما اليوم الأول بكتفي في استكشاف المنطقة القريبة من الفندق اليوم الثاني جولة في أحد الباصات السياحية وبأي باص تنصحوني وهل ممكن أضيف نشاط ثاني ؟ اليوم الثالث ؟؟ اليوم الرابع ؟؟ فلورنس اليوم الأول استئجار السيارة والانطلاق الى فلورنس مرورا بأوت لت ذا مول اليوم الثاني الذهاب الى بيزا بالسيارة من الصباح الباكر وهل ممكن أضيف نشاط ثاني ؟ اليوم الثالث ؟؟ فيرونا الانطلاق الى فينيسا ( وش الاماكن الي اقدر أغطيها هنا لاني راح ابيت في فيرونا ) ثم التوجه إلى فيرونا للمبيت ميلان اليوم الأول جولة سريعة في فيرونا وزيارة منزل جولييت ثم الانطلاق الى ميلان اليوم الثاني الذهاب الى سيرفالي اوت لت اليوم الثالث جولة في ميلان ( وش الاماكن الي تنصحوني أزورها ؟) ......... أبغى منكم تضيفون بعض اللمسات على الجدول عشان يكتمل ......... شاكر ومقدر لكم :(125): |
ننتظر الإجابة من الخبراء عشان أعتمد الجدول :(95): |
هلا اخوي بخصوص يومين روما المتبقيه انصحك بزياره جزيرة كابري والذهاب لها ياخذ منك 3 ساعات تطلع من روما بدري بخصوص ثالث يوم بفلورنس خليه جوله في هضبة انجلو وساحة الشعب والنهر وتماشي فينيسيا اهم شي ساحه سان ماركو توصل لها ميلن جوله بالباص بتغطي معالم ميلان واخر يوم خله لساحه الدومو والشوارع المحيطه بها |
رحلة سعيدة ان شاء الله |
| الساعة الآن 07:54 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO