|
ايطاليا الحب الأول والأخير بسم الله الرحمن الرحيم عائلتنا على اختلاف اذواقها يجمعها حب إيطاليا يمكن لان ميلانو اول مدينة اوروبية نروح لها سوا وبعدها خلاص او ولدنا الي يشجع ميلان مأثر على البقية مع ان عندنا برشلوني بعد . من بعد كورونا ماتيسر لنا سفرة لاوروبا (دول شنقن بالتحديد ) رحنا لندن كم مرة وحبيناها بس رجع الحب ايطالي وخاصة بعد افتتاح ويز لاول الوجهات روما . وصلنا ايطاليا عن طريق رحلة داخلية من برشلونة هنا موضوعي الاول فيه تفاصيل الرحلة الجزء الاول . https://www.arabtrvl.com/vb/t52106.html كانت الوجهه بولونيا الصراحة كنت ابي نقعد فيها مدينه صغيرع وخفيفه دم بس العيال ومعهم حق الوقت المتبقي قليل ويبون فلورنسا وروما . مطارهم صغير مرة او يمكن لانها رحلة داخلية لدرجة نزلنا من سلم الطيارة مشينا شوي ودخلنا الصالة ما فيه خرطوم ولا باص على رجولنا دخلنا وخذنا شنطنا ومشينا ، اخذنا تاكسي لمحطة القطارات الحلو في الموضوع وصولنا مبكر الصباح معنا وقت . وصلنا المحطة وشوي حوسة مافهمناها بسرعه ونسرع لايفوتنا القطار وبنتي طاحت مع شنطتها وتعورت رجلها وركبنا الحمدلله اخيرا صراحة انا مااستمعت برحلة القطار مرة شلت هم بنتي خفت ان العوار قوي وجلست ابحث عن مستشفيات اول مااوصل اوديها .. وصلنا فلورنسا المحطه حليوه رحنا للتكاسي اخذنا تاكسيين للعدد والشنط كنا ماخذين شقة حلو مكانها يجيب العافيه في السنتر وكلشي حولنا ونفس العمارة فيها بوتيكات فالنتينو وديور وقدامنا اوميغا هههههههه موقع استراتيجي للخساير . وصلنا على الظهر وموجوده الاستقبال هي عمارة وفيها اكثر من مالك بس اشوا حقتنا شكل لها الاكثر فصايره تحت فالاستقبال ودتنا الشقه وعطتنا المفاتيح واخذت ضريبه المدينة وراحت . رحت اشوف بنتي ومعي جايبه عدة التدهين دهنتها ولفيتها قلت نروح مستشفى قالت لا مايحتاج باخذ مسكن . جلسنا صلحنا قهوة عربية ومعنا اغراض تمر وحلويات تقهوينا وانبسطنا لان برشلونه كانت غرف فندقيه ومنقسمين هنا سوا مع بعض ومطبخ . يتبع |
حمد لله علي السلامة ايطاليا من الدول الجميلة اللي لازم تروح لها اكثر من مرة و فلورنس من المدن الايطالية الجميلة اللي لها طابع خاص هادئة و مبانيها رائعة متابعين معك التقرير الشيق - |
1000 لابأس على البنت أهم شئ موقع السكن وطالما أخذتوا في السنتر راح تستمتعون كثير ونستمتع معكم ديرة الطليان ونيسة متابعين معاك |
اقتباس:
ايه والله حتى فنادقها اثريه وجميله شاكرة متابعتكم ان شاء الله يعجبكم الباقي |
اقتباس:
الحمدلله السكن صدق مكانه اهم شي تابعوا معي البلقي افضل باذن الله |
نكمل : بعد ماتقهوينا وريحنا وحطيت ايضا ملابس في الغسالة قلنا ننزل نشوف المنطقه حولنا قلت لبنتي اذا تعبانه عادي نجلس سوا قالت لا عادي بطلع طلعنا خطوات قليله وصرنا قدام الجسر يهبل مرة المكان ومحلات مرتبة مرة دخلنا كم محل ولقينا محل مرتب مرة قال اصبرو اسمعوا وش بقولكم انا ترا استخدم نفس جلود البراندز ونفس المصانع بس موب مسموح احط اسمها وابيع ارخص وصدق شنطه تهبل مرة جلد حلو وموب رخيص لكن طبعا ارخص من الماركات المعروفة. قلت تونا جابيين خل نفكر وبنتي اخذت الكرت ومرينا كم محل يشبهون لفكرته . بعدين طلعنا على ساحه فيها مبنى قديم وفيه محل طلعوا العيال تقييمه عالي اسمه مستر بيتزا محل صغير كم طاوله قالت انتظروا وبناديكم لأنه مليان وفعلا صار يستحق الانتظار لذيذ مرة وأنواع بيتزا جميله وقالت لنا بدون ما نسال عن الأنواع اللي تصلح لنا . بعدها كملنا تمشي ومريت صيدليه انا والصغيرة وقلت لها انها طايحه واعطتني أكياس ثلج قالت سوي كمادات وبتخف رجعت انا واياها الشقة وكمدتها وصلينا وريحنا . قلت تبين نرجع لهم او نجلس خلاص قالت لا خل نروح لهم ومالومها الأماكن مرة شيقة والطلعة حلوه . ومع ان الجو بارد جدا لكن آيسكريم إيطاليا ما يقاوم رحنا واخذنا آيسكريم ومرينا كارفور وشرينا أغراض واخذت زبادي وحليب واعجبني يوسف افندي اخذت كم حبه ورجعت للشقة والعيال جلسوا برا شوي ورجعوا . جلسنا شوي واكلنا وعقبها نمنا يوم طويل وتنقلات .. |
الله رجعتي الذكريات الايطاليه سلامات خطاكم الشر كان لنا تجربة في المستشفيات الايطالية في روما صراحة المبنى كآنه متحف اثري كله رخام و زخارف و ماتم التراساوند و ايكو و فحوصات دم و تنويم الوالدة 6 ليالي انا قلت بشوف تامينا الطبي يغطي قالو ما نحتاج بس اعطونا نسخة من الجواز و الفيزا الشنغن و هذي وصفة العلاج و توكلوا علي الله نرجع لموضوع فلورنسا عندك اسم المحل و عنوانه خل نكتشف معاكم و ياريت التقرير مدعم بالصور بكون له طعم اخر |
اقتباس:
زين المستشفى الله لا يحيج انا والله قعدت افكر في التأمين وش نسوي بس الحمدلله ان شاءالله مانحتاج المحل راحت له بنتي ثانيه الصبح مبكر وخذت منه قطعتين بس بعدين قرت تعليقات في قوقل يسبونه وضاق صدر مع ان قطعها حلوه بس تقول ليت مااخذت هو هذا عموما Toni & Co +39 055 389 4444 https://maps.app.goo.gl/CQtokzPRAL2GYznQ8?g_st=iw |
الحمدلله على سلامة البنوته بنشوف ايطاليا معاكم بعد برشلونه بس نبي صور انا احب الصور التسوق واكتشاف اشياء جميله وغريبه احبه وقولي لبنتج لا تتحسفين اللي يسبون مو نفس ذوقج انتي ذوقج حلو وما اخذتيه الا لان عجييب عليها بالعافيه وعليكم بالعافيه كلماشريتو واكلتو في مستشفيات مجانيه حتى بلندن مجربينهم ببلاش ورعاية طبيه متكاملة مستمتعين بسوالفج تابعي |
اقتباس:
قريت تعليقك لبنتي الله يسعدك يارب ❤ المستشفى الله لا يحيج الحمدلله اخذنا من الصيدليه وتحسنت المكان صدق يرد الروح ويخليك تطيب . |
اليوم الثاني والاخير في فلورنسا رحنا الصباح مبكر للجهة الثانية من الجسر قصر وحديقة تاريخية اخذنا تذاكر ودخلنا الحديقة القصر له دخول ثاني بس قلنا يالله يكفي الوقت الحدايق الحدائق يالله الجنة بس شي رهيب مره مشكلتها للي مثلي الدرج الكثير بس بتشجيع العيال ويالله حسافه بتشوفين مناظر حلوه الحمدلله وقينا للاخر تشوف مناظر بانوراميه للمدينه وحنا نازلين بدت تمطر الا الصوت غريب موب مطر عادي صار ثلج وكبير غجاة امتلت ملابسنا ومااستعدينا ابد الحو ماكان يوحي ونزلنا بشوي شوي لين لقينا مكان مظلل جلسنا شوي بين وقف المطر ورجعنا شوي للشقه حطينا الملابس في المجفف وبدلنا وطلعنا ثانيه. ورحنا ايضا لقوتشي قاردن دخلوا البنات كنه متحف لقوتشي وانا جلست وشع حفظ الطاقه انتظرهم في الساحة . يقولون موب مره يستاهل . رحنا حول الغروب لقمة مايكل انجلو اخذنا تاكسي والحمدلله قرار جيد التاكيي مااقدر اطلع القمه جميله جدا وفيها مكبر يالله لقينا معنا كوينز وحطيناها وشفنا فيه وقعدنا نتمشى فيها بعدين نزلنا النزله كانت موب مره سهله بس جميله جدا وشلالات خلال الطريق وكملنا بعدين مشي للجسر ولمنطقة السكن حقنا ، اخذنا فالطريق من محل مخبوزات مره لذيذه ودنا رجعنا له ثانيه بس مافيه وقت بعدين تعشينا في مطعم جميل والله ورجعنا نجمع اغراضنا بكرة الرحله لروما . وبنتي تبي محل الجلديات ارسلت له تقدر تفتح بكره مبكر قال طيب لان مواعدين التاكسي عشره ونص بنروح محطة الباصات، قمنا الصباح مبكر البنات راحوا المحل وانا جلست اجهز الشناط والاغراض ، ورحنا لمحطة التاكسي فيه محل بعد قدام العمارة حقتنا حق فطور ومخبوزات اخذنا منه كروسان للطريق ، |
تشكر اخي الكريم على التقرير، هل بالإمكان تزويد التقرير بالصور؟ المنتديات تفتقر للتقارير والصور الحديثة. |
اقتباس:
ايه انا هدفي اقدم شي لو بسيط وان شاءالله بحاول احط صور باذن الله |
كنت في شهر سبتمبر في ميلانو وفلورنس يا سلام على فلورنس جميلة جدا |
اقتباس:
|
الجزء الثاني من ايطاليا كان روما وصلنا لها عن طريق الباص فلكس باص ..ممكن نسمي رحلتنا رحلة المواصلات وانواعها جربنا كل شيء قطار سيارة طيارة باص . الباص كان ارخص كثير من القطار واريح من ناحية الشنط لها مكانها من البداية وخلاص ماتقعد تدور مكان زي القطار في حالة الزحمة . لكن اعتقد كان ابطأ فأخذ وقت اكثر لكن مايهم المناظر على الطريق مرة جميله والكراسي مريحة . وصلنا روما واستقبلنا ثلج على غير عادة روما فقد قرأت ان بردها لطيف ونادر سقوط الثلج . روما البداية كانت اساس رحلتنا وناوين اطول وقت فيها وحيث سبق لنا زيارتها فجلست ابحث عن اشياء غير عادية او بمعنى غير اللي كل السياح يروحون لها . لقيت موقع حلو اسمه https://mamalovesrome.com/ تشرح فيه كل شيء ومرتب حسب الأشهر والأماكن وكل ما تحتاج معرفته سكنا في فندق the code كنت اخذته من تقرير الأخ أبو معتز وقريب من السلالم الاسبانية .وكان جميل وموقعه حلو قريب من اشياء كثير يتبع |
اقتباس:
والأجمل انكم جربتو كل وسائل التنقل والله مره جميل 👌 قمة المتعة السفر صراحة لازم الواحد يجرب كل شي حتى المشي ايضاً اذا المسافات قريبه امتع وامتع . اما السكن ف فندق the code فعلاً كان جميل مثل ما تفضلتي وجربتوه ايضاً كاموقع احنا انبسطنا فيه وكان سهل علينا الوصول للأماكن والمعالم كانت قريبة ونظيف صراحة ما نسيته وهنا تكمن الفائدة من طرح اي تقرير لازم يضمن كل شروط الفائدة ولأستفادة الحمدالله .. وكلي اشتياق للمتابعه معكِ واسترجاع ذكريات روما الجميلة 🙏 |
اهلا اهلا حياك الله ام معتز ايه والله استفدت من تقاريركم وودي افيد لي احد بيروح . الفندق موقعه جميل تدرين يوم اروح روما من قبل ماصعدت السلالم كانت مريعه لي رقيت شوي ووقفت هالمره الفندق صار فوق واستمتاع المنظر جدا والنزله دايم اسهل والحمدلله على العافية منوره تقريره وسعيدة بمتابعتك |
جميل جدا ، متابعه يا ريت تحاولين تحطين الصور بيكتمل الجمال مع الاسلوب:e304: |
ماشاءالله روعه التقرير ومستمتعين معاكم بس ناقصه جمال الصور |
تكملة روما : ادري متأخر مرة بس عاد الشكوى لله استمتع بالكتابة هنا واذا احد قرأ او رد ممتاز جدا واذا احد استفاد افضل وافضل لكن لو ماحصل عادي اكتب لنفسي :) المطاعم في روما تسكر وقت العصر تقريبا من نهاية الظهر ووصولنا روما كان تقريبا نهاية الظهر دخلنا الفندق وحطينا اغراضنا وصلينا وطلعنا . الفندق جمب السلالم الاسبانية من فوق ونزلنا لتحت وتمشينا في المنطقه وكنا جايعين وقفنا في مقهى وعادة نشوف تقييمات جوجل قبل ندخل الا هالمرة سبحان الله اخذنا قهوة وقطع كيك كان متواضع جدا والسعر فوق 80 يورو او تسعين وش دعوى ؟؟ يوم سالناها قالت هناك الاسعار كانت مكتوبه بخط غير واضح وزائد اذا بتجلس على طاولتهم كل شي يتدبل قطعه الكيك اربعه لكن تصير ثمانية وهكذا . غلطتنا ماسالنا عن اسعار ولا شفنا تقييم يوم قرينا التقييم واحد وكل الناس يشتكون من الغش في الاسعار يالله الحمدلله الامر سهل . كملنا تمشي في الشوارع المجاورة وفرق مرة الجو يساعد سبق الزيارة في سبتمبر كان حار هالمرة الجو بارد منعش العشاء حجزنا في مطعم الفريدو ويقول انه الاصلي كان عشا لذيذ وحركات شو (ان شاءالله بجيب فديو له ) وانتهى يومنا . لاحظت خلال وقتنا (يناير) الزوار قليل مرة ساحة السلالم فاضية والنافورة اقل من زيارتنا السابقة . اليوم الثاني راح الاولاد يشوفون الكولسيوم المسرح الروماني وعدد من الاشياء السياحية لان ماكانوا معنا قبل وانا والبنات رحنا مول كبير اسمه مكسيمم حلو وفيه سوبرماركت وحبيب الشعب بريمارك كنا نحتاجه :) قالو لنا الشباب انهم لقوا مطعم شاورما اكسبريس ولذيذ مرة مع ان غالبيتنا مانفضل مطاعم عربيه في السفر بس قالوا هذا غير فخذنا تاكسي ورحنا له هو قريب من النافورة وصدق يستحق جميل جدا واللي يبيعون فيه من سوريا ولطيفين جدا ومحترمين . كانت رحلة روما اغلبها تمشي بدون تخطيط في الساحات والشوارع الصغيره شراء اي شي يصادف من تذكارات وملابس ايطالية محلية جميله . ورجعنا انا وبعض الاولاد والباقين راحوا لندن بيوصلون اخوهم بياخذ دورة هناك . مطار روما جميل جدا والطيران الحمدلله ماصادفنا مشاكل حتى في شحن الشنط كل شي تمام الحمدلله ورجعنا في وقتها . وصلى الله على نبينا محمد وعلى اله وصحبه وسلم |
عودا حميدا للعودة للتقرير سؤال هل جميع مطاعم ايطاليا تسكر العصر وكم ساعه ؟ الكافيهات ما تسكر دام انج قلتي انكم تقهويتو وشريتو كيك؟ حلو كل مجموعة تروح صوب واللي يعجبهم حلو ان مكانكم قريب من الاماكن السياحية بريماك لابد منه ربي يوفق اللي يدرس بلندن ويوفق ويحفظ جميع العيال استمتعنا بالتقرير وان شاءالله سفرات ممتعه اكثر واكثر |
ايه عندهم فترة قبلوله قليل تلقين مطعم صاحي يبدون عقب ست تقريبا العشا وممكن مقاهي بس اذا جوعانين نبي اكل سنع شكرا لمرورك وردك الله يعافيك |
| الساعة الآن 10:11 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO