|
رحلتي من التردد إلى المتعة: أول مرة أسافر برا! السلام عليكم ورحمة الله وبركاته، عدنا، لكن هذه المرة بتجربة، وليست سؤالًا. صراحةً، أنا استفدت كثيرًا من المنتدى أكثر من أي مكان آخر، وحسيت أنه من واجبي أرجع وأكتب تجربتي، لعلّ أحد يستفيد منها. رحلتي كانت هادئة، وحاولت قد ما أقدر أخليها استجمام وريلاكس بعد سنتين مليئة بالضغوط. وأخيرًا، ولأول مرة، سافرت خارج المملكة. كانت خطوة صعبة شوي، لأني كنت متخوفة أطلع برا السعودية، خصوصًا كوني في مجتمع يعتبر السفر للمرأة (وللرجال بعد!) شيء مرفوض، والسفر عندهم يقتصر على دبي وقطر… وخلاص! بدأنا نحجز للرحلة قبلها بيوم 😂😂. ما أكذب، التخطيط كان موجود، بس الصملة ما كانت موجودة… إلين قلت: لازم أجزم وأجرب بنفسي. حجزنا على طيران وييز لأنه مباشر من جدة إلى ميلان والعكس. ما كان يهمنا كثير موضوع الخدمات أو المقاعد أو الأكل، أهم شيء ما نضيع وقتنا في التنقل من مطار إلى آخر. توكلنا على الله وحجزنا. وحبيت أنبّه على نقطة لأهل جدة: طيران وييز يطلع من المطار القديم (الصالة الشمالية). إحنا كنا بنروح على المطار الجديد، لكن الله سخّر لنا سائق أوبر نبهنا وقال لنا. خطتنا كانت: • ننام أول ليلة في فندق قرب مطار ميلان، لأن الرحلة توصل متأخرة. • بعدها ننطلق إلى ريفا ديل غاردا ونقضي فيها يوم، ونزور مدينة الليمون. • ثم نروح إلى أورتساي لثلاثة أيام، ومنها نزور بحيرة برايس وسان كانديدو. • بعد كذا نرجع إلى ميلان ونقضي فيها يومين. • وأخيرًا، العودة إلى الوطن. جدول لطيف يجمع بين الاسترخاء، والطبيعة، والمدينة، والتسوق… وهذا بالضبط اللي نحتاجه. ملاحظات مهمة: • السفر صار جدًا سهل بوجود Google Maps، وترجمة قوقل، وChatGPT، والتيك توك! لكن نحتاج عقل يبحث ويخطط ويعرف يستخدم الأدوات المتاحة. • خصوصًا الآن مع وجود الشرائح الإلكترونية، صار تفعيل النت أسهل من قبل، تفعّله وإنت في بيتك، وتوصل الديرة وكل شيء شغال فورًا. ذكرت هذا الكلام لأني كنت بتواصل مع مكتب سفر، وحسيت إنه كان بيجيب العيد، وواضح إنه ما كان فاهم إحنا وش نبي! فأفضل قرار اتخذناه: خططنا بأنفسنا، واخترنا كل شيء بأنفسنا |
الحمد لله علي سلامة الوصول شكرا على طرحك تجربة السفر و التفاصيل تبعها اتمني اذا أمكن طرح بعض تفاصيل الفنادق اللي سكنتم بها و عجبتك حتي يستفيد بها المسافرين . تحياتي |
شكرًا لك اختِ والله يجزاك خير على كل ما قدمتيه ابشري بنزل لكم السكن وتقييم عنه وبحاول انزل صور |
� أول ليلة – مطار ميلان Malpensa 🏨 Sheraton Milan Malpensa Airport Hotel & Conference Centre 🔗 رابط الفندق الرسمي بما إن وصولي كان متأخر، اخترت أسكن داخل المطار في فندق الشيراتون، وكانت الفكرة جدًا مريحة لتجنب التعب بعد رحلة طويلة. لكن! تجربتي معهم للأسف كانت سيئة: • دفعوني تأمين (وديعة) فوق 300 ريال وما رجعوها. • قلت لهم بدفع كاش عشان أضمن رجوعها، قالوا لازم تدفعين المبلغ كامل وما كان معي. • بعد التشيك أوت، أخذت الفاتورة وتواصلت معهم، قالوا “رجعناها وتواصلي مع البنك”، وللآن ما وصلني شيء 😣 نفس الشي صار مع شركة SIXT لتأجير السيارات! أرسلوا لي إيميل أن السيارة ما فيها أضرار، ورح يرجعون الوديعة، والآن صار لي أكثر من 24 يوم، ما شفت شيء! 📣 تنبيه للكل: احذروا من موضوع الودائع! تابعوا بدقة مع البنك، وخذوا إثباتات، ويفضّل الدفع كاش أو بكريدت ماستر بحيث تقدرون تتتبعونها. 🌊 Riva del Garda – بحيرة غاردا 🏨 Residence Centro Vela 🔗 رابط السكن الرسمي سكنت في شقق نظيفة وبسيطة، سعرها رائع جدًا مقارنة بالمكان، والإطلالة خيال على البحيرة 😍 ✅ المميزات: • نظيف، وهادئ، ومريح • قريب منه مول فيه سوبرماركت كبير، مطعم هندي، وبيتزا ممتازة (5 دقائق مشي) • إذا كملت مشي توصلي للسنتر والمطاعم ⚠ العيب الوحيد: بعيد شوي عن السنتر، فلو الجو حار ممكن تحسين إنك بتتعبين بالمشي. 🍕 ملاحظة: ألذ بيتزا أكلتها في الرحلة كلها كانت هنا! 🏔 Santa Cristina (بالقرب من Ortisei) 🏨 Anna Lodges Dolomites 🔗 رابط السكن الرسمي بكل أمانة… هذا أفضل سكن جربته في الرحلة! نظيف، مودرن، جديد، إطلالته على الجبال خرافية، وكل شي موجود حتى غسالة صحون ✨ ✅ المميزات: • تعامل راقٍ جدًا من أصحاب المكان • السوبرماركت قريب (3 دقائق مشي) • المطاعم والمخبز قريبين، والأجواء الريفية الجميلة حوالينك • مواقف مجانية وجاكوزي في بعض الوحدات أنصح فيه وبقوة ❤ 🏙 آخر أيام الرحلة – ميلان • عنوان الفندق: Piazza IV Novembre 3، Milano Centrale • ↪ الموقع الرسمي: nyx‑hotels.com/milan  فندق قرب محطة ميلان المركزية (Milano Centrale) ✅ المميزات: • قدام محطة المترو مباشرة، توصلك خلال 5 دقايق إلى ساحة الدومو • خيار ممتاز للتنقل داخل ميلان ⚠ الملاحظة المهمة: السرقة والنشالين منتشرون جدًا في المترو. انتبه على أغراضك، وعلّق جوالك في رقبتك، وخل شنطك مقفلة دايمًا |
الفنادق جميلة و مميزة بانتظار صور التقرير . ** بالنسبة لموضوع الوديعة احيانا كثيرة تتاخر بسبب انظمة البنك الاوروبي لكن باذن الله تسترديها . تحياتي |
اقتباس:
|
تخطيط جميل واختيارات موفقة لوحدة أول مرة تسافر للخارج وأكيد الآن اكتسبت خبرة كبيرة وطار التردد والخوف خيار مناسب السكن قرب المطار لأول ليلة أما الاسترداد راح يتم بس الدفع بأي بطاقة ؟ اختيارات موفقة للسكن والحمد لله كل شيء كان 100% وهذا مهم بأول رحلة أوروبا لم تعد آمنة كما كانت النشالين كثير في ايطاليا اسبانيا وفرنسا كيف كان تجربتكم مع طيران ويز ؟؟؟ :e032: |
تم اضافة التقرير للمواضيع المميزة في صدر المنتدى :e032: |
اقتباس:
شكرًا للطفك |
اقتباس:
شكرًا جزيلًا⭐ اي والله السكن توفقت فيه جدًا وانا اعتبر السكن من أهم عناصر السفر امانة ماوجهت مشاكل مع النشالين رغم اني اعتمد على المترو طول فتره اقامتي لان سياقه في ميلان توتر والمواقف صعبة وزحمة خلاص ريح مخك وطلع على مترو 4 يورو وانت في صدر الدومو تجربة طيران ويز رهيببببببه جدًا فيه تاخير على الرحلة صح مافيه أكل ومقاعد شوي صغيره ولا فيه شاشه بس عادي معاك جوالك ومن حسن حظي ماكنت الطيارة زحمة ففيه مقاعد كثير فاضيه يمدي الواحد يتسدح وكذا |
اقتباس:
|
افضل قرار انكم ترتبون رحلتكم بنفسكم تختارون اللي يريحكم |
بالنسبة لموضوع الوديعه اغلب الفنادق ماتخصم المبلغ تسوي فقط حجز على المبلغ وعند الشيك اوت يشيلون الحجز فماراح تحسين ان في مبلغ رجع |
صحيح اخت ايمان هذا اللي صار معايه يعطيك اللعافية على مرورك الجميل❤ |
افضل القرارات ان الشخص يفكر لنفسه لراحة نفسه بعيداً عن ان يبحث عن خطه مرسومه سابقاً ياليت التقرير مصور كان افضل شكرا لك |
كفوو انكم قررتم السفر بالخارج والامور سهالة الفنادق ممتازة واختيارات حلوة التقرير خفيف لطيف بس حبيت تتكلمين عن غاردا كيفية الوصول لها ؟ وكم تبعد عن ميلان ؟ وياريت في صور تضاف للموضوع بارك الله فيج خبيرتنا الجديدة |
يعجبني اللي يخطط بنفسه:72: |
الحمد لله على السلامة أم مبارك بعض القرارات المفاجئة نتائجها أفضل من التخطيط المبالغ فيه والسفر رغم المشقات صارت خياراته واسعة وسريعة بفضل النت والهواتف الذكية أهم شي العزم والتوكل على الله |
اقتباس:
|
اقتباس:
|
اقتباس:
شكرًا لمرورك |
نفس الشي صار مع شركة SIXT لتأجير السيارات! أرسلوا لي إيميل أن السيارة ما فيها أضرار، ورح يرجعون الوديعة، والآن صار لي أكثر من 24 يوم، ما شفت شيء! 📣 تنبيه للكل: احذروا من موضوع الودائع! تابعوا بدقة مع البنك، وخذوا إثباتات، ويفضّل الدفع كاش أو بكريدت ماستر بحيث تقدرون تتتبعونها. شخصيا 4 مرات أستأجر سيارة من SIXT باستخدام بطاقة السفر (العملات) من بنك الاستثمار في دول مختلفة بأوروبا اللي يصير مبلغ الوديعة يخصم من الرصيد ويكون قيد الانتضار او يسمى حجز مبلغ لذلك إذا تدخلين على العملية نفسها يكون قيد الانتضار مثل ماتفضل الاخوة بالردود وبعد 3 ايام أو اسبوع من ارجاع السيارة يرجع المبلغ هذا اللي يصير دائم معي ويكون يرجع بعملة اليورو اذا باليورو او عملة الدولة وليس للحساب الجاري لذلك ممكن يكون موجود اذا تستخدمين بطاقة العملات اذا مارجع وكان محجوز بعد 45 يوم يفك الحجز ويرجع لك صار معي بأحد الفنادق |
| الساعة الآن 01:45 AM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Friendly URLs by vBSEO