|
فجأة ويز :برشلونه والباقي بعدين السلام عليكم ورحمة الله مقدمة مهمه : اخر زيارة لدول الشنجن كانت 2019 ومن عقبها خلصت فيزتنا وصار بس بريطانيا رايح جاي .. بعدين قررنا نروح ونستغل طيران ويز أسعار جدا رخيصة وتوكلنا على الله وحجزنا ويز الى الان محدودة الوجهات من الرياض والاوقات فحسب اللي يناسب اجازتنا اخذنا الرياض فيينا -روما الرياض واخذنا موعد السفارة الاسبانية بتقولون وش دخلها ؟ مدري والله انا هالسفرة تقاعدت عن البحث وخليت عيالي يبحثون وهم حجزوا اقرب موعد الاسبانية واخر تجربة لنا معهم فقالوا هم واضحين وخلاص نقدم عندهم قدمنا وعطونا سنتين ان شاءالله نستخدمها بالعافية اخر شنقن كانت تنتهي وقت كورونا ما استفدنا . المهم انا شخصية ماش قلقه شوي وماارتاح وخفت من هالويز ما يطيرنا وفيزتنا اسبانيه قمت حجزت داخلي فيينا برشلونه الخطة السابقة كانت فيينا ميلان وبالسيارة جوله لين روما بس الغيتها (رجعت الديكتاتورية المتقاعدة) وصارت الخطة : فيينا برشلونه -برشلونه بولونيا ومنها لفلورنسا يومين ثم روما ثلاث أيام الصراحة ماشفت تقارير او معلومات جديدة عن برشلونه قلت اضيف شيء بسيط ان شاءالله اقامة تقريبا اربع ايام برشلونه .. يتبع |
بانتظار المعلومات والويز شنو تجربتها معاكم رحله موفقه باذن الله |
متابعين |
أهلين فيك كيف تجربتكم مع ويز ؟ وهاتي علوم برشلونه :e306: |
حياكم الله جميعا بتكلم اول عن ويز : ويز والله مرة ممتازة السعر كان جميل جدا بس لان التذاكر مقسومه رحنا خمسه ورجعنا ثلاثه الباقين راحو بويز ايضا للندن وكان رخيص جدا 3000 ريال او اقل كانت تكلفه الذهاب لخمسه والرجوع لثلاثه مايجي سعر تذكرة وحده سابقا على اي خطوط ثانية طبعا الطائرة مافيها اي ترفيه ولا اكل فيخ عربة تقدر تشتري ممكن طبعا تاخذ معك اي سناك تبيه او مويه من المطار قبل الاقلاع واسعارهم حلوة لو اضطريت تشتري . بالنسبة لي متعتي كانت تتبع خط سير الرحله وهالشي موب موجود بس ماعليه الوقت مر سريع بالرغم ماكان فيه اي نوع ترفيه ومباشر الرحله الحمدلله . جلسنا اول ليله في فندق قريب من مطار فيينا ورحنا الصباح للسنتر وافطرنا وتمشيه سريعه رحلتنا العصر لبرشلونه على طيران ويز ايضا . |
الان برشلونة هذي الرحلة الثانيه لها رحت 2015 بس ماكانت في الشتاء السكن كان في فندق May Ramblas Hotel اخذنا غرفتين ثلاثيات ، فندق عادي سعره معقول نظيف ومكانه في شارع الرامبلا وهو الشارع الرئيسي وحي جدا كل الوقت المحلات فاتحه وحيوي وممتع جدا بالمقابل كان شوي ازعاج لان شكلهم ماينامون ابد الشارع لكن حنا نصير جايين تعبانين من اللفلفه وننام الحمدلله الجو كان جميل نلبس بس قطعه وحده وجاكيت بس حلوه مرة برشلونه في الشتاء تتمشى اي وقت الظهر والعصر الجو لطيف الى بارد لكن اقل بروده من لندن مثلا . |
يوم الوصول برشلونه وصلنا تقريبا الساعه سبه ونص مساء كانت رحلة داخلية فما فيه تدقيق ولا ختم جوازات اخذنا شناطنا ومشينا اخذنا تاكسي ودانا للفندق دخلنا متحمسين لا يفوتنا شي حطينا الشنط وصلينا وطلعنا ندور حوالينا كانت بعض المحلات بتسكر لكن الاغلب ماشاءالله خرشه مرة تمشينا في الرامبلا وتعشينا في تاكو بيل ماكان هو المأمول بس كنا جايعين وهو اقرب شي وجيد جدا تقييمي للاسف ما عندي صور + مااعرف ارفعها اصلا فاعذروني والله بعدين قالت بنتي الكبيره ترا هنا قريب قهوة وعندهم كوكيز لذيذ مايتفوت ورحنا تقهوينا مع ان الوقت متاخر بس عادي اجازة . كملنا تمشي فالشارع ورجعنا الفندق ونمنا فالبداية كان حر مرة مشغلين تدفئة والزين ان التحكم عندنا قفلناها والحمدلله الجو مقبول ولابسين كويس . |
اليوم الثاني الصباح قمت مبكر وصلينا الفجر وبنتي الصغيرة كانت مزكمة قبل الرحله ويمكن من الرحلات ورا بعض تعبت اذنها وحرارة طلعت انا واياها رحنا صيدلية واعطانا علاج وحنا طالعين شافت بريمارك وهي طالعه لامها بريمارك بندول ومسكن جيد قالت خل ندخل بس شوي دخلنا كانوا توهم فاتحين والبضاعه مرتبه قلت نجلس فيه لين يقومون اخوانها الباقين ** الرحلة بدون ابو من غير شر بس ماجا معنا فأنا صايره امثل دورين وعيالي كبار الحمدلله . خلصنا بريمارك وقابلونا الباقين رجعنا الفندق نحط الاغراض ونروح نفطر . رحنا لهالمقهى Chocolataria Equador حلو عنده تشوروس مشهور فيه واخذنا ايضا كيكة وكريم بروليه وشاي وقهوة بعده اتجهنا للبحر فيه مول هناك وايضا تلفريك وصلنا المول ورحنا تمشيه سريعه كان الجو نهار وحار شوي بالنسبة للي جاي على انه شتاء والعيال يصورون واللي يبي يشرب قهوة او عصاير وسناكات المكان حلو ووسيع صدر التلفريك قريت قوقل تعليقات انه درج طويل وهو كان بعيد شوي قال ولدي فيه تلفريك ثاني نروح له بالتاكسي لقينا سيارة ورحنا :Montjuic Cable Car. اخذنا تذاكر طلعه فقط لاننا بننزل شوي شوي ونتفرج الظاهر كانت التذكرة بعشرة يورو للشخص و15 لو روحه ورجعه . رحنا للقمة مرة جميله وتتفرج على برشلونه من فوق وفيه قلعه ايضا انا مادخلت راحت بنتي الصغيرة واخوها تحسفت مارحت معهم بس كنت في وضع توفير الطاقة جالسة اتفرج واريح :) بعدين نزلنا لقينا مقهى تحت اخذنا قهوة وشاي وسناك بطاطس وكيك عنده كراسي جلسنا تقهوينا وريحنا وبعدين كملنا النزله . بعدها رحنا بالتاكسي للقرية الاسبانية (تشبه الجنادرية اللي كانوا يسوونها عندنا تراث وثقافه الاسبان وكشكات ) مكان مسلي جميل الدخول برسوم وعطونا تخفيض للطلاب المكان مرة لطيف وفيه دورات ماه واماكن جلوس صلينا فيه وكملنا باقي النهار فيه ومحل عصيرات وبان كيك مرة لذيذ وايضا محلات هدايا جميله |
وراكم ياكافي محد قرا موضوعي ؟ ماجاز لكم ؟ |
حلو طمنتينا على طيران ويز أما سكنكم على شارع الرمبلا صعب لأنه مزعج جداً والنوم متعب مع الازعاج زين وافقتوا أجواء حلوة لأن بالصيف حر عندهم لعب دورين بالرحلة متعب الله يعينك متابعين معاك :e306: |
اقتباس:
الرامبلا كنت ابي نستغل الوقت ونقدر نرجع الفندق اي ساعه وموب سيء مره مزعج لكن عادي الامور سهالات شكرا لردك ومتابعتك |
تكملة اليوم الثاني خلصنا من القرية الاسبانية اخذنا تاكسي رحنا لحي el bran منطقة حلوة وقريبه للرامبلا فيها ساحة وشوارع تتفرع تسوق واكل وقهاوي اخذنا بطاطس من محل **كل مطاعمهم البطاطس مرة عجيب مع صوصات مختلفه اكلنا وحنا نتمشى بعدين لقينا جلسات وجلسنا وكملنا تسوق وتمشي اللي نلقاه نشتريه بعدين قالو العيال هنا محل تراميسو حلو اجلسي ونروح نجيب منه وجلست وجابو وقهوة واكلنا **مدري يمكن عشان شتاء والجو حلو الاتكل والقهاوي مالها حزة مرتبة عندنا كل وقت عادي .. كملنا لين فندقنا مشي مريح كان ماتحس بالتعب كله محلات وتمشيه وكراسي اجلس ويسبقوني وارجع لهم رجعنا وجلسنا نفكر في سالفة الروحة الى ""اندورا "" |
ياسلام ياسلام حلوو يعني طيران ويز حسيتج نفسي مع متابعة مسار الرحله هههه معليش قضيها لعب بالتلفون او الايباد ههه او نووومه خفيفة بس مشكلة الجناط اشلون عقب المشترى من بريماك ههه الجولات حلوه وزين رحتو للقمة مع التلفريك التسوق ممتع ومريح اذا كان تحت الفندق او قريب من الفندق احلى شي سلامتها الصغيره ما تشوف شر شوقتينا على شارع الرامبلا الله يكتب لنا رحله لبرشلونه واسبانيا باذن الله مستمتعين وبدون صور اذا بتنزلين صور شوفي بوابة الكاميرات في شرح للتحميل للمنتدى ومتابعين للآخر يالغاليه |
اقتباس:
مره يشوق الرامبلا وبرشلونه كلها ونيسه حتى عيالي مع انهم راحوا لها اكثر من مره قالو خيره اضفناها للجدول عادي اضفنا شنط عقب وانا اجيب اللي تتسفط وتنفتح عقب تعبينها مره ماتقول شي منوره والله |
جلسنا نشوف مواعيد الباصات اللي تودي اندورا اندورا للي مايعرفها مدينة ماتتبع احد ولا فيها ضرايب وبعد منطقه بارده وحنا لها سبق فالصيف وكانت معقوله وخساره ليت نوينا سياره افضل يصير الواحد حر نفسه مايرتبط بمواعيد باصات شفنا مواعيد الباصات الاحد ومحدوده شوي قلنا نخليها الاثنين ونجلس برشلونه الاحد فيه اماكن مامريناها … اليوم الثالث وكان يوافق يوم احد طلعنا نفطر في الحي القوطي في مقهى قديم وعنده شوروس واشياء ثانيه وعيالي تحمسوا من شد الحماس شبهوا المالك بجدهم يقولون والله نفس الحركات ههههه افطرنا عنده وكان المكان جميل وخفيف طينه وبعدها قعدنا نتمشى في الحي القوطي وناس يسوون عروض وشرينا بعض التدكارات يتبع |
مشينا لزارا ولقيناه مسكر حسافه اتذكره في سفره سابقه وفي مدريد كان حلو وبضاعته احسن من زارا الرياض بس ماكتبه الله . وصلنا سقرادا فاميليا من قوقل : كاتدرائية ساجرادا فاميليا (اسبانى: La sagrada Família) أو كنيسة العائلة المقدسة، وهي كنيسة كاثوليكية رومانية، تعد من أضخم كنائس أوروبا، تقع في حي ساجرادا فاميليا فى مدينة بارسلونا، كاتالونيا في اسبانيا. ابتدى في بناها سنة 1882، ولَم يكتمل بناها الى الان ومتوقع ينتهى البناء سنة 2026 , اختيرت سنة 2007 ضمن قائمة كنوز اسبانيا الاتناشر.[5] واللي بانيه جاودي بعد له بيت مشهور ومزار رحنا له عقب . حلو المكان فيه جلسات واكشاك والشوارع المحيطه به خرشه وحركة . جلسنا شوي بعدين اخذنا تاكسي لبيت قاودي رحنا بس مادخلنا البيت معلومة عني : موب مرة على المتاحف وهالاشياء بس اوصلها اسم مريت عليها ودخلنا محل تابع له فيه تشوكلت وكوفي وورتنا الحلال بدون مانسالها وكان فيه زيت زيتون مرة شوقني بس خفت يتكسر ماوصل قالت ماعليك بلفه زين ولفته والحمدلله وصل الرياض بالسلامه . جو العيال الباقين وكملنا تمشيه . قالوا بناكل في برقر اسمه بادن بادن كانوا جايينه قبل كورونا يناير 2020 رجعوا وبدت التعليق وانا مشتهيه باييلا او اكل صدقي موب برقر قلت باخذ معكم بطاطس وبعدين ندور مطعم لي . وجا والله ماشاءالله مرة يشهي اكله والمكان مريح مرة وحبيبين اللي يشتغلون . خلصوا اكل ومشينا كملنا طريق ورحنا بالتاكسي للرامبلا نزلنا بدايته وحلو هو المحلات فاتحه دخلنا كم محل ولقينا محل يبيع شالات واشياء هنديه خذنا منه هدايا واشياء حلوة . كملنا تمشيه ورحنا للكوفي حق الكوكيز اخذنا منه تقهوينا فيه كان يوم مباراة السوبر الاسباني المقام في الرياض رحنا مطعم كنت شايفته اول يوم عند المول حلو مكانه يطل عالبحر جلسات خارجيه وشكل اكلهم زين وتقييمهم حليو في قوقل . رحنا وكانوا مشغلين المباراة وهو يبربر اسباني يوم قال الرياض فجأة عيونا قلوب خضراء صدق شعور غريب مرة ياملحنا والله وملعبنا .. اخذنا باييلا خضار وباييلا دجاج وبطاطسهم العجيب وكرات جبنه على اساس العيال نقنقه ماكلين برقر بس الحمدلله امداه تهضم بالعافيه . خلصنا العشا والمباراة خلصت لكن مرة كنت تعبت واخذت تاكسي انا والبنات والعيال قالوا بيكملون مشي يشوفون احتفالات الفوز . رجعنا الفندق وانتهى يومنا وناوين نقوم بكرة ابكر شي نلحق الرحله حقت اندورا .. |
اليوم الرابع قبل الاخير صحينا الصبح بدري عشان نلحق باص اندورا اخذنا تاكسي رحنا لمحطة باصنا اسمه دايركت هي محطه كبيره مره الباص اللي يروح اندورا مقابل للمحطه الكبيره عباره عن صاله قص تذاكر ومقهى صغير وصلنا قبل موعدهم حول عشرين دقيقه سباق مع الوقت راحوا العيال ياخذون التذاكر وجلست شوي عقب المراكض اريح الحمدلله ركبنا الباص ومعنا كروسان اخذتاه من المحطه ومويه مشينا الطريق مره جميل وقرى صغيره تهبل تمنينا اخذنا سياره ونوقف على راحتنا وصلنا بعد تقريبا ثلاث ساعات الا ربع او حولها كان الجو سنو خفيف يهبل مره انبسطنا كان ودنا نشوف ثلوج بس يالله العوض ولا القطيعه .. قبل نوصل وقف زي تفتيش ودخل اثنين بوليس شيكوا عالجوازات والفيزا سبق رحنا مااتذكر كان فيه تفتيش اندورا مدينه جميله السنتر عباره عن محلات وسوق كبير مفتوح وفيه مول مسكر جميله مره والاسعار عندهم ارخص كثير خاصه العطور والتجميل يهبل مره تقش وماتفكر في شي تفرقنا هو شارع طويل مافيه ضيعه كل واحد يشوف وش يحب فجأة تجمعنا نتقهوى الا انفاجيء بنتي الكبيره تسحب شنطة ههه شرتها عشان تشيل مقاضيها وبكره رحلتنا داخليه قلت اجل خل نوقف متقهوى واضيف شنطة للحجز وش نسوي بعد الحمدلله اضفتها ووقفنا شربنا شاهي واحد قهوة وبطاطس وكملنا تسوق بعدين قبل نرجع للباص مرينا مقهى عنده هوت تشوكلت وشوروس اخذنا منه ومشينا للمحطه عشان نلحق باص الساعه ست وربع الحمدلله وصلنا على الوقت وركبنا الباص عاد هنا قلت زين مااخذنا سياره الطريق بعضه اظلم ومتعرج وانا مااحب الطرق كذا وصلنا برشلونه ورجعنا لفندقنا وطلبنا برقر بادن بادن احتجنا رقم اسباني وكلكنا موظف الاستقبال وعطاهم رقمه واستلم طلبنا اكلنا ونمنا ورانا رحله الفجر لايطاليا وبكذا انتهى جزء برشلونه .. حبيت اضيف رحلتي ولو بدون صور بس لان ماشفت تقاربر جديده هنا قلت اضيف اي معلومه نشوفكم في رحلات ثانيه ان شاءالله |
الله يعطيك العافية وخاصة انك نقلت لنا تجربتك مع طيران حديث ودخيل علينا تتقريبا مثلك احب تكون شاشة قدامي حتى لو ما اتابع شي حاجه نفسيه |
الله يعافيك ابو منار وشكرا للرد ايه والله المقصد انقل التجربه والطيران جديد وزين سعره للي يهتم بالميزانيات |
قبل انهي قسم برشلونة بتكلم عن مطارهم رحنا الصباح مبكر رحلتنا الى بولونيا على طيران vueling وهو ايضا طيران داخلي اقتصادي وكل يوم ضايفين شنطة من البنات والحمدلله . دخلنا المطار لقينا كاونترات مكتوب شيك ان ذاتي حتى الشناط بصراحة ماقد جربناها بس قلنا يالله نسويها اسرع يمدينا نروح نفطر ومانمسك طابور سوينا طباعة للبوردينق وحطينا عدد الشناط وطبع لنا ستكراتها ووديناها للميزان بعد ماحطينا لكل شنطة ستكر واخذنا جزء منه زي مايسوي الموظف وبس يوزنها الجهاز وتروح للسير استودعتهم الله اول مرة اسويها والحمدلله الامر سهل جدا . رحنا للتفتيش وبصراحة زعلوني الاسبان والله احبهم ومحترمين الا موظفهم نشب للبنات يشيلون جاكيتاتهم وفهمناه انها زي رسمي ماينشال (انا ماقال لي شي لان لابسه جكيت طويل مسكر مرة مافيه مجال ينفتح ) وولدي يتكلم اسباني حاول معه ويشرح له في مطارات كثير يودون البنات مكان صاد وفيه موظفه تفتش بالعادة . المهم خلصنا الحمدلله بالسلامة وبنتي الصغيره تتحلطم قلت لها تعودي موظفين المطارات لا تحاكينهم ابد لازين ولا شين والله الواحد يخاف بعد . رحنا بعدها مابعد فتح احد لين فتح كوفي اخذنا منه سندوتشات وشاهي وقهوة والحمدلله ورحنا عند بوابتنا . انتهى جزء برشلونه انا احبها كثير ومن المدن اللي عادي اكرر زيارتها ماامل منها . |
بالفعل برشلونه ونيسة متى ما سلمتوا من النشل السرقة فيها وفي مدريد زايدة عن الحد بس خسارة ما لحقتوا على زارا وهو المفضل عندي برضه أسلوب جميل تسلمين :e306: |
اقتباس:
زارا حبيب الكل وفي اسبانيا افضل من اي مكان ان شاءالله مرة ثانيه |
ماشاءالله انا كنت ناسيه التقرير والا شنوو المهم كملته الحين حلو التمشي ببرشلونه والتسوق لابد منه بكل مكان طيب لما اضفتي الجنطه كم اخذوا منكم على كل جنطه او بالكيلو ؟ استمتعنا بالتقرير وبالمعلومات الجميله شكراا لذكر تجربتج |
اقتباس:
|
لو مع هالتقرير الجميل صور ياسلام شكرا لك |
اقتباس:
|
تقرير مكتوب بأسلوب محبب وسلس حسافه يا ريت تحاولين تضيفين صور ويكتمل الجمال :18: بالنسبه للبس الجاكيت في المطار مشكله لان اغلب او كل المطارات يطلبون تشيلينه واجهت المشكله مره وحده بحياتي وكانت الموظفه محترمه ودتني مكتب مسكر وفتشتني وخذت الجاكيت حطته بالجهاز وردته لي من عقب ولا مره رحت المطار بجاكيت |
اقتباس:
جاري محاولات مع عيالي اسرق صورهم واخليهم يصلحونها لي هنا #رفقا بنا :) صحيح غالبا او والله دائما القى موظفات متفهمات مدري وراهم حقين برشلونه زعلونا عليهم . |
يا سلام ذكرتيني في برشلونه واندورا من اجمل الاماكن اللي زرناها برشلونه ونيسه وخصوصا شارع الرمبلا وايد حلو |
سرد جميل وممتع :13: برشلونه بالخطة عندي فضول استكشفها بس محتاره كيف تتقسم مع مدريد والجنوب وبالنسية لطيران ويز انا برضه جربتها في يونيو 2023 دايركت الرياض - روما - الرياض كانت مثلكم ولله الحمد تجربة ايجابيه جدا وتكرر وتعتمد , كانت الطائره فل لكن الناس مبسوطه ههههه , الطاقم جدا ودود , الكراسي مريحه جدا بس الشي السئ فيها وقت وصولها للوجهه اخر الليل والحمامات بكرامه مافي تنظيف |
| الساعة الآن 02:02 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO