|
باص لندن وبطاقة الاويستر !! مافهمتها ابداً السلام عليكم ورحمة الله :e022: أنا آلان في لندن لي يومين وضيعت شوي ابي منكم مساعدة .. أسئلة مهمة تتمحور حول الباص ، أنا أخذت اويستر لباصات لندن فقط .. وماعرفت شلون اعرف رقم الباص اللي مفروض اركبه ؟ :20: خرائط قوقل مانفعتني ولا تجيب لي فقط الباصات تجيب ان مفروض اركب مترو ثم باص وحوسه ؟؟ وايضاً لما اطلع لمحطة وقوف الباص القريبة مني واقرأ في اللوحة اللي فيها خرائط مسار كل باص ما احصل مكتوب وجهتي ؟ يعني مثلاً ابي اروح هارودز و مو مكتوب هارودز كيف اعرف المحطة اللي بيوقف فيها الباص قريبة من وجهتي ؟ هل فيه برنامج يعلمني ؟؟ اليوم انا قعدت على خريطة قوقل ابي اروح لبرج لندن ولا مسار من الباصات يوديني ورحت كتبت اخر محطة لكل مسار وحصلت مسار يودي لمكان ننوعاً ما قريب من برج لندن ونزلت وغيرت الباص ، بس ولو حوسه ابي برنامج او طريقة اعرف منها مباشرة وين اركب او وين اروح :/ يعني مثلاً ستراتفورد مول اللي هو اكبر مول باوربا ؟ ماعرفت اروح له ؟ كان مفروض اروح له اليوم بس ماعرفت !!! لدرجة توقعت ان الباص والاويستر مايودي له :10: وبالنسبه للاوت لت Bicester Village هل اقدر اروح له بالباص ؟ :/ في السوبر ماركت اللي شريت منه قال المحاسب ان الباصات فقط لندن والاوت لت خارج لندن لازم تاخذين قطار :/ وسعر تذكرة القطار اوفر !!!!! 200 باوند لي انا واهلي ؟؟ هل يسوى المكان !! ولا لا ! وشكراً لكم ... امي تدعي لكم دائماً ولو ماعرفنا شئ تقول أسئلي في المندى :e32d::e32d: |
لا ابدا السالفه ابسط مما تتوقع اخوي الامور سهلة جدا خلني اطلع من العمل واشرحها لك بأذن واحد احد باسرع وقت ان شاء الله |
|
جربت الموقع ، غير واضح يكتب ارقام باصات ما احصلها في الشارع !! ولا في اللوحات اللي مكتوبه في محطة انتظار الباص ؟ انا اهم شئ عندي الاوتلت ما ادري لو اقدر اروح له بالباص :( |
اقتباس:
|
الاوت لت ما ينفع الباص لازم القطار الباص اذا ما لقيتي الرقم اللي يودي للمكان اللي تبغينه في المحطه اللي عندك روحي للمحطه اللي بعدها الارقام مكتوبه باللوحه ولازم تعرفين اتجاه المكان لازم تكونين عارفته لان الباص ما يلف للوراء يمشي سيدا افضل شي لج اسألي الفندق عن محطة الباص اللي توديك ورقم الباص ثاني شي اسألي الناس في الشارع عرب او اجانب الكل يحب يساعد اسالي راعي الباص قبل لا تركبين قولي له المكان وهو يدليك على المحطه اذا كانت يسار او يمين ورقم الباص لا تستحين اسألي افضل بالنسبه لمول الويستفيلد الكبير بستارتفورد اخذي تاكسي لانها منطقة بعيده بتتعبين بالباص وكل شوي يوقف وان شاءالله بعد الشباب بيخدمونج لا تحاتين |
في تطبيق اسمه لندن بس (باص) مفيد و الاندرقراوند مافي اسهل منه و بستر ماتوصل 200 الحجز المبكر حتى ب 18 بوند ممكن توصل |
الأخوان ماقصرو بيض الله وجهم بعطيك طريقتي انا زيك مااحفظ الارقام ومع الوقت والتجربة حفظتها اول ماتوصلين موقف الباص بتشوفين لوحة فيها خريطة وفيها ارقام واسماء المناطق مرتبة بالابجدية مثلا وين تبين تروحين انتي في موقف الي جنب الماريوت بزاوية الهايدبارك بتروحين الهارودز مثال هذا الهارودز في النايسبريج تشوفين حرف الكي k اذا مكتوب النايسبريج معناتة الباص يروح هناك اكيد بتشوفين مكتوب رقم بجنبه او كذا رقم مكن 4 ارقام كذلك مثلا 143 - 414 - N10 يعني اي باص يمر عليك بهالارقام اركبي فيه اكيد انه بيروح الهارودز ولزيادة التأكيد اسألي سواق الباص جدا متعاونين وحبيبين ولاتستحين منهم عادي الوضع متعودين وهذه من اساسيات عملهم استعيني بالتطبيقات في المتجر للتلفونات الذكية جدا مفيدة وسهلة ماعليك الا تحديد المكان الي تبينه وهو يرسم لك الخطة بالارقام والاوقات اتمنى اكون افدتك استخدمي طريقتي الاولى وبتشوفين شلون هي بسيطة جدا وواضحة اتمنى عاد اني عرفت اشرح البسترفلج تذكرتها حدها 20 باوند دائم اشتريها من محطة مارليبون ن شباك التذاكر اقطعها واركب مع اقرب رحلة شاملة الباص هناك في القرية يمكن انتي مفهمو عليك يحسبونك تبين منطقة ثانية لذلك انتبهي وفيه رحلات بالباص تنطلق من الاكسفورد بسعر اقل لكن ماانصحك مشوار وبعيد القطار احسن ويااختي اسألي العرب واخوانا الخليجين مافيها شي بالعكس اكثر شي يسعدني هناك ان احد يجي ينشدني والله نفرح ويفرحون لاستعنتم باخوانكم والحريم الله ماكثرهم في محطة مارليبون يروحون لنفس السوق لذلك من تشوفينهم اتبعيهم وماجاك علي هههههه اقص يدي اذا مو رايحين القرية :32: |
اختي تراه سهل مرررره بس انتي روقي شوي : الاويستر كارد للمترو والباصات فقط ماتقدرين تستخدمينه للقطارات الي تودي اماكن بعيده مثل البستر فيلج وغيره من الاماكن البعيده 1- كل فندق فيه استشاري يدلك على اقرب طريق اسأليه مثلاً تبين تروحين من الماربل ارش الى البيكدلي بيقولك اركبي الباص رقم 94 الي بيمر في الماربل ارش وانزلي لما تطلع في شاشة الباص كلمت بيكادلي وانزلي فيها ,,,لانو كل باص فيه شاشه داخل الباص نفسه وكل مايوقف في جهاز صوتي يقولك اسم المحطه القادمه الي يوقف فيها ,,, 2- لازم تعرفين شلون تتعاملين مع google MAp وتراه سهل مره يعني انتي تختارين مكان الوجهه وتختارين وسيلة النقل اما مشي على الارجل او الباص او المترو . 3- لازم تفرقين بين شي اسمه مترو وشي اسمه قطار : المترو للاماكن الي داخل لندن يعني قريبه منك القطار للأماكن البعيده مثل البستر فيلج وغيره من الاماكن الي برى لندن مثل ملاهي ثورب بارك وماتقدرين تستخدمينه بالاويستر كارد . 4- كل منطقة انتظار للباصات فيه عامود مكتوب فيه رقم الباص وين االمحطات الي بيمر فيها الين يوصل اخر محطه له ويرجع من نقطة البدايه حقته مثلاً باص رقم 148 ينطلق من محة لانكستر جيت الى اخر محطه له بيكادلي وانتي تبين تروحين الاكسفورد فيه وحده من توقفاته هي الاكسفور تركبين فيه ... اتمنى اني قدرت اساعدك واذا فيه اي استفسار حاظرين لا تستحين امشي وأسألي .. مرحباً فيك اختي سلمي على الوالده الله يحفظنا وياكم |
تقصدين مول ويستفيلد فيه 2 مجمعين واحد قريب في شبردبوش هذا تروحين له بالمترو او الباص هو في آخر امتداد شارع الاكسفورد من جنوب يعني مثال من محطة ماربل ارش او لانكستر غيت او كوينزوي او نوتينغ هيل وسيييده لشبردبوش كل هالمحطات بتمرين عليهم لاتنزلين الا في شبردبوش وفيه ثاني بعيد شوي ومايستاهل العنوه اذا المقصد فقط تسوق وهذا بالمترو الى محطة ليفربول وبعدها تاخذين الترين يعني الي يمشي فوق مو الي بالانفاق الى ويستفيلد ستراتفورد سيتي، Olympic Park, Montfichet Road, London E20 1EJ، المملكة المتحدة |
| الساعة الآن 10:37 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO