|
ولندن ولندن ..... آه يالندن ( بصراحة ماعجبتني ) السلام عليكم ورحمة الله وبركاته ؛ لي اسبوع راجعة من بريطانيا ( رحلة صيف 2019 ) بعد ماكانت النية شمال ايطاليا وغيرنا الوجهة المهم ..... اول مره أروح بريطانيا ؛ وأول ماطبيت لندن أنصدمت من البلد وسخة مره وقديمه ومافيها أي تقدم أو تطور ! قلت يمكن الانطباع الاول لي غلط مع الآيام عرفت أن احلى مافي بريطانيا جوها وطبيعتها خاصة بلدة ( ويندسور ) سافرنا لبريطانيا بشهر جولاي ( شهر سبعة ميلادي ) 2019 الجو كان معتدل أبداً ماكان بارد وآخر الايام حر ( متنا حر وماكان فيه استعداد في بعض الشقق للحر من تكييف وغيره ) المواصلات غالية وخاصة تاكسي لندن ؛ وبالأخير اعتمدنا الباصات والقطارات أرخص . المطاعم والكوفي شوب بعد غالية وعادية مافيها فخامة وكمية أكلهم قليل مقارنةً بأمريكا والدول العربية . للأمانة كانت هناك سهولة في استخراج التأشيرة البريطانية وكذلك سهولة في الجمرك البريطاني في مطار لندن ولله الحمد بأختصار بريطانيا بدون جو وطبيعة ماتسوى شي ... ماادري ليش الناس هابين فيها وتتملك فيها !! وأنصح السفر إليها في اشهر يكون الجو فيها جميل ومطر ... حتى مايواجهكم الحر مثلنا بصراحة ماأتوقع العودة لها مرة أخرى والله أعلم . وشكراً |
أهم حاجه الجو الناس تسافر تبغى تغير جو يعني لو رحتي لشرق اسيا زي ماليزيا واندونيسيا حتشوفي كميه هائله من الطبيعه لكن الجو حررررر ورطوبه فما حتستمتعي كمان بلاد اوروبا تتشابه في الطبيعه لكن زي جو لندن لا يوجد مثله في العالم كله وهو اللي جاذب السياح من كل أنحاء العالم وهذا أحد مميزات لندن |
الحمدلله على السلامه الجوو اكيد بيكون الجو حار لأنك رايحة فب أحر شهر بالسنه ولكن حرهم يستحمل مو مثل حرنا بالنسبه للتكييف في وايد فنادق مكيفه وهذا بيكون مكتوب ببوكينغ اذا الفندق مكيف او لا المناطق الشماليه ببريطانيا الجو ابرد مع ان هذه السنه شفنا امطار وجو جميل من سنابات الاهل في نص شهر يوليو الاوساخ مادري يمكن ايامكم لان البلد في ذروته السياحيه التطور ؟ ؟ ليش لان المباني وشكلها المحتفظين فيه او شنو هل لقيتي تخلف بالمواصلات او البنيه التحتيه للبد المواصلات عندهم شبكات مترو وقطارات وباصات وتاكسي واوبر وجت ارخص تاكسي في لندن بس استخدام بطاقات اويستر ولها موضوع شرح كامل عنها هنا في البوابه مفيد كان فادكم لو مطلعه عليه قبل السفره المطاعم والكافيهات فيها انواع الرخيص والغالي والاطباق كذلك على حسب المطعم حتى عندنا تلاقين اطباق غاليه وكميه قليله بس طبعا ما نظلم الكل لان البعض الطبيعه تلاقينها في القرى والمدن الشماليه والبحيرات ويندمير كانت راح تعجبج وايد وان شاءالله تروحين لها مره ثانيه وتغيرين رايج البلد حلووو بس روحي لها في الشتاء ولا تروحين لهابالعطلة الصيفية زحمة |
الحمد لله على السلامة اختياركم لتوقيت السفر كان خاطئ لا تسافري لأي بلد في ذروة الصيف الاسعار دبل و الزحمة غير مقبولة و الاجواء حارة في مثل توقيتكم أشهر الصيف ( جون ، جولاي ، اغسطس ) كان ممكن تزوروا استراليا ، نيوزلندا أو جنوب افريقيا في أشهر الربيع ( مارس ، ابريل ، مايو ) ممكن تزوروا اوروبا ، امريكا ، كندا و دول امريكا الجنوبية والوسطى في أشهر الشتاء ( ديسمبر ، يناير ، فبراير ) أجمل وقت لزيارة دول شرق آسيا مثل ماليزيا وتايلند و اندونيسيا ووووووو أما أشهر الخريف ( سبتمبر ، اكتوبر ، نوفمبر ) ممكن تزوروا اليابان ، كوريا ، تايوان معوضين خير وان شاء الله تزوروا لندن بالتوقيت المناسب متأكد نظرتكم راح تتغير عن البلد شكراً على طرح رأيك بكل أمانة فهذا يفيد المسافرين كثيراً |
احترم وجهة نظرك ولا اختلف معك كثيرا حول لندن بالذات احيي فيك شجاعتك واعترافك بعدم نجاح التجربة وقليل من يعترف بذلك الصورة الذهنية المسبقة عن أي وجهة هي المسؤول رقم واحد في القرار النهائي بعد الزيارة حول نجاح التجربة أو فشلها ما زلت اذكر بعض رحلاتي السياحية والتي اعترف انها كانت فاشلة الأولى منها كانت في حدود 30 يوما وغيرت الوجهة بعد أسبوع فقط رغم الحجز المدفوع مسبقا إلى دولة أخرى بعد الرجوع للسعودية وشحن المعنويات الأخيرة كانت في حدود 37 يوما وغيرت بعض الوجهات داخل الدولة رغم الحجز المدفوع مسبقا كنت أتوقف عند اشهر بحيرة عند الناس في تلك الوجهة وأقول لنفسي أين المتعة والاسترخاء كنت ادخل مقر الإقامة الذي حجزت فيه وتقييمه فوق 9 من 10 وأقول أين الرفاهية المزعومة في رحلاتي المتأخرة صرت اعمل حذف للصورة الذهنية المسبقة وأكون صورة من الواقع اثناء الرحلة بعيدا عن طوفان الآراء غير العادلة احيانا وابتعد عن اطالة الإقامة في اغلب الوجهات الأكثر ضجيجا إعلاميا داخل كل دولة حتى لا تصدمنى تقبلوا تحياتي |
السلام عليكم ورحمة الله سبحان الله الموضوع كان عبارة عن رأي فقط للأخت ايمان تذكر فيه تجربتها الغير ناجحة بالنسبة لزيارتها للندن إلا ..... وكلمة ( إلا ) ما جعلتني حقيقة أرد على الموضوع إلا أن الردود الجميلة والرائعة من كل من : أختي العزيزة أم حسين أخي الحبيب بو غسان أخي الحنيفي أثرت فعلاً الموضوع وجعلت له بعداً آخر ، وهي فعلاً تعتبر دروس يستفاد منها فلكم جميعاً جزيل الشكر |
اقتباس:
صحيح الجو والطبيعة ومشكور على ردّك |
اقتباس:
الله يسلمك .... حنا مرتبطين بإجازة الصيف وشهر جولاي هو أنسب شهر لنا للسفر وهذا وجهة نظري قد يحتمل الصواب وقد يحتمل الخطأ فيه مثل يقول ( اللي مايعرف الشيء يجهله ) اتوقع بريطانيا تحتاج الزيارة لأكثر من مره حتى نفهمها ونعرف الاماكن الجميله فيها جزاك الله خير على مرورك |
اقتباس:
مثل ماقلت انا هذا الوقت المناسب لنا للسفر شهر جولاي وصحيح كانت لندن حر وزحمة وشكراً على المعلومات المفيدة |
اقتباس:
لاني اشوف الناس هابين فيها ويتملكون شقق ... على أيش ؟! اذا الجو حار ومافيها امطار كثير ؛ وأنا رحت مدن أوروبية أخرى كانت ابرد وأجمل من لندن بمراحل على العموم السفر آذواق وأنا حبيت اكتب رأي بصراحة ... وشكراً |
| الساعة الآن 06:05 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO