تقييمي لأجواء تركيا
 

السلام عليكم
اولا انا اكره الحر ودقيقه جدا بهالموضوع لانه يهمني
سافرت لتركيا في شهر سبتمبر الماضي في عيد الاضحى
الاجواء في ابانت براد واحيانا تكون بارده
اما سابنجا واسطنبول كانت سيئة جدا فتره الصباح الى الساعه 5
بعده يعتدل الجو
صراحه ندمت كل الندم لما رحت بهالشهر
اغلب كلام الناس يقولون الجو حار بس تقدر تتحمله مو نفس جو السعوديه ودرجه الحراره ماتعدي 27
.... بس 27 عندهم كأنه 45 عندنا
ابدددددا ماكان يحتمل! اطلع الصبح والله دقيقه تحت الشمس تصير ريحتي حريقة
بوصف أدق تعرفون العيال لما يطلعون الشارع ويرجعون كيف تصير ريحتهم :D
المشكله في تركيا لازم تطلع بدري عشان كل الاماكن السياحيه تقفل الساعه 6
فلو انتظرت الشمس تهدأ بيفوتك كل شي ويخلص اليوم بدون اي اكتفتي
اللي يهمه الجو مثلي ويبي يدفع فلوس على شي يسوى لايسافر تركيا بالصيف


السفره الثانيه كانت قبل اسبوع
اللي هو شهر مايو
برضه قالوا لي ان الجو ربيع واحسن وقت للزياره ورحت اسطنبول فقط
كانت سفرتي تاريخ 5 ووصلت شمسس وعلى بالي بشوف الغيوم بما انه فصل الربيع��
عرفت ان شمسهم محد يمزح معها حتى لو بالشتاء :D في شجر لازال صامد مع لونه الاخضر وفي شجر مات .. ورود التوليب اللي قالوا لي عنها بشوفها كثير فقط شفتها في مكان واحد ومره وحده فقط والباقي ماتوا الله يرحمهم ههههههه
ثاني يوم صار الجو غيوم وامطار والجو براد شوي بس بالليل احيانا تضطر تلبس جاكيت
بعد بكم يوم شمسس قويه وحر تقريبا في يوم 11 مايو وفوق انسلخنا بس مو مثل شمس سبتمبر بس كان برضه حر مايحتمل
انا ماعرفت انه حر صدق الا لما صار كل واحد نفسه بخشمه بس ننافخ على بعض هههههه ولأني بالايام الاخيره ألبس جزمه فلات وانتو بكرامه صارت رجلي "بالمكان المكشوف" اغمق من اللي متغطي بالجزمه ههههههه حرقتني الشمس :D يعني مو مثل ماقالوا ربيع والجو بارد

الخلاصه ان جو مايو متقلب بين حر وبرد وشمس وغيوم .. هذا وانا سافرت اول مايو ومتأكده في نهاية مايو حر قوي
المهم اني اعطيت الاعضاء الذكور هنا اكس في تقييم الاجواء لانهم نكبونا ههههههه حنا الحريم بالبيوت ومانتحمل الحر زيهم متعودين


المره الثالثه بإذن الله اذا سافرت ماراح افكر اسافر غير منتصف شهر ابريل فقط
فصل امطار وجو بارد تقدر تتحمله والشجر اخضرررر والورود والتوليب خاصه بكل مكان

لمن لايهمه الامر:D
اذا انت من عشاق ستاربكس ... اشرب من هناك لين تشبع قبل ترجع السعوديه
لان اسعاره أرخص منا بنسبة 50% :D
الكوفي اللي اشتريه ب 19 ريال ينباع هناك ب 9 ليره :25:


وشكرا لكم ... اذا استفدت من موضوعي ادعي لي الله يحقق مرادي

والله هذه المشكله بعينها انا حجزت شهر 8 يعني مااروح والا كيف معقول الحرارة عندهم اشد منا اجل وش نقول حنا بالجو اللي عندنا اللي شوي الجمل وهو ماشي ياخسارة علي الوقت اللي ضاع من عمري خلال تصفحي بالتقارير خلاص انا زعلان منكم:28:

الاجواء في اسطنبول متقلبة في الصيف . انا رحت اوغست الماضي و كانت درجة الحرارة خلال اسبوعين من 27 الى 34 درجة . و اتذكر كان في يوم مطر و يوم ثاني رحنا اكوا دولفين ما قدرنا نسبح من برودة الماء . افضل حل في رأيي زيارة موقع سياحي في الصباح و مول فترة الظهيرة و الانطلاق للتمشية من 4 الى 10 مساء يكون الجو بديع حيث انه غروب الشمس الساعة 8 تقريبا و اغلب المحلات تقفل الساعة 10 .

الجو حار مثل جونا بس هم أسوء لأن تحس ان الشمس فوق راسك مباشره :D
نفوخك تغلي على قولة اخواننا المصاريه .. اشعة الشمس هناك عموديه مؤذيه جدا يعني انتبهوا من ضربات الشمس
للاسف انت حجزت في اسوء وقت هههههه انا لما حجزت في سبتمبر كان هالشهر هو نهاية الصيف وماسلمت
ممكن الذكور غير الاناث يتحملون لانهم متعودين
بس انا لما ابي اسافر وأغيّر جو يعني لازم انبسط من كل النواحي ... والا يازين المكيف بالسعوديه :D

رحلتي بمايو لما يكون الجو مغيّم اطلع اتمشى بعد الفطور مباشره يعني الساعه 8
بس بسبتمبر الساعه 5 العصر اطلع :21: شفت الفرق :D

المهم ضروري بعد ترجع سالم تكتب لنا عن الجو

ماكان تقييمي لحالي حتى صديقتي نفس الشي لان ماقدرنا نتسوق
اذكر رحنا بازار الثلاثاء ولأن المكان مو مكيّف وزحمه وحر وقفنا تسوق وطلعنا ... هالكلام بمايو تقريبا في 10 مايو .. الساعه 12 الظهر او 1


لا .. كنسلنا الشمال التركي

المشكله مثل ايا صوفيا يقفل الساعه 6 وقصر دولما بهشه يقفل 4
البازارات برضه الساعه 6
المغزى ان اغلب الاماكن يقفلون بدري
متى توصل وتاخذ وقتك اذا طلعت 4 ؟ مافي وقت مره

البسفور والحدائق ماتنفع الا بالنهار