|
مساعده للخبراء اول مره اسافر تركيا سلام عليكم يا اعضاء وخبراء المنتدى الغالي .. طبعا زي ما هو واضح بالعنوان انا اول مره اسافر لتركيا بعد تردد شديد وخوف من الاوضاع هناك استخرت وتيسرت ولله الحمد . طبعا انا راح اقعد هناك 8 ليالي 9 ايام من 20 سبتمبر الئ 28 ف الله يعطيكم العافيه بغيت جدول مناسب بين اسطنبول وبورصه بالاماكن السياحيه الي تستاهل ازوها مثل جزيره الاميرات ورحله بالبفسفور وجبل الاولوداغ والسلطان احمد وهل تنصحوني استاجر سياره لاني صراحه ما احب التكاسي ولا سايق خاص احب السياره تحت رجلي مكان ما اروح ولا يزعجني احد وعندي سوال محيرني اذا استاجرت سياره اقدر اروح فيها بالعباره الي بورصه لاني سمعت يقولون تقدر تروح بسيارتك بالعباره (اسم الميناء باسطنبول ؟ وبورصه ؟ ) وبالنسبه للتعاملات الماليه انا راح اتعامل بالفيزا واسحب من صرافتهم بالفيزا ينفع كذا ؟ والله يجزاكم كل خير اعذروني علئ الاسئله الكثيره ولكن العشم فيكم اكبر |
هلا اخوي الوضع هناك جدا ممتاز ولا تسمع للناس الخايفه تركيا اكثر دولة تستقبل خليجيين والوضع ممتاز والله يقابلونك بابتسامه ورحابة صدر انا كنت اسمع مثلك لكن بعد مارحتلها مافيها غير كل علم طيب ولكن فيه ناس لهم اهداف اخرى يخوفون من السفر لتركيا ثانيا : انا افضل وبشدة قصوى ان تزور الشمال التركي انت لم تذكر الشمال التركي وهذا مستغرب !! بما ان لديك 8 ليالي فقط اذهب اسطنبول طرابزون وماحولها اوزنقول ثالثا: بالنسبة للسيارة في الشمال التركي لاتوجد مواصلات عامة وبالتاكيد افضل خيار استيجار سيارة ما فيها كلام وافضل شركة guranta ارخص من الشركات العالمية ولها اسمها ومجربه من الكثير مضمونه وخذ تامين شامل و قوقل ماب يكفي لاتستاجر قارمن اما في اسطنبول الافضل حمل تطبيق اسمه bitaksi تقريبا كذا تطبيق تكاسي تركي مثل كريم و اوبر مضمون وافضل شي لا يستطيع ان يغشك لان السعر التقريبي يظهر لك قبل طلب التاكسي ومعلومات السواق موجودة وتستطيع تدفع بالبطاقة...شكرا |
تسلم على الرد يالغالي بالنسبه للتكاسي ماني مرتاح لهم وانا قررت استاجر سياره من موقع رينتال كار وارخص اشوف انه افضل اذا حد عنده تجارب ياليت يفيدنا وياليت حد يجاوب بخصوص العباره هل تشيل سياره ومن وين |
الشمال التركي بعدين اروح لها ان شاء الله |
الجميع سوف يشجعك على استئجار سيارة خارج اسطنبول مثلا في الذهاب إلى سبانجا أو يلوا أو بورصة ، أما داخل اسطنبول سوف تجد صعوبة لأنها مزدحمة وممكن في بعض الأحيان ما تحصل موقف لسيارتك أنا راجع من تركيا قبل 3 أسابيع مع عائلتي وأطفالي وكانت أول زيارة لها واستخدمت تطبيق آي تاكسي بإستخدام العداد والحمدلله جميع السائقين كانوا محترمين وممكن تستخدم تطبيقات أخرى مثل بي تاكسي وكريم ، فما فيه داعي للخوف والقلق وإذا كنتوا شخصين أو ثلاثة ممكن تستخدموا الترام والمترو أرخص |
العبارة إلى بورصة ما سبق جربتها ولكن حسب إطلاعي ممكن تطلع من ميناء يني كابي في اسطنبول إذا كانت عندك سيارة إلى ميناء مودانيا في بورصة ، أما ميناء امينونو فيه عبارات تطلع إلى بورصة لكن بدون سيارات وبالتوفيق |
رحلة موفقة إن شاء الله |
اقتباس:
انا مثلك رحلتي بعد كم اسبوع وقررت استأجر سيارة لكن لاتسكن بالسلطان احمد ماراح تلقى مواقف بخصوص العبارة بحثت كثير وكثير وفحطت لين عرفت لطريقة من هذا الموقع https://www.ido.com.tr/ اعتقد فيه اكثر من ميناء تطلع من عبارة الي تشيل السفن لكن انتبه مو كل الموانئ انا اخترت ميناء يني كابي اختار سيارة وحجمها ومع السيارة يكون تذكرة لشخص واحد بعدين من الخيارات تحت تضيف شخص بالغ او تختار طفل لازم تضيف الاطفال مع انهم مجانا بس لازم تسجل بياناتهم وبعدين روح اختار المقعد بالعبارة |
1 مرفق حلو ممتاز عرفت بس غريبه ما في رحلات في سبتمبر يمكن باقي ما فتحوا للشهر الجاي .. وش رايكم بالجدول هذا الوصول الخميس 9 صباح اسطنبول يصير الخميس والجمعه والسبت اسطنبول الاحد الاثنين بورصه الثلاثاء سبانجا الاربعاء والخميس اسطنبول والعوده للوطن الغالي باذن الله نحلل الرحله تحليل 😂😂 |
بالتوفيق بالنسبة لي مثل ماقلت لك من واقع تجربه اكثر من مره اسطنبول من الخطأ استيجار سيارة فيها لانها زحمة ولايوجد مواقف في اغلب الاماكن اذا حصلت موقف تلقى عليه شعار ممنوع الوقوف موقف خاص ومثل ما اكد اخونا المسافر انا جربت تطبيق بي تاكسي في اكثر من مرة جميل جدا ولا يوجد اي محاوله سرقة او نصب بعكس التاكسي العادي الذي يحذر منه الكثير |
اما بالنسبة لموقع رينتال كار موقع عالمي مضمون انا جربته كثير ممتاز لكن تجد عندهم غاليا عروض مكتوب تامين شامل مجاني ولما تستلم السيارة يقول لك الموظف تحتاج تدفع تامين شامل لا يوجد لديك تامين شامل انت هنا ادفع للتامين لانك اصلا ما دفعت قبل للموقع التامين مجاني بس شركات السيارات لا يعترفون فيه..ادفع افضل لاقد الله حادث اي شي تحتاج ورقة المرور فقط |
اقتباس:
اعكس الايام بين سبانجا وبورصة بورصة تصلح بالشتاء سبانجا اسكن بالمنطقة عند جبل معشوقية جميل لاستجمام يومين بورصة كربون اسطنبول |
المشكله ما بقعد الايام كلها باسطنبول عشان كذا بستاجر واخذها بورصه وسبانجا وكيف الاوضاع الحين بعد طيحت الليره |
اقرا التقارير وراح تشوف نفسك خبير دام سفرتك بعدها اقرا والله بتستفيد خاصه التقارير المثبته وربي يسهل سفرتكم |
الله يعطيكم العافيه ما قصرتم جميع ، بحجز سياره عن طريق رينتال كار استلام من المطار بس كيف يوصلون لي السياره والا لهم مكاتب استلم السياره منها ؟ وفيه موقع ثاني يمدحونه اسمه نارقيتا اعتقد وش الافضل بينهم |
رحلة موفقه ان شاظالله:e520: |
عزيزي انسى حكاية انك تستاجر سيارة داخل اسطنبول لانها متعبة جدا جدا لك وزحمة شديدة والمواقف نادرة وبعيدة وغالية والبنزين غااالي وش لك بوجع الراس انت رايح تنبسط او تتبهذل في السواقة وفي البحث عن مواقف خذ لك سواق مع سيارتة ويكون مرشد سياحي لك وريح راسك واذا مصر على انك تاخذ تسوق السيارة بنفسك فالله يعينك على القروشة والمواقف وتقدر تدخل سيارتك للعبارة المتجهة الى بورصة بس اسال عن الطريقة عند الميناء |
خلاص ققرت استخدم المترو او التكاسي باسطنبول ،وبورصه استاجرسياره وبالنسبه لجبل اولوداغ وين مكان بدايه التلفريك او اطلع بسيارتي |
فعلا اسطنبول مايحتاج لها سيارة المترو والباص والتاكسي تكفي السيارة تعتبر عبء عليك جبل الاولداغ لمن تطلع بالتلفريك المحطه الثانية فيه سيارات فان توصل للقمة وسعرها رخيص |
الله يعطيكم العافيه ويسعدكم الحين بسالكم موقع رينتال كار يقبل بطاقه فيزا مسبقه الدفع ؟ اذا حجزت سياره يلغي دايركت كلمت الاداره قالوا ما نقبل فيزا مسبقه الدفع غريبه |
اهلين وسهلين فيك احجز اذا وصلت ببطاقة مسبقة الدفع وخلاص |
الله يسخر لك اخوي ولنا جميعا انا سفرتي مع العايله بنص سبتمبر ومابعد رتبت شي بسالك اخوي عن جبل الاولداغ مممن تعطيني فكره عمه ؟؟ وبارك الله فيك |
وانا معم في ٢٠ سبتمبر بأذن الله ، جبل الالوداغ حسب ما سمعت انه في بورصه ورائع جدا في الستاء وفيه اطول تلفريك بالعالم واكبر شجره معمره طبعا اكتب عن الجبل ويطلع لك الف معلومه وبالصور وتفيدك اكثر انا حجزت في بورصه يومين ومخطط للجبل اروح ان شاء الله |
| الساعة الآن 05:23 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO