|
رايكم في مخطط سفرتي :) السلام عليكم رحلتي ان شاءالله بعد اقل من شهر واحس اني شوي ضايعه ومارتبت كل شي :21: خلصت الحمدلله حجوزات الطيران و اغلب الفنادق عددنا 4 كبار ومدة السفر 14 ليلة الوصول باريس و العودة من زيورخ الجدول كالآتي : 5 ليالي باريس 3 جنيف 5 انترلاكن 1 زيورخ < ماحجزت فندق في زيورخ .. بما انها ليله وحده عادي احجزها هناك واشوف الانسب ؟ ------------ جنيف : اول يوم : استكشاف المدينه ثاني وثالث يوم: هم اللي محتاره فيهم شوي كنت مفكره اخصص يوم كامل لآنسي بس قريت في احد الردود ان انشطتها قليلة و محتاجه كم ساعه بس ؟؟ و هل اخصص يوم كامل ل شامونيه والمونت بلان ؟ ولو فكرت ادمج شي معاهم مثل ايش ؟ ممكن اضيف مونترو او لوزان او مالهم داعي ؟ -------------- انترلاكن : اول يوم : التجول في المنطقه نفسها وزيارة مطل هاردر كلم ثاني يوم : زيارة قمة الجنقفرو ثالث يوم : زيارة شلالات جس باخ + تروميل باخ < ينفع زيارة شلالين في نفس اليوم ولا ننوع احسن يعني نحط كل واحد في يوم منفصل مع مكان اخر ؟؟ رابع يوم : بحيرة الاوشن سي + البلاوسيه < نفس السؤال فوق نجمعهم في نفس اليوم ؟ خامس يوم : ممكن زيارة لوزيرن او مصنع الشوكولاته < ودي ازورهم كلهم بس مو عارفه انسقهم في الجدول رايكم في الجدول ؟؟ هل ممكن اضيف اماكن اكثر في نفس اليوم ؟ من الاماكن اللي عجبتني و ودي اضيف عالاقل بعضها (جريندوالد + لوزيرن + مصنع نستله + خوانق الآر + قشتاد) ممكن تساعدوني في التنسيق و ايش الاماكن اللي اقدر اروح لها في نفس اليوم مع بعض ؟ ----------- المواصلات: باريس مواصلات عامه + من باريس لجنيف بالقطار بالنسبة ل سويسرا ما استقرينا للحين اذا بنستاجر سياره ولا لا :( بس لو فرضنا مبدئيا انه بناخذ سياره ،، فكرت اول يوم وصول جنيف ماراح نحتاجها فتنصحوني نستآجرها ثاني يوم في جنيف ونروح فيها آنسي وباقي الاماكن ؟ او بما انه الفندق بيعطونا بطاقات المواصلات في جنيف مجانا .. نأجر السياره واحنا متوجهين ل انترلاكن ؟ يعطيكم العافية و اتمنى تعطوني اقتراحاتكم وملاحظاتكم ع المخطط وشكرا :e306: |
مرحبا اختي وعليكم السلام ورحمه الله وبركاته ان شاء الله الجميع هنا ماراح يقصر معاج اذا ممكن في البدايه اعرف الفنادق الي تم الحجز لها !! الشي الثاني باريس خليها 4 ايام وزيدي اليوم في انترلاكن خليهم 6 وجنيف تستاهل ليلتين على الاكثر بس بما ان بتروحي الى انسي فا 3 ليالي مناسبه لها شامونيه لاتروحين لها كفايه قمه كانغفرو في انترلاكن لان الوقت ضيق عندج او اذا تبغين تروحين لها تخصصين لها نص يوم بدري الصباح وترجعين اول العصر لقضاءه في جنيف بالنص الثاني من اليوم يعني قمه مونت بلانك حسب وقتج وظروفج هناك بالنسبه لمنترو ولوزان لوزان تقدرين توقفين فيها وتتمسين فيها وانتي بطريقج من جنيف الى انترلاكن تتجولين فيها كم ساعه وبعدها تكملين الى انتر لاكن عشان تستغلين اليوم وبالنسبه لمنترو راح ادمجها لج في يوم واحد مع مصنع كرير للشوكولاته وتطلعين لهم من انتر لاكن راج لج للتكمله تحياتي |
بالنسبه لجدول انتر لاكن ماراح اتطرق له الحين بنرتب لج الجدول ان شاء الله عقب مانخلص ترتيب الامور الثانيه تطمني بأذن الله راح يكون مرتب بالنسبه للتنقلات صح باريس مايحتاج سياره خلكم على المترو فقط وفي جنيف تحتاجون سياره والافضل انكم تستأجرون ولا تستأجرونها يوم ذهابكم الي انسي يفضل تاخذونها وقت الوصول الى جنيف لانها مافرقت يوم واحد لان وقت تأجير السياره واستلامها يبغيلها وقت وهالوقت راح يضيع عليكم وقت بالخروج الصباح بدري للذهاب الى انسي اما اذا بتروحون انسي بالباص او المواصلات العامه فا ماتحتاجون تستأجرون السياره الا في وقت ذهابكم الى انتر لاكن لان انسي ممكن تروحون الاماكن القريبه من بعض بدون مواصلات ابتداء من الحديقه الاوروبيه مرورا بالحديقه الانجليزيه ومنها الى سنتر انسي |
ماقصر خبيرنا ابو سعد وجهت نظري تختلف جدا مالكم ومال جنيف أنتم في أوروبا متعوا نفسكم ف الارياف باريس ٣ ايام طيران داخلي ع جنيف استلام سياره من المطار ( حجزها مسبقا مع الطيران وأثناء حجز الطيران يفضّل الوصول لجنيف فترة النهار مقدما) الذهاب مباشره الي انسي يومين فرايبورغ (الغابات السوداء) ثلاث ايام ايسلتوالد او انترلاكن ٤ ايام زيوريخ يوم (بناء ع رغبتكم ) والاستعداد للمغادرة |
يعطيكم العافية ع الردود :) بالنسبة لتغيير الايام ف صراحه صعب حاليا بما اني حجزت الفنادق واتفقنا وخلصنا :21: انا كنت متردده بخصوص جنيف بس قلت اضيفها بالنص بين باريس و انترلاكن اسهل وبما انه اليومين اللي بعدها بطلع للاماكن القريبه هل انسي تستاهل يوم كامل ؟ بالنسبة ل مونترو اروح منها لمصنع الشوكولاته بدل ما اروح له من انترلاكن ؟ بس لاني قريت القطار اللي في مونترو يودي مصنع الجبن وصراحه مابي اروح له وابي استغل الوقت في مكان ثاني .. او في طريقه ثانيه ؟ بخصوص شامونيه انا شفت تقارير الاعضاء وعجبتني بس ماشفت القمه هل تكفي جونقفرو مكانها ؟؟ اقتراحاتكم بالنسبه لجنيف .. اول يوم التجول فيها .. ثاني يوم آنسي .. ثالث يوم مونترو ؟؟ ممكن اضيف شامونيه معاهم ؟؟ وياليت تعطوني اقتراحاتكم بالنسبه لجدول انترلاكن ؟ الترتيب اللي كتبته للايام خلاص هذا هو الترتيب النهائي للاسف ماقدر اغيره حاليا .. ياليت تفيدوني حسب هالترتيب :( |
توزيع الأيام ممتاز ونصيحتي لكم انكم تستاجرون سيارة لانها اكثر متعه واسهل للتنقل وتوفير الوقت جنيف -اليوم الاول جولة في المدينة - اليوم الثاني زيارة انسي وهي تستحق الزيارة نصف يوم على الأقل ولو معاكم السيارة ممكن تزورون شاموني في الصباح والفترة المسائية انسي - اليوم الثالث تزورون مونترو ولوزان مصنع الشوكلاته ممكن تزورونه وانتوا بالطريق من جنيف الى انترلاكن لو كان معاكم سيارة لان الوصول له بالقطار متعب وياخذ وقت انترلاكن - اليوم الأول بيكون يوم الوصول والتمشي فيها - اليوم الثاني زيارة بحيرة الاوشن ثم بحيرة البلو سي - اليوم الثالث قرية جريندوالد والصعود منها الى قمة جونغفرو وممكن بدالها تزورون قمة تتلس اللي قرب لوزيرن ثم مدينة لوزيرن - اليوم الرابع مطل الهادر كلم ثم رحلة بحرية في بحيرة برينز ومنها تزورون شلال جيس باخ وقرية برينز وفيها القطار البخاري - اليوم الخامس وادي لوتربنين وفيه شلال تروميل باخ وشلال ستوخ باخ والمطعم الدوار في قمة Schilthorn مع العلم ان شلال تروميل باخ وقمة Schilthorn توصولون لهم بالباص من محطة لوتربنين والباص رقمه 141 زيورخ الأفضل انكم تحجزون لها قبل السفر عشان تحصلون فنادق مناسبة لكم قرب محطة القطار هذا الجدول اذا كانت تنقلاتكم بالقطار اما اذا بالسيارة فيمكن يختلف شيء بسيط مع إضافة بعض الأماكن وبالتوفيق |
اقتباس:
يعطيييك العافية اخ مقدام ماقصرت استفدت جدا من الترتيب وضفت اماكن ماكنت مفكره فيها بالنسبة ل مصنع الشوكولاته دام الوصول له صعب بالقطار ..هل فيه باصات تاخذنا له من جنيف او من انترلاكن ؟ |
مصنع الشوكلاته ممن توصله بالقطار ولكن المدة شوي طويلة مع تبديل القطار في اكثر من محطة ومدة القطار من جنيف الى مصنع الشوكلاته حوالي ساعتين و35 دقيقة والقطار يطلع من محطة جنيف الى محطة Broc-Fabrique مع توقف وتبديل قطار في محطتين الاولى Romont والثانية Bulle ومدة القطار من انترلاكن الى مصنع الشوكلاته حوالي ساعتين و 19 دقيقة والقطار يطلع من محطة Interlaken West الى محطة Broc-Fabrique ويتوقف القطار في محطتين الاولى محطة بيرن والثانية محطة Bulle |
^ شكرا اخوي ماقصرت الحمدلله اقنعتهم نستاجر سياره .. وان شاء الله تكون اسهل و افضل :) |
بالتوفيق أختي وأستودعتكم الله :6::e328: |
| الساعة الآن 04:43 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO