|
مخالفة مرورية ... !! السلام عليكم ورحمة الله وبركاته 2015 كانت لي رحلة اوربية احدى محطاتها إنترلاكن خالفوني الشرطة في مواقف السيارات علشان مادفعت فلوس الموقف المخالفة غير مباشر يعني انهم علقوها على السياره .. المخالفة قيمتها 40 فرنك وانا الى الان مادفعتها وانا ان شاء الله مسافر بالصيف لسويسرا هل ممكن راح تواجهني مشكله لأني مادفعت المخالفة ... ؟؟ |
up up |
وعليكم السلام ورحمة الله وبركاته ما عندي فكرة، لأن عادةً لما يكون علينا مخالفة يخصمها مكتب تأجير السيارات من البطاقة الإئتمانية. إذا ما بعثوها لمكتب التأجير فما بتكون متسجلة عليك في أي مكان على ما اعتقد، لأن المخالفة على السيارة مب على رخصتك. هل ممكن يكون المكتب خصمها من البطاقة وإنت ما انتبهت؟ |
بالعادة يراسلونك شركة التأجير |
ياهلا ومرحبا اخوي في عده لوصول المخالفه وتسديدها وتختلف حسب الدوله وشركه التأجير الي يصير ان الشرطه ترسل المخالفه لشركه التأجير شركه التأجير ترسل لك ايميل بالمخالفه وتفاصيلها وغالبا يرسلون لك طريق الدفع اما عن طريق باي بال او ارسال المبلغ بتحويل بنكي عن طريق رقم الايبان اذا لم يصلهم رد منك خلال فتره يرسلون المخالفه لمركز الشرطه والذين بدورهم يرسلون لك رساله بالبريد وفيها تفاصيل المخالفه والتسديد راجع بريدك الالكتروني وللتسهيل عليك اكتب اسم شركه الايجار بالبحث عن الايميلات وتطلع لك كل مراسلاتهم بالتوفيق |
سبحان الله.. صار لنا موقف من كم يوم ويعتبر رد على استفسار الأخ أبو نيره كنا في سويسرا ها الشهر، منها 10 أيام في انترلاكن وبعدين 4 أيام في زيوريخ المهم، في الليلة الثانية لوصولنا لزيوريخ وعلى الساعة 3 بعد نص الليل :19: قمنا مفزوعين من النوم على شخص يدق الباب فكّرناه واحد سكران ومخربط في الغرفة فما فتحنا طبعا، تم يدق الباب، اطالعت من العين السحرية اللي في الباب وسألت إنت شو تبغي قال افتحوا الباب نحن الشرطة !!!!!!!!! كانوا اثنين ريال وحرمة، الحرمة حطت بطاقتها عند العين السحرية وقالت شوفي نحن الشرطة، قلنالهم ما بنفتح، شو عرّفنا إنتوا شرطة وإلا لا، وزوجي اتصل بموظف استقبال الفندق قاله في ناس عند الباب، قال الموظف إنهم شرطة وأنا اتأكدت من هوياتهم. فتحنا الباب، قالولنا نحن نبغي نسلمكم أوراق مخالفة ولازم زوجي يوقّع بالاستلام، وها المخالفة كانت عليكم من سنتين في 2017 ، وإنتوا ما دفعتوها !!!!!!!!! وإذا ما دفعتوها بيمسكونكم في المطار او أي منفذ حدودي تمرون عليه. وللعلم، نحن ها المرة دخلنا عن طريق مطار ميونيخ ومنه سرنا النمسا وبعدين سويسرا بالسيارة فما مرينا على أي منفذ حدودي في الطريق. كانت مخالفة سرعة على الشارع الرئيسي.. كان الشارع سرعته 80 ونحن كنا نسوق 100 وما وصلنا شي من مكتب تأجير السيارات بعد ما رجعنا، ما أعرف ليش. قالولنا ممكن تدفعونها في أي مكتب بريد. دفعناها اليوم الثاني ولله الحمد. المخالفة كانت ب 120 فرانك ، وغرامة التأخير 150 فرانك !!!!! أما كيف عرفوا مكاننا، فهو لأن لما سوينا تسجيل الدخول للفندق الموظف أخذ جواز سفر زوجي وعمل له مسح ضوئي، فالظاهر إن النظام عندهم متصل بالشرطة. أما فندق انترلاكن فما أخذوا الجواز.. ما أعرف هل نظامهم مختلف أو لأنهم يعرفونا من سنين ودايما نسكن عندهم لما نزور انترلاكن. وعلى فكرة، اتصلنا اليوم الثاني بسفارة الإمارات في سويسرا نسألهم عن الموضوع قالوا عادي الشرطة يسوونها لأن الناس غالبا طول اليوم يكونون طالعين من الفندق، وهم بالنسبة لهم عدم دفع المخالفة يعتبر جريمة أو شي من ها القبيل. وبعد كلمنا مدير الفندق عن كيف موظف الاستقبال ما خبرنا لما وصلوا الشرطة قال الموظف ما يقدر يسوي شي، خاصة إن الشرطة ما خبروهم شو الموضوع فإذا الموظف اتصل بالغرفة قبل ما الشرطة يطلعون فوق ممكن الشخص يهرب إذا كان مسوي جريمة مثلا. وهذا اللي صار ويانا، وياربّ محد يمرّ بمثل ها الموقف لأن فعلا شي مرعب إن الشرطة يدقون الباب ها الوقت، وإنت ما تعرف هم شرطة وإلا عصابة بتهجم عليك. والحمد لله على كل حال. |
موقف صعب يام نوف كذلك التوقيت غير مناسب |
المفروض موظف الاستقبال يتصل يبلغكم قبل وصول الشرطه للغرفة الوقت غير مناسب وكل الموضوع مخالفة مرورية ع الاقل اتصل الاستقبال وينزل لهم زوجك مو يجون الغرفه |
بعضها تسقط بالتقادم اذا مخالفة عادية وليست تجاوز سرعة بسرعة جنونية، اعتقد سبق وقرأت بموقع الشرطة السويسرية ان المخالفات المرورية تسقط بالتقادم بعد ظ£ سنوات من رفعها للمحكمة، اما المخالفات اللي تعتبر جريمة ولازم تمثل بالمحكمة بعضها تسقط بعد ظ© سنوات او اكثر او يطرحونك اول ماتوصل على المنافذ. عموما الامر بسيط، اذا منعوك من الدخول اشرح وضعك ومتأكد بتمشي امورك اذا مخالفتك بسيطة. فيه دشير كل سنة يجون اوروبا ويشحنون سياراتهم هناك من الخليج عاثوا بالارض فسادا وامورهم ماشيه وكل سنة يرجعون. |
يارجل ماعليك خوف اذا عليك مخالفه اذا وصلت سويسرا بيطلبوو منك تسددها فقط طبعا بيكون فيه غرامه على التاخير واذا ماكلموك اعرف ان ماعليك شي واذا ودك تتاكد ارسل ايميل واستفسر على الايميل هذا obuz@police.be.ch |
| الساعة الآن 10:38 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO