|
تجربتي البائسة مع Europcar السلام عليكم والرحمه ياشباب ويابنات قبل ٣ اشهر رحت المانيا واستاجرت سياره عن طريق مكتب يورب كار واخذو حجز مبلغ حوالي ٢٠٠٠ ريال طبعاً فيزتي هي بطاقة التسوق مسبقة الدفع , قبل رجوعي للسعوديه بيومين سلمت السياره في باريس وبعدها بيوم ( اليوم قبل الاخير ف السفره ) رجعت لي الالفين ريال الحمد لله سحبتها من الفيزا على طول من اقرب صرافه لكن السبب خلاني اكتب هالموضوع هو بعد رجوعي للسعوديه بثلاث ايام تقريباً دخلت تطبيق الراجحي كان عندي بعض الحوالات جالس اسويها اكتشفت ان رصيد فيزتي سالب ٢٠٠٠ ريال مع العلم انه ماجاتني رساله من البنك او اي شي فقط شفتها بالصدفه وتركتها قلت يمكن غلط بالسستم لانه اذا دخلت الراجحي مباشر من اللابتوب يطلع لي الرصيد صفر ولكن من تطبيق الايفون سالب ٢٠٠٠ ريال مع الوقت تم سحب مبلغ من رصيدي الجاري ودخلت تطبيق الراجحي اكتشفت ان حسابي الجاري برضه سالب ٢٠٠٠ ريال !!! وبعد فترة اتصلوا علي بنك الراجحي قالوا عندك التزام على الفيزا يجب سدادها !! السؤال \\ انا عندي سفره لايطاليا بعد ٣ شهور واحتاج استاجر سياره كيف اقدر استاجر بدون ماتصير لي هالحوسه ؟ |
وعليكم السلام غريبة لأن شركة يوربكار كبيرة وماعندها لف و دوران لابد تعرف السبب بالتواصل معهم وممكن تروح لفرعهم بمدينتك بعض الاحيان يكون خطأ موظف الا اذا كانت عليك مخالفات سرعة وغيرها هذي الحوسة نادر ماتصير وفي ايطاليا و اسبانيا لابد تعتمد على الشركات الكبيرة مثل يوربكار وهيرتز و بدجت وسكست وتأخذ تأمين شامل عشان كثرة النصب والسرقات لابد من بطاقة الفيزا بكل الاحوال و أنا دايم أنصح بالفيزا العادية مش مسبقة الدفع لأن كثير ما يقبلها |
قيمة حجز التأمين على السيارة تختلف من دولة لأخرى حتى مع نفس الشركة في إيطاليا حجز التأمين يكون كبير عكس ألمانيا وقد يتجاوز قيمة إيجار السيارة ، لذا إحسب حسابك من حيث كفاية رصيد البطاقة وخصوصا أن عندك حجوزات أخرى مثل الفنادق |
اقتباس:
والله تم تسليم السياره ولا قالوا عليك مخالفات ولا اي شي ولا حتى جاء على ايميلي توضيح منهم بخصوص اذا فيه مخالفات مروريه واصلا السرعه حنا تحت الليمت اللي حاطينه بالشوارع المشكلة ان رقم حجزي ضايع ولا اقدر اتواصل معهم الا عن طريقه |
اقتباس:
لو رحت للمكتب هنا يطلعه برقم جوازك او ايميلك طالما عندهم البطاقة مايقولون لك يسحبون مباشرة ويرسلون لك على الايميل يبلغونك فقط توقعي تكون مخالفات مرورية او تكون فيه خدشة بالسيارة هنا او هناك |
عليكم السلام الخطأ ليس من شركة التاجير بل من مصرف الراجحي الخايس طبعا اي مبلغ محجوز يمكن ان تسحب او تشتري منه ببطاقتك الائتمانية مسبقة الدفع عند الراجحي وبعد رفع الحجز عن المبلغ يبدأ المصرف ياخذ اللي له راجع حساباتك صح وشوف كم كان رصيد البطاقة وكم المسحوبات والمشتروات التي صرفتها من البطاقة واذا طلع لك مبلغ ناقص يمكنك الاتصال ع البنك اذا فيه خطأ يرجع لك المبلغ بس اول شي تسوية طلع كشف حساب للبطاقة من اول يوم استخدام حتى عودتك هالحركة اعتقد في الراجحي فقط افضل شيء طلع بطاقة فيزا عادية وريح مخك واذا رجعت الغ البطاقة وكذلك يمكن قبل السفر ادخال رصيد عليها من حسابك |
اقتباس:
شكرا لك راحت عن بالي كشف الحساب بشوف كشف الحساب وان شاء الله تتضح الصورة طيب يا اخوان انا سفرتي الثانيه باقي عليها ٣ شهور ان شاء الله الى ميلان وسويسرا وش رايكم بموضوع السياره هل المواصلات العامه تفي بالغرض ولا احتاج فعلا للسياره |
كلمت بنك الراجحي وخلال يومين بيوصلني كشف الحساب حق الفيزا وسالته هل اقدر ارفع اعتراض على هالمبلغ قال نعم تقدر |
اقتباس:
اتوقع مشكتلك اما مخالفات او ضرر في السيارة اربما يكون الخصم من احد الفنادق اذا كنت استخدمتها في الحجوزات الاخرى غير السيارة |
الاعتراض عند الراجحي مثل قلته..! ومجرد اضاعة وقت ولايملكون اعادة المبلغ اذا كان مسحوب بناء على اتفاقية بينك وبين شركة تأجير السيارات وسبق سحب مني مبلغ في تركيا.. ورغم انه واضح انه غير مستحق والراجحي مقتنعين تماما الا ان المبلغ جلس اكثر سنة وانا اتابع مع الراجحي واقدم اعتراضات.. واخرتها مليت وتركتهم..! ايضا سبق سوا معي حركة ثانية.. وهي اني اول ماجيت من السفر الغيت بطاقة الائتمان نهائيا.. وطلعت بدل لها لكن رغم ذلك سحب مني مبلغ لصالح شركة سكست في الدنمارك يعني البطاقة اللي تعاملت مع الشركة فيها ملغية.. ومع هذا دخل على حساب البطاقة الحديدة وسحب المبلغ.. وقدمت اعتراض ومافيه اي فائدة,...!! لكن الفيزا مهمة جدا في السفر وكثير امور مانقدر نسويها بدونها والحذر واجب من البداية ولاستئجار السيارات لو كان تعاملك مع وسيط مثل رنتال كار حق بوكنق او غيرها.. بحيث انه لو صار اي شيء تقدر تتصل عليهم من هنا برقم مجاني وهم يتولون التواصل مع الشركة اللي خصمت المبلغ وبخصوص سؤالك لسفرتك القادمة.. السيارة مهمة جدا في ميلان وسويسرا .. لان وسائل النقل الاخرى مكلفة او متعبة |
| الساعة الآن 12:44 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO