|
استفسار بخصوص السكن في الشمال التركي السلام عليكم .. كيف الحال ياشباب .. إن شاء الله بخير انا إن شاء الله ناوي اروح لتركيا في الصيفية مع العائلة بس حبيت استفسر بخصوص السكن لانه اهم شي .. هل فيه اكواخ او فلل او بيوت شعبيه في طرابزون وازنجول او الفنادق .. الصراحة ودنا بالبيوت الشعبيه او الفلل لكن متخوفين من الحشرات وعدم النظافه وسوء الخدامات .. او اسكن في فندق افضل .. العائلة مكونه من 7 اشخاص السؤال الثاني : مدة الاقامه 11 يوم صافيه.. كم اجلس في اونجول وفي طرابزون واسف على الإطاله .. ♥ |
وعليكم السلام شف وأنا أخوك كل اللي تبيه موجود الصيف موسم والأسعار ترتفع أخشي أقولك لا تحجز وخل حجزك مباشر ثم ما تلقي صديقي العام أيضا عائلته 6 أشخاص وحجز لما وصل ولقي علي راحته الفنادق أبتعد عنها أسعار غاليه جدا لا تسكن في أزنجول مباشره خلك في أطرافها أفضل لك أنت بس تبي أزنقول وطرابزون أري مباشره اذا ما فيه تعب الي ازنقول 3 ليالي ثم ايدر ليلتين ليله ريزا ثم طرابزون والخبراء أعلم منا بحكم خبرتهم في تركيا |
اخوي فيصل ما قصر معاك بس الظاهر الصيف هذا راح يكون فيه سياح كثر للشمال وتقريبا السعودية وقطر والكويت صار فيها خطوط مباشرة الى طرابزون الاهم قبل كل هذا اخوي تحجز سيارة وعددكم 7 ما شاء الله يعني تحتاجون سيارة كبيرة السيارة تعتبر نص التخطيط وممكن تستقر في طرابزون وكل يوم تتجه الى منطقة مثل اوزنجول ايدر مشاكا وصامويلا حيدر نبي واذا ما ودك فيه منطقة قبل اوزنجول اسمها شيكرا اسعارها مناسبة للسكن وقريبة من اوزنجول وايدر |
اقتباس:
انا ناوي طرابزون و اوزنجول فقط .. لانا كثيرين وبيصير تنقلنا صعب .. حجز السكن عند الوصول قد جت في بالي بس اشوفها مخاطره والافضل الحجز مبكر .. بس المشكلة هل فيه اسم لا اكواخ او بيوت شعبيه او فلل .. ؟ لان البوكنق مافيه كثير .. وش الافضل اقسم الايام على اوزنجول وطرابزون بالنصف او فيه شي افضل من الثاني |
اقتباس:
شكرا على تنبيه حجز السيارة لاني متساهل فيه .. وبخصوص السكن إن شاء الله بستقر اوزنجول وطرابزون فقط |
نسيت أذكرك بالسياره ماقصر عادل مشرفنا الغالي ..هي أهم شي السكن في ازنجول بتلقاه غالي لكن ممكن قبلها ارخص بكثير صديقي لقى سكن العام رخيص أعتقد 3 غرف تقريبا 500 ليره من مسجد القريه يمين ثم يصير خلفك المسجد فوق ثاني لفه تقريبا بتشوف مسجد هناك فيه شقق |
بنسبة الى حجز السيارة بصيف ولازم سيارة كبيره ضروري جدا ولافضل تسوقها بنفسك و السواقه هناك سهله بنسبة الى السكن كل صيف هناك فنادق جديدة و شقق ارى السكن في اوف او طربزون افضل عن الزحمة وتروح اوزنجول نهار وترجع وكذلك المناطق القريبه ممكن تحجز لك يومين في فندق وفي هذا الوقت تشوف بنظرك شقق نظيفه تم الإرسال من SM-N920C باستخدام Tapatalk |
معليش عندي مشكلة السكن دورة في البوكنق اسعار غاليه جدا هل فيه مواقع او برامج او للحجز منها .. او ياليت تعطوني اسماء فلل او اكواخ .. لاني بحثت وماوجدت .. اسف اتعبتكم معي .. |
اسعار الصيف غالية شوف الشركة الي موجود اعلانها في الاعلى اكيد يساعدونك |
الاخوان ماقصرو وانا هنا فقط حتى أأكد على صواب اختيارك للسكن واقتصاره على مدينتين فقط حتى ماتتعب في الشيك أن والشيك أوت لان فيها ضياع للوقت بالنسبة للسكن فأوزنجول مليانه اكواخ وفنادق ولكن بالصيف تكون مزدحمة مثل ماذكرو لك بعض الاخوان ومع هذا ما انصحى بالحجز من البوكنج لان الاسعار لاحظتها عالية بينما اذا رحت بنفسك ستجد الاسعار ارخص وكذلك تقدر تكاسر معه بالسعر (( انا سكنت بنصف سعر البوكنج )) ونصيحتي في اليوم اللي ناوي تطلع لاوزنغول ااطلع بدري بحيث يكون الوقت معك للبحث عن الافضل (( لاتجي الساعه 10 الصباح الا انت هناك )) احد الاخوان رشح لك السكن بأيدار يومين بينما انا ارى بأن ايدر جميلة لقضاء يوم ترفيهي كامل ثم العودة لطرابزون واذا كانت المسافة بالنسبة لك مزعجة كون ايدر تبعد 150 او 200كم على ما اذكر عن طرابزون فممكن تاخذ فيها ليلة تكون ليلة فاصلة مابين سكنك بطرابزون واوزنجول . بالنسبة للسيارة فالاخوان نبهوك وماقصرو وانا فقط احب اذكرك بأستخراج رخصة دولية اذا انت ناوي تسوق السيارة (( 100 الى 150 ريال )) من اي مكتب سياحي معتمد قبل تسافر فأذكر بأن احد الشباب كان حاجز سيارة ودافع حقها مقدم ويوم وصل للمطار واكتشف انه ناسي الرخصة الدولية رفضو يسلموه السيارة ولذا جرى التنوية . |
شخصيا لا انصح بسكن في ايدر لعده اسباب هناك زحام من افواج السياح هناك بالباصات الكبيره وعرقله للشارع ثانيا نوعيه الفنادق قد تحجز وتتفاجاء بانها على مرتفع وغرف ضيقه ولا يوجد مصاعد بل وبعضا تذهب البه مشي عل الاقدام وهو فوق تله او مرتفع ارى من الافضل الذهاب هناك وقضاء يوم كامل و العوده الى طربزون هي تبعد حوالي مئة وخمسون كيلو ولكنه طريق ممتع جدا تم الإرسال من SM-N920C باستخدام Tapatalk |
عليكم السلام ممكن تخلي ترتيب الايام هكذا: 2 اسطنبول 3 ازونجول 3 طرابزون 2 تسطنبول بالنسبة للسكن في ازونجول وطرابزون فيه فنادق واكواج جد نظيفة وخدماتهم جد رائعة ولا داعي للخوف يمكنك الاستفادة من هذا الرابط : https://www.arabtrvl.com/vb/t27272.html |
اوزنجول بالنسبة لاول مرة تزورها الافضل السكن فيها لعدم الحاجة لاستخدام السيارة داخلها تكون فترة راحة واسترخاء من ٤ الى ٦ ايام ومنها تنتقل لاماكن الزيارة القريبة منها ثم باقي الايام تسكن في طرابزون ومنها تنتقل للاماكن القريبه منها |
طربزون يكفيها يوم واحد الاهم المعالم فيها وبامكانك التوجه منها الى ريزا ويكفها يوم واحد او منطقة ايدار اما ازنجول خرافيه رغم هدوئها وقلة فعاليتها لكن مريحه للاعصاب والاكواخ فيها نظيفه سكنا في كوخ اسمه جول باتشي اذا ماكت غلطانه مرتفع عن الجامع لكن هادي ونظيف وفي غرف لها اطلاله على البحيره ومن ازنجول بامكانكم الذهاب لقرية السلطان مراد ويكفيكم فيها كم ساعه لانها بارده جدا جدا جدا |
ضع في جدولك منطقة ايدار جميلة جداً لا تفوتها في سفرتك موفق ان شاء الله |
الصراحة وفيتوا وكفيتوا واستفدت منكم كثييييير .. جزاكم الله خير .. ♥♥ |
| الساعة الآن 10:07 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO