|
استفسارات مستجد انا اول مرة اسافر خارج المملكة واول مرة ادخل المطار واستخدم الطائرة ولدي بعض الاستفسارات . اولا /حجزت مع مكتب سياحي. وسفري من مطار جدة الى تركيا/اسطنبول السؤال ماهي الخطوات التي اقوم بها لانهاء اجراءات المطار ؟ مع العلم ان لدي حقيبة ارغب في شحنها وحقيبة اخرى على الكتف اريد الدخول بها داخل الطائرة. وجزاكم الله خير. علما ان المكتب ارسل لي تذاكر الطيران على الايميل عبارة عن ورقة بيضاء فيها معلومات السفر يقول اطبعها وروح للمطار قبل الاقلاع بساعتين. |
رد: استفسارات مستجد الحجز على الخطوط السعودية |
رد: استفسارات مستجد الموضوع بسيط جداً إن شاء الله قبل كل شئ ، هل المكتب طلع لك فيزا دخول الى تركيا قبل الوصول ؟ اذا لا ادخل هذا الموضوع اذا كنت ماتبي تنتظر بالمطار في تركيا http://www.arabtrvl.com/vb/t71.html الشئ الثاني بخصوص الإجراءات ، انا أنصحك تروح قبل الرحلة بـ 3 ساعات دامك اول مرة تسافر ! اول شئ تسويه ، تتأكدمن الحجز عن طريق رقم الحجز حقك وتكتبه في ورقة بخط واضح عشان تقص البوردنق منه ، مايحتاج تطبع الورقة ولا شئ من موقع الخطوط السعودية تتأكد من الحجز وكل شئ ، ولا تنسى وتتأكد من كامل أغراضك بالشنطة وتتوكل على الله وتروح المطار ، اول ماتنزل مطار جدة تمشي تدخل المطار وتروح تحصل عامود كذا مكتوب عليه المغادرة الدولية ، سهم يمين ، والمغاردة الداخلية سهم يسار ، تروح المغادرة الدولية ، بعد كذا تتجه لكونترات الخطوط السعودية ، وتصف طابور ، وتعطي الموظف رقم الحجز حقك والجواز سواء تعطيه ، وتحط الشنطة اللي بتشحنها عالميزان ، وتخلي الشنطقة الثانية معاك ، بعدين يعطيك البوردنق وعليه رقم شحن الشنطة ^_^ بعد كذا ، تروح في نفس المكان ورى شوي 100 متر تقريبا مكتوب المغادرون فقط او شئ مثل كذا ، فيه موظف واقف يطلب منك البوردنق عشان يتأكد انك مسافر ، تعطيه ويرجع لك ، وتحصل كونترات الجوازات قدامك ، تختم الجواز ، وتروح على التفتيش تاخذ صندوق تحط فيه كامل اغراضك اللي شايلها ، كل شئ ، ساعة قلم جوال ، شنطة اليد ، احيانا يخلونك تشيل الجزمة بعد ، حزام ، بعدين تحط الصندوق ، بالسير وتدخل انت ، اذا ماصيح الجهاز امش على طول وخذ الصندوق من السير اذا صيح وطلع صوت وقف ^_^ ويفهمك العسكري ويفتش ويشوف من وين طالع الصوت بعد كذا تحصل صراف ATM عاليمين اذا تبي تصرف او شئ ، تكمل تحصل السوق الحرة بوجهك ، تمشي تحصل بوابات الإقلاع قدامك ، تروح تحصل شاشة فيها كل الرحلات اللي بتغادر اليوم ، تدور رحلتك وتشوف على اي بوابة ، وتنتظر ، وخل اذنك واعية لاقدر اله حصل تأخير او شئ ، او النداء للرحلة ، (البوابات كلها في نفس الصالة وجنب بعض وعليها رقم واضح ) وبس بالسلامة ، اي شئ مو فاهمه انا اشرحه لك من ناحية السفر وإجراءاته واي سؤال عن تركيا الأخوان مايقصرون إن شاء الله ، لني مازرتها قبل كذا |
رد: استفسارات مستجد بيض الله وجهك :) |
رد: استفسارات مستجد صباح الخير ما قصر الاخ و اطبع معلومات السفر وبعد الفيزا احتياطاً وبالنسبة لإجرائات مطار اسطنبول فيه لوحات ارشادية اتبعها او الي اسهل منها اتبع الي معك بالطيارة وين مايروحون روح وراهم :) تروح وترجع بالسلامة |
رد: استفسارات مستجد الف شكر لك اخي وكذلك الجميع على تعاونكم |
رد: استفسارات مستجد السلام عليكم ..... كم تكلفة الفيزا لشخصين وطفل /بالريال السعودي |
رد: استفسارات مستجد 180 ( 60 دولار لكل شخص ) صباحكم حب |
رد: استفسارات مستجد ما قصرو الاخوان الله يعطيهم العافيه حبيت انبهك للجواز خذ لك صورة من الجوازات وخليه معك في جيبك ايضا المبالغ النقديه خذ معك مبلغ يكفي يومين وزوعوها بينكم واستخدم بطاقة الصراف تسحب منه مصروف كل يومين تأكد من المكتب السياحي واسأل عن الاسم الكامل للشخص اللي بيستقبلكم في المطار ورقم جواله وهل بيستقبل عوايل ثانيه او لا ؟ في حال تأخر عليكم او نساكم خاصه اذا بيستقبل مسافرين آخرين .. بالتوفيق والله يسهل لك امورك ويجعلها عطله سعيدة |
رد: استفسارات مستجد انا مثلك مسافره جديدة بس لاتنسانا من تقرير ذهبي بعد العوده دائم المسافرون الجدد تقاريرهم ناريه :yolks00740::yolks00250: |
رد: استفسارات مستجد شكرا لكم اخواني |
رد: استفسارات مستجد اذا بتاخذ فلوس كاش ، من جدة حول فلوسك الى دولارات ، واذا جيت تركيا وزعها بينك وبين زوجتك مثل ما قالو لك الاخوان . واذا بتسحب من الصرافات في تركيا فيه عمولة مبلغ ثابت ياخذه البنك على تحويل العملة من عملة حسابك السعودي (الريال) الى الليرة تركية وهو عبارة عن مبلغ ثابت في كل عملية سحب بغض النظر عن المبلغ اللي تسحبه سواء سحبت مية ليرة او الف ليرة فالافضل انك تسحب اكبر مبلغ تقدر تسحبه في كل عملية سحب وهذا ينطبق على كل الصرافات في العالم. ضع فلوسك دائما في جيبك الامامي في البنطلون ولا تضعها في الجيب الخلفي ، ولا في الجاكيت لان النشل يحصل بالذات في المناطق المزدحمة والمترو .. وحاول ان لا تأخذ كامل المبلغ معاك ، اذا الفندق محترم وفخم ضع فلوسك في خزنة الغرفة. تأكد من الطقس في اسطنبول ، اذا رايح خلال هذا الشهر بيكون برد بالذات في الصبح والليل ، جيب معاك جاكيتات ولبس يدفي وبالذات للطفل ، ونصيحة تاخذون تطعيمات الانفلونزا لكم وللطفل قبل الرحلة بكم يوم. قبل السفر اطبع عناوين الفنادق باللغة التركية لان كثير ممن ستقابلهم في تركيا وسائق التاكسي لا يتحدثون اللغة الانجليزية ولا العربية ، فقط التركية في مطار اسطنبول (اتاتورك) اذا معاك عربية للطفل فيمكن يحتاج تنتظر بعد استلام العفش الين يجيبون العربيات لحالها اتفق مع تاكسي المطار على سعر معين لانه لو شغل العداد ممكن توصل لمبالغ مرتفعة وغالبا تتراوح الاسعار من مطار اتاتورك الى منطقة تقسيم بين 50 و 70 ليرة كأعلى حد في اوقات الذروة والزحام واذا احتجت شي انا حاليا في تركيا الى 12 مارس ، ماني خبير لكن بحاول افيدك .. تحياتي ورحلة موفقة |
رد: استفسارات مستجد شكرا جزيلا لك وللاخوة الكرام على افادتكم الرائعة... ابغا استفسر عن كيفية الوصول من فندق تاليا في سبانجا الى مرتفعات كارتبيه ذهابا وايابا كذلك لمعشوقية حيث اني أستأجرت في الفندق لمدة يومين وماهي الاماكن التي تنصحون بزيارتها في هذه المنطقة للاستمتاع بالطبيعة والأنهار. |
رد: استفسارات مستجد ان شاء الله الرحلة في 20ابريل |
رد: استفسارات مستجد السلام عليكم .. ارجوا المساعدة ياكرام في كيفية الوصول الى حديقة اتاتورك في اسسطنبول من السلطان احمد |
رد: استفسارات مستجد والله الحديقة بعيدة في منطقة سارير قريبة من غابات بلغراد اسمها ataturk arboretumu والافضل تأخذ لك سيارة مع سائق |
رد: استفسارات مستجد إلا اذا تقصد ميني ترك فهذي تختلف |
رد: استفسارات مستجد شكرا ..اخواني هل حديقة جولهان بارك بعيدة عن السلطان احمد وهل بالامكان الذهاب لها على الاقدام |
رد: استفسارات مستجد قريبة جدا والأفضل والأسرع إركب الترام ووقف في جولهانة خطوات فقط بالتوفيق |
رد: استفسارات مستجد شكرا جزيلا لكم على تعاونكم... بالنسبة لبورصة استاجرت في فندق اناتوليا وابغا اروح لمطعم حجي داي .هل المسافة بعيدة عن الفندق وكيف يمكن الذهاب له .وهل لو اخذت تكسي اصحاب التاكسي مضمونيين وليس منهم خوف .كذلك هل هناك خصوصية للعائلة في المطعم.هذي اسأله تدور في ذهني والمعذرة على كثرتها . |
رد: استفسارات مستجد اخواني الكرام السلام عليكم ورحمة الله وبركاته ارجوا منكم التكرم بمساعدتي رتبت جدول الرحلة الى تركيا على النحو التالي: -يومين في بورصا. -يوم في يالوا. -يومين سبانجا. -يومين ابانت. -اربع ايام في اسطنبول. السؤال/هل تنصحوني بسحب اليوم الي في يالوا وجعله في ابانت لتصبح 3ايام ابانت ، لاني اريد الاستمتاع بالارياف والاجواء الربيعية . |
رد: استفسارات مستجد السلام عليكم اخواني الكرام باقي يومين على سفري وحبيت اعرف هل الاجواء الان خلال هذا الاسبوع ثلوج في بورصا وابانت ام لا ..ارجوا التكرم بالرد ياكرام |
رد: استفسارات مستجد وعليكم السلام في بورصا احتمال يكون فيه في الجبل بقايا ثلوج لكن ان شاء الله الي متواجدين هناك يعطونا الخبر اليقين |
| الساعة الآن 10:23 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO