معظم تجاربي كانت على خطوط أوروبية بحكم إنه أقرب المطارات لي في الخليج وديار الغربة خيارات الطيران فيها محدودة بالذات إذا بغيت ترانزيت واحد فقط، فمعظم طيراني على الخطوط الألمانية لوفتهانزا أو خليط لوفتهانزا ويونايتد الأمريكية، وأطير عليهم أكثر شي لغرض تجميع الأميال غير إنهم آفضل غير لي من ناحية أسعار تذاكر وترانزيت مثل ما قلت. ولأني أطير عليها قريب ١٥ سنة كانت في تجارب كويسة وتجارب سيئة لكن الجيدة غلبت على السيئة. أهلي كانت عندهم قصة طويلة عريضة معاهم عشان تأجيل تذاكر كورونا من ٢٠٢٠ وصاروا ما يحبوهم كثير. غير انه لما جوا امريكا مؤخرًا صار لهم مقلب في مطار فرانكفورت وفجأة غيروا لهم البوابة بدون إنذار.

جربت الهولندية ثلاث من قبل وآخر مرة كانت الطيارة الأولى على الهولندية والثانية والثالثة على شريكتها دلتا الامريكية وكانت لطيفة التجربة والخدمة ومشاكل أقل من الالمانية (مع انه صعب اقارن كوني ما طرت على الهولندية بنفس القدر). وودي لو كانت في رحلات مباشرة من أمستردام لمدينتي في أمريكا ولو كانت في كنت بختار الهولندية أكثر.

جريت الطيران البريطاني لكن مشكلته إنه أغلى ومطار هيثرو يصير زحمة بشكل متعب احيانا. وكمان الرحلة لي من أمريكا الى الخليج الترانزيت فيها ساعة واحدة فقط فهذا ما يخليها خيار وارد لي. تجربتي بشكل عام كانت كويسة في الماضية لكنها من زمان مرة.

غير هذا ما جربت اي من الخطوط الخليجية في رحلات لامريكا ما عدا رحلة واحدة على القطرية وكانت ترانزيتين لكن كانت تجربة جيدة بشكل عام ولو انها من زمان بعد.

اهلي يطيروا على الاتحاد من فترة لكن بالنسبة لهم كانوا يشتكوا من انه المقاعد مو مريحة كثير بس أنا ما جربت الاتحاد فما جربتها بنفسي. وهم يطيروا على الاتحاد كونها اريح من ناحية الجوازات والجمارك الامريكية كونهم موجودين في مطار ابوظبي لكن بالنسبة لهم الطيارات مرهقة. وجربوا الهولندية قبل سنة وقالوا انها كانت مريحة بعد والموظفين لطيفين.