|
تجربتي بأصدار فيزا امريكية من الظهران السلام عليكم ورحمة الله وبركاتة سبحان الذي سخر لنا هذا وماكنا له مقرنين وانا الى ربنا لمنقلبون ياحلو هذا الدعاء :200: اللهم لك الحمد عدنا من سفرتنا الجميلة وكان ودي لو انها ماخلصت امريكا شي عجيب صحيح :201: الموعد كان بتاريخ 15 جولاي وسفرتي كانت بتاريخ 27 جولاي وهذا ماسبب لي بعض القلق لقصر المدة طبعا بما انها اول مرة اصدر فيزا سياحية لامريكا ففضلت يسويها لي مكتب وياخذ لي الموعد على الا اغامر واتعب نفسي بتعبئة الابلكيشن عبر النت والسعر ب 150 للجواز الواحد + 600 ريال قيمة الفيزا يتم دفعها ببنك سامبا الامريكي في البداية كنت محضر جميع المطلوبات من بدري واخذت موعد قبل 15 قبل رمضان بيوم يعني قبل السفر بشهر لكن طلع من حضي ان السستم عندهم تعطل في هذا التاريخ وعلي ايجاد موعد اخر ولم اجد قبل 15 جولاي اي قبل السفر فقط ب 12 يوم وتوكلت على الله ورحت المقابلة مع الاهل في رمضان الساعه 10 الصبح الموعد دخلنا كالمعتاد بعد التفتيش الصالة واخذ رقم انتظار والذهاب لتسليم الاراق في البداية وتعود وتجلس مكانك لين يجي رقمك وينادونك وتدخل للمقابلة طبعا بعد سماع اسمي ورقم والكبينة الي يتم فيها المقابلة دخلت الا هالشقراء الشمحوطة الامريكية الي قابلتنا بابتسامه وقامت تسولف شوي مع المدام بعد اخذ الجوازات فقط لاغير وسالت بنتي الصغيره عن دزني لاند بعد علمها اننا رايحين لاورلاندو وكانت بصراحه لطيفة جدا ومحترمة اسألتني وين تشتغل وعلمتها وقالت لي اخر سفره سافرتها وين وماسمعتها عدل احسبها تقول متى بتسافر صدق لا قالوا كلن على همه سرى قلت في 27 السفره الا هي تضحك وتأشر على الفيزا البريطانية فهمتها وقلت يس رحت العام الماضي لندن واسمع احلى كلمة منها قالت حبيتك :yolks00310: ههههه امزح قالت مبروك كنقروليشن ابروف :(6): المهم اني قلت لها ترا رحلتنا قريبة بعد كم يوم والعيد قريب ومافيه دوام لكم قالت دونت وري ات ويل بي ردي ارقد وامن :201: وعطتني ورقة مكتوب فيها عنوان ارامكس الخبر الي بجنب الموفنبيك وقالت شيك بكرة :202: قلت ابشري ومشينا وفعلا والله ماجا بعد الفطور واشيك عن طريق موقعهم ببرقم الطلب الا واقرا اشود يعني مصدرة وافتح موقع ارامكس من بكره واشيك الا والله مكتوب 3 جوازات ردي تو بيك اب يعني جاهزه للاستلام الا جوازي مو موجود عليه ردي فقط انه وصل لديهم المهم اني رحت لهم العصر واعطية ارقام الجوازات والارسالية من القنصلية ويجيبها كلها الاربع جوازات والحمد لله الفيزا موجودة والامور تمام ولله الحمد اي سؤال او خدمة انا حاضر ومن اسهل الفيز الي اصدرتها في حياتي هي الفيزا الامريكية |
رد: تجربتي بأصدار فيزا امريكية من الظهران وعليكم السلام ورحمه الله وبركاته حمدلله علي السلامه شكرا لذكر تجربتك ابوعبدالله |
رد: تجربتي بأصدار فيزا امريكية من الظهران يامرحبا بمديرنا الغالي نورتني وشرفتني بالموضوع العفو طال عمرك وهذا اقل من الواجب |
رد: تجربتي بأصدار فيزا امريكية من الظهران اجل قالت حبيتك هاااه لايكون ناوي تتزوج الثانية هههههه .. الحمد لله ع السلامة ... تبي الصدق تقارير امريكا والله ممتعة .. وما استغربت لما قرأت انك انبسطت في الرحلة .. دولة رائعة .. وتجربة جميلة .. الله يعطيك العافية Sent From Samsung Galaxy S6 |
رد: تجربتي بأصدار فيزا امريكية من الظهران الله يحييك يالقحطاني مرحبا الف منور الموضوع لاتوهقنا يابن الحلال مابه لاثانيه ولاثالثه وحده ونقول يالله السلامه من جد الديرة تستاهل من يتعنى لها لو ان مشوارها طويل شوي لكن تستاهل كل قرش ينصرف فيها وتصلح لكل فرد من افراد العائلة سيجد ما يتطلع له الله يزوجك قل آمين |
رد: تجربتي بأصدار فيزا امريكية من الظهران الحمد لله على سلامة ابو عبدالله انا يوم 20 كان سفري .. و24 كنت اورلاندو لو كنت ادري عنك .. كان لزوم القهوه والعشاء يا عسل والله امريكا جميله ورائعه .. وتستاهل العنوه لكن مع طيران الامارات .. كل شي يهون وكلامك صحيح .. من ابسط واسهل التاشيرات اللي عملناها هي الامريكيه |
رد: تجربتي بأصدار فيزا امريكية من الظهران ياهلا والله بخوي بوعبدالرحمن وهذه الساعه المباركة وياليت والله دريت عنك كان جيتك وتشرفت بلقياك ونفس الطيران الامارات بصراحة مافكر بغير هالطيران خدمة ممتازة وطائرات تشرح الصدر ومتعاونين لاعلى درجة من الاحترافيه في العمل ويكفيني مطار الامارات ومنها نكسب اميال الي استفدت منها كثيرا اورلاندو حكاية لحالها من الجمال انا كنت بنيويورك اولا وبعدين طرت عن طريق جت بلو لورلاندو واستأجرت سيارة من اولمو الي بفندق الفور بوينت الي جنب مطعم اي هوب خذيت موستنغ كشف 7 ايام وبعدين غيرتها بكومارو كشف 7 ايام اخرى وعودت مره ثانية لنيويورك ذكريات لايمكن تنسى في امريكا من اجمل السفرات في حياتي قضيتها في هالديره كل شي فيها يشرح الصدر ولي عودة لها بأذن الله قريب دام الفيزا اوبن خمس سنين الامور الباقية سهالات كل ماطريت امريكا طرى في بالي مساعد الرشيدي تخوفني مشاوير الطريق المظلم المهجور // وانا لا من ذكرتك قلت طولي يامشاويري عزاي انك رجاي العذب لو كل الدروب عثور // وصلت اوما وصلت اعرفك ما انت منتظر غيري |
رد: تجربتي بأصدار فيزا امريكية من الظهران والله الشرف لنا طال عمرك نفس الوضع .. نيويورك ومنها بالجيت بلو الي اورلاندو وفيها حجزت فيلا لمدة 10 ليالي ب1070 دولار واخذت سيارة عن طريق اولمو من مطار اورلاندو واعطاني الموظف المصري سياره وما عجبتني .. ورجعت له وقلت له شوف غيرها .. قال ارجع للمواقف واختار اي سياره تعجبك وهنا تركت الاختيار لام عبدالرحمن .. قلت لها هذه المواقف امامك اختاري اللي تعجبك .. واختارت سياره عائلية ماشيه 1000 ميل وبعدها طيران الي واشنطن ثم بر الي شلالات نياجرا ثم بر الي نيويورك للعوده وبأذن الله راجعين لها .. |
رد: تجربتي بأصدار فيزا امريكية من الظهران بصراحة شركة المو محترمين وخدمة ممتازة ومتعاونين جدا جدا صارت لي سوالف معاهم شحليلهم خدومين ومايقصرون بشي اول ماجيت بروح اورلاندو حجزت سيارة عن طريق موقع وسيط طلعت لي من مطار اورلاندو شركة E-Z من اسوء الشركات الي مرت علي في حياتي استأجرتها عن طريق النت ب 340 دولار مدة 14 يوم ويوم وصلت المطار قالي السعر غير 1200 دولار!!! هنا استنكرت وقلت مستحيل يوصل هالسعر اعرف الديره وماعمري سمعت ان حد استأجر بهالقيمة وورقة الحجز الي معاي ب 340 دولار قال انشورنس ومادري ايش قلت كنسل الحجز وسلام عليكم رحت لفندقي بتكسي بعد ضيقة الصدر وافتح الجهاز الابتوب واحجز من المو موستنغ بقيمة 370 دولار واروح لهم الصبح وماقصروا معاي ابد في دقيقتين عطتني السيارة والورقة وقالت مع السلامة وجيتهم بعد اسبوع وشفت الكومارو البيضا عندهم وعجبتني قلت ممكن اغير قالو انت تامر امر هههه وبدقيقه غيرت لي السيارة يعني شركة اتعب وانا امدح فيهم انا سكنت في فندق حياة الي باول شارع الانترنشنال درايف فندق عجيب وفخم لابعد درجة والخدمات ممتازة لو ان سعره شوي غويلي لكن يستاهل بغيت فلا بس ام عبدالله مارضت قالت ابي فندق ينظفون كل شي والبركة حقته كبيره والعاب اطفال بصراحة الفندق لحاله عن منتجع كامل الخدمات |
رد: تجربتي بأصدار فيزا امريكية من الظهران هذي يبيلها تقرير بوعبدالرحمن ابدا انت وانا بعدك :(37)::(153): |
رد: تجربتي بأصدار فيزا امريكية من الظهران اقتباس:
عاد ننتظر تقرريرك ان شاء الله خلنا نشوف وش صار معك |
رد: تجربتي بأصدار فيزا امريكية من الظهران يا ويل حالي شوف .. اللي صارت له مواقف كثيره .. هو اللي يبدأ ( يعني انت ) يالله بسم الله |
رد: تجربتي بأصدار فيزا امريكية من الظهران رائع يابو عبدالله الشرح سلس و التجربة تطمن الكثير الله يسعدك بس ترانا ننتظر تقريرك و تقرير أبو عبدالرحمن |
رد: تجربتي بأصدار فيزا امريكية من الظهران وعليكم السلام فارس الجبيل تجربتك جميله وسلسه وسهله والحمد لله وهكذا هي التأشيرة الأمريكيه ليس هناك أسهل منها لمن يقنع القنصل بأن هدفه سياحي فقط فمن يمتلك سي في قوي وسجل سياحي من قبل بسهوله يحصل عليها ومبروك عليك ونتمنى لكم رحلة سعيده موفقه |
رد: تجربتي بأصدار فيزا امريكية من الظهران ماشاء الله تبارك الله الأدارة كلها هنا شكله اجتماع مجلس ادارة هههههه الله يحييكم وينور دروبكم جميع مثل مانورتوا الموضوع هذي والله الساعه المباركه وهذا اقل شي ممكن نقدمة لهذا المنتدى الي له الفضل بعد الله سبحانة وتعالى في تسهيل امورنا وسفرنا ويعلم الله اني ودي اسوي موضوع لكن للاسف نفسي قصير بالمواضيع زائد ان الصور اغلبها بالجوال ومن بعد الانستغرام ماعطانا مجال نحتفظ فيها ابوعبدالرحمن علي الهذره والكلام وعليك الصور :(101)::(153): |
رد: تجربتي بأصدار فيزا امريكية من الظهران يا زينك زيناه الحمدلله على السلامه ممكن أعرف ايش الأوراق الي المفروض آخذها معي للمقابلة وهل ضروري احضار بنتي عمره 6 سنوات معي للمقابلة او فقط انا و الام |
رد: تجربتي بأصدار فيزا امريكية من الظهران اقتباس:
الزين زينك هوايا عيني الله يسلمك ويامرحبا بك الاوراق المطلوبة تعريف بالراتب + كشف حساب + صور مقاس 5* 5 + الابلكيشن والموعد طبعا الموعد مايفتح لك الا بعد ماتدفع الرسوم في بنك سامبا علما انها كلها مثل ماخذيتها معاي المقابلة رجعتها وماحد طلب مني غير الابلكيشن والجوازات فقط الاطفال غير مطلوب تواجدهم يكفي الام والاب فقط لكن انا وديتهم احتياطاً الامور سهالات وبنفس اليوم تاخذ الموافقة وتصدر التأشيرة بالكثير ثاني يوم وانت مستلمها خاصة اذا كانت سياحية |
رد: تجربتي بأصدار فيزا امريكية من الظهران اقتباس:
الله يسعدك يا عيني بخصوص الابلكيشن ، هل تقصد DS-160 لاني طبعتها و مكتوب عليها عبارة ( DO NOT BRING THIS TO YOUR INTREVIEW ) او تقصد ابليكيشن ثانية ؟ تحياتي |
رد: تجربتي بأصدار فيزا امريكية من الظهران حمدلله على السلامة مشرفنا العزيز واهم شي ان امورك تسهلت الله لا يهينك |
رد: تجربتي بأصدار فيزا امريكية من الظهران اقتباس:
ويسعد ك ياخوي نموذج دي 160 يتم كتابتة الكترونيا اون لاين بعد الانتهاء تجيك صفحة التأكيد مثل هذي [BIMG]http://www.mbt3th.us/vb/imgcache/122186.png[/BIMG] فيها صورتك ورقم الطلب اذا وصلت هالصفحة فانت اتميت جميع الخطوات وهذي المطلوبة http://www.arabtrvl.com/vb/t579.html http://www.arabtrvl.com/vb/t704.html اقتباس:
شرفتني ياخوي |
رد: تجربتي بأصدار فيزا امريكية من الظهران اقتباس:
تسلم يا قمر تم طباعتها و الحمدلله كانت هناك الخطوة الاخيرة في تعبئة النموذج وهي التوقيع و التأكيد على صحة المعلومات نسيت انتهي منها و بعد ان قفلتها الان ظهر لي ما كنت ابحث عنه موعدي بعد يومين بالتوفيق |
. |
| الساعة الآن 01:10 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO