بسم الله الرحمن الرحيم

السلام عليكم و رحمة الله و بركاته .. أهلاً وسهلاً جميعاً أتمنى أنكم بأفضل حال :e304:


أنقل لكم تجربتي اليوم في طلب الفيزا السياحية B2 من السفارة الأمريكية بالظهران و ما حصل معي.

إنتهيت من إجراءاتي بالموقع من معلومات و بيانات ولله الحمد و تم تحديد الموعد في يوم 26/7/1437هـ , المصادف لـ May 3 2016 الساعة 10:30 صباحاً.

توجهّت الساعة 9 صباحاً للسفارة الأمريكية في جامعة الملك فهد للبترول و المعادن حاملاً معي كالتالي :

1 - جواز سفر.
2- صورتين 5×5 مكشوف الرأس مع وضوح الأذنين , بدون أي تعديل فوتوشوب ..
3- ورقة الموعد , تمت طباعته من موقع السفارة
4- كشف حساب 3 شهور.
4- Application Confirmation Page ( مطلوب وأنا من فهاوتي نسيت أطبعه وأحضره ).
* سأرفقه لكم.
5- إيصال دفع رسوم الفيزا ..
6- تعريف من مقر العمل " أنا طالب لذلك أحضرت تعريف من الجهة اللي أداوم فيها ".
7- أي ورقة إضافية ممكن تفيدك في قبول الفيزا ( غير مهمة )

" عن نفسي أحضرت ورقة لصاحبي من جامعته في أمريكا تفيد بأنه سيتخرج في الصيف ولذلك كان سببي الأول حضور تخرجه ".

Application Confirmation Page
http://store1.up-00.com/2016-05/146231243577651.png

غطيت على البيانات والصورة, خوفاً على قلوب العذارى من الفتنة < ليتك ساكت :24:

بسم الله نبدأ.

نزلت من السيارة و وقفنا في التفتيش , " لا تحضر معك إلا مفتاح سيارتك و المحفظة فقط ".
عديت التفتيش و بعدها أنتظرت في طابور إلى أن ناداني الموظف للتوجه للنافذة.
أخذت أوراقي الموظفة وقالت " فيصل, فيه ورقه ناقصه عندك ( اللي هي الأبلكيشن كونفيرميشن).
قلت نعم أنا نسيت أطبعها هل فيه مشكله بتواجهني داخل بالمقابلة ؟
قالت ما أعرف شوف هناك ).

توكلت على الله و دخلت السفارة. توجهت إلى مبنى التأشيرات , أول ما دخلت ناداني موظف على كاونتر صغير أخذ جوازي و أدخل معلوماتي في الجهاز و رجعه لي و أعطاني رقم قال أنتظر الدور.

جلست تقريباً 10 دقائق و جاء موعدي و توجهت إلى الكاونتر 5.

للعلم والإحاطة ( تحصل مقابلتين , المصداقية مهمة جداً )



المقابلة الأولى :-


توجهت بكل ثقة و كان الحوار كالتالي :

أنا : السلام عليكم.
الموظف : وعليكم السلام، أعطني جوازك
الموظف : هل قمت بزيارة الولايات المتحدة من قبل؟
أنا : لا.
الموظف : بصّم ( 4 أصابع من اليد اليسار , 4 أصابع من اليد اليمين ثم الأبهامين مع بعض ).
الموظف : تفضل و راح نناديك بالإسم.

رجعت جلست وأنتظرت تقريباً 10 إلى 15 دقيقه و ناداني كاونتر آخر بإسمي , توجهت له بكل ثقة لأنها هي المقابلة الحاسمة وفيها الحوار والأسئلة الدسمة والزبدة كلها:24:.

المقابلة الثانية :-



الموظف : هل سبق لك زيارة الولايات المتحدة من قبل ؟
أنا : لا.
الموظف : ما هو سبب الزيارة ؟
أنا : السبب الرئيسي هو حضور حفل تخرج صديقي , و السبب الآخر سياحة.
الموظف : إلى أين ستذهب ؟
أنا : بنسلفينيا.
الموظف : مدة إقامتك في الولايات الأمريكية؟
أنا : من 15 إلى 20 يوم , أقل من شهر.
الموظف : هل أنت طالب او موظف ؟
أنا : طالب
الموظف : على حساب الوالد ؟
أنا : نعم.
الموظف : أين يعمل والدك ؟
أنا : أجبته بمكان الوظيفة.
الموظف : مبروك, أنت مقبول و ستسلم جوازك بعد أربع أيام.

شكرته, وقلت أتمنى لك يوم سعيد.

إضافة : أنا وكم شخص لم يطلبوننا سوى الجواز فقط , الاوراق الباقيه لم يطلبوها.
لكن خلك حريص و شيلها معك كامله لا تنسى شي, ممكن مزاجهم كان رايق اليوم :24:


مدة الحدث الكامل أقل من ساعة, من دخولي السفارة إلى خروجي منها.
سهالات والحمدلله لا تتخوفون.

نصائح مهمه *


* الإهتمام بالمظهر
( ألف خط عليها , ركزوا عليها مهمه مهمه جداً ايضاً قبولك من رفضك يعتمد على مظهرك واناقتك. لا تتكلف, لكن يجب أن يكون مظهرك جيد جداً).


* التحدث

( تحدث بلغتك إذا لغتك الإنقليزية ركيكه, فهم يتحدثون باللغتين العربية والإنقليزية ).


* الثقة بالنفس

( لا ترتبك , خلك طبيعي جداً و لا تتخوف من المقابلة لأنها سوالف ما بينك و بين الموظف ).

* المصداقية

( جاوب بكل صدق و صراحة , لأن كل معلوماتك باينة عنده بالكمبيوتر أيضاً يسجّل أجوبتك ).



والحمدلله حمداً كثيراً طيباً.
أتمنى التوفيق لكم زملائي و قبول فيزكم بكل يسر وسهوله وسفر ممتع وإجازة سعيد.
وبلغنا الله وإياكم رمضان وأعاننا الله على صيامة وقيامة.

أول مره أكتب موضوع في منتدى لي اكثر من 4 سنوات أو 5 ما كتبت , ففقدت المهاره أتمنى إني كفيّت ووفيت وأي سؤال أنا حاضر بإذن الله.

في أمان الله

المشاركة الأصلية كتبت بواسطة آخـــرفـــرصـــة (المشاركة 226870) و عليكم السلام ياهلا و مرحبا اطلالة مميزة بأول موضوع ما شاء الله أكيد قلوب العذارى راحت ملح هههههه لازلت تملك موهبة الكتابة الله يحفظك ترتيب و تنسيق و عرض جميل للافكار مع سرد مشوق تجربة بلا شك مفيدة للجميع و راح تساعد الكثير شكراً لك على طرجها أهنيك على أسلوبك الرائع و الحقيقة كسبناك بيننا الله يحييك

المشاركة الأصلية كتبت بواسطة بورمث (المشاركة 226882) عليكم السلام ماشاءلله تجربتك حلوة عكس تجربتي الغبية اللي في 2010 .. يعني اسألة خفيفة والمده كلها أقل من ساعة ماشاءلله .. وترتيبك للموضوع ونصائحك كلها حلوه ماشاءلله .. بالتوفيق لك وعقبال ما تستلمها:18:

المشاركة الأصلية كتبت بواسطة PrinceOfPersia (المشاركة 226986) ماشاء الله أول مشاركة وبالتفاصيل تروح وترجع بالسلامة بإذن الله

المشاركة الأصلية كتبت بواسطة فيصل (المشاركة 227045) وعليكم السلام ورحمه الله وبركاته علي البركه ما شاءالله استغرب عدم طلبهم اي ارواق

المشاركة الأصلية كتبت بواسطة منيرة (المشاركة 227059) شكرًا لذكر تجربتك لا تنسانا بالتقرير Sent from my iPad using Tapatalk

+ تحديث للموضوع و تكملة المستجدّات.




بعد طول إنتظار, في يوم 19 مايو تفضّلت علي السفاره الأمريكية بإرسال إيميل لي مفاده :

http://store2.up-00.com/2016-05/1464175538811.png

( عزيزي المقّدم على الفيزا, فيزتك تحت الإجراء الإداري, لإكمال الطلب يرجى منك إتباع المعلومات المطلوبه وإعادة إرسال الرد على نفس الإيميل ,
1- جميع أرقام جوازاتك القديمة والجديده.
2- برنت ( كشف ) من مديرية الجوازات تفيد بعدد جوازاتك و أرقامها.
تحياتنا لك. السفارة الأمريكية ).

وقت و يوم الرساله لم يتم إلا من قبل شخص لعين لعين لعين جداً ! يعني فوق تأخيركم يا أنجاس ترسلون الرسالة يوم خميس الساعة 3 و نص العصر !!!! مافيه أي دائرة حكومية تعمل هذا الوقت ونهاية أسبوع ! ثانياً أضطر إني أجلس إلى يوم الأحد يعني يومين أسب وألعن فيكم !!!!!

هدّيت من نفسي وقلت كل تأخيره فيها خيره وإنتظرت إلى يوم الأحد حتى رحت للجوازات مواصل دخلت الجوازات ورحت لمنطقة سفر السعوديين ودخلت على مكتب الرئيس هناك ضابط برتبة مقدّم محترم جداً وواضحه القيادة والوحوشيه اللي فيه :1:

سلام عليكم عليكم السلام.
لاهنت طال عمرك أحتاج برنت للسفارة الأمريكية من وين آخذه؟
قال روح السيب ثاني غرفة كلم فلان الفلاني هو يعطيك إياه .. قلتله أمرك طال عمرك

وأروح والحمدلله ماكان فيها هالغرفة إلا شخصين أو ثلاث مع العلم إنها ( غرفة تسليم الجوازات ) يعني غرفة مهمه جداً.

وأكلم الموظف من ورى القزاز بنبرة هياط خفيفه ( أنا جاي من طرف المقدّم وأبي فلان الفلاني ) قام من مكانه العسكري قال أزهمو فلان :1: إسترح طال عمرك الحين بيجيك الشباك الأخير.
جاني قلتله السفارة الأمريكية طلبت مني برنت للجوازات اللي طلعتها من أول قال أوكيه عطني بطاقتك الأحوال عطيته و صرف لي برنت لعدد السفريات ! و مشيت
وأرجع البيت وأسوي سكان للبرنت وأرسله لهم وأصور عدد ختومات كانت بجوازي القديم وأنا صغير مو موجوده بالبرنت وأيضاً جوازي كامل صورته وأرسلت لهم أرقام جوازاتي اللي كلها إثنين واحد بيدي و الثاني محجوز عند السفاره فقط وكلام منمق يمكن لو شخص قراه بيقول خلاص عطوه الفيزا انا رحمته مابي شي ثاني منه :23::1:


+ أرسلولي الرد بنفس اليوم الساعة 3 العصر قالو :-

http://d.top4top.net/p_1455ucz1.png

عزيزي. الرسالة غير مقبوله بالكامل, نبي برنت من الجوازات يعلمنا كم جواز طلعت فقط سفرياتك حطها في أذنك :1:.

طبعاً حالتي كانت صعبه والنوم مقطّع كل شوي أصحى أشوف ردّوا أو لا يعني الوضع صعب جداً ويوم قريت كلامهم الجوال بغيت أفتته بيدي أنقهرت وعصبت وأرتفع ضغطي يعني لازم أروح بكره نفس الحكاية لنفس المقر لنفس الشباك وأفهمه الموضوع مره ثانيه و زحمه وحر والوضع لا يُطاق

أستهديت بالله و جمعت أنفاسي وقلت مو مشكله نروح بكره كل تأخيره فيها خيره , جا من بكره يوم الإثنين و طلعت على الساعة 8 الصباح و رحت الغرفة على طول بدون ما أمر على المقدّم لأني حفظت الطريق خلاص هههههههه ونفس الكلام نادولي فلان الفلاني , لكن هالمره طوّل علينا وبنفس الوقت الشباك اللي أكلم فيه هو نفسه شباك للضمان الإجتماعي , يعني قدامك شيبان وأنا أصغر شخص فيهم ( فعلياً ) ! كان قدامي 3 شيبان خلصوا في ظرف نص ساعة وجيت بعد ما تأكدت إنهم مشوا وأكلم بالشباك نفس الموظف اللي خدمني أمس بس مو هو اللي أنا كنت أبغاه واللي موصّيني عليه الضابط ، قلتله أمس جيتك وطلبت منك برنت لكن صرفت لي برنت سفريات ورفضوه السفارة فاللي أحتاجه الآن برنت لعدد الجوازات المستخرجه من عندكم فقط لا غير ! قال أبشر أجلس أنتظر وأنا بدخل داخل أكلمهم ( داخل غرفة الحاسب الآلي ) قلت مو مشكله.

أنتظرت نص ساعه و طلع عسكري ثاني غير الأول اللي كلمته وأدقق بإسمه وإلا فعلاً نفس اللي أبيه أنا , وأنقز له السلام عليكم لا هنت الموضوع كذا كذا كذا قال أوكي عطني جوازك القديم وعطيته قال أجلس والحين بجيب لك البرنت قلت أوكي.

جلست وأنا عيني على باب هالغرفة متى تفتح وآخذ الأوراق وأطلع لأن طقت كبدي , جاء بعد 5 دقايق وأروح له وأشوف عطاني ورقتين , الأولى تبيّن أول جواز إستخرجته في 2006 والثانيه الجواز اللي مع السفارة , و كل جواز له ورقته الخاصه قلت أبوك مرحوم ياشيخ هذا اللي أبيه من أول , قال بتدرس بأمريكا ؟ قلت لا سياحه , قال الله يوفقك ويسهل عليك إذا دقرّوا لك أو صارت لك مشكله تعال عندي على طول. شكرته و طلعت وعلى طول وصلت البيت وأسوي سكان للبرنت وأرسل الورقة للسفارة وردوّ علي بنفس اليوم هالرد :


http://c.top4top.net/p_145nj701.png

عزيزي, تم قبول الرسالة.
وسنخبّرك إذا أحتجنا معلومات إضافية.
شكراً لتعاونك.

أنا هنا تنفسّت الصُعداء قلت حمدلله فيه مبشّرات خير. عدى يوم الإثنين على خير جاء الثلاثاء دخلت على موقع التحقق من الفيزا وشفت الإجراء إداري بس إنهم محدثّين الطلب حقي بتاريخ 5/24 يعني نفس اليوم , قلت حلو يعني شغالّين ع الطلب ومهتمين فيه.

دخلت اليوم الصبح و حصلت هالرسالة الجميله

http://e.top4top.net/p_145fu101.png


ISSUED الكلمة الجميله على القلب :55::55::55:

تم الإنتهاء من الإجراءات باقي يرسلون الجواز لأرامكس , فنقول إن شاء الله إذا مو اليوم حيكون بكره , وإذا مره مره مو بكره راح يكون الأحد. وأستلم الجواز وأطير وأسابق العصافير

أعتذر عن الإطالة بس حبيت تشاركوني المعاناه :1: وأن كل تأخير يصيب المؤمن فهو خيره له وكل الخير.

المشاركة الأصلية كتبت بواسطة آخـــرفـــرصـــة (المشاركة 234311) ما شاء الله 1000 مبروك بعد المعاناة المهم كلمة issued و الباقي يهون شكراً علىى اهتمامك و تحديثك للتجربة لين حصلت على الفيزا رحلة سعيدة

المشاركة الأصلية كتبت بواسطة بورمث (المشاركة 234365) مبروكككككككك وبدون عصبية طول بالك:24: أنا أسوا منك في 2010 طلبوا مني ورقة خلو سوابق ورحت وبصمت وأخروني بالشهور .. مع أني الحمدلله شاب حالي حال نفسي لا مشاكل ولا شيء فمصيبتك أهون من غيرك:24:

المشاركة الأصلية كتبت بواسطة بورمث (المشاركة 234702) ايه أستلمتها وسافرت أميركا ورجعت الحمدلله والحين بجدد وبسافر مره ثانية إن شاءلله:18: الله يسهل سفرتي وسفرتك .. ولا تحسب أنك الوحيد سبق وطلبوا ناس أرقام جوازاتهم مثلك ،،

المشاركة الأصلية كتبت بواسطة فارس الجبيل (المشاركة 234709) تجربة جميلة وصحيح انهم معقدينها شوي لكنهم شحليلهم امورهم زينه ويخاطبونك مباشرة وواضحين حتى بالطلبات الي يبونها اعرف لك سفارات لو ناقصة ورقة ماعطاك مجل تكمل وتقدم من جديد وبرسوم جديدة هذولا ياحليلهم ياخذون ويعطون معاك وفعلا سريعين بالرد للأستفسارات وموقعهم محدث اول بأول شوف تجربتي لها في يوم خلصت والله يوفقك ومبروك تخرج خويكم وترجعون بالسلامة ان شاء الله

المشاركة الأصلية كتبت بواسطة شارلوك هولمز (المشاركة 237195) الف مبروك .. ولاتنسانا من التقرير فيصل ومبارك لصديقك التخرج هولمز

المشاركة الأصلية كتبت بواسطة tab_el (المشاركة 238009) الف مبروك وشكرا على طرح تجربتك