شبكة و منتديات العرب المسافرون - مبروك ما جاك.. وتتربى بعّزك "الفيزا"

السلام عليكم جميعا

طبعاً العنوان غريب.. بس بتعرفون ليش بعدين..

اولاً حبيت اشكر اخوي (آخر فرصة) كان موضوعة عن تعبئة الفيزا والدفع والمواعيد شامل كامل.. الف شكر

نجي هنا لموضوعنا..

كان موعد مقابلتنا ( انا وزوجتي واثنين من اولادي فقط، الثلاثة الباقين اقل من 14 سنة) يوم 18 اكتوبر 2018 في القنصلية في الظهران.

كانت المقابلة سلسة والاجراءات اوكي حتى الاسئلة كانت بسيطة.. سافرتو لامريكا من قبل (نعم) مكان عملك، هل مازلت تعمل بنفس الشركة، ليش بتسافرون.. بس ، اسئلة روتينية..

بعدين قالي الفيزا تحتاج لبعض الاجراءات الادارية واعطاني ورقة قالي عبها ورجعها لي.. الفورم المعروف الي فيه سفراتك لمدة 15 سنة والغرض من السفرة، اماكن الزيارة، ومن مسوؤل ماليا عن تمويل سفراتك.. اسماء اخوانك واخواتك وتاريخ ميلادهم وعملهم، حساباتك في السوشال ميديا وايميلاتك، تفاصيل عملك...

المهم قعدت اعبي هالمعلومات واعصر مخي عشان تاريخ السفرات.. وتواريخ ميلاد اخواني..

المهم قعدت حوالي النصف ساعة اعبي الي اقدر عليه.. رجعت للقنصل مع الفورم. قالى اوكي تفضل جوزاتك خلها معك وحنا بنرد عليك في غضون اسبوع اسبوعين.. قلتله ان مخططنا نزور اورلاندو في الشتا (اجازة بين الفصلين) قالي بنتواصل معاك.. قلتله اجل خل الجوزات عندكم اذا السالفة اسبوعين ، ما احتاجهم حالياً، قالي اوك..

طلعنا من القنصلية وانا النفسية دمار.. انا والعاية عندنا سجل سفر لامريكا حافل.. ولا قد صارت لنا اي مشاكل ولا حتى مخالفة مرورية.. يالله الخيرة في ما اختاره الله..

مر الاسبوع .. والاسبوعين.. ارسلتلهم ايميل.. وكان الرد المعروف " فيزتك تحت الاجراءات الادارية وبنبلغك اذا فيه اي تحديث.."

قرب موعد السفر المقرر (ما شريت تذاكر ولا شي،، احتري الفيزا).. راسلتهم بعد شهر.. ونفس الاجابة.. قلت اجل خلني اطلب الجوزات واذا احتاجوها بيراسلوني..

والله وطلبها ووصلت ارامكس في نفس اليوم.. ومن نوفمبر الى نهاية يونيو 2019 وانا اراسلهم كل شهر او شهر ونص تقريباً.. والرد كان نفسه حتى يأست..

قررنا انا والعايلة نسافر :e01d: الى اوروبا اواخر جولاي 2019، ورتبنا حجوزاتنا وفيزنا وامورنا من شهر مايو (تعرفون عددنا كبير)..

يوم 11 جولاي وانا كنت في سفرة عمل خارج المملكة جاني اتصال .. وارد قالي معاك القنصلية الامريكية في الظهران.. ارسلنا الجوزات عشان نخلص الاجراءات..

انا الحين صرت بين فرح وقلق.. فرح من صدور الفيزا (واخيراً).. وقلق من ان الاجراءات ممكن تتاخر وورانا سفرة اوروبا.. قلت للشخص الي كلمني عن سفرة اوروبا، قالي ارسلنا الجوزات وان شاء الله ما تتأخر..

رجعت من سفرة العمل.. واخذ الجوزات على ارامكس وارسلها للقنصلية.. وبدا مشروع التتبع..

وصلت الجوزات القنصلية يوم الاثنين 15 جولاي وصارتحديث لكل جوزات العايلة ما عدا جوازي!! .. وانا الي يزيد عندي معدل القلق.. يوم الثلاثاء ما صار اي تحديث!!!..

الا وعلى المغربية تقريباً، اشيك على الموقع والا كل الجوزات بما فيهم جوازي تحدثو ليوم 16 جولاي..
تنفست الصعداء وقلت الحمد الله..

يوم الاربعاء 17 جولاي على اخر اليوم شيكت وجاني هالتحديث

https://1.top4top.net/p_1297lsk5t1.jpg

:e50c: تم اصدار الفيزا للجميع.. :e50c:
:5:

واسلمتها من ارامكس اليوم التالي، الخميس 18 جولاي 2019

يعني بعد 9 شهور بالتمام والكمال.. تم ولادة الفيزا..

ملاحظة: في فيزتي انا فقط مكتوب في قسم الملاحظات في الفيزا annotation
Clearance Received on xx-xxx-2019
احد يعرف معنها هالكلام.. وشكراً

هذي قصة المولودة "فيزا" باختصار.

وترا الاجراءات الادارية ممكن تاخذ وقت، لكن في الاغلب الفيزا تصدر. لأن القنصل قبل المقابلة ووقت المقابلة شاف شي في معلومات الطلب يحتاج تدقيق اكثر حتى يعتمد اصدار الفيزا..

شاكر مروركم