شبكة و منتديات العرب المسافرون - تجربتي في استخراج الفيزا الامريكيه - قنصلية جده

السلام عليكم ورحمة الله وبركاته

هنا بسرد تجربتي الخفيفه اللطيفه في استخراج الفيزا لعلها تنفع احد او يستفيد منها مع انو ماشاء الله الموقع فيه كل شي من الى.

طبعا في خطوات تعبئة الابلكيشن الموضوع دا نفعني من البدايه الى النهايه
https://www.arabtrvl.com/vb/t15702.html

اول مشكله واجهتني بعد مادفعت وانسحبت الفلوس المفروض يطلع ليا ايصال الدفع ولكن للاسف طلعت ليا صفحه بيضاء تواصلت مع خدمة العملاء ولكن للاسف ماطلعت منهم ب فايده وبسبب كدا تعطلت 10 ايام بدون ما اقدر احجز موعد , حطيت في الموقع مشكلتي والاخوان هنا افادوني بصراحه فا ياريت رجعت للموقع من البدايه بدال العطله ف لعلها خير.
وهنا حل المشكله في الموضوع دا
https://www.arabtrvl.com/vb/t47564.html

بعد ماحطيت الايصال طلع ليا اول موعد في 30 نوفمبر وطبعا للاسف جداً بعيد بس مني مستعجل بما انو رحلتي لسه مو الان , بعدها حدثت وطلع ليا موعد في 14 نوفمبر وحجزته وفي نفس اليوم طلع ليا موعد في 18 اكتوبر لكن قلت ممكن احصل اقرب وبعدها يوم طلع ليا موعد في 1 اكتوبر بس طمعت وحدثت كثير وقفلوا حسابي 72 ساعه :20::20::20: بعدها ب 3 ايام رجع الموقع فتح ليا ولكن ابو طبيع مايغير طبعه ههههههههههه ومره ثانيه 72 ساعه :30::30::30::30: , بعدها قلت توبه والله لمن يفتح مره ثانيه خلاص اقرب موعد احجزه وخلاص المهم بعد مافتح ب يومين كدا في الصبح على 8 دخلت الموقع فجأه وحصلت موعد يوم 11 اوغست الساعه 8:30 الصبح وطبعاً حجزت بدون اي تفكير.

الحاجه الثانيه بديت اجهز ب الاوراق اللي احتاجها للتقديم

1- نموذج DS-160 (طلبوها)
2- الموعد حق السفاره (طلبوها)
3- كشف حساب 6 اشهر حساب الوالد (لم تطلب)
4- ورقه من الجامعه بما اني طالب ( لم تطلب )
5- صورتين شخصيه 5X5 (لم تطلب)
6- ورقة تعريف الراتب من الوالد (لم تطلب)
7- خطاب تكفل مصاريف من الوالد (لم تطلب)

يوم الموعد خرجت من بدري ووصلت الساعة 8:05 قبل الموعد ب 25 دقيقه بس الامن السعودي رجعنا وقالوا تعالو قبل الموعد ب 15 دقيقه وبعدها قالوا ب 5 دقائق , كنت رابع شخص واقف في الطابور بعدها بدينا ندخل كل شخص فرق بينهم دقيقتين.

اول مرحله في شباك تطلب منك ورقه DS-160 بعدها تعطيك ورقه حمراء الخطوه اللي بعدها توقف امام باب وتظهر للامن الورقه الحمراء ويدخلك التفتيش اثنين اثنين , طبعا لو كان عندك جوال او مفتاح سياره راح ياخذوه ويعطوك ورقه فيها رقم.

ثاني مرحله تخرج من مكان التفتيش وتدخل غرفه كدا حجمها متوسط في واحد يسألك ايش نوع الفيزه ويعطيك رقم للانتظار طبعاً بما اني رابع شخص انتظرت فقط 5 دقائق
وجاء رقمي وقمت وقفت عند الشباك.

1- اخذ الجواز وحط ورقه خلف الجواز
2- تأكد من اسمي وتاريخ ميلادي
3- سألني انو قبل كدا زرت امريكا
4- سألني كان عندي فيزه صالحه حتى الان.

بصمت اربعه اصابيع اليسار
بعدها اليمين
بعدها الابهام

بعدها قلي انتظر راح يناديك بنفس الرقم دا للمقابله الشخصية

انتظرت في حدود ال 15 دقيقة طبعا مغص وارتباك هههههههههههههههه

المهم جاء رقمي

في البدايه المقابله ب الانجليزي بما اني اجيد اللغة الانجليزية

القنصل
صباح الخير
انا
صباح الخير
القنصل
كيف حالك؟
انا
بخير ماذا عنك
القنصل
ممكن جواز السفر ؟
انا
تفضل , بس جواز السفر ؟
القنصل
ايه نعم في حالة احتجت اوراق ثانيه راح اطلبها منك

الاسأله كانت كالتالي:-
هل سافرت قبل كدا امريكا ؟
جاوبت ب نعم
هل الفيزه اللي سافرت فيها من قبل نفس نوع الفيزه المقدمه الان ؟
الجواب نعم
هل انت طالب ؟
نعم
ايش تخصصك
جاوبت
من المتكفل ب المصاريف ؟
الوالد
ايش عمل الوالد ؟
جاوبت

طبعاً طول الوقت على الكمبيوتر قاعد يكتب

اخيراً قلي بصم يدك اليسار وبصمت

ومسك الجواز ورفعه وهنا قلبي وقفف في مكانه وقلت مرفوضه خلاص راح يرجع الجواز

قلي الفيزه مقبوله وراح تكون جاهزه خلال يومين عمل

وبس هنا انتهت المقابله

اخر حاجه اول مارجعت البيت شيكت في الموقع كانت تحت الاجراءات الاداريه
الى يوم 12 اوغست 1 الظهر تغيرت الحاله الى اصدرت.

بعدها في نفس اليوم الساعه 9 الليل جاتني رساله انو الجواز جاهز للاستلام في ارامكس

بكل بساطه الجواز انتهى خلال 36 ساعه مع الفيزا

اي سؤال انا حاضر

وشكراً لكم جميعاً