بخصوص الاجراءات الادارية للتأشيرة الامريكية
 

السلام عليكم
كما هو موضح في العنوان مشكلة الاجراءات الادارية
تقدمت بطلب تأشيرة دراسيه
كانت المقابلة في القنصلية الامريكية بجده يوم 19 ديسمبر 2021 انا وزوجتي واطفالي ،، كانت مقابلة سلسه واسئلة بسيطه جدا ، ونهاية المقابله اخبروني ان طلبي مرفوض حالياً بسبب تحويله الى اجراءات اداريه ، طبعاً ارسلوا لي ايميل وايضا لايميل زوجتي وطلبو بيانات اضافيه وفوراً ارسلتها لهم اليوم الثاني ، سألت وقتها وقالوا يمكن الموضوع ياخذ 6 اسابيع وكنت متطمن ،، للاسف حتى الان لازال الطلب مرفوض واكملت 4 شهور ولم يتم اي تحديث بخصوص طلبي ،، سويت تأجيل للدراسة مرتين ،، ارسلت لهم ايميل مرتين استفسار والرد واحد انتظر لازال طلبك تحت الاجراءات الادارية ،، وارسلت لهم ايميل اليوم وبشوف وش بيردون ،،
اللي صار معه نفس الحاله هذي كم ممكن تاخذ وقت الاجراءات الادارية ؟
وماني عارف وش اسوي لو اعرف انها بتطول مره بغير الدوله ع بريطانيا او استراليا لأن الوضع الان مع السفاره الامريكيه معلق ، ياليتهم يعلمون من بدري يامرفوض او مقبول بدون المرمطه هذي.

الله يكون بعونك
انا نفس الوضع وتقريبا نفس المده من 7 ديسمبر 2021.
بس الفرق انهم اخذو الجوازات وقالت لنا مممكن نحتاج معلومات اضافيه وخلينا الجوازات عندهم وهم رجعوهم بعد 3 شهورمع ورقه صفراء للاجراءات الاداريه وارسل لهم ايميلات ونفس الجواب لازالت تحت المعالجه
فيزاسياحيه ودخلت الشهر الخامس من غير اي تحديث
الله يفرجها علينا

الله ييسر لها لك يارب
دراستك اكاديمية ولا معهد ؟ وهل قدمت لهم ضمان مالي رسمي؟

دراسة اكاديمية والضمان المالي قدمته للجامعة وبناءً عليه اعطوني ال I-20

تحديث
كلموني السفاره اليوم واخبروني انهم وافقوا على تأشيرتي انا والعائلة ومطلوب مني ارسل الجوزات عن طريق ارامكس،، الحمدلله على كل حال اخذو مني وقت طويل واضطريت خلال الفتره الماضيه اغير وجهة الدراسة على استراليا ، لعل في الامر خير ان شاءالله.
بس نزلت الخبر للفائدة لمتابعين موضوع الاجراءات الادارية
كانت المقابلة بتاريخ 19 ديسمبر 2021
وصلت الموافقة بتاريخ 18 اغسطس 2022
8 شهور بالضبط
عقبال جميع المنتظرين يارب

لعلها خيره. الله يوفقك ويسر امرك