|
تجربتي مع السفارة الألمانية 2018 1 مرفق السلام عليكم أمس الخميس 26/7/2018 كان موعدي انا وزوجتي مع السفارة الألمانية والحمد لله كان التقديم سلس جدا وبدون تعقيدات (أنا ماخذ موعد عادي من الموقع تكلفته 258.3 ريال لشخصين ، تفصيل المبلغ= تكلفة الموعد للشخص الواحد 123 + ضريبة 6.25= 129.15*2=258.3 ريال ) وكان موعدي الساعه 10:45 وأنا دخلت المبنى 10:15 تقريبا ((رحلتي ان شاء الله في 14/9/2018 مدتها 15 ليله، منها 11 ليله في ألمانيا)) بشرح لكم من دخلت المبنى إلى أن طلعت وأعتذر على الإطالة مقداً:1: أول ما دخلت لقيت مكتب على اليسار فيه موظف وقدامه طابور بسيط من المراجعين وقفت وجاني الدور وشاف موعدي وختم على ورقة الموعد بكلمة(AUTHORISED) وقال السفارة الألمانية فوق دخلنا مع باب أمني ( باب خاص بتفتيش النساء وآخر للرجال) تمر فيه على جهاز الكشف المعروف مدخل الرجال كانو الأمن فيه بشوشين ومبتسمين وما طلبو مني انزل اللي في جيبي على الطاولة ، دخلت ورن الجهاز وقال لي الأمن معك شي؟ قلت معي كل شي ههههه :44:وضحك وقال تفضل الله يسهل أمرك. أما مدخل النساء كانو يفتشون الشنط وخذو من زوجتي جهاز الهواوي، يقولون ممنوع داخل لأنه يأثر على اجهزة عندهم !! وعطوها رقم عشان تاخذ الجهاز واحنا طالعين بعد ما دخلنا من عند التفتيش رحنا يسار وطلعنا للدور الأول (يوجد درج + مصعد) وأول ما طلعنا الدرج فيه موظف على اليمين جالس على مكتب صغير وعندة كمبيوتر (هذا اللي يعطي الأرقام للمراجعين على أي سفارة) اختار في الشاشة السفارة الألمانية وحدد عدد الأشخاص (2) وطبع لنا الرقم بعد الموظف هذا فيه ممر على اليمن دخلنا معه أول صاله على اليمين هي صالة استقبال طلبات الشنقن الألمانية فقط (الصاله فيها 11 موظف، 7 يستقبلون الطلبات و 3 مدخلين بيانات وتبصيم ومشرف،، العدد ممتاز وما توقعته ) جلسنا وجانا موظف وعطانا هالورقة مكتوب فيها كيفية ترتيب أوراق الفيزا السياحية https://www.arabtrvl.com/vb/attachme...1&d=1532688429 رتبتها حسب طلبهم وهذي الأوراق اللي انا قدمتها: 1- نموذج الطلب (انا عبيته إلكتروني وطبعته ويجي 6 صفحات ووقعنا عليه) 2- صورة مقاس الوجه 3.6سم (وهذا مهم جدا في السفارة الألمانية ، يعني يكون 90% تقريبا من الصورة وجه) 3- تأمين طبي. 4- حجز فنادق (كل حجوزاتي من موقع Airbnb) 5- حجز طيران. 6- حجز سيارة عدد أيام رحلتي (لأن تنقلي بين المدن كله بيكون بالسيارة) 7- تعريف بالراتب بالإنجليزي موجه للسفارة الألمانية (أنا صادقت عليه من الغرفة التجارية زيادة حرص مني لكن ما أدري إذا إلزامي أو لا) 8- كشف حساب 3 أشهر بالإنجليزي مختوم من البنك على الصفحة الأولى والأخيره. (ملاحظة: جا رجال جنبي وسأل الموظفه هل تقبلون كشف الحساب غير مختوم من البنك؟ قالت له ايه عادي مو لازم مختوم) 9- صورة من بطاقات الإئتمان. 10- صورة من بطاقة الأحوال + صورة من كرت العائلة (غير مترجمين) 11- صورة من الجواز (الصفحة الاولى + الصفحة 3 اللي فيها توقيع صاحب الجواز والتوقيع على الجواز إلزامي) 12- صورة من الفيز السابقة (إذا سبق وأن حصلت على فيز شنقن من قبل) بالنسبة لأوراق زوجتي مثل اوراقي ما عدا كشف الحساب 3 أشهر لم أرفقه معها (غير مطلوب) وارفقت معها صورة من تعريف الراتب الخاص بي (بناء على طلب الموظفه) بعد إنتظار تقريباً نص ساعه جا دورنا قدمت أوراقنا وراجعتها الموظفه وسألت هل الحجوزات مؤكدة قلت نعم ومدفوعة و وريتها في حجوزات الطيران والسكن أنه مكتوب (Paid) تم الدفع قالت كل أوراقكم كامله بس فيه مشكله في التأمين الطبي الخاص بك لقت إن تاريخ ميلادي في التأمين الطبي يختلف عن اللي في الجواز (فرق يومين) وهذا بسبب برامج التحويل من هجري لميلادي ، كل برناج يعطي نتيجه مختلفه، والجوازات مستخدمه برنامج يختلف عن اللي تستخدمة شركة التأمين ، وانا مأمن أون لاين في التعاونية ولا انتبهت لهذا الخطأ في التاريخ ، لو اني منتبه كان كلمتهم وعدلوها لي بس ربك كاتب هالشي. قالت إذا تبيني امشيها مشيتها بس على مسئوليتك بس تبي نصيحتي رح عدلها لأن السفارة الألمانية دقيقين وممكن يرفضون طلبك عشان التاريخ وقلت شورك وهداية الله سألتها إذا فيه التعاونية هنا في المبنى؟ قالت لا بس فيه شركات ثانية غيرها بإمكانك تأمن تأمين جديد لك أنت بس لأن زوجتك ماعندها مشكلة في تأمين التعاونية. وقالت اذا عدلتها تعال عندي مباشرة وأكمل إجراءاتكم وأهم شي قبل الساعه 2 الظهر . وقتها كانت الساعه 11 وربع تقريبا. طلعت وفكرت هل أكلم التعاونية يعدلون لي التاريخ؟ بس المشكلة بيرسلون لي ملف PDF وما أدري وين أطبعه !! وحسب ما قريت من ردود الناس السابقة إن شركات التأمين اللي داخل المبنى غالية جدا . سألت الموظف حق توزيع الأرقام وقال لا بالعكس بتحصل مثل برا أو أرخص. نزلت تحت ولقيت شركة إسمها (Allianz) سألت عندهم ولقيت أسعارهم حلوه تأمين 15 يوم بـ 59 ريال للشخص تأمين 21 يوم بـ 75 ريال للشخص شامل الضريبه والرسوم الإدارية أمنت عندهم وطلعت للموظفه قالت انتظرو شوي أخلص اللي في يدي وأناديكم (كانت قمه في الإحترام واللباقة في التعامل) دقايق ونادتنا وعطيتها الأوراق ثم عطتني ورقة تعهد وحده لي و وحدة لزوجتي وقعنا عليها واضافتها مع اوراقنا . ودفعت رسوم الفيزا 530.5 ريال لشخصين ثم قالت تاخذ الفيزا من اسبوع إلى عشرة أيام ، استريحو وبينادونكم بالإسم للتبصيم . جلسنا أقل من نص ساعه تقريبا ونادو علينا وبصمنا وطلعنا. وجتني رساله فيها رقم الطلب وان طلبي استلم من قبل المركز. ----------------------------------------------- خلال مراجعة الموظفه لأوراقنا سألتها عن الحد الأدنى المطلوب توفرة في الحساب البنكي لأني سمعت أرقام مختلفه قالت شروط السفارة الألمانية لازم يكون في الحساب مالا يقل عن عشرة آلاف ريال عن كل شخص . يعني انت وزوجتك لازم يكون في الحساب 20 ألف واللي لوحده يكون في حسابه 10 آلاف والعائلة المكونه من 5 أشخاص مثلا لازم ما يقل الرصيد البنكي عن 50 ألف ، وعلى ذلك قس. وسألتها قلت ليش كل فترة لكم شروط مختلفه؟ قالت هذا من السفارة لأن قبل 3 أشهر تغير القنصل الألماني وهالجديد غير في الشروط وصارو دقيقين جداً وصارو يرفضون طلبات والإسبوع الماضي رفضت طلبات كثير . وشفت قدامي ناس ماقبلت صورهم لأن مقاس الوجه عادي وليس على طلب السفارة (3.6سم للوجه) . وأسمع الموظفين يقولون روحو صورو صور جديده وتعالو. أعتذر مرة ثانية على الإطالة بس حبيت أعرض تجربتي عشان يستفيد منها غيري مثل ما استفدت أنا من تجارب اللي قبلي وأشكر جميع القائمين على هذا الموقع وكل من قدم معلومه مفيده لنا وساعدنا في موضوع الفيزا والله يجعله في موازين حسناتهم ودعواتكم لنا بالتوفيق والحصول على الفيزا :3: تقبلو تحياتي |
ما شاء الله عليك يابو رسيل تفصيل رائع للتجربة نشكرك عليه واكيد كثير من الاعضاء والزوار راح يستفيد منها الله يجعلها بميزان حسناتك لا اتفق مع الموظفة ان الكثير من السعوديين انرفض الاسبوع الماضي لكن الحالة السياسية تلقي احياناً بظلالها على هذي الامور الله يسعدك وان شاء الله نبارك لكم بالفيزا |
الحمدلله مشت امورك على خير انا موعدي كان 2018/7/23 عاد تصدق ماطلبو مني بطاقة ائتمانيه ، مع اني سالتهم اذا يبونها بس قالت لي الموظفه مايحتاج بالنسبه لكشف الحساب ، سوو لي سالفه يقولون لازم يكون 25 الف اقل شي ونا الكشف كان فيه 20 الف ، مع العلم اني مسافر انا وزوجتي بس لكن حسيت انها غلطانه او مضيعه ، لاني حسب ملسمعت من الكثير ان المبلغ 20 الف مثل ماقلت انت عاد قلت ارسليها وماعليك انتي وان شاء الله تمشي الامور ههههههه |
اقتباس:
والشكر لك على مواضيعك ومعلوماتك اللي استفدت منها كثير . وانا كتبت هالموضوع من باب رد الجميل لهذا المنتدى وعشان يستفيد غيري . والله يتقبل دعائك ... |
كنا عيلة بالغين و٤ اطفال والحساب فيه بس ٢٥ الف واعطونا تأشيرة سنتين الحمد لله بس اوراقنا كاملة من والى المبلغ تحس ماهو مقياس كلن يقول شي |
اقتباس:
|
جاني استفسار على الخاص بس ما قدرت أرد عليه حسب شروط المنتدى بسبب عدد مشاركاتي القليلة بخصوص تأمين التعاونية أنا أمنت عن طريق موقعهم ودفعت بالفيزا وطبعت التأمين بس صار بالعربي . ولا لقيت شي في الموقع يخليني أطبعه بالإنجليزي ، دقيت على خدمة العملاء بالتعاونية وطلبت الوثيقة بالانجليزي وأرسلوها لي على الايميل ملف PDF وطبعته ملون وعليه ختم إلكتروني مطبوع ، ولون الختم أسود وقبلوه وما قالو عنه شي. بخصوص الصورة نعم المقاس نفسه 3.5 × 4.5 لكامل الصورة وأقصد بصورة الوجه اللي هو من أعلى الجبهه إلى آخر اللحية لازم يكون طوله 3.6 يعني تكون الصورة مقربه كثير وداخله في الوجه. |
اقتباس:
شكرا جزيلاااااااااا |
العفو واتمنى انكم استفدتم من تجربتي واحب ازيد لكم بأنه في يوم الخميس 2/8/2018 جتني رسالة بأن الجوازات جاهزة للاستلام من مكتب التأشيرات الموحد ورحت يوم أمس الأحد واستلمتها (جوازي + جواز زوجتي) وعطونا مدة قصيرة جدا من 14/9/2018 إلى 18/10/2018 35 يوم فقط !!!!!!!!!! غريييب جدا الحمد لله على كل حال في المره القادمة بشوف سفارة غير الألمانية للتقديم على الشنقن |
اخوي الله يسعدك ماقصرت وسوالي وش التعهد اللي تقول وقعته انت وزجتك |
| الساعة الآن 07:56 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO