بسم الله الرحمن الرحيم ..

تحية طيبة لرواد هذا المنتدى الكبير ، وحبيت أفيد الأعضاء والزوار عن تجربتنا الأولى في إصدار الشنقن من مكتب خدمات التأشيرات الأسبانية الجديد BLS :e511:

تقريباً من حوالي السنة طلعت الأسبانية من مركز التأشيرات الموحد وأصبح لها مكتب مستقل
موقعه في الرياض على طريق الأمير مشعل في عرقة في مبنى تجاري في الدور الثاني وهذا موقعه :

https://goo.gl/maps/wxJ8QxV2kes

وكان موعدنا أنا وأخوي أمس الأحد 2018/05/13 الساعة ثمان الصبح ، وهذي بعض الملاحظات :

ــ المكتب حجمه صغير نوعاً ما وكان جداً ممتلئ بالمراجعين .

ــ قاعة إنتظار واحدة للجميع العوائل والأفراد .

ــ عدد الكاونترات 5 عيبها إنها متلاصقة جداً مع بعض ولا فيه كراسي أمام كل كاونتر يعني بتبقى على رجولك واقف ونت تقدم .

ــ أعيب على هذه المكاتب ونفس النظام أيام المركز الموحد موضوع المواعيد
المفروض أن يتم تقديم المراجعين بناء على الموعد وليس على ورقة الإنتظار اللي يأخذها
أنا حاجز الموعد على ثمان الصبح ولو ما بكرت بدري وجيت أول واحد ولا ما كنت دخلت على الموعد
وعشان كذا نصيحة لا تاخذ على وقت الموعد إطلع بدري وخذلك رقم .

ــ دخلونا الصالة من 8 إلا عشر وإنتظرنا ينادوا على المراجعين لين 8:45 ،
الطاقم جميعاً أخوات مواطنات ما عدا موظف من الجنسية الهندية وهذا اللي قدمنا عنده
وحسيت إنه مش بكفاءة موظفين المركز الموحد عند مراجعة وتدقيق الأوراق
إلا بالعكس هو كان يسألني عن بعض الأوراق مثل التأمين أو التذاكر
رغم إنه الأوراق كلها قدامه ولا حسيت إنه دقق في تواريخ الحجوزات والتذاكر ويطابق بينهم .

ــ شغلة إنتبهوا لها اللي هي التصوير ، في جميع المرات السابقة كنت أصور في إستديو خارجي
ونا لابس نظارتي الطبية وكانت تقبل مني ، المره هذي رفضوها وقالوا لازم من غير نظارة
رغم إنه ما فيه أي إشارة في الموقع عن موضوع النظارة الطبية وصورت عندهم
وخذوا مني 40 ريال لصورة واحدة فقط !!

ــ الرسوم لأخوي 339 ريال ، رسوم الفيزا 265 ريال ، رسوم المكتب 69 ريال ، ومبلغ 5 ريال حق الرسايل
وفيه خدمة توصيل عن طريق أرامكس سألتهم بـ 40 داخل الرياض
ونا دفعت 379 ريال بزيادة 40 ريال حق التصوير .

نجي لموضوع الطلبات ، الأسبان والله إنهم زينين وحبيبين وإجراءتهم تنتهي بسرعة ولا سمعت إنهم ردوا متقدمين
بس للأمانة طلباتهم زادت أكثر من اللازم وطالبين أشياء مالها أي داعي
يعني شنو بيستفيدون من كرت العمل (البيزنس كارد) للمسؤول اللي وقع على خطاب التعريف
يوم ماطلبت البيزنس كارد حق مدير الموارد البشرية طبعاً إستغرب وقالي ما يبوني أجي معك بعد خخخخخخخ !!
وشنو بيستفيدون من البيزنس كارد تبعي ونا أساساً مقدم لهم كرت بطاقة العمل مترجمة وخطاب تعريف ومدري وشو !!
أما باقي الطلبات مثل ماهي : أصل الجواز والنموذج + تذاكر الطيران الدولية والتنقل الداخلي وكلها مؤكدة +
حجز فنادق من بوكينق + تأمين صحي عملته أون لاين من التعاونية الواحد بـ 85 ريال لمدة شهر +
خطاب تعريف + كشف حساب + خطاب مني بسبب الرحلة + صورة إقامة مترجمة من مكتب معتمد +
صور تأشيرات شنقن سابقة + تأشيرة خروج وعودة .


دعواتكم تمر بسلام ولو إنها المره الثالثة بس لازم من المغص والقلق والتوتر :32: وأي أسئلة من عيوني والله ..

هلا بـ الإستاذ الغالي بو غسان ..

فعلاً يا سيدي لأن المكتب جديد والطاقم ممكن يكون ما عنده ذيك الخبرة الكافية .

صحيح الزحمة سببها بدء موسم الإجازات والصيف ولا أكيد الأيام الأوقات الثانية يكون أقل بكثير .

بـ النسبة لطلب البيزنس كارد ، لا والله هذا طلب السفارة !! لو ترجع للتشيك ليست اللي أرفقته
في الموضوع المثبت عن الشنقن الأسباني راح تشوف هالطلب الغريب ..

شرفني مرورك ..