شبكة و منتديات العرب المسافرون - رحلتي الشتوية.. ميلان كومو البندقية فلورنسا بيزا ربالو برتفينو ميلان

ابشركم رجعت اغلب الصور او اني ما صورت واجد طلع لي فديهوات وصور ميب كثيره بس يعني بنزيد صوره او صورتين :yolks00570:

:gbg:

بسم الله نستكمل رحلتنا وهذا اليوم الثاني في فلورانسا
الجو صحو وفيه كم سحابه :yolks00430:

اصبحنا بكيير على الساعة 9 تقريباً لان نايمين بدري
وجينا نكيف عشان نطلع وانا مصحصحين واجهز عدة الكوفي واشغل الغلايه وهنا كانت الصدمه :yolks00800:
غلايتهم توصل درجة حرارة الغلاين ثم توقف تجلس لها دقيقه ولا ثنتين ثم تقدر تشغلها .. كذا ما استفدنا شئ لازم تتقلب القهوه :e43e:

عاد انا خلاص استحيت من باني ايطال اخاف ينقدون علينا عيال بلد الفرنجه :yolks00320:
كل ماتروح ديره تجينا بقهوتك وترمسك

والله وانزل للرسيبشن واعطيهم نفس الموال الي سويته في كومو :yolks00250:
ابتسامه عريضه ومعليش ممكن خدمه صغيره ابي اسوي قهوه عربيه ومعي عدتي
قالت رح للمطبخ وبكلمهم .. قلت زين مرسي اوي :e327:

واطلع فوق للدور اظاهر 6 وصاير اول ماتدخل فيه موزع وفيه قزازه كبيره تشوف البار او المطبخ واشوف وحده تكلم قلت شكلها جالس تشرح لها الله يستر بس زين حرمه اهون شوي

واروح لها واعطيها نفس الابتسامه :yolks00250: معليش بنتعبك معنا شوي بس تعرفين الخرمه
قالت اسمع شف تدخل المطبخ معصي <--- اظاهر شكله من البلديه ممنوع احد يدخل المطبخ من غير العاملين لان كلهم يعييون

قالت ياولد العرب ترى علمك غانم وما طلبت شئ <-- كاني فليتها لا بس الله يصلحها ويهديها ماقالت شئ قالت ابشر بس انت علمني خطوه خطوه انا بشب على الفرن وانت علمني

طبعا كلهم يتوقعونها زي قهوتهم الا واحد شكله معلم قهوه قالي هذي زي القهوه التركية تحتاج طبخ وتطلع لها رغوه بس ذا بيجيكم علمه الايام الجايه

والله واطلع جوالي واقول يامعلمه :39:
شوفي هذا فديو مصوره للخال الشقردي من كومو وهو يضبطنا شوفي اشلون ضبط القهوه وسوي زيه اسهل
ميب صابره علي اخلي القهوه على النار 15 دقيق

الشاهد وبدت تسويها لكن الضعيف عورتها يدها من مسكت البريق قلت لها امسكه عنك قالت لا ولا تقربه
قلت بكيفك وكل شوي تقول يكفي اقولها لا وش يكفي دقيقتين تستهبلين يبي لها اقل شئ عشانك تعبتي خمس دقايق وكل شوي تناظر الساعه وتبين لي انها تعبت بس مع ضحكه

يوم شفت الوضع كذا تلميح قلت هاتي هاتي خلاص ماقصرتي المهم ريحة قهوه
:e045:
وتقهوينا طلعت حليوه تمشي الحال

وبدينا مشوارنا مروقين ومكيفين وقلنا يالله هيا الى العمل
نبي الحين نفطر وين نروح .. الا اشوف في قوقل حولنا مقهى تقييمه زين قلت خل نشروح له
عندهم كوروسان واومليت وقريب

http://i65.tinypic.com/2db3vab.jpg
جينا نطلب كوروسان قلنا عندكم زعتر جبن لبنه سااده طيب
قالت لنا لا مافيه فيه مربى قلنا هات يالله
وثم جلسنا وطلبنا اومليت وعصير برتقال

اكتشفت ان الايطاليين يعشقون الجريبفروت :yolks00270:
بس كل مطعم او مقهى تختلف فيه نسبت الجريب فروت مع البرتقال
لازم تقولهم برتقال ساده مامعه شي
وفيه نقطه ثانيه غريبه لاحظتها في هالمقهى وفيه مطعم ثاني في ميلان مايستخدمون مناديل عاديه
منديل رقيق مخلوط معه ورق بلاستيك زي الي يغلفون به الشاورما او الي يجي مع الدونات :detective2: ماله فايده
وخلال هاليومين من السفره لاحظنا الايطاليين يعشقون القهوه ويتقهوون وهم واقفين عند البارات كبار وشباب نفس الشئ مايجلسون

بعد ما افطرنا وروقنا بدت رحلت الاستكشاف وجلسنا نفر على رجولنا الديره صغيره وحلوه للي يحب المدن الي بالطراز التاريخي الحجري وممرات صغيره، ولاحظت عندهم محلات جلد كثيره للقلفزات والجزم وانتو بكرامه مدري هم مشهورين بها او وش

http://i65.tinypic.com/otdg5i.jpg

يوم ابعدنا شوي في المشي تعبت المدام قلت يالله نرجع بالباص
نظام التذكره اظاهر موحد في ايطاليا التذكره مدتها 3 ساعات ثم تشتري غيرها

دخلت بقاله قال مخلصه دخلت البار مدري مقهى قباله وخذت منهم تذكرتين بس ناسي بكم
هو بيورو ولا يورو وشوي في هالحدود
طبعا معتمدين على خرايط قوقل قال لنا اركبوا الباص الفلاني وتراه بيجيكم بعد شوي
والله وننلطع ولا جاء كل شوي باص وخوينا ما جاء وشفته وقف في موقف ثاني مقابل للي انا جالسين فيه

قلت يا ام محمد سرينا شكل الموقف غلط .. ومشينا وننتظر لحالنا :e419: بس الشارع حركه وفيه طلاب مدارس وشكله اخر يوم مبسوطين ويتبادلون القبل عيني عينك :yolks00780:
وثم جت عجوز تنتظر معنا تطمنت الحين ان فيه امل يجي خوينا ما مقلب بنا قوقل

والله وجاء وركبنا المشكله مدري وش نظام باصاتهم مع التذاكر انا اذكر فيه كرت تحطه على الجهاز فيه شريحه ذولا لا ورقه صغيره ورق
واركب واوري السواق التذكره ولا قال شئ وجلسنا وجلست اراقب الي يركبون في كل وقفه الا وحده ركبت وحطت التذكره في جهاز في الوسط يسحب البطاق ويرجعها لك هنا فزيت وسويت نفسي ابو العريف :yolks00740:
وادخل تذكرتي وتذكرت المدام واجلس

ووصلنا للوجهه الي نبيها النهر عشان بنشوف الجسر المشهور عندهم ناسي وش اسمه
الزبده يعتبر معلم عندهم

http://i64.tinypic.com/2nusuwj.jpg

الغريب مدري لي مايخلون العالم تنزل تحت بمحاذات النهر زي باريس فيه زي كذا مسوين زي الممر قريب من النهر ذولا فيه بس مقفل مدري ليه

الشاهد وصلنا جسرهم المنشود وطلع عنده عالم وطلع خرابه وهو كان اول جسر يربط بين المنطقتين وفيه مبني عماير على الجسر ومحلات وصغير في الصور كانه كبير

http://i67.tinypic.com/2csffb6.jpg

اغلبه محلات ذهب يمين ويسار وفيه مطل في الوسط حلو
وفيه مجسم عليه اقفال زي حقت باريس حقت الحب ويصورون معها الناس

ثم رجعنا قلنا نكم لفه في المدينه وناكل لنا شئ

http://i65.tinypic.com/1583t6d.jpg

ومدحو لنا هالمقهى هو حلو وجلساته حلوه على ساحه فيها ذيك اللعبه الي تدور الاحصنه وفيه ناس يسوون عروض .. وبتحصل كل جيرانكم الخليجيين موجودين هناك

نفس الحكايه ماعندهم شوربه وخذنا رزيتو وسبغتي بحري والمدام خذت عندهم حلا مشهور مدري وشو
فوقه بودره بنيه

http://i65.tinypic.com/nd0m0n.jpg

صادف يوم زيارتنا للمدينه مدري عشان كريسمس او يوم وطني او حروب صليبيه الزبده سوو مسيره لابسين لبس عسكري قديم ويمشون مسيره الى ان يوصلون للدومو وكل شوي يضربون مدفع
كان هذا اليوم حلو تحس المدينه حيه وزحمه كانك في ملاهي موب مدينه من الحركة
وكانت الشوارع ونيسه حتى الليل ماتخاف لان كلن طالع يتشمى وحتى يووم قفلت المحلات
بس مدري هي طول السنه كذا ولا بس عشان وقت زيارتنا

حاولنا نفر كل شء عشان نحرك بكره بدري الى بيزا وبورتفينو نبي يكون الخط نهار ونشوف الدنيا اونس من الظلام

http://i65.tinypic.com/6yfnso.jpg

فرجعنا الفندق ورتبنا اغراضنا استعدادا ليوم غد :63:

:gbg:

في ردنا القادم نستكمل صباح فلورنسا وبيزا وربالو وبرتفينو
:e303:

:e137:
أدري تاخرت في باقي الرحلة لكن صادف عندي شغل وإجازة مدارس <-- مالها دخل :17:
عذراً على الانقطاع .. :e310:

:gbg:

نستكمل من حيث توقفت .. الي هو اخر يوم في فلورنسا رتبنا اغراضنا الليل عشان نصحى بكير ونفطر وننطلق الى بيزا وبورتفينو :e42f:

نفس المنوال الصباح نضبط القهوه عند الحجيه لكن هالمره ماطولت لن من نظرتها حسيتها ماودها قلت سوي واحد قهوه سريع سريع ..

وتقهويت مع ام حمودي :48:
وقلنا يالله ننزل نفطر فطور سريع وقبل لا نطلع من الفندق قلنا للاستقبال جهزوا السيارة ترانا ماشين..
رجعنا حصلنا السياره عند الباب وانا كنت مسوي تشيك اوت قبل لا اطلع والشنط عندهم بس باقي حساب المواقف للسياره عطيته الاستقبال وما ياخذون الا كاش لانه موب تبع الفندق خذوا علي يومين ب 50 يورو :27:

وقلنا قبل لا نطلع من هالديره لازم وداعيه خل نروح للمطل حقهم
http://i65.tinypic.com/29vnfco.jpg

بالسياره تقريبا ربع ساعة اظاهر او ثلث
وفيه مواقف بالساعة عند المطل وفيه كم كوشك يبيع تذكارات واطلاله على المدينة كاملة حلو موب شين
واشوف في خرائط قوقل انه في الصيف يزيدون عدد المواقف .. وفيه باصات اظاهر توصل لهالمطل
وفيه ايضا حديقتين يمين ويسار لكن مارحت لها لان اتوقع في الربيع او الصيف تكون حلوه ومزهره الورود
وفيه مطعم او مقاهي في مكان اعلى من المطل لكنه خلف المطل اشلون اوصف

http://i66.tinypic.com/25up4cm.jpg

ماطولنا لان ورانا خط فقلنا بسم الله توكلنا على الله .. وانطلقنا
الان الوجهه بيزا نتمشى فيها ساعتين الى ثلاث ساعات مبدئياً واحتمال تزود :e324:

والطريق كان حلو مع انه شتاء لكن كنا نمر بمزارع حلوه مرتبه ومرتفعات وجبال كان فيها خضار عكس طريقنا من كومو الى فينيسيا فيه خضار وشجر وتشوف الكنايس تصميمها كانها مساجد لها منارات واضحه بين البيوت
وحاولت اقراء عن كنايسهم فيه بعضها يقولون كانت مساجد وقلبوها وفيه ناس تقول لا هم تاثروا بالمسلمين ذيك الفتره وبالمسلمين في اسبانيا الزبده منظرها حلو وهي فوق الجبل وحولها بيوت صغار .. جاني شعور ودي ارجع بالزمن فتره واشوف كيف كانوا عايشين وقتها في عز وقت المسلمين والمسيحيين :e14b:
في امريكا دخلت كم مره كنيسه وفي باريس ولندن شفت كنايسهم لكن طرازهم للبناء غير وماشدتني وعندهم كنائس نفس باقي اوربا بس الشاهد وانت تمشي في الخط وتشوفها من بعيد
وطراز البناء للبيوت تقريبا واحد قرميد <--- زي الطراز الاندلسي او المغربي الي فوق يكون فيه زي المظلة ديكور يا احمر ولا ازرق ولا اخضر هو زي البرتغال واظاهر اغلب اوربا نفس اللون اللون الاحمر الي يميل على البرتقالي

وقربنا من بيزا .. الصدمه :yolks00700:
اشيك على اللوكيشن في الجوال وفي السياره كلهم يقولون عشر دقائق وتوصل للوجهه الي انا حاطها مواقف عند برج بيزا اشلون وش هالديره ؟؟ شكلي غلطان في اللوكيشن :(46):

عن سمعت بيزا وبيزا واسمها مرتبط بالبيتزا والبرج المائل واول ماتقول بيزا يجيك علم ايطاليا واذا مارحت بيزا كانك ما رحت ايطاليا .. الصوره الي في بالي عنها انها مدينه كبيره وفيها حياة عمائر وتاريخيه
طبعاً قريت عنها قبل وماحصلت شئ فيها الا الدومو والبرج المائل وفيه شارع تسوق ولوحة جداريه لفنان مشهور والعالم تقول نمرها ساعتين ونروح .. كنت اقول اشلون اكيد ما سلطوا عليها الاضواء ولا اشلون بيزا هذي :28:

جاني شعور وانا امشي حسيتها احدى المحافظات عندنا في السعودية
وصلنا قال اللوكيشن باقي دقيقه على الوجهه الا اشوف زحمة ناس لكن ماشفت البرج ولا شئ بس زحمه
ودخلت المواقف ووقفت وانا منصدم بس على قولتهم الكتاب باين من عنوانه

المواقف يعطيك زي القرش بلاستيك تخليه معك وانت طالع تحاسب وقفنا والسياره فيها اغراضنا وقلت الله الحافظ كان الوقت العصر

وفيه مخرج واحد للمواقف على سكه صغيره غير مدخل السياره المشكله هالمخرج والسكة
متجمعين فيها افارقه اشكالهم ونظراتهم تثير الريبه :yolks00780:
طلع متجمعين يبيعون شنط تقليد واتوقع وراهم مصايب بعد لكن الحمد لله فكنا الله منهم وانطلقنا للبرج المائل
تدخل بين اكشاك تذكارات كلهم تقريبا يبيعون نفس البضاعة
ثم تشوف سور كبير وبوابه تدخل تشوف الدومو والبرج سعنون :yolks00770:
http://i64.tinypic.com/24qq25f.jpg

وهالساحات الخضراء محوطينها ممنوع تدخل ولا تجلس عليها بس تناظر والعالم كل واحد يتفنن في الصورة

http://i65.tinypic.com/vymyy8.jpg
ورحنا شوي نستكشف المنطقة الا اغلب الاماكن مقفله عشان الشتاء او عشان اجازة الكريسمس
صايره المدينه كئيبه تجيب الهم تحسفت اني مريتها .. ماطلونا فيها ساعة تقريبا ثم مشينا

وانا طالعين قلت وش رايك ناخذ لنا بطاطس ماك ننقنق عليه في الخط :yolks00740:
دخلنا الا زحمه طبعاً لاحظة ان مطاعم الفاست فود قليله عندهم ماك وبرجركينق وخاصه برجركينج هو الي نشوفه في اغلب المدن لكن ماك الي كل ماسافرت ديره لازم اشوفه في كل زاويه عندهم نادر

الشاهد دخلت وطلبت بطاطس قالت تبي كاتشب قلت ايه قالت بمدري كم سنت :yolks00160: الله يفقرهم
وانا انتظر الا اشوف فيه ورقه مكتوب اذا تبي تستخدم دورة المياه وانتو بكرامه
لازم تعطيهم فاتورة الطلب بس لزوار المطعم البلديه عندهم مستكثره تبني لهم دوراة عامه جنب البرج :yolks00440:

انطلقنا وانا متحسرين على هالزياره الخائبه .. الي يبي يمرها يمرها مرور الكرام ماتستاهل نص يوم
الوجهه الان من بيزا الى ربالو وبرتفينو تقريبا ساعتين

طبعاً هنا الطريق بداء يتغير لاننا بدينا نرجع من الجنوب الى الشمال فكان الطريق عبارة عن جبال وشجر وانفاق وانهار او مجرى سيل وفي بعض الاماكن فيه بقايا ثلج وفيه قرى صغيره تشوفها على الجبال او بيوت تقول ذولا اشولون يوصلون هناك ولا اشلون سياراتهم تمشي .. المشكله ودي اتامل في الخط وفي نفس الوقت لازم انتبه للخط ...

ومن خلال الخط لاحظة شئ في سواقتهم فيه كلمه نسيت وشي لكنها بالايطالي وعند لوحه اذا قربوا عندها يهدون مع انهم يكونون مسرعين قبل يوصلون واول ما يتعدونها يسرعون .. فكان استنتاجي لها انها كاميرات او رادارات سرعة :yolks00530:

وثم وصلنا بحفظ الله ورعايته لربيالو هي مدينه صغيره كنت بسكن فيها بس واطلع اتمشى في بورتفينو
الزبده نفس المشكله رجعت معي بخصوص اللوكيشن والجوال
المعزبه قلت لها الان الشوارع صغيره فانتي وجهيني

ونمشي فجاءه كان الوقت المتوقع 20 دقيقه فجاءه صار 50 دقيقه اشلون ؟؟ :yolks00590:
وكل شوي الوقت يزود واللوكيشن يقول ارجعوا ؟؟

قلت فيه شئ غلط ما اذكر ان الفندق كان فوق جبل اذكره قريب من البحر ومواقف القوارب اشلون
وقف وقف خل نشوف الخريطه زين

ثم قلت خل نرجع ونشوف وش يقول كل مانتعدى يزود الوقت خل نمشي مع الحرامي لباب الدار ونشوف ودخنا وجوعانين صراحة المود قفل :27:
يوم رجعنا ونمشي معه خطوه بخطوه ومهدي السرعه الا طلع اني تعديت اللفه الي مفروض الف معها ويوم مسكت اللفه الثانيه طلعتني الجبل ... ويوم مشينا صح وثلنا للفندق على طول وراح وقتنا على الفاضي لوه نهار كان اهون نشوف مناظر

الفندق هذا قديم وعادي وكنت ماخذه عشان فيه مواقف عامة جنبه وبس عشان ننوم ونطلع
لو برجع مره ثانيه منيب ساكن فيه مع ان الموظفين الي فيه محترمين جداً ومتعاونين لابعد درجة ونفسيتهم عسل ومؤدبين

اول ما وقفت السياره قلت له عندي حجز وقال حياك الله نزل اغراضك وتعال كل امورك جاهزه
وسالته فيه مواقف هنا قال ايه وعادي وقف مجانيه قلت زين وتوني مشغل السياره الا اشوفه يركض ويقول لي حرمتي بتطلع الحين وقف مكانها مقابل الفندق وتجي حرمته تركض توخر سيارتها وزياده يوقف لي الشارع عشان اديور :6:

وزياده على كذا يوم طلعنا الغرفه حصلتهم حاطين لي سرير طفل مع انه في الحجز كاتبين الطفل عليه رسوم زياده وغرفتك صغيره تقدر تسوي اب قريد اذا وصلت لغرفه اوسع ولكن ماعطيتهم الاوكي لاني غيرت رايي ماجبت ولدي معي برد ولا حاسبوني عليه ولا حتى سالوني عن ولدي بس تشكرت منهم وانا طالع وقلت لهم لانه برد ماجبته معي عشان مايقولون يستهبل ذا <--- مادروا عنك :yolks00490:

http://i66.tinypic.com/55ielg.jpg
هذي الاطلاله من الفندق

حطينا اغراضنا وقلنا بنروح ناكل لنا شئ ورحن لبورتفينو تقريبا 20 دقيقه الطريق مسارين رايح جاي يمينك جبل ويسارك سفح جبل وبحر :yolks00590: المنظر روعة لكن للي يخافون مايصلح لهم
والمشكله لليل ويطيرون هالايطاليين بسياراتهم الصغيره فيه واحد قفلها معي لاصق فيني وانا مهدي زي الي يقول اسرع والله ويطلع المارد السعودي الي فيني واسوق سواقتي في الرياض :yolks00800:
بس ابي اعلمه ترى اعرف اسرع واتهور بس موب وقته يا تعدني ولا امش زي الناس

وصلنا بورتفينو تقولون خاويه على عروشها :yolks00700: كل شئ مقفل وهدوووء
في الخريطه كنت متخيلها اكبر من كذا طلعت ولا شئ وش اقولكم كبره جد جد صغيره مدري كيف تكون في الصيف اذا زحمه فيه كراجين مواقف بفلوس واحد كان مقفل يوم نجي وكلهم جنب بعض الي دخلناه ادوار مرتب لكن مدخله المواقف ضيق وصاير منعطف اتوقع اصحاب السيارت الكبيره او الي سواقته موش ولا بود بيتعب زي مواقف الابراج في مكه ولا البحرين مداخلها ضيقه

نزلنا نتمشى الا هدووء ووصلنا للمارينا وكل المطاعم مقفله الا اثنين يمكن ونقرب من واحد ويستقبلنا حياكم
انا توقعته بيقفل طلع يقول تونا بنفتح 7.30 السهره عشاء لكن تفضلوا اجلسو وتمقلوا في المنيو على ما نجهز طبعا مافيه الا مطعمين وانا جوعانين فما فيه خيار ادخل لو انه عادي

منيب متكلم عن طفاصيل الطلب لكن يوم طلبنا جاب لنا باديتين شوربه قال هذي من الشيف ترحيبيه
وكان تقديمه حلو

صراحه طعمها ما انساه الى اليوم غريب شوربه فيها لذعه حلوه المدام تقول نكهة القرقاص كان تعرفونه نبته بريه .. انا مدري اشون اوصفها لكنه تحس لسانك يتكهرب وانت تاكلها يحرك كل حواسك الوقيه :(34):

ورجعنا للفندق عشان ننوم نومه هنيه ونرجع للديره الصباح نشوفها وهي مصحصه ومنتعشه
وان شاء الله نستكمل لكم الرحه غدا او بعده ان شاء الله ونختمها بميلان ديرة الاناقه والموضه :e304:

:gbg:

شكراً لكم