X سُعداء بتواجدكم بيننا ونتمنى لكم قضاء وقت ممتع ،نأمل منكم زيارة صفحة شروط الإستخدام ،تفضلوا مشكورين بالتسجيل لإثراء الجميع بخبراتكم السياحية
Loading...







عدد المعجبين139الاعجاب
إضافة رد
LinkBack أدوات الموضوع انواع عرض الموضوع
غير مقروء 03-01-2018, 11:28 AM   #1
ATL

مسافر جديد

الصورة الرمزية ATL
 
تاريخ التسجيل :  Mar 2015
رقم العضوية : 2301
الدولة : المملكة العربية السعودية
الجنس : ذكر
المشاركات : 96



Cool رحلتي الشتوية.. ميلان كومو البندقية فلورنسا بيزا ربالو برتفينو ميلان


السلام عليكم

اول شئ شكراً لهذا الصرح الي استفدت منه كم معلومة وعشاك كذا تحمست اكتب تقرير مختصر عن رحلتي
كرد للجميل ولعل احد يستفيد من تجربتي زي ما استفدت من تجارب البقية



رحلتي كانت فجر يوم السبت 16 ديسمبر على الخطوط السعودية مباشرة
والعودة صباح يوم الاربعاء 27 ديسمبر على الخطوط السعودية مباشرة

الطيران كان عادي جداً وطيارة صغيرة مثل الطيران الاقتصادي ثلاث ركاب على اليمين وثلاثة على اليسار
في الذهاب كانت الطياره شبه مليانه والعوده مليانه

استغربت في الذهاب أن فيه نسبة كبيره من الهنود أو البنغالية مسافرين قروب بعوائلهم
ولا فيه اي سعودي غيرنا

مدة الرحلة تقريبا 6 ساعات

الذهاب والعودة
الرياض - ميلان
ميلان - الرياض

خطة الرحلة
يوم الوصول ميلان ثم ناخذ السيارة وننطلق لكومو نجلس ليلة ونطلع بعدها للبندقية
جلسنا ليلتين ثم الانطلاق الى فلورنسا ايضا ليلتين ثم مرينا بيزا ساعة زمان متوجهين الى بورتفينو
بنجلس فيها ليلة لكن السكن كان في ربالي تبعد 20 دقيقه عن بورتفينو ثم باقي الايام في ميلان



أول ما وصلنا ميلان اظاهر ماكان فيه الا رحلتنا ورحلة معنا فاضية الجوازات وما طولنا وحتى الشنط على طول وصلت

كانت الخطة باخذ شريحة من المطار وثم اخذ السياره لان حاجزها من موقع SIXT كان عندهم عرض تخفيض 20% وتدفع عند الاستلام وقابل للالغاء في اي وقت
مع ان مواقع التاجير زي رينتال كار وكايك وغيرها تطلع لي ان فيه سعر ارخص لسيارات وعن طريق شركة SIXT الا اني قلت اتعامل مع الشركة اضمن لي واوضح لان قد استاجرت عن طريق هالمواقع ويوم وصلت طالبوني ادفع مبلغ تامين على السيارة يقولون مانقبل تامين الشركة خلهم يرجعونه لك

دورت محل اتصالات في المطار ماحصلت لكن سالت مطعم هناك يتكلمون انجليزي مكسر زي محدثكم

وقالوا لي تحصل شرايح عند محل تبديل العملات ويوم رحت حصلت عنده شريحة فودافون عندهم عرض
بس 45 يورو شريحتين وحده نت بس والثانيه نت واتصال وحده فيها 10 جيجا والثانيه 8 جيجا
لكن اشك في كلامهم لان فيه وحده من الشرايح على طول خلصت الثانية كنا نشغلها للضروروة بنبحث عن لوكيشن ولا نشغل سناب شوي ونصور

يوم خذت الشريحة قلنا خل ناكل لنا شئ دامنا خلصنا امورنا .. خذنا لنا كوروسان وقلنا لهم نبي كوروسان مع جبن بدون لحم وخرابيط و
والمدام طلبت لاتيه <<< يوم وصل انصدمت وهي انصدمت من اللاتيه
طلع اللاتيه عندهم حليب ساه .. فلازم تقولهم لاتيه مع قهوه فيسوون لك حليب ويصبون عليه شوي قهوه
وصراحه كنت متخوف من ردت فلعهم وتعاملهم مع الاجانب واللغة لكن طلعوا زي العسل

عاد استلام السياره واضح تتبع لوحة ايجار السيارات والباص نفس الطريق في الدور الارضي
وحصلت شركة سكست لحالهم لهم مكتب كبير تحت واضح خلصت اموري وخذت السيارة

هنا بدت اللخمة
حركت السيارة يوم جيت اطلع حصلت بوابات ماتفتح الا بكرت، وفيه كرت معي ادخله يقول غلط
واجرب بوابه ثانيه نفس الشئ ..
الا رحمه من ربي جت عاملة تنظف ماتفهم انقليزي اشرت لها وخذت الكرت وعلى طول فتح
طلع المشكله فيني مدخله مقلوب

طبعاً السيارة فيها شاشة ونفقيشن انجليزي فما يحتاج تطلب منهم جي بي اس شيك على السياره لاجيت تطلبها وشف مواصفاتها عشان لاتخسر عمرك

واصلا انا محمل خريطة اوف لاين من قوقل ماب لايطاليا

وانطلقنا بحفظ الله نتبع الخريطتين عشان نتاكد ان الوصف صح
والحمد لله الامور تمام لكن الي موب تمام ان العالم طايره وانا مهدي ما اعرف كم السرعة القصوى وودي اسرع مثلهم وراي 40 دقيقة على ما اوصل

بعد مسافة جتنا بوابات كثيرة
وش السوات يا ام محمد ..!! وين نروح معه بعضها عليها علامة قروش وفلوس وشي اسفر ومكتوب تيلي باس

وانا اذكر اني دافع من ضمن الرسوم ضريبة طريق.. قلت بدرعم مع الي تيلي باس الي بدون بوابه
وتوني معدي الا تولع اشارة حمراء وتطقني الغلقة
من اول يوم يقفطوني .. واذكر دبي عندهم مخالفه كبيره على سالفة بوابات سالك لاتصير مثلهم
وانا قاري في تويتر قبل ان فيه واحد جته غرامه كبيرة وطول الطريق قافلة

جتني بوابة ثانية بس ما اذكر هو انا بس دفعت 2 يورو ولا اني خذت كرت

الزبدة سالفة هالبوبابات هي في الطرق السريعة لاجيت تدخل واذا جيت تطلع منها لازم تمرها وتوقف تحصل فيه كرت طالع تسحبه وتمشي ولاجيت للبوابة الثانية
بتحصل فيه بوابات فيها كاشير وفيه بوابات زي المكاين تعطية الكرت او تدخل الكرت في المكينة ويطلع لك السعر في الشاشة وتدفع هلل ولا ورق واظاهر بعد فيه بطاقة بعض البوبات

طبعاً حط حسابك لهالبوابات من قطة السفرة اذا انت بتستخدم السيارة
اقل شئ 2 يورو او 1.70
ومره وصلت اظاهر 20 يورو

المهم يوم دخلنا كومو بدت الشوارع الي رايح جاي صغيره ويمينك البحيره بس انت فوق جبل
وفي هالمسارين يمشي معك سياكل ودبابات ومنعطفات فلازم تركز وفيه اشارات مؤقته يصير فيه صيانه فيجبرونك تدخل على المسار الثاني تعكس

ووصلنا الفندق اظاهر الساعة 11 وكان تسجيل الدخول الساعة 2 لكنهم ماقالوا شئ وكان كل شئ جاهز ومتعاونين وبشوشين وانا كنت ماخذ فكرة سيئة عن الايطالياً بسبب سمعتهم وسمعت الديرة


هذي اطالالة الغرفة .. خذنا لنا غطة ابو ساعتين ترريحة عقب الرحلة والخط
ثم طلعنا نتمشى في المدينة ونشوف وش علومها .. كنت متصور انك تمشي وتوقف سيارتك على اي رصيف
طلع فيه مواقف منتشره في المدينة طبعاً بفلوس والقريب زحمة واوقات ادخل مع طرق الناس تمشي فيها ضيقة والجي بي اس يقول طريقك صح لحسة مخ

في النهاية حطيت موقع مواقف ثاني على اساس انه ابعد من الاول وطلع قريب
لان المدينة اصلا صغيرة لكن الخريطة مكبرتها وقلت ليتني موقف من زمان في هذي المواقف بدال الفرفره
نظام المواقف تحصل في الشارع لوحة مكتوب بالازرق P وبعضها مكتوب تحتها كلمة بالاخضر معناتها متاح
تاخذ ورقة وبالساعة وقبل لا تطلع فيه مكينة تحت في المواقف تسدد وانت طالع تحط الكرت تفتح البوابة

المكينة ماتقبل اكثر من 50 يورو عملة ورقية لكن تقبل بطاقة <<- ماكان معي فكه بس 100 يورو وابيهم يفكون لي في النهاية استخدمت البطاقة

كان وسط المدينة الدومو زحمة لانه صادف عطلة الكريسمس وحاطين اضاءه على الكنيسه والمباني الي جنبها عالم.. وقلنا بنجرب مطعم ممدوح لنا في هالساحة ودخلنا بنطلب لنا شئ يشبعنا ويدفينا

العالم اغلبهم شراب وانا دايخين نبي ناكل ونزبن من البرد
جاب المنيو ندور شورة ؟؟ قال مافيه واستغرب يوم سالنا
في الاخير طلبنا بيتزا وسلطة سيزر ومكرونه وكانت اول وجبه فعليه من ايطاليا

احس اني كثرت كلام .. خلني بكره ان شاء الله اكمل لكم باقي السوالف عشان لا اقلب راسكم ... يالله نراكم على خير

 


توقيع : ATL

اللهم لا تجعل في قلوبنا غلاً للذين آمنوا
ATL غير متواجد حالياً   رد مع اقتباس
غير مقروء 03-01-2018, 11:51 AM   #2

مراقبة العرب المسافرون

الصورة الرمزية الايمان
 
تاريخ التسجيل :  Dec 2014
رقم العضوية : 331
الدولة : الكويت
الجنس : انثى
المشاركات : 6,253



أوسـمـة: الايمان
وسام الحضور المميز


مـجـمـوع الأوسـمـة:1 (الـمـزيـد»)
افتراضي

بدايه رائعه للتقرير
بانتظار التكمله وياريت تزيد عدد الصور عشان نعيش معاكم اجواء الرحلة

 

الايمان غير متواجد حالياً   رد مع اقتباس
غير مقروء 04-01-2018, 05:02 AM   #3

المدير العام

 
 
تاريخ التسجيل :  Dec 2014
رقم العضوية : 15
المشاركات : 16,156



افتراضي

وعليكم السلام
حوسه البوابات اذا مو مأخذ فكره عنها

الاطلاله تنسيك التعب


متابعينك

 

توقيع : فيصل

الْحَمْدُ لِلَّهِ الَّذِي بِنِعْمَتِهِ تَتِمُّ الصَّالِحَاتُ

معرفاتنا بوسائل التواصل الإجتماعي


فيصل غير متواجد حالياً   رد مع اقتباس
غير مقروء 04-01-2018, 09:44 AM   #4

مشرف المغرب و دول اوروبا الاخرى

الصورة الرمزية Haksa77
 
تاريخ التسجيل :  Dec 2014
رقم العضوية : 395
الدولة : K.S.A
الجنس : ذكر
المشاركات : 6,997



أوسـمـة: Haksa77
وسام الحضور المميز


مـجـمـوع الأوسـمـة:1 (الـمـزيـد»)
افتراضي



وعليكم السلام
بداية موفقة ورائعة
الإطلالة كلام ثااني ماشاء الله
متاابع ووياك يالغاالي
شكراً لك بحجم السماء

 

توقيع : Haksa77

يلومني فيك ي المغرب
من لا عذرنا ولا شافك
جاهل ومسكين مستغرب
محروم من روعة أطيافك

Haksa77 غير متواجد حالياً   رد مع اقتباس
غير مقروء 04-01-2018, 09:57 AM   #5

مشرفة امريكا و ايطاليا

 
 
تاريخ التسجيل :  Dec 2014
رقم العضوية : 96
الدولة : البحرين
الجنس : انثى
المشاركات : 2,138



أوسـمـة: منيرة
وسام الحضور المميز


مـجـمـوع الأوسـمـة:1 (الـمـزيـد»)
افتراضي

باين تقرير ابداع بالانتظار

 

منيرة غير متواجد حالياً   رد مع اقتباس
غير مقروء 04-01-2018, 03:06 PM   #6

نائب المدير العام

الصورة الرمزية آخـــرفـــرصـــة
 
تاريخ التسجيل :  Dec 2014
رقم العضوية : 16
الدولة : فضاء العرب المسافرون
الجنس : ذكر
المشاركات : 20,110



افتراضي

ما شاء الله بداية رائعة في سرد احداث الرحلة
توقيت جميل لزيارة ايطاليا كيف كانت الاجواء ؟
المواقف حوسه في ايطاليا لكن استئجار سيارة ضروري للمتعة
و حلو انك اعتمدت على سكست لانها شركة محترمة

اطلالة الفندق رائعة بس ايش اسمه ؟

كيف كان تعامل الايطاليين ؟
متشوقين لتفاصيل الرحلة

 

فيصل, توبليرون, Haksa77 و 1 آخرون معجبون بهذا.

توقيع : آخـــرفـــرصـــة



لا أكتب الا في شبكة و منتديات العرب المسافرون

آخـــرفـــرصـــة غير متواجد حالياً   رد مع اقتباس
غير مقروء 04-01-2018, 03:06 PM   #7
ATL

مسافر جديد

الصورة الرمزية ATL
 
تاريخ التسجيل :  Mar 2015
رقم العضوية : 2301
الدولة : المملكة العربية السعودية
الجنس : ذكر
المشاركات : 96



افتراضي

أولاً اشكر مروركم الكريم على الموضوع والرد وأعتذر عن التعقيب على الردود عشان ماينقطع حبل أفكاري في السرد مع كامل الود والتقدير

ثانياً أعتذر عن الاخطاء الاملائيه بسبب الاستعجال في الكتابة
ثالثاُ: بالنسبه للصور للاسف اغلب التصوير يكون فديو ولا صور بالسناب وتكون من باب مشاركة الاهل والاصدقاء باللحظات


نستكمل أ؛داث السفره، طبعاً رجعنا للسيارة وقلنا نمر سوبر ماركت نتقضى لنا خفايف ومويه
وبحثنا الا فيه كارفور واظاهر انه هو اشهر سوبر ماركت عندهم

الزبده وقفنا الموتر وبدينا رحلت البحث واول مادخلنا الا قسم الخضار وكل سفره لنا نمر محل خضار لازم ناخذ من عندهم (فندي ، يوسفي، يوسف افندي، اخو البرتقال )

الزبده النظام اخدم نفسك بنفسك حتى الميزان، ونعبي كم حبه وتورطنا اشلون نحط التسعيره وحاولنا نراقب الي قبلنا وش يسوون في الجهاز لكن للاسف هو عباره عن ميزان الكتروني وفوقه زي اللوحه فيها ارقام الى 33 تقريباً

كل واحد يحط الخضار او الفاكه ويضغط الرقم ويطبع له السعر والوزن
واناظر الخضره الا كل نوع فوقه كلام وسعر ورقم وقلنا نجرب بعض الارقام
مرتين كل مره يطلع لنا سعر غير سعر الكيلو المسجل

في الاخير ام محمد قالت جرب هذا الرقم ونجرب الا ضبط وتنفسنا الصعدا مشتهين الفندي وقتها

ثم جلسنا ندور خبز طبعاً كل مرحله نشوف اهل الديره وش يسوون ونقلدهم
المشكله اهل الديره يشترون خبز بالكيلو بعد والمشكله ناشف مدري وش يحبون فيه زي الخبز الفرنسي لكن اشكال واحجام

الى ان فتحنا عيونا وحصلنا قسم ثاني حق خبز توست وصامولي، وخذنا مويه
الشاهد جينا نحاسب .. وحاسبت الا ادور كيس بعبي اغراضي !!
واسالها وتطلع لي وحده من تحت .. انا قد سمعت انهم يحسبونها بفلوس بس ماجاء في بالي لكن ذولا يعطونك اذا طلبت ... وفي ميلان عطونا كين نايلون قلنا لهم نبي كيس ورقي احلا شكل عشان هديه قال لا هذا بفلوس

ورجعنا للفندق ميزته عنده مواقف خاصه فيه مجانية واطلاله مباشره على البحيره لكن يبعد عن مدينة كومو تقريبا 20 الى 30 دقيقة وسعره يناسب فندق حق ليلة نوم بس
لكن عيبه اثاثه قديم وكان بررد التدفئة فيه وسط ..
Ristorante Hotel Villa Belvedere

يوم اصبحنا نزلنا نفطر طبعا اغلب فنادق ايطاليا الي تعاملت معهم الفطور ينتهي على 10.30 الى 11 اخر شي

الفطور كان بسيط جداً جبن عسل مربى فواكه كورنفلكس بيض مسلوق او مفيوح الي تسمونه كوروسان
تبي اومليت تدفع زياده .. اطلالة مطعمهم راايق ومودرن واجهه قزاز كامل على البحيره

الصوره من قوقل لتوضيح الصورة

رتبنا شنطنا عشان نسجل خروج ونمر عاد المطل على البحيره ثم نروح للبندقية
واستعدينا للرحيل .. لكن فيه شئ نسيت اقول لكم عنه يمكن تضحكون

أم العيال راعية قهوة عربية وقبل لا نسافر مرتبه العده ومتحمسه ومجهزه الترمس والمعاميل والتمر السكري المجروش

الشاهد تقهوينا في الطيارة وكيفنا .. وعاد يوم جاء صباح طلعتنا من كومو عشى اساس بتضبط لنا قهوة عشان الخط طلع الفندق مافيه غلايه
وش الطريقه ورانا خط ثلاث ساعات وحسوفه القهوه وطلع ناسين غلايتنا ماجبناها الحين وش السوات !!
المعزبه الا تبي قهوه قالت قلهم يصلحون لنا عطهم الطريقه ولا قلهم انا بصلحها ..

والله واروح على استحياء واشوف لي ذاك الخال الشقردي واساله وحاولت افهمه وراح كلم الشيف حق المطبخ وقال ولا يدخلون زينها لهم في البار زي مكينة الكبتشينو اخترع
وفيه موظفة الريسيبشن حاولت في الشيف لكنه مصر مافيه مالكم الا البار وقالت للخال الشقردي ضبطهم

والله يطلع لنا بريق ويحط لنا فيه مويه حاره شوي وحطينا القهوه وجلس ماسكها يسخنها بالبخار شوي شوي
لوني مكانه قلت له توكل على الله ذي شغلانه .. لاكنه شقردي جعل ربي يهديه ويسلم
وفي النهايه طلعنا بقهيوه مقبوله تنشرب

وانطلقنا للمطل فيه له طريقتين عشان تطلع له
يا قطار مخصص للمطل ولا تطلع له بالسياره وفيه مواقف فوق



انا قلت بروح بالسياره ودي اتمشى في الديره ومره طلعت بالتلفريك في تركيا وتحسفت قلت ليتني مشيت بسيارتي احلا

لكن هالمره تحسفت لان ايطاليا شوارعها وسخه تخيل تطلع جبل بشارع رايح جاي مايتحمل الا سيارتين وبعض الاماكن سياره وحده وفيه منعطفات خطره جداً ومافيه حاجز الحاجز شجر وحاطين ماصورتين يقالهم حمايه وهي لاتغني ولا تسمن من جوع

يوم طلعنا فوق فيه مواقف على حظنا كانت مجانيه لانه يوم السبت او الاحد
,فيه مقاهي تطل على البحيره من فوق الجبل المنظر جميل وانت تشوف الجبال والبحيره

ماطولنا ثم انطلقنا الى البندقية فينيسيا بلد العشاق على قولتهم



وصلنا للجسر المتصل بالبندقية طبعا اذا قربت توصل بينتهي الطريق بمسارين وفيه لوحات للمواقف كاني منيب واهم اذكر اني مسكت اليسار ووصلني لاقرب مواقف

لكن فيه واحد كان مقفل والثاني ما انتبهت له فدخلت لهذي المواقف
Garage San Marco Venezia
واتوقع انهم موحدين السعر للمواقف القريبه .. هي عباره عن مواقف ادوار اول ماتدخل من البوابه يستقبلك واحد يعطيك ورقه ويقولك اي دور تروح له .. واذا وصلت للدور بتحصل واحد ثاني يستقبك يسالك كم بتجلس ويسجل على الورقه شئ مدري وش

لكن من خلال اطلاعي عن المواقف انهم يقولون لك خل مفتاح السياره في السياره اذا نزلت لان احتمال انهم يحركونها في اوقات الزحمه ويرصون السيارات قدام بعض، بس على وقتي كان فيه مجال ولا قالوا لي شئ

وصولنا كان على المغرب وبرد ومعنا ثلاث شنط
ادري ان كل من راح يحذر من كثرت الشنط بس وش نسوي خفت اخلي شئ في السياره
وقلت باخذ تاكسي اسرع ويوصلني للفندق مباشرة وكنت متوقع ان الفندق له باب على القناة المائية لكن طلع هو يطل على قناة صغيره لكن ماله باب ولا تدخل التكاسي مثل هالممرات



طبعاً التاكسي مكتوب لوحة انهم موحدين السعر لكن يمكن في المواسم الميته انك تكاسرهم
واذا انت منتب مستعجل ولا وراك شئ بينزلون لك

انا خذت التاكسي الى وسط المدينة القديمة ب 60 يورو .. طبعاً موقف التاكسي جنب موقف الباص مكتوب عليه TAXI


الحساب كاش مافيه بطاقة

وصلني لاقرب موقف باص جنب الفندق وانا اختياري للفندق كان جنب موقف الباص دقيقتين مشي الا انا عند الفندق

الجندول ماتقدر تاخذه من مواقف المطار او مواقف التاكسي له مواقف خاصه حول المدينة وكل موقف له جوله خاصه فيه، انا غلطت واستعجلت وخذت جندول جنب الفندق وخذ بي لفه في الممرات المائية لكن توقعته بيوديني لجسر التنهيدات وجسر مدري وين لكن طلع بس يلف للممر المائي الي حول موقفه



ادري خشيت عرض بسالفة الجندول بس لاني كنت اسال عنها هل الجندول يوصل من المطار للفندق بحيث اخذه مره وحده ياخذ بي جوله ويوصلني للفندق ولا لا

طلع مايوصل زي ماقلت له جولات مدوده وحده تقريبا 30 دقيقه واشك اتوقع اقل ما حسبتها وفيه اطول لكن اغلب العالم ياخذون ام 80 يورو الي هي 30 دقيقة
وحتى الجندول قابل للمكاسر وبيقولك السعر موحد وبيوريك لوحه لكن في غير المواسم واذا شافك صامل بيقولك تعال انا خذته ب 60 يورو مرتين ومن منطقتين مختلفه لكن ماركبته الا مره وحده لان المره الثانيه ماكان معي كاش وقال ما اقبل الا كاش



ونكتفي بهذا القدر اليوم ونكمل لكم ان شاء الله بكره ولا بعد جولتنا في البندقية وتصوري عنها
نشوفكم على خير

 

توقيع : ATL

اللهم لا تجعل في قلوبنا غلاً للذين آمنوا
ATL غير متواجد حالياً   رد مع اقتباس
غير مقروء 05-01-2018, 02:07 AM   #8

نائب المدير العام

الصورة الرمزية آخـــرفـــرصـــة
 
تاريخ التسجيل :  Dec 2014
رقم العضوية : 16
الدولة : فضاء العرب المسافرون
الجنس : ذكر
المشاركات : 20,110



افتراضي

خذ راحتك و رد وقت ما تحب عشان ماينقطع حبل الافكار

يا سلام على اطلالة المطعم خطيرة
اما كيف القهوة العربية ما له حل بس لو اشتريتوا غلاية صغيرة من المحلات

اسعار الجندولا احسهم مبالغين فيها

متابعين ومستمتعين

 

فيصل, توبليرون و Haksa77 معجبون بهذا.

توقيع : آخـــرفـــرصـــة



لا أكتب الا في شبكة و منتديات العرب المسافرون

آخـــرفـــرصـــة غير متواجد حالياً   رد مع اقتباس
غير مقروء 05-01-2018, 02:52 AM   #9

مراقب العرب المسافرون

الصورة الرمزية فارس من خيال
 
تاريخ التسجيل :  Dec 2014
رقم العضوية : 54
الدولة : K.s.a - الرياض
الجنس : ذكر
المشاركات : 3,584



أوسـمـة: فارس من خيال
وسام الحضور المميز


مـجـمـوع الأوسـمـة:1 (الـمـزيـد»)
افتراضي

بداية رائعه للتقرير وياليت تكثر من الصور
فعلا اسعار الجندول مبالغين فيها

متابعين للاخر

 

فيصل, توبليرون و Haksa77 معجبون بهذا.
فارس من خيال غير متواجد حالياً   رد مع اقتباس
غير مقروء 05-01-2018, 01:47 PM   #10
ATL

مسافر جديد

الصورة الرمزية ATL
 
تاريخ التسجيل :  Mar 2015
رقم العضوية : 2301
الدولة : المملكة العربية السعودية
الجنس : ذكر
المشاركات : 96



افتراضي


وعليكم السلام
حوسه البوابات اذا مو مأخذ فكره عنها
الاطلاله تنسيك التعب
متابعينك
هي سهله بس لخمه فجاءه تطلع لك ولا تدري وين تروح معه
وعلى قولتهم ياغريب كن اديب تخاف تغلط ويستقعدون لك


ما شاء الله بداية رائعة في سرد احداث الرحلة
توقيت جميل لزيارة ايطاليا كيف كانت الاجواء ؟
المواقف حوسه في ايطاليا لكن استئجار سيارة ضروري للمتعة
و حلو انك اعتمدت على سكست لانها شركة محترمة

اطلالة الفندق رائعة بس ايش اسمه ؟

كيف كان تعامل الايطاليين ؟
متشوقين لتفاصيل الرحلة
والله الاجواء انا ماعندي مشكلة مع البرد ينصبر عليه ومجربه قبل بس أهم شئ يكون فيه مطر ولا ثلج
المشكلة على حظي ماجانا ثلج ولا مطر الا اخر يومين كل الايام شمس صحو ولا حتى سحابه وحده

واستئجار السياره على قولتك ممتع ومريح التنقل فيها لكن الايطاليين عندهم حركة هالمواقف الي باليوم كامل ومافيه مواقف في اي مكان لها اليه مافهمتها الي لون الخطوط ازرق والي ابيض والاصفر
والشوارع ضيقة يالله تاخذ سيارتين فاغلبها السكان ماخذينها
لكن حلاتها ماتكون مربوط بوقت رحله تحرك متى ماتبي وتوقف وين ماتبي وتغير طريقك على مزاجك


خذ راحتك و رد وقت ما تحب عشان ماينقطع حبل الافكار
يا سلام على اطلالة المطعم خطيرة
اما كيف القهوة العربية ما له حل بس لو اشتريتوا غلاية صغيرة من المحلات
اسعار الجندولا احسهم مبالغين فيها
متابعين ومستمتعين
قلنا بنشتري غلايه بس في كومو مافيه وقت ندور وصرنا كل ما نروح فندق نحصل غلايه نصلح فيها


بداية رائعه للتقرير وياليت تكثر من الصور
فعلا اسعار الجندول مبالغين فيها

متابعين للاخر
للاسف الصور زي ماقلت قبل اغلبها سناب فاحاول احط الي عندي ولا اجيبها من قوقل

سعدت بطلتكم

 

فيصل, توبليرون و Haksa77 معجبون بهذا.

توقيع : ATL

اللهم لا تجعل في قلوبنا غلاً للذين آمنوا
ATL غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
شهر عسل ميونخ+ ميلان Sauud991 استفسارات البوابة السياحية 3 31-12-2017 04:29 AM
ميلان - سويسرا e7sas_ra8i استفسارات سويسرا 10 18-07-2017 10:31 AM
رحلة الى ميلان Tariq.Saud بوابة السفر الى ايطاليا ITALY 7 24-04-2017 10:34 AM
فنادق ميلان aroosh بوابة السفر الى ايطاليا ITALY 19 20-11-2015 06:52 PM
من ميلان إلي جنيف ؟؟؟ y3goob1 بوابة السفر الى ايطاليا ITALY 1 04-08-2015 11:29 AM