|
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) انا رحت لقريه الأعناق الطويله حرام والله يكسرون الخاطر احسهم مزنووووووطين اي جمال هذا اللي يحبسون فيه رقبه المرأه بحلقات حديد وعلى فكره حتى للقدم يحطون :(7): وعنهم مشغولات يدويه حلوة يعرضونها واغلبهم مسلمين حسب ما بلغنا قائد الرحلة يومها حلوة للزيارة مرة بس متابعتك ،،،،،،، |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) اقتباس:
صحيح قرية الاعناق الطويلة هم اللي يحطون حلق في ارقابهم الين تصير طويلة .. ما ادري من لاعب عليهم وقايل ان هالشي حلو ! حياك اخوي طارق اقتباس:
تسلم وابشر باللي يسرك اقتباس:
اقتباس:
اقتباس:
مشكور اقتباس:
الله يعافيك وحقين الارقاب من شفت صورهم في بروشور الرحلات ما اعجبوني اشكالهم بايخه :(157): اقتباس:
ملعوب عليهم يابنت الحلال واعجبتهم الشله انها تجيب لهم سياح ودخل مادي ، اما جمال فما اظن :(59): مشكورين والجزء القادم عن بوكيت استعدوا |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) عدنا .. وصلنا لموعد السفر من شانق ماي الى بوكيت بعد ان قضينا فيها 4 ليالي كانت موفقه ولله الحمد ... بوكيت وصلنا بحمد لله وقوته الى جزيرة بوكيت بعد رحلة طويلة بعض الشيئ حدود الساعتين .. لبعد المسافة بين شانق ماي في الشمال وبوكيت في الجنوب .. جزيرة بوكيت تعد من افضل الجزر في العالم لنظافة شواطئها وصفاء مياهها وكان لها نصيب الأسد من عدد ايام الرحلة 6 ايام تقريباً وفضلت اقسمها لقسمين .. قسم عبارة عن ليلتين في منتجع موفنبيك في شاطئ الكارون وقسم 4 ليالي في فندق الهولدي إن في شاطى الباتونق الغرض من التقسيم ان المدة طويلة ومنطقة الباتونق على ما سمعت عنها انها مليانه سياح وصجه ولجه شوي فقلت اخلي يومين للاسترخاء والباقي اروح للباتونق .. طلعنا من المطار وتوجهنا بالتاكسي لفندق الهولدي إن مقر اقامتنا ... مدخل الفندق جميل .. وشكل اللوبي مميز .. استقبلونا الجماعة استقبال جميل كعادتهم وعطيناهم فوشرات الحجز وقالوا حظكم زين .. قلنا الحمد لله بس وش السالفه ؟؟ قالوا غرفتكم غير جاهزة الحين لذلك راح نعطيكم غرفة افضل من حجزكم واكبر .. قالوا انتظروا شوي الين تجهز الغرفه وودونا للكوفي وقالوا اطلبوا على حسابنا واخذنا قهوه وانتظرنا الى ان جهزت الغرفة ... طبعاً حجزي كان بسعر 410 ريال لليلة مع افطار الفندق موقعه ممتاز يعني تطلع وتلقى البحر قدامك ومن الجهة الثانيه تلقى الشارع الموازي للشاطى كله محلات ومطاعم عربية ومكاتب سياحية وكل شي .. لما دخلنا الغرفة صراحة ما توقعناها بهالفخامة والجمال .. وحمامها تكرمون غرفة لحاله ومعها بلكونه كبيرة مطلة على المسبح .. وهذي صور الغرفة وهذا الحمام (تكرمون) وهذي البلكونه مع اطلالتها على المسبح ارتحنا شوي ورتبنا اغراضنا وقلنا نطلع شوي نستكشف المكان ومنها نحجز برنامج مسائي عشان نستغل باقي اليوم ونحجز حق الايام الجايه رحلات .. البرنامج المسائي بكل تأكيد بيكون الذهاب لعرض الفنتازيا (FantaSea) الغني عن التعريف واللي راح اتكلم عنه ان شاء الله .. رحت اللوبي ابشوف سعر الفنتازيا واقارنها بالسعر خارج الفندق واللي دايم ما يكون ارخص .. وطلع سعرها موحد من الشركة نفسها واخذتها بدون عشاء عروض فقط مع التوصيل ذهاب وعودة ومقاعد ذهبية بـ 1650 بات للشخص تقريباً 182 ريال تقريباً . بالنسبة للمقاعد الذهبية هذي يكون موقعها ممتاز وفي وسط مسرح العرض .. وراح اتكلم عنها بتفصيل اذا جاء وقتها .. طلعنا نستكشف المكان ومرينا الشاطئ ( الباتونق) .. طبعاً نظامه العاب بحرية واكشنه وعالم زي النمل بعكس شاطئ الكارون اللي فيه هدوء واسترخاء وخالي من الالعاب البحرية .. لقطات من الشاطئ بعدها اخذت لفة في الشارع الخلفي للفندق وماشاء الله كل شي تبيه موجود ومتوفر واخذت فكره عن بعض المطاعم العربية الموجودة وعن المحلات بشكل عام .. المهم فيه مكتب سياحة وسفر في نفس هالشارع اسمه (سارة) سمعت عنه من واحد من الشباب وقالي ان صاحبه شخص اماراتي فقلت نروح نحجز منه بحكم انه عربي ومنا وفينا وناخذ راحتنا في الكلام .. لقيت المكتب ودخلت عنده وما قصر الرجال قعد يشرح لي عن الرحلات ودردشت معه شوي وحجزت من عنده على ثلاث رحلات اللي هي : - رحلة الى جزيرة جيمس بوند - رحلة الى الرافتينق - رحلة الى جزيرة بي بي ايلاند شاملة السيارة من والى الفندق مع وجبة غداء وعصيرات وفواكه وماء وشاي وقهوة واتفقنا على اوقات الرحلات ومتى تجي السيارة وغيرها .. وراح اتكلم عن كل رحلة بالتفصيل ان شاء الله .. وبالنسبة للمكتب للامانه زيه زي غيره يعني ماشفت فيه فرق الا انه اخ عربي بس .. وهذي صورة للمكتب طلعت بعدها من عنده ورحت اشتري بعض الاغراض واللي انصح الجميع بها في رحلات بوكيت ... وهي: • كريم واقي من الشمس للوجه وللجسم لانه في يوم واحد بيقلب جسمك اسمر وممكن تحس بحرق وحرارة في جلدك • كاب او أي شي تغطي به رأسك من حرارة الشمس لانك بتتعرض للشمس وقت طويل في القوارب • ملابس بحر من شورتات سباحة وبنطلونات برمودا وفوطة وشبشب • نظارة شمسية • كاميرا تصور تحت الماء (اذا امكن) لان فيه غوص وممكن تفيدك في الامكان اللي تتعرض فيه للماء غصب عنك .. ومثل هالنوع من الكميرات يصلح تحت الماء وللتصوير العادي بعد .. بعد ما رتبت نفسي للرحلات رجعنا للفندق للاستعداد للفنتازيا واللي يبدأ الساعة 9 مساءً عروض الفنتازيا (FantaSea Show) هي عبارة عن مدينة ترفيهية فيها مسرح للعروض ومحلات لبيع الاشياء التذكارية ومطعم كبير .. واللي يهمنا هي العروض .. هي عبارة عن عروض في مسرح مغلق وكبير .. وتحكي قصة التراث التايلندي على مر العصور وتعتمد العروض على الليزر والاصوات واستخدام الحيوانات في التمثيل مثل الفيلة والنمر والماعز والدجاج وغيرها .. وبصراحة عروض ممتعة جداً يعني فيها اتقان عجيب من قبل الانسان والحيوان والاخراج عالمي .. استمتعنا فيها وراح الوقت في غمضة عين .. تبدأ الساعة 9 مساءً ومدة العرض تقريباً ساعة وربع .. هذي بعض الصور لمكان قص التذاكر وللمكان قبل الدخول للعروض .. للاسف ان الكاميرا بجميع اشكالها ممنوع دخلوها للعرض ’ ويستلمون منك أي كميرا سواء فيديو او ثابت ويعطونك رقم واذا طلعت من العرض تستلم كميرتك .. حتى الاكل والشرب ممنوع تدخل به .. وتنظيمهم مميز في الدخول والخروج واستلام الكميرات .. بعد ما انتهى العرض طلعنا نتمشى شوي في المكان وشرينا بعض الاشياء التذكارية ولقينا الباصات تنتظرنا برا وكل شي منظم وكل شخص يتجه للباص اللي جاء معه ويشيكون على الاسماء والفنادق قبل لا تركب يعني شغل نظيف .. ورجعنا للفندق بعد قضاء ليلة ممتعة مع عروض الفنتازيا اللي انصح بزيارتها لاي شخص يجي جزيرة بوكيت .. من بكره راح تبدأ اولى الرحلات البحرية وهي رحله الى جزيرة جيمس بوند |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) جزيرة جيمس بوند James Bond Island اسمها المحلي (Koh Tapu) وسميت بجزيرة جيمس بوند لان الممثل البريطاني ( Roger Moore ) صور فيها فيلم "The Man with the Golden Gun" عام 1974م فاشتهرت بهالاسم .. سعر الرحلة للشخص : 1700 بات (189ريال) انطلقنا صباحاً لرحلة جيمس بوند .. اخذنا الميني باص مع بعض السياح لموقع التجمع في الميناء ومنه تنطلق السفن للرحلات السياحية .. وصلنا واستقبلونا ووجهونا للمركب اللي بتكون عليه الرحلة وجلسنا ننتظر الين اكتمل العدد وفي هالفترة متاح لك الشاي والقهوة والماء والعصيرات .. بعدها بدا يتكلم المسؤول عن الرحلة ويشرح لنا خطة السير ويورينا على الخريطة وين بنروح وعطانا كل التعليمات عن الرحلة وانطلقنا على بركة الله والاجواء مشمسه شوي مع بعض الغيم وهذي صورة للسفينة من الداخل طبعاً ما يعيب الرحلات البحرية من وجهة نظري هي طول المسافة يعني لو تحسب الرحلة كاملة يمكن اكثر من نصفها في الطريق للجزر روحه ورجعه ... صحيح المناظر حلوة لكن يحس الواحد بالملل شوي .. خاصة ان الجو مشمس بشكل عام واوقات الرحلات في عز النهار .. المهم واحنا في الطريق مرينا ببعض الجزر الصغيرة إلى ان وصلنا للمحطة الأولى وهي عبارة عن جزيرة فيها كهوف وراح نركب القوارب المطاطية لدخول الكهوف والوصول لمنطقة في وسط الجزيرة طبعاً كل قارب فيه شخص يقوده ويقدم بعض المعلومات عن الجزيرة وراكبين فقط لانه صغير وطويل عشان يساعده في دخول الكهوف .. توقفت السفينة وبدوا العمال ينزلون القوارب المطاطية وركبنا باتجاه الكهوف وهذا تبع الشركة قاعد يصور الناس عشان اذا رجعنا من الرحلة يعرضون علينا الصور مطبوعه وبالبرواز للبيع ولك الخيار في الشراء .. قعدنا نتجول في المكان صراحة طبيعة رائعة يعني جبال صخريه اشكالها غريبة وكلها اشجار وبعدها توجهنا للكهوف .. وبلغونا ننزل باجسامنا لتحت لان الالمكان ضيق وفيه ممرات السقف قريب جداً بعهدها طلع المكان ظلااام واعطونا تريك مع كل قارب عشان نشوف الطريق ونشوف التكوينات الصخرية العجيبة .. ومرينا بأحجار كرستاليه تطلع انعكاسات حلوة مع الاضاءة ... بعدها طلعنا لمكان بين الجبال وتوجهنا لمكان ثاني والمكان مليان سياح من رحلات ثانية وصاير المكان كلها زحمه بالقوارب المطاطية بس كان الجو حلو بين الجميع والكل مبتسم بعدها رجعنا للسفينة وتوجهنا لجزيرة جيمس بوند وصلنا لجزيرة جيمس بوند وصراحه المكان زحمة زحمة بالسياح يعني الواحد ما ياخذ راحته في التصوير او التمشي .. اول ما وصلنا للمكان لقينا هالسوق الصغير يبيعون فيه اشياء يدويه وشغلات كثيرة وفيه حجر كبير منقص من الجبل شكله غريب بس ما قدرت اصوره زين من زحمة السياح وهذي صخرة جيمس بوند اللي قفز نها في الفيلم :(37): .. جلسنا في المكان يمكن 30 – 40 دقيقة وبعدها مشينا من المكان توجهنا لجزيرة ثانية وراح يكون فيها دخول في الكهوف بالقوارب المطاطية .. هذي صورة العمال نزلوا القوارب من السفينة مشينا لاول كهف وطلع ضيق مره وزحمه عنده والحمد لله عدينا هالمنطقة الضيقة بس فيها متعه ومغامره ووصلنا لمنطقة وسيعه بين الجبال بعهدها طلعنا من المكان وشوفوا الزحمه في المكان ههههه وهذي صورة السواق حقنا الله يذكره بالخير .. من مواليد هالجزر اللي سكانها مسلمين يعيشون على الصيد والسياحة عدها قدموا لنا الغداء في السفينه عباره عن بوفيه بسيط فيه رز ودجاج وسمك وفاكهة ومشروبات وبعد الغداء شربنا الشاي والقهوة الى ان وصلنا للمحطة الاخيرة وهي جزيرة راح نتوقف فيها للسباحة والاسترخاء تمشينا شوي في الجزيرة .. فيها كشك صغير ودورات مياه (تكرمون) تدخلها بفلوس يعني تدفع 20 بات ويعطونك مناديل وتدخل .. لكن من جوا رايحه وطي يعني تتحسف انك دخلتها لكن ربك يعين ههههه http://www.sfari.com/forums/images/smilies/075.gif لقيت الشباب التايلنديين اللي معنا في القوارب يلعبون لعبة تايلنديه عباره عن كوره من الخشب يتناقلونها بينهم بالرجل بدون ما تطيح على الارض ودخلت معهم اطقطق شوي وانواع الضحك :(47): وفي النهاية صارت رجلي حمراء هع هع ما ادري كيف يلعبون بها !! بعدها انتهى الوقت المحدد وركبنا السفينة ورجعنا بعد رحلة ممتعة ومنوعة ومرهقه في نفس الوقت لانها من الصبح إلى المغرب وراح اتوقف هنا والجزء القادم ان شاء الله عن رحلة الرافتنق في جبال بوكيت ومافيها من مغامرات وتجارب الى اللقاء |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) هلعتني على هالرحلة مامريتوا على جزيرة المسلمين كوه بانيي مفروض من ضمن الرحلة البحرية بعد أسبوع طلع لكوه بانيي |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) بصراحة الفندق روعة وسعره مناسب جدا يعيك العافيه اخوي فهد |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) اقتباس:
يا هلا فيك مرينا مرور سريع على مكان قالوا ان سكانه مسلمين وعايشين على الصيد وصراحة ما ادري هل هي نفس اللي ذكرت او لا . |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) اقتباس:
الله يعافيك .. والفندق رائع وموقعه مميز وسعره فيه .. |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) اجمل شي عجبني في بوكيت رحلة الرافتنغ والانشطة اللي فيها في انتظار انطباعك عنها تحياتي |
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) احس ان االلي ما يحب البحر بيمل واسعارهم اعجبتني 6 ايام هل هي مناسبه |
| الساعة الآن 05:10 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO