|
و هكذا خاب ظني في الخطوط الاماراتية بسم الله الرحمن الرحيم مساء / صباح الخير جميعاً طبعاً ... الكل يمدح الخطوط الاماراتية .. مو بس في المنتدى .. الا حتى في الواقع حتى في الاستطلاعات و التقييمات العالمية ... دايما الاماراتية تحصل اعلى المستويات و اوائل المراكز و ابدا ما صادف إني أحجز عليها ... الا في الاجازة اللي فاتت ..... و للأسف خاب الظن و خابت كل التوقعات نبدا من أول خطوة .. صار عندي سفر سريع لدبي لمدة 3 أيام أنا و عيالي ... ولدي 6 سنوات و بنتي سنتين الله يحفظهم زوجي هناك كان عنده شغل و قلنا نروح له نغير جو بالويكند الطويل دورت على ال Gulf Air و كانت كل الرحلات فل ... لاني يوم ادور الحجز كان يوم الثلاثاء بالليل و الرحلة اللي ابيها او الخمبس بالليل او الجمعة الصبح قلت فرصة اشوف الاماراتية و اشبع فضولي و اخيرا اركب طيارتهم و استمتع بخدمتهم كان سعر التذاكر لنا ثلاثتنا الذهاب الجمعة الصباح الساعة 9.50 بتوقيت البحرين و العودة الأحد بالليل الساعة 8.55 بتوقيت الامارات 356.800 دينار بحريني سويت الجيك ان يوم الخمبس ... و اخترت الكراسي اللي بالنص على اساس ان معاي اطفال و الدريشة اخر همي وقتها .. لان المسؤولية اللي عندي اهم ليلتها ما نمت لاني تاخرت بتجهز الشناط و الساعه 6 ونص الصبح بديت اتجهز و اجهز العيال و ولدي الصغير مع الشغالة وديتهم عند امي و رحت المطار وصلنا تقريبا الساعة 8 المطار و طبعا كان زحمة عشان الويكند الطويل مثل كل مرة البحرينين يدورون الاجازة عشان يسافرون خلصنا الاجراءات بسرعة ما عندنا الا شنطة و عربة بنتي الله يحفظها و بسرعة على البوابة المفروض 8.50 تفتح البوابة عشان الدخول للطيارة لكن لحد الساعة 9 ما اشوف احد واقف حتى عندها لما وصل الموظف سألته هذي بوابة الاماراتية رحلة دبي ... قال اي .. بس الطيارة للحين ما وصلت من دبي و حتى اذا وصلت بنحتاج ننظفها قبل لا ندخلكم ... قلت له شلون يعني ... ابتسم و واضح ما بيده شي و قال ان شاء الله ما نتأخر وايد !!! قلت في سري .. أفا يالاماراتية ... هذا اولها ... يلا العوض بعدين خل نركب الطيارة و نشوف وركبنا الطيارة تقريبا الساعة 9 ونص .. و مع لوية اليهال ما حطيت بالي الساعة جم بالضبط طرنا بس أكيد تاخرنا عن الوقت الاصلي طلبت ماي لولدي .... قالت لي المضيفة اوكي .. و مشت و ما رجعت لي صواني الريوق كانت تقريبا تنرمي على صينية الكرسي ... و كنت انا بهدوء اعصاب مع ان داخلي ينفجر ارتب الاكل فيها لاولادي بس ما اكلوا منه الا التفاح .. فطور سيء و الاكل باااااااااااااااااااااااااااارد ... اغلب المسافرين اللي حولي يشتكون من خيارات الفطور مثلا روب بالمشمش ... من ياكله اصلا ... استغفر الله اهوه اكيد نعمة ... بس على الاقل يختارون شي يناسب اذواق الناس المختلفة و بالاخير وقت الشاي وزعوا الشاي على نص المسافرين و الباقي لا !!!! المهم وصلنا دبي بسلام ... و مع الوقت و الايام و الطلعات و الروحات و الجيات نسيت ارتب الكراسي للرجعة و ما تذكرت الا في يوم السفر الصبح الطيارة فل على الاخر و ما لقيت لنا كراسي يم بعض ... قلت ما عليه .. نروح المطار شوي من وقت عشان ارتب مع الكاونتر وصلت قبل موعد الرحلة ب ساعتين و ربع و رحت للكاونتر و شرحت للموظفة وضعي و قالت اصلا اللي واضح عندي كراسيكم يم بعض قلت يلا الظاهر انا ما انتبهت و رحنا عشيت العيال و بعدين على البوابة عند باب الطيارة المسافرة اللي جدامنا اغمى عليها و اضطروا يسكرون ممر دخول ال economy و دخلوا باقي المسافرين من ممر دخول ال بيزنس ولما دخلنا الطيارة ما شفت و لا مضيف او مضيفة مبتمسين طول الرحلة ... انا فاهمة ان الطيارة تاخرت حول الساعة تقريبا و السبب اغماء المسافرة و تنزيل شنطها بس المفروض احنا المعصبين مو اهم .. الطيارة كانت قذرة .. و ما ابالغ بالوصف .. فيه بقايا اكل في الممر .. فيه كيس اكل تحت كرسي ولدي .. و تحت كرسي بنتي كان فيه ملعقة / قفشة / خاشوقة .. معدن مو بلاستيك .. ما قدرت اخلي شنطتي على الارض .. خليتها على كرسي بنتي يمي المضيف المسؤول عن المنطقة عند كراسينا كان جدا سيء .. اول شي مثل ما شفت الكراسي ما كانوا يم بعض .. قلت له قال لي الطيارة فل ما اقدر اسوي لج شي ... و يكلمني بنفس خاااايسة كلمت مرة والله يجزاها خير تنازلت عن كرسيها و كرسي زوجها و قعدت أنا يم عيالي ... وراحت اهيه على الكرسي اللي كان المفروض يكون لي عند الدريشة .. اتمنى تكون تهنت فيه ... و الله يسعدها دنيا و اخرة بعدين جا الاكل ... مثل اول مرة ... بااااااارد و بلا طعم ... اكل المستشفيات احلى !!! كنت منقرفة و متضايقة و مزعوجة طول الرحلة و ان شاء الله ما اعود اكررها ابدا .... لا للاماراتية مافي التزام بالوقت .. مافي حتى اعتذار على التأخير الطاقم في الرحلتين - الذهاب و العودة كان اسوأ ما يمكن الهبوط في مطار دبي فاااااااشل اعتقد كثر ما جربت .. مافي على القطرية و كل شي في الدنيا له مساوئ ... لكن تبقى احسن طيراان جربته في حياتي و الله يرزقنا وياكم بسفر قريب ... آجل غير عاجل |
رد: و هكذا خاب ظني في الخطوط الاماراتية لولا الاذواق لبارت السلع ولولا الظروف فالكل مرتاح مادري عن وضع الطيارة برحلتكم انا جربتها كذا مره دايما كنا مرتاحين فيها والمضيفين ممتازين وكان عندي ولدي شوي سمين فكانوا دايما يسألونه عن اذا كان مرتاح والا لأ وكانت نفسيتهم حلوووة الله لا يراويج عيل مضيفين الطيران التركي والا البقاسوس ههههه نفسية بجد ودج تكفخينهم الأكل بالأماراتيه صح بارد وساعات الاطباق مو حلووه وان شاءالله تجربينهم في رحلات ثانية تغير نظرتج لهم شكراا لذكر تجربتج يام ريمه |
رد: و هكذا خاب ظني في الخطوط الاماراتية غريبة والله من خطوط مصنفة إنها من أفضل خطوط الطيران في العالم عموما مشكورة على ذكرك هذي التجربة وإن شاء الله ما تواجهينها مستقبلا ولو إن أغلب تقارير الأعضاء اللي سافروا عن طريق الخطوط الإماراتية كان مبسوطين الله يعطيك العافية |
رد: و هكذا خاب ظني في الخطوط الاماراتية الله يعوضك .. جربتي طيران الخليج او الطيران السعودي ؟؟ انا جربت القطرية السعودية افضل كرائي شخصي شكرا على ذكر تجربتك هولمز |
رد: و هكذا خاب ظني في الخطوط الاماراتية تجربه رغم صعوبتها الا أنها مفيده أعتقد أغلب شركات الطيران لا يولون الاهتمام الازم بالرحلات القصيره مشكوره أختنا على ذكر تجربتك |
رد: و هكذا خاب ظني في الخطوط الاماراتية تجربة قاسية وان شاء الله ما تمرون بمثلها وهناك خطوط افضل منها.,, كنت اسافر عن طريق الامارتية والامور كانت ماشية حلوة وكل شي تمام حتى حصلت مشكلة لي مع عامل من الجنسية البنقالية او الهندية يعمل بمطار دبي كنا راجعين من جنييف باخر الليل وارهاق سفر وننظر الصعود الى الطيارة المتجهه للرياض واغلب الناس الي معنا مرهقين من السفر .. العامل البنقالي السي الاخلاق نادى مرتين يعلن عن صعود الركاب الى الطائرة النداء الاؤل ما احد ركز عليه لان لغته الانجليزية غير واضحة لكن الندى الثاني تكلم وقال انتم بقر ما تسمعون يالله الطيارة راح بتطير بصراحة عصبت ورحت اتفاهم معاه ليش تتكلم بهالاسلوب ما تجاوب معي وحط الغلط علي وحاول يستفزني علشان اضربه ومعاه المضيفة تساعده على الغلط من الجنسية النيبالية او حولها الركاب كلهم دخلو الى الطيارة الا انا واهلي اصريت اننا نتوجه الى اقرب محكمة بدبي علشان يتادب ويحترم الجنسية السعودية لانه شكله حاقد بمعنى الكلمة .... دقايق معدودة وحضر المشرف التركي رجال محترم اخلاقه عاليه وضحت له المشكلة وانه البنقالي غلط على الجميع و تعامله سي بمعنى الكلمة دخلنا الطيارة واتجهنا الى مقاعدنا والى اليوم هاذا حذفت الخطوط الامارتية بكل انواعها ليس كره لاهل الامارات لكن للتعامل القذر الفردي من بعض العمالة الموجودة هناك ...... تبقى القطرية بنظري رقم واحد تعامل راقي والناس لها نظرة بمى تحب |
رد: و هكذا خاب ظني في الخطوط الاماراتية اول شي الحمدلله على سلامتكم اختي والله يكون بعونج معاج حق بالقي فلتيه تجربه صعبه وخاصه انها اول مره على الاماراتيه ودايما الانطباع الاول يدوم فتره طويله بس ترا ها الامور ممكن تصير بجميع الشركات والخطوط الاماراتيه معروفه من احلى وارقى شركات الطيارات العالميه واستغربت بصراحه من الي صار فيكم وان شاء الله سفراتكم القادمه تكون كلها مريحه وجميله تحياتي |
رد: و هكذا خاب ظني في الخطوط الاماراتية شكرا لذكر تجربتك الغير جيدة معوضه خير بسفرة اجمل وطائرة وتعامل افضل يعطيك العافية |
رد: و هكذا خاب ظني في الخطوط الاماراتية شكرا ع ذكر تجربتك معوضين خير في السفرات القادمة |
رد: و هكذا خاب ظني في الخطوط الاماراتية اقتباس:
للحين مو مصدقة قذارة الطيارة .. ملعب مو طيارة |
رد: و هكذا خاب ظني في الخطوط الاماراتية اقتباس:
الكل يمدحها و هذا سبب استغرابي و اللي خلاني اكتب التقرير الله يكون بالعون خلاص بعد القطرية مافيه |
رد: و هكذا خاب ظني في الخطوط الاماراتية اقتباس:
جربتها بعد ب 99 لما رحنا تايلند و اتذكر كانت جيدة بعد السعودية ما جربتها للحين ... يلا ان شاء الله نروح العمره عليها |
رد: و هكذا خاب ظني في الخطوط الاماراتية اقتباس:
صح مفيدة ... لكن الله لا يعودها وعارفة ما يهتمون بالرحلات القصيرة بس يدخلونا طيارة قذرة .. ابدا ما توقعت ... ما انسى شكل بقايا الاكل على الارض لولا اني كنت مضطرة ومعاي العيال ما قعدت فيها |
رد: و هكذا خاب ظني في الخطوط الاماراتية اقتباس:
بقر !! استغفر الله .. والله لو مكانج اسوي اكثر اهم شي رضا المسافر ... الظاهر بالرحلات القصيرة مثل ما قال اخوي الغردقاوي يستهينون بهذا الشي وصح مثل دلع القطرية و تعاملهم الجميل ما شفت ... الله يرزقنا وياج و نسافر عليها قريب |
رد: و هكذا خاب ظني في الخطوط الاماراتية اقتباس:
الله يسلمك من الشر اخوي وصادق امور التعطيل و الربكة ممكن تصير بكل الخطوط لكن برحلتين ذهاب و عودة .. و ما يفصل عنهم الا 3 ايام ... في شي مو ضابط بالموضوع |
رد: و هكذا خاب ظني في الخطوط الاماراتية اقتباس:
الشكر لك اخوي والله يرزقنا وياك سفرة جميلة |
رد: و هكذا خاب ظني في الخطوط الاماراتية اقتباس:
|
رد: و هكذا خاب ظني في الخطوط الاماراتية تجربة مريرة .. وموقف لا تحسدين عليه ... الله يعوضكم خير أختنا/ أم ريمه |
رد: و هكذا خاب ظني في الخطوط الاماراتية الحمد لله على سلامتكم اختي والله انك صاجه ملعب مو طياره اول مرة اسمع عن طياره وصخه:(38): الله يعوضك عليك بسفرة احلى وطيارة طاقمها يرد الروح انا جربت الاماراتيه من زمااااااااااااان الى تايلند كانت روعه من كل شي لكن بعد ما جربت العمانيه صراحة حسيتها افضل بكثيييييييييييييييير الاتحاد ممتازة ومريحه وللأسف بعض التصرفات الشخصية من الطاقم هي اللي تنكد على المسافر وتوني راجعه من السفر وكنت على القطريه ما حبيتها وايد وبعض المضيفات نفوسهم شينه وللأسف يقدمون مشروبات ( ويسكي ) على الطياره هذا ضيق خلقي حيييييل والمصيبه ان المسلمات هم اللي يقدمونه ولما صورت العربه عصبت المضيفه وجاني مسئولها يقولي ممنوع التصوير قلت انا ما صورتها صورت العربانه خخخخخخخخخخخخ وكيفك ترضى او ماترضى ما اعتقد اني بختار القطريه الا اذ كنت مضطرة |
رد: و هكذا خاب ظني في الخطوط الاماراتية اقتباس:
وشغلت اني اتعارك معه او مثلاً اضربه على وجهه ليس هاذا اسلوب حضاري لانه هناك عندهم نظام قيد عليه اخطاءه والمحاكم جاهزه وراح اخذ حقي بالنظام لكن الواحد يبي ياصل بيته بسلام وزي ما قالو ابعد عن الشر وغنيله ... |
رد: و هكذا خاب ظني في الخطوط الاماراتية الله يعوضكم خير |
رد: و هكذا خاب ظني في الخطوط الاماراتية بالفعل الاماراتيه ماخذه صيت ماتستحقه جربتها العام وصارت لى مشكله معاهم وبعدها ماافكر اسافر فيها وتظل القطريه من ارقى الخطوط صموته |
رد: و هكذا خاب ظني في الخطوط الاماراتية الحمد لله على سلامتكم موقف لا تحسدين عليه اغرب شي موضوع النظافة لان شركات النظافة تابعة للمطار بس ممكن الوقت و التاخير هو اللي خرب الموضوع معوضين خير ان شاء الله |
رد: و هكذا خاب ظني في الخطوط الاماراتية مشكوره على التقرير بس لاحظت هناك تحامل كبير على طيران الامارات وتناقض بسردج ، ، قلتي موعد الطيران الساعه 9:50 وانتي كنتي عند البوابة 8:50 قبل ساعه وركبتي الطياره 9:30 قبل الإقلاع ب 20 دقيقه وين التأخير اول مره اسمع يحطون الاكل على الكرسي الا لو انتي طلبتي منهم ذلك حتى لا يطيح على الأطفال . وبعدين ما فيه طياره تقلع بدون تنظيف وخصوصا انتي راكبه من المحطة الرئيسية فاكيد بتكون مو طيارة ترانزيت بعدين تبغين تقنعينا بان طيران الخليج احسن من الامارات ؟ أتمنى لج حظ موفق |
رد: و هكذا خاب ظني في الخطوط الاماراتية رأيي ان بعض الخطوط رحلاتها لداخل الخليج ليست بمستوي رحلاتها لأوربا حتي رحلاتهم لأسيا أقل اهتمام شكرا لذكر تجربتك |
رد: و هكذا خاب ظني في الخطوط الاماراتية معوضه خير لي تجربه معهم ومضيفاتهم النفسيات من الجنسيه العربيه ذكرت تجربتي هنا بأحد المواضيع لأحد الاخوان نسيت العنوان |
| الساعة الآن 02:40 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO