|
وصلنا امريكا قبل قليل بسم الله الرحمن الرحيم الحمد لله تم الوصول قبل 6 ساعات الى مطار ميامي واحب انقل لكم الاحداث بما اني كنت متخوف عن بعض الاجراءات والغاء البعض منها واحب اخدم اي واحد بيمر بنفس التجربه وكرد جميل للمنتدى والمشاركين اللي استفدت منهم كثيراً… طبعاً هذي الزياره التاسعه لامريكا الحجز على القطريه قبل 6 شهور (رياض دوحه ميامي ) مطار الرياض البارحه كان زحمه فوق الخيال الى درجة الناس ماسكة سرا في الشارع … للأسف ربعنا مايتغيرون تخيلوا من حرصي ومن خوفي من المفاجآت رحت قبل اسبوع للمطار في نفس وقت اقلاع القطريه وقلت انا عندي رحلة الاسبوع القادم وابي اعرف وش المطلوب قالوا القطريه بالنسبه لنا نحتاج طباعة الجواز الصحي لكن اسأل الجوازات وحت الجوازات وقلت نفس السؤال قال النقيب مانبي شي اهم شي انكم ماخذين 3 جرعات للكبار واقل من 12سنه تامين قلت تمام … المهم جينا المطار ويوم ختمنا جوازاتنا قالت الموظفه بنتك مايقبل الجهاز ان يخرج لها لازم تكون ماخذه الجرعه الثالثه قلت كيف تاخذ الجرعه الثالثه وعمرها 15 وغير كذا السستم مايقبل يحجز لها قالت والله هذا اللي قدامي 😂😂😂 والله مشكله ،، المهم جاء واحد مشكور من الجوازات لابس مدني ونعم الرجل واخذ الاوراق وجواز البنت وخرج لها وقلت له انا من حرصي جاي قبل اسبوع خايف من ذا السالفه !! قال والله مامنك خطاء الخطاء من السستم من عندنا … حقيقه اقدم له الشكر فنادر تجد موظف يعترف بالخطاء .. ختمنا ورحنا نبي نجلس في اللاونج وللأسف اقسم بالله من العام من عيد الأضحى والتكيف عطلان ونفس المشكله البارحه وحر موت وتركناهم ونزلنا عند ستارزبوكس حتى فتحت الرحله واقلعنا،، المهم اقلعنا في الموعد المحدد ووصلنا الدوحه الساعه 2 ورحنا لاونج المهاء لان عندنا ترانزيت 6 ساعات وليل وسهر وتعب وللأسف مطار حمد مطار كبير بس لاونج صغير وفل الفل ومالقينا مكان وهذا يا اخوان اشوفه عيب البطاقات الماستر والفيزاء صاروا كل الناس معهم بطاقات وكل واحد من حقه يدخل اللاونج بس هذا غلط العدد اكثر من الاستيعاب ،، ماعلينا دورنا لاونج اخر بفلوس وكل ماجينا واحد قالوا فل وزحمه ورحنا لغرف النوم وقالوا فل وزحمه .. للاسف مطار كبر على قل سنع وما اعجبني بصراحه ولايزعلون علينا اخواننا القطريين… اقلعنا الساعه 9 الصباح الى ميامي وكانت الرحله مجدوله 8:05 وحلقنا 14:35 بالضبط وصلنا بتوقيت ميامي الساعه 4:35 دقيقه عصراً وكنت متخوف من الجوازات وميامي بالذات لنا مواقف معها سابقه في كل وصولنا لنا ،،، لكن الله سهلها سبحانه وكم سؤال وصوره وبصمه وبس ،،، الغريب اللي لاحظته واتمنى اني افيد الاخوان ،، 1-ماعاد فيه الورقة الزرقاء حقت الجمارك وما احد طلبها 2- ماعاد فيه تختيم على الجواز 3- ما احد قال لنا شي من الجمارك او احد شيك العفش فلله الحمد وصول سلس وسهل وما تأخرنا لكن التأخير صار عند اجار السيارات لانها اول شي غاليه ثلاث اضعاف الاسعار السابقه ثانياً لاني ابي اسلم السياره في اورلاندو في 4 جولاي وهذا يوافق اليوم الوطني واغلبهم رفض عدا شركتين وحده اعتقد اسمها فاملي عندها اكسبيدشن 3 ايام ب1200 دولار ووحده ثانيه اول مره اشوفها اسمها AEC عندها ميني فان ب700 دولار 3 ايام وتسليم في اورلاندو وخذيته وقلت امشي حالي لان عندي ترتيبات وحجز سياره في اورلاندو … حبيت افيد محبين امريكا عن اللي صار واللي شفته ،،، على فكره مايحتاج نطبع الجواز الصحي او تامين الاطفال كل شي مبين في السستم ومحد طلب مني ذا الاوراق اللي متكلف وطابعها وراصها في ملف 😂😂 |
السلام عليكم و رحمة الله و بركاته .. ما شاء الله الحمد لله على السلامة يا أبو سلمان و نتمنى لكم أقامة سعيدة نقطة عدم قبول النظام أصدار الخروج للأطفال ممن لم يتلقوا الجرعة الثالثة و النظام الصحي لا يقبل ترشيحهو للحصول عليها أتوقع سوف يواجه كثير من الأسر خلال الفترة القادمة و لابد من حل لهذه المشكلة و شكراً لك أبو سلمان على ذكر تجربتك بالتفصيل عن الوصول إلى أمريكا |
وعليكم السلام الحمدلله تسهلت اموركم ليش التأخير في الاقلاع وايد من الدوحه الى ميامي نفس ملاحظتي في شهر 1 لما دخلت ميامي و من الاكوادور كنت واصله قلت شكلي اليوم بنام في المطار من اسألتهم ولا انصدم بس بالصوره و رحب فيني في ميامي من غير ورقا زرقا ولاختم ولاحتى عن بي سي ار ولا تطعيم في اقل من دقيقه انا عند سير الجناط |
الحمدلله على السلامة وشكراا للمعلومات وان شاءالله تكون مفيدة للكثير |
الحمدلله على السلامة ابو سلمان دايما في بداية الصيف والاجازات تكون الدنيا زحمة ولخبطة تتهنى ان شاء الله في رحلتك |
الله يسلمكم جميعاً شاكر مشاعركم ودعواتكم وهذا من نبل اخلاقكم ،،، وصلنا اورلاندو 3 جولاي وخذيت سكن ليله وحده فقط و4 جولاي حاجز فله لمدة اسبوعين ورجعت السياره اللي اخذتها من ميامي واستأجرت مرسيدس من مطار اورلاندو لكامل الرحله وترجيع في ميامي ،،، الامور طيبه والاسعار تقريباً فرق بسيط للأعلى بس مو مثل ماقالوا الناس …البنزين اشوفه كأنه كل يوم ينزل نزول بسيط يعني اقل شي شفته حالياً 4.27 للجالون …تحياتي للجميع واي استفسار انا حاضر ،،، لكن عندي طلب بسيط اللي جاي اورلاندو خلال هذا الاسبوع وهو لازال في السعوديه اتمنى يتواصل معي على الخاص فيه شغله بسيطه احتاجها كبر كف اليد |
وفقك الله وسهل امرك واجازة سعيدة |
اقتباس:
|
الحمدلله على السلامة أخوي الله يعافيك رحلتنا بعد كم يوم وودي أتأكد وش طلبوا منك بالضبط لأن كل يعطيني كلام مختلف هل طلبوا فحص للأطفال قبل الإقلاع أو بعد الوصول ؟ هل طلبوا CDC |
حمدا لله على سلامتكم هل ممكن تدلونا على سكن جيد في اورلاندوا |
| الساعة الآن 01:04 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO