|
ابولجين الصيني ..... ترانيم يناير .. على الحان شنغهاي السلام عليكم اخواني ... اخواتي .. ايها المسافرون الجميلين ايها الشعب الكريم ... (كانت الخطه سفر في نوفمبر لكن تأجل وعسى الامر خير) اليوم 4 يناير 2026 .. عام جديد وخير وبركه / اشد الرحال واجدد العهد مع الشنطه والشاحن وهيتر القهوه .. متمثلا قول الشاعر : اقول لها وقد طارت شعاعا .. من الصينيين ويلك لن تراعي :e13d: الرحله من 9 -يناير حوالي اسبوعين وهي رحلتين في رحله .. .شنغهاي الصينيه وكم يوم في هانوي فيتنام .. بداية الصين ثم فيتنام نظام هجوله ... تقسيم الايام والخطه الى الان مااتضحت :e13d: الناقل الاول من الرياض خطوط شرق الصين دايركت بالفين ريال :e13d: رحله هانوي .. ابتعرض الطيارات بشنغهاي واي خطيط يولي ابروح معه على هانوي والحافظ الله |
كل شي تمام .. ولكن تحتاج رحله الصين بعض الترتيبات فهم غير العالم .. تخيل بلد مافيه جوجل ماب ولاجوجل .. ولاحول ولاقوة الا بالله :17: جهزت عدتي كامله وشحنت جوالي بالتطبيقات اللازمه للتعامل مع خوالي الصينيين ( ني هاو ) ( بصوت بس ) :17: بديل اوبر تطبيق اسمه didi بديل جوجل ماب تطبيق اسمه du واهم الادوات واشهرها ( وسيله الدفع العامه في الصين ) تطبيق اسمه ( علي باي) .. هذا تقدر تدفع فيه للاكل والمواصلات والفنادق ... الخ |
فيتنام .... تحتاج فيزا ... قدمت الفيزا غالبا تأخذ 4 ايام عمل وتصدر لم اهتم بالتفاصيل هذه المره ... اشعر اني وصلت مرحله ممكن ان ازور اي دوله بلاترتيبات معقده وقراءات تفقد التفاصيل متعتها ... |
نيهاو أبو لجين الصين من وجهات 2026 المفضلة لذا أشوف تقتصر الرحلة هذي عليها فقط البلد محتاج أكثر من رحلة لاستكشافه ممكن تزور شنغهاي قوانقزو شينزن بالرحلة هذي وثق تماماً أنك بتصير مشهور لأن كثير راح يطلب يتصور معك غالباً يعتبرونك كائن غريب يزورهم :32: تحتاج تطبيق ترجمة صوتي VPN مشكلتك الرئيسية هي الأكل فيه مطاعم يمنية منتشرة بهذي المدن الثلاث وفيه كنتاكي ومكدونالدز بالإضافة للكافيهات اللي تقدم قهوة ومعجنات موجود ستاربكس بس فيه سلسلة تفوقت عليه اسمها Luckin Coffee موجود حول 8000 كوفي شوب في شنغهاي لوحدها وهي اللي تجرب الأكل منها لأن الطلب من مطاعمهم صعب |
اقتباس:
عليكم السلام ابو لجين هذا التطبيق فيه كل شي الان ضروري تحمله Nihao China |
ويلٌ للصينين من شر قد أقترب |
اقتباس:
:58::32::58: |
نيهااااو بولجين أنا بعد أقول خلك على الصين إهي بروحها يبيلها شهر نصيحة من اختك اخذ معاك معلبات احتياط وسناكات ما شاء الله تجهيزات حلوة من التطبيقات وأحلى شي زيارات من غير ترتيب 👌🏽 |
اقتباس:
اهلا بشيخ العرب اخر فرصه (منور باللوك الجديد ) اتفق معك فيه توجه كبير جدا لشنغهاي ( يمكن السوشيال ميديا) ساهمت في توجه الناس لها .. ازعم انها لم تكن مشهوره قبل اكثر من عام وللامانه ماحجزت الى الان من الصين لفيتنام .. ان جاز لي الجو كملت بالصين اما الشهره فماعندي مانع .. لو يبوني اطق الشماغ والعقال ابولجين في خدمه الشعب .. ني هاااااو :7: اما التطبيقات فلاامانه جهزت بعضها ومازال هناك تطبيقات لازم تكون بالجوال لفك المشكلات .. ركبت خرائط وعلي باي ويلزمني بعض الامور الى الان .. اما الاكل فشي متوقع .. البلد من هالناحيه ماهو جيد ابد تروح تاكل وجبه وتطلب طلب خفيف تاخذه معك ( لليل الطويل ) :17: جاري البحث عن Luckin Coffee تحياتي لسموك |
اقتباس:
هلا بالامير .... شكرا للاضافه .. احتاجها فعلا .. جاري التحميل |
اضافة تم التأكد منها .... الطيران الصيني يطلب ان يكون الشاحن المتنقل ( الباوربانك ) يحمل الرمز ( CCC ) والا سوف لن يسمح لك بحمله داخل الطائرة مريت المحلات اليوم ولكن الباوربانك من هذا النوع لم ينتشر بعد بالاسواق ... الامر ليس مهما جدا .. بالامكان شراء باور بانك من الصين بعد الوصول .. ولكن دونته هنا كمعلومه للاخوة والاخوات |
اقترح أبو لجين أنك تأخذ معك ثوب وشماغ + عقال وتطقها في واحد من الكافيهات تسوي لهم شو في شنغهاي برضه لا تأخذ معك ملابس واجد طقم واحد احتياط فقط لأن الملابس عندهم رخيصة وموجود تقليد للبراندات الأصلية لذا جهز نفسك للتسوق وهو أهم فعالية عندهم بعد لطافة الشعب |
اقتباس:
نيهاو.. شيخة الرحالة والله بديتوا تقنعوني امضي بقية الرحله بالصين اما المعلبات فاللهم نعم .. تم اخذ نصيحتك وساقوم بتخصيص جانب من الشنطه للاكل الخفيف.. حق وقت الزنقات .. المزعج ياازميلتنا الانترنتيه هي لو مااشتغلت التطبيقات حقتنا هناك .. وش تسوي بالليل بدون واتس اب وتكتوك وغيرها .. كيف ستعرف اين انت بلا جوجل ماب .. تحياتي لسموك |
"الاتصالات" ... تضاربت الاقوال فمنهم من يقول لازم ( في بي ان ) واخرون يقولون اطلب شريحه الكترونيه من تطبيق علي باي .. وتشتغل على طول بدون في بي ان ( مع انها غير منطقيه ) لو كانت السوشيال ميديا محظوره كيف يتم تقديمها مع الشريحه الصينيه ؟؟؟ وتطبيق ميرالو ذا مدري وش اسمه ابلشني كل شوي ناط لي باعلان .... المشكله اني مااثق بالشرائح الالكترونية ... ذي لعلنا نلقا احد مجرب يشرح ** معلومه مفاجأة : كثير من المتكلمين بالتيك توك ( يعيد ماسمعه فقط ) لكي يكسب مشاهدات .. ويتضح كذبه عندما يسأله الناس ويتهرب .. |
اقتباس:
مع ان الفكره شاطحه .. الا ان ال طنجه ( الصينيين ) مفرغين من الداخل يعني مااعتقد ان من يلبس الثوب والشماع سيتعرض لاكثر من نظرات استغراب او ربما تصوير معه .. ميزتهم شعب مشغول والله ماادرا عن تعقيداتنا وعرقياتنا والمناحرات اللي بيننا كعريبيا .. او عرب واوربيين .. ال شان يونج والله مادرو :32: |
تصريح خطير من ابولجين دام ظله : :e438:لقيت تقرير عن ( سوق الزواج في شنغهاي) كل يوم سبت كل ام او اب يجي ويعرض بناته ( معلومات وافيه على ورقه ) وان جازت لك المواصفات والتعليم و و و .. ممكن تتزوج ... لذلك السبت القادم ان شاء الله .. لو ماكتبت رد هنا .. ترا متزوج .. ومكمل نصفي الثالث .. **هذا الرد ليس بالضرورة ان يعكس رأي شخصي ** تطبق الشروط والاحكام |
نعم موجود لكن لابد تجهز لك CV تكتب فيها معلوماتك الشخصية هواياتك والمميزات اللي عندك ثم يدرسون عرضك وغالباً يتم الرفض لأنهم مجتمع منغلق وما ودهم يزوجون بناتهم لأغراب لذا ماكو خوف ضامنين رجعتك بخفي حنين :32::32: |
اقتباس:
لا لا تخافون عليه راجع بأذن الله اول سؤال يسلونك عنه ايش تعرف تتطبخ ؟؟؟؟؟ ان شافوك ما تعرف تطبخ ضفادع وخفافيش راح يضربوك الباب :31::31::31: واذا شفته فتح عيونه اللي كنها شمعه لد اعرف ان الدعوى خسرانه |
اقتباس:
الحساد واجد هاليومين :e32e: |
اقتباس:
خفافيش يامجرم ههههههههههه هههههههههههه انتهى مشروعي قبل يبدا لي الله عنه هو وبنته الطنجه :1::1::1: |
التجوال استقر الاختيار على تطبيق AIRALO اسعاره جيدهو الكلام عنه ايجابي في السوشيال ميديا بجربه واعطيكم خبر .. معظم الشرائح الالكترونيه تبدا مشكلتها عند الوصول ومحاولة التفعيل ... |
|
اهلا بالاخوة والاخوات … سكان العالم العربي من هنا من ارض اجدادي ( كنه تحمس) احييكم من شنغهاي ** الرحله طويله جدا جدا وجدا 9 ساعات عن 90 ** الكذبه الاولى من رواد التكتك سالفه الشواحن اللي لها تصنيف خاص …… غير صحيحة ولا احد يسالك تطبيق ايرالو ( شريحة الكترونية) ممتاز جدا اول مانزلت المطار شبك 5 ج ** الدخول سلس لكن اعمل حسابك سو كرت الوصول قبل تطير افضل……. الاجهزه اكثرها عطلانه ( اجهزه تقرا جوازك خطوة اولى وتقرا بصماتك ) ثم تروح للجوازات بعدها….. خطواتها سهله بس اغلبها عطلانه ** التوصيل من المطار للفندق وسط المدينه 370 يوان ولو قال الف عطيته بعد الرحله اللي تحس ان رجليك ماهي لك بعدها هههههههههههه ** الجو بارد ماهو كثير |
الحمدلله عالسلامة متابعين تفاصيل الرحلة :e303: |
نحمد الله على السلامة الله يعينكم ويكون معكم متابعين لهذا التقرير المميز عن الصين:e513: |
الحمد لله على السلامه يابو لجين كبسة خفافيش تنسيك البرد والتعب كله لو اخذت معها ايدام ضفادع امورك في السيلم |
الحمدلله على السلامة بولجين متابعين معاك الإمبراطورية الصينية انطباع أولي جيدجدا |
اقتباس:
|
اقتباس:
اهديك اغنيه ( الليالي ) لميادة الحناوي مالها دخل بس دخت من وصف العيشه قلت نغير جو الرد ...... انت تقولها تمزح هههههههه امس مريت مطعم وانا اتمشى مادخلته ورايته عارض ااشياء تجعلك تكره الصين كلها الاسلام يخليك ادمي محترم ههههههههه |
اقتباس:
الله يسلمك انتي يالذات والله دعيت لك دعوه مسافر وانا بالرياض قبل المطار تذكرت كلامك عن الاكل ومريت سىوبر ماركت وعبيت باقي المساحه في الشنطه ...... يوم جيت هنا هي ( عيشتي ) ههههههههههههه المطاعم الحلال هنا مشاوير ردك ساهم قي انقاذي :1: الانطباع الاولي عن هالمدينه تحديدا ممتاز البلد امن جدا ( شوارع نظيفه - منضبطه- لامتسولين - لامضايقات- لامشاهد مزعجه كما تعودنا في بلدان اسيا -لا عشوائيات ......... ) مدهشه من جد ووجهة عالميه لولا امرين : -الاكل - الانترنت المكتوف وثالثه من عندي ( حاجز اللغه الرهيب ) ..... |
اقتباس:
الصين بلد جميل في المدن السياحية لكن مشكلة الاكل مزعجه تجربة مررت بها واعرفها جيداً مشكلة الانترنت vpn يحل لك المشكلة ابو لجين شكلك ما تعرف الشحاذين عندهم (الشحاذ عندهم يعلق لوحه على رقبته او يضعها جنبه فيها بركود وتدفع له عن طريق الباركود ) حتى الشحاذه متطوره في الصين :31::31: |
السلام عليكم كيف الجو الان بشنغهاي ببارد مرة ولا كيف ياليت طريقة تنقلك من المطار الي الفندق هل فية سواق ولا تاكسي كيف مستوي الامان وطريقة صرف الفلوس وهل البطاقات السعودية تعمل افضل مكان للسكن يكون متوفر كل شي عندك وشكرا |
اقتباس:
ههههههههههههههههههههه والله يا ردك ضحكني ضحك وفي نفس الوقت وأنا اقرأ الرد وجالس آكل ساندوتش جاني غثى ههههههههههههههه |
اقتباس:
اتفق معك بسالفه الاكل ... واليوم كملت السالفه لقيت تقرير يقولك ( بوديكم مخبز حلال في كوانزو ) ؟!!!! يعني فيه خبز حلال وحرام بعد ( الله يرحم الحال ) والصامولي اللي نشريه بالجمله من بقالات شنغهاي :24: اما الشحاد ابوباركود .. فوالله جاني وتذكرت ردك هذا ... لقيته عند مطعم اسمه اي فلفل .. مطعم مسلمين ولقيت مع علبه عليها باركود ... امششش |
اقتباس:
عليكم السلام الجو بارد جدا جدا .. لعشاق البرد الجو جميل وشاعري ... وخاصه في المساء (انا كائن قطبي ) .. اما الاخوان محبي اغسطس فيحتاجون جاكيت قوي شوي ** من المطار فيه شركات تكاسي .. كثير ..وفيه حنشل برا .. تكاسي وكذا .. لكني بعد رحله طويله اخذت تكسي .. بعد ان تأكدت مرتين انه يعرف الموقع (عدم وجود الانجليزيه ) // الامان 150% .. والحافظ الله جل وعلى ... البلد امن مشيت في كل مكان .. مافيه مضايقات ابدا .. وكلن في حاله .. الفلوس صرفت معي الف يوان من المطار ومعي مئتين دولار كاش والباقي بطاقاتي ( ربطتها بتطبيق علي بي ) .. ووصلت اخر الرحله وهي معي ** لن تحتاج الكاش ابدا ** الحساب كله عبر التطبيق علي بي هذا جامعة ماهو تطبيق فيه تكاسي ودفع واماكن تسوق ومقترحات سياحيه وبيع شرائح الكترونيه وكل شي يخطر ببالك :e513: البطاقات السعوديه نعم تعمل .. مع اني ماجربتها الا مره او مرتين الباقي كله عبر علي باي السكن في منطقة قرب التايم سكوير اللي انا سكنت فيها جنبك الاسواق والمولات والمطاعم ( بعض يقول اسلامي) والانطلاق الى الفعاليات قريب .. شارع بوند يبعد عنك عشر دقائق وشارع التسوق والمزارات الاخرى كلها في محيط عشر دقائق / التنقلات عبر تطبيق ديدي وهو موجود في علي بي ادخل وحدد نقطه الوصول دقائق وياصلك صيني ساكت وتركب لمكانك اللي رايح له وتنزل وانت ساكت بدون دفع ولما تفتح التطبيق مره اخرى يظهر لك حساب رفيقك اللي جابك وتسوي دفع .. |
نصيحة لله ثم للتاريخ : لازم يكون معك كاااااش يواااااان في محفظتك وصور لكرت الفندق وكرت الفندق نفسه ورقم تلفونه لانه لو يطفي جوالك بلشت بالعربي نظام التكاسي عندهم بن كلب تبي تاكسي يوديك .. بشكل مباشر مافيه .. لازم عبر التطبيق .. وان حصلت راح تبلش معه ... اخلاقهم ضيقه واللغه صفر مكعب .. توريه العنوان بالانجليزي يون ونتين ويمشي ..لغتهم تقل ونين ... لازم يكون معك كرت فيه العنوان باللغه حقتهم .. ( الشبوك ) هههههههههه |
اقتباس:
الرحله القادمة ان شاء الله ... مرشح جدا ان تكون للصين عندما اطلعت على البلد وبحثت في السوشيال ميديا صارت المقاطع تظهر بحسب البحث .. لقيت اماكن في الصين جميله جدا وغير مشهوره ( وطبيعتها ساحره ) ... |
ان شاء الله الله يكتبها لك وتسهل |
اقتباس:
ماقصرت شرح وافي ومعلومات ثرية واشكرك علي رحابة صدرك يالغالي سوال اخر التكاسي او التنقلات من علي بي تقريبا المشوار بكم ايضا من المطار الي الفندق كم اخو منك الشركات او التاكسي للتوصيل للفندق شكرا لك |
اقتباس:
ممتاز الانطباع الحمدلله أنها تكون بهذا الانطباع الحلو ان شاء الله تكثر المطاعم عندهم وتكون قريبة على الفنادق اووو اللغة حدث ولا حرج لازم ترجمة قوقل |
| الساعة الآن 07:09 PM |
Powered by vBulletin® Copyright ©2000 - 2026, Jelsoft Enterprises Ltd.
Search Engine Friendly URLs by vBSEO