|
زيارة قريبه و استفسارات عن لندن السلام عليكم هذا اول استفسار لي في بوابة بريطانيا و ان شاء الله ما يكون الأخير :24: ناوين نشد الرحال لبلد الضباب بعد أسبوعين بإذن الله و لحد الحين ما حجزنا أي شي حتى الطيران :2: الرحلة بتكون لمدة. 10 أيام تقريبًا من تاريخ 18 ديسمبر إلى 28 ديسمبر عز البرد بحط الأماكن اللي ناوية ازورها و ابغي منكم مساعدتي بترتيبها و اضافة أماكن تستحق الزيارة متحف الشمع الهايد بارك البيكاديللي الأجور رود مدينة التون تاورز قصر باكنغهام متحف الحرس لندن آي ساحة الطرف الآغر شارع الاكسفورد سيلفردج هارودز كوفنت جاردن محل أم اند امز كوفنت جاردن سوق بورت بيلو * شبرد بوش متحف شارلوك هولمز طبعا المطلوب من الخبراء مساعدتي بترتيب الأماكن و الأفضل لزيارتها و اللي ما منها فايده نلغيها عادي و اهم شي أماكن للأطفال و الآوت لت ضروري نسيت اسمه و اذا ممكن اضافة منطقه نزورها لمدة يومين أو ثلاث ما في مانع بس تكون دافيه شوي و الفنادق عندي لسته طويله و ما زال البحث جاري ارجوا منكم مساعدتي و لا تبخلون عليه بأي معلومه جزاكم الله خير |
حياج الله ام علي حاليا انا في لندن طبعا موت برد للاسف مافي مناطق دافيه كلهم باردين وماانصح تطلعين برا لندن لان الوقت يظلم بسرعه واغلب المناطق الخارجية هاديه لا صار نهارهم قصير انا من ناحيتي أقول كنسلي شبردبوش ماله داعي روحي هاري بوتر لليهال وفي سيرك في وقتكم حلو والعروض المسرحية الآوت لت اسمه بستر فيلج انا حاليا ساكنه في blakemore hydepark hotel الفندق حلو والأهم الحمام في هوووووز 😁😁 طبعا الهايد بارك فيها الحين مدينة الملاهي winter wonderland تغنيكم عن مدن الملاهي عندج مكان حلو عند لندن تاور بريدج اللي اهو جسر لندن اسمه hays galleria صوب الجسر محلات وكافيهات عالنهر واكشاك .. وعندج old spitalfields market وايد حلو المكان قريب على ليفربول ستيشن طبعا كل اللي ذكرتيهم حوالين بعض مافي شي بعيد الا الآوت لت و إذا بتروحون التون تاورز بس مدينة الملاهي في الهايد بارك تغنيكم عن الروحه |
اقتباس:
هلا أبرار الله يبشرج بالخير على خبر البرودة :27: حاليا احنا عندنا شمس و بردانين ما اعرف كيف بتحمل الجو هناك بس مضطرين نسافر هالوقت نخاف ما نحصل اجازه بعدين و السفره هاي ابغي اليهال يستانسون عادي لو نوديهم كم حديقه أم حسين قالت لي نفس الكلام اقعد بس في لندن الفنادق شابه ناااار احاول ادور. شي تقييمه عالي و نظيف مشكوره ما قصرتي و اول ما احجز الطيران ببلغكم عشان ارتب جدول اول يوم |
ان شاءالله باللي تامرين فيه |
وعليكم السلام ورحمة الله وبركاته هلا والله اختنا ام علي ماقصرت اختنا ابرار جزاها الله خير وعن البرد فيه ملابس اسمها الثيرمال تلبس تحت وخفيفة فيها طبقة حرارية تحافظ على درجة حرارة الجسم جربوها اخوي واهله في لندن العام في يناير رحلة موفقة ان شاءالله |
اقتباس:
هيه أكيد اخذها حق عيالي في الشتاء حتى الكويت يوم نسافر ألبسهم اذا الجو كان وايد بارد و احنا اذا طلعنا البر بعد لازم نلبس مشكوره عالنصيحه ما قصرتي |
على كثرت الأماكن اللي حاطتها ولكنها كلها موجوده بالسنتر وقريبه من بعض انصحك تروحين لألعاب الوندر لاند اللي يحطونها كل سنة قبل الكريسماس بالهايدربارك وانصحك تروحين للوستفيلد مجمع تسوق ومطاعم كبير كبير مره اما شيبرد بوش فهذا مكان شعبي ولا فيه اي شي ولا يستاهل اجرة الباص اصلا :) اما ساحة ترافلقار فما انصحك فيها لأن الجو بارد ولا فيها اي متعه بهذا الجو متعتها هي و البيكاديللي سكوير بالصيف لما تتجمع الناس وتصير فيها انشطة عفويه وخصوصا بالويك اند الأجور رود ما فيه شي ممتع ,, انا امر عليهم اذا ابي مطاعم عربية بس بما انك بتروحين ام اند امز يعني بتدخلين شارع ريجنت الراقي ومحلاته الراقيه اذا كان الجو يساعد انصحك تروحين حديقة هولند بارك حديقة صغيره ولكنها رايقه وتصميمها رائع انصحك تصعدين مع اولادك برج شارد يعتبر اعلى برج في بريطانيا ويمكن في اوروبا ( يمكن :) ) قصر كنزنقتون هذا القصر اللي انولدت فيه الملكه وبعدين صار لديانا اول زواجها وهو القصر الرسمي للعائلة المالكة قديما ومكانه بحديقة كنزنقتون واللي بعض الناس على باله انها امتداد للهايد بارك وخوذلك لفه في لندن تاور القلعه الأثريه على نهر التيمز ومو بعيده عن بق بن ولكن بالجهة الثانية من النهر وبالأخير انصحك تروحين المطاعم اللي بشارع جيمس واللي هو ثالث شارع بعد سلفريجز ودي اقولك لندن بهالوقت ما تصلح للأولاد لكن انتم مصممين :) |
اهلين باللندنية الجديدة انصحك من قلب بفندق ابرار سبق سكنت فيه قبل سنتين حلو واللوبي جميل وعندهم افترنون تي جيد وفطورهم مشبع بالسرداب واذا كنتي من محبين المشي تروحين للهايدبارك مشي بس يحتاج شوي لياقة الاطفال بيحبون الهايدبارك وبينسون باقي الاماكن |
صح وديهم متحف الشمع اذا ماعمرهم زاروه بأي دوله بينبسطون محلات ليقو وام اند امز و ديزني تعتبر تمشيه لهم وبينبسطون وانتي تقضي من بريمارك عندهم اشياء حلوة انا حتى القطن لازالة المكياج اخذة من عندهم |
اقتباس:
بالعكس انا وحده احب الأماكن الشعبية وايد و ارتاح نفسيا فيها :24: و شكرا لك على الاقتراحات لكن يا ريت لو ترتب لي الأماكن و البرد ان شاء الله نتحمل و خلاص اليوم حجزت التذاكر تاريخ السفر 18 ديسمبر و العودة 28 ديسمبر جزاك الله خير |
اقتباس:
ههههههه حبيت اللقب اليديد اخاف اصدق عمري بس :1: و الله شيكت على الفندق بس التقييمات خلتني أتردد شوي اليوم حجزت الطيران و الحين ان شاء الله بحجز الفندق ، الحمدلله اللياقه موجوده و حتى لو ما شي لياقه في السفر بتطلع مشكوره على النصيحه و ساعديني اكثر على ترتيب الأماكن لو تسمحين |
اقتباس:
و الله حتى امهم و ابوهم و لا عمرهم زاروا متحف الشمع :24: أكيد ما يحتاج توصيه أصلا زوجي بروحه امس وداني السوق الصيني عشان ناخذ شنط يقول يوم بترجعين اغراضج زايده :32: بس طبعا ما عجبنا أي شي و قررنا ناخذ من دبي مول و انا أقول بأخذ من لندن احسن أي شي تشترونه من هناك و ينفع للاستخدام طرشولي على الخاص بعد ما أدري اذا بكرر الزيارة مشكوره و ما قصرتي |
الجناط روحي باللي عندج اكيد بتشترين من هناك واحسن مكان بريماك جناطهم حلوه واسعارهم زينه احسن من اللي بره ساحة الحمام والبيكاديللي بتلاقين في ناس تسوي عروض في تذاكر شامله لاربع معالم منها متحف الشمع ولندن اي والاكواريوم واعتقد معرض شخصية شريك اول شي روحي متحف الشمع الصبح مبجر بعد الفطور علشان تلحقون على الدور وبعدين تروحين لندن اي والباجي كلهم يمها حتى اعتقد تقدرين تروحين لهم بيوم ثاني مو شرط نفس اليوم واذا الشباب يحبون الكرة لازم تحجزون حضور مباراة اقرب شي عندكم نادي تشيلسي وملعبهم اسمه فولهام والله يحفظكم ويسعدكم بهالسفرة الحلوه |
بريمارك البجايم الملابس الداخلية الشنط الكبيرة للسفر وشنط المكياج البلاستيك الشرابات بس اتوقع البضايع بتكون شتوية للاسف انا اقضي منه حق سنة :14: |
بلندن ماتحتاجين جدول لان كل الاماكن قريبة من بعض والفندق والله حلو وسعرة وموقعة ممتازين |
هلا والله يا ام علي هالسنة لندن ماراح تزورين الكويت بالشتاء احب لندن وايد لكن مااحبها بهذه الفتره فتره الأعياد والزحمة والبرد الأفضل تقعدون بلندن لان الأجواء وايد بارده بالنسبة لشبربوش اذا تحبين الدراريع المخمل والبيجامات القطنية والخامات روحي له اغلب الأماكن اللي ذكرتيها يم بعض تقدرين تروحين اكثر من مكان في يوم واحد مثلا محل أم اند امز في البيكاديللي سفره سعيده يا ام علي |
اقتباس:
بو علي عنده عشق لشنط السفر عادي يشتري من دبي و من لندن قبل أسبوع كان في فرنسا و حصل شنطه صغيره تدخل الطياره بس عليها رسومات ميكي ماوس قالي تطلع تقريبا 600 أو 700 درهم قلت له لا تاخذها التذاكر من وين اشتريها من موقع و الا مكتب سياحي المباريات قاعد بشيك قال في 3 أو 4 مباريات فترة سفرنا :30: قلت لك يوم واحد بس انا مسافره أتمشى مب احضر مباريات و يحفظ لك الغوالي |
اقتباس:
مب مشكله ناخذ حق الشتا مشكوره |
اقتباس:
القلب يبغيكم بس و الله كل سنه زوجي يقول نسافر مكان غير الكويت و يتم الرفض و المشكلة ما عنده اجازه طلب 3 أسابيع قلنا أسبوعين لندن و أسبوع الكويت لكن تم الرفض و عطونا 10 أيام بس ما نستغنى عنكم أكيد يمكن أزوركم ويا اختي اذا وافقت الحكومه أكيد المخمل حق الوالده لانه في الشتاء تكون في برشلونة و الجو بارد خذت لها قبل من الرياض و حبتهم وايد أكيد ان شاء الله بمر عليه هذا السوق لازم مشكوره عل الاقتراحات |
اقتباس:
بالنسبة لي اول مره اعتقد لازم اسوي جدول عشان ما اتخربط بالأماكن أكيد بضيع بقوم الصبح مب عارفه من وين أبدا المشوار الفندق راح علينا تأخرنا بالحجز |
1 مرفق هذا الملف بيغنيك :) |
اقتباس:
شكرا لك تسلم و ما قصرت |
اليوم زوجي يقول اسألي كم الميزانية حق 10 أيام قلت له كل واحد ميزانيته على قد صرفه و مشترياته محد يقدر يحدد أو يقيم الميزانية |
صح كلامك لو بتفطروا بالفندق وتتقهوون في نيرو حبيب قلبي ووجبة خفيفة بنص اليوم مثلاً وتتعشون وجبات سريعة وتعتمدون على الباصات والمترو بتفرق كثير معاكم عن المطاعم العربية والهندية والتكاسي |
اقتباس:
احنا مشكلتنا نحب ندلع نفسنا الفطور أكيد بيكون برع لانه اعتقد الحجز بدون فطور و التكاسي ان شاء الله ما نحتاجهم المطاعم ألعربيه و الهنديه لابد منهم :72: شكرا لك |
بالنسبة لسياستي المالية في السفر اذا اكثر من اسبوعين طبعاً لازم المطاعم العربية والهندية لان بعد الاسبوعين تبدأ النفس تشتاق لاكلنا :17: غششينا وين حجزتي اي فندق |
اقتباس:
لا احنا لازم نجرب كل الأكل و ما نقدر نجازف وايد باللي ما نعرفه الحمدلله حجزت نفس فندق أبرار Blakemore Hyde Park ما لقيت حجز على موقعهم و لا في بوكينج اتصلت فيهم مباشره و حجزت |
ممتاز ان شاء الله بيعجبكم :e437: |
اقتباس:
ما شاء الله فندق Blakemore Hyde Park من تجربة ممتاز في كل شئ كموقع و نظافة و خدمة ... و من تجربتي له سكنته 3 مرات و بالمره الأخيرة كان تم تجديدة بالكامل يستحق بصراحة .. رحلة سعيدة .. |
اقتباس:
مشكور على رفع المعنويات جزاك الله خير |
هالفندق ان شاءالله بنعتمده دام اغلب الاعضاء مجربينه ولازم يغيرون اسمه الى فندق العرب المسافرون عاد نبي تصوير وتفاصيل سجليها علشان التقرير :13: |
اقتباس:
|
يعني ي ام علي انت معانا في نفس الرحلة ههههههه راح نسافر لندن في نفس يوم رحلتك 18 ديسيمبر الى 1 يناير عشان حفلة راس السنة و يوم 20 نطلع على ادنبرة 3 ايام و نرجع قبل الكرسمس و حجزنا في فنادق كلها فيها افطار و اخذنا بطاقة اويستر عشان المواصلات،، بالنسبة للبرنامج شكلي بغش منك لان الى الان ما حددنا و ين بنرو ح وش بناكل تروحو و ترجعو بالسلامه يارب |
اغلب الاماكن السياحيه فيها مكان حجز التذاكر اما الكتروني او نفس المكان مثلا اذا رحتي متحف الشمع عندهم عروض لتذاكر كذا مكان سياحي مثل متحف الشمع ولندن اي ومتحف المواصلات وشريك والاكواريوم وراح تكون مخفضه ونفس الشي بالامواقع الالكترونيه لهم تقدرين تحجزين قبل فتره https://www.viennaticketoffice.com/M...iAAEgIc9PD_BwE |
اقتباس:
تعرفوني احب اذكر التفاصيل ان شاء الله اصور و أحط كل شيء الله يقدرني اقتباس:
الله يسلمج اقتباس:
|
اقتباس:
يمكن اذا على الاماراتية و الصبح بتكونون ويانا خذي راحتج في الغش بس لا تنسينا من التقرير الزين |
اقتباس:
ان شاءالله بنشوف رايج فيه |
اقتباس:
دايما زياراتي لها في الصيف وان شاءالله عن قريب بنزل تقرير عنها ياريت تسوين تقرير عنها نبي نتعرف عليها بالشتاء |
اقتباس:
ان شاء الله أوصل لكم المعلومات اللي راح تفيدكم دعواتكم باجر سفرتنا |
تروحون وتردون بالسلامة سفرة ممتعة |
| الساعة الآن 07:00 AM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO