|
سفرتي لتركيا في النيو يير 2016 السلام عليكم قبل فتره كنت متخوف من سفرتي لتركيا في هذي الفترة وبشكل عام لانها فترة توترات سياسية تركيا وروسيا وسوريا المهم المدام كان في خاطرها تروح اسطنبول وجاء ذاك اليوم اشوف عروض الطيران الا ناس اظاهر شخصين مع اختيار المقعد طلعت علينا ب 1800 ريال للشخصين قلت احجز على النيو يير طبعا مع الوقت حصلت الشركات تسوي عروض قريبه من هذا السعر يعني فرق تقريبا 900 ريال الخطوط السعودية والتركية وقبل الرحلة بشهر يمكن المهم ومن حجزت وانا ماودي في هالديرة بس عشان المدام وجلست اتابع واقراء واسال الي سافروا لتركيا وخلني اقولكم السلبيات الي قالوا لي عنها او الصورة الي خذتها عنها قبل اسافر: اسطنبول مدينة وسخه بيئياً قذارة متسولين في كل متر مواصلات متعبة وصعبة وزحمة لاتطاق نصب في الاسعار في كل مكان حتى المتسولين لو تعطية ليرة يلعب عليك وياخذ منك 10 :34: المطاعم والمقاهي لازم يضيفون على الفاتورة طبق او طبقين ميب لك لازم سائق خاص عشان تستانس وتاخذ راحتك السائق الخاص يتاخر ويدخل معك المقهى والمطعم ويطلب طلبات بدون ما يستاذن منك اسطنبول يكفيها اربع ايام تعاملهم اوسخ منه مافيه ودفشين تزوير عملات بشكل علني عيني عينك وخاصة التكاسي انتبه منهم لازم تحول فلوس معك كاش من السعودية اضمن لك تقسيم منطقة قريبة من كل شئ وفي نفس الوقت كلها متسولين ومنطقة فساد **** :12: مطار صبيحه الجوازات حيوانات في تعاملهم هذي اظاهر اغلب الامور الي كنت اسمعها ومتخوف منها ومضيقة صدري لكن الان بحاول اعطيكم لمحات عن الرحلة الي كانت من تاريخ 25 ديسمبر الى 8 يناير الرحلة كانت عن طريق طيران ناس الساعة 9 ص اظاهر ووصولنا الساعة 12 الظهر كنت حاجز سيارة من موقع رينتل كار من شركة Circular Car Hire حجزت عن طريق النت قابل للالغاء طبعا سحبوا المبلغ اول ما حجزت لكن يقولون لو الغيت بنرجعه لك ويوم احجز ما حطيت بيانات الرحلة في الحجز وهالنقطة خلتني انلطع في المطار اول ما وصلت مطار صبيحة كانت كل الاجراءات سهله جدا جدا :10: مطلع التاشيره من النت وحاط موعد الوصول قبلها بيوم جيت عند الجوازات عطيته الجوازين وطقطق في الجهاز وناظرني وناظر المدام وقال توكل على الله فيه شباب قدامي ثلاثة وقف واحد منهم وقال لعسكريه خذيه معك واخوياه مشاهم ويوم رحت للعفش لقيت خويهم رجع لهم ماخذ له عشر دقايق العفش على طول وصل ، وطلعت لمنطقة استقبال القادمين فيه كان حملات تبع السوريين وبعضهم كاتبين اسامي على ورق انا طلعت ورحت لمكاتب تاجير السيارات ولا حصلت الشركة وسالتهم قالوا برى المطار وكل من اسال يساعدني في المطار حتى فيه موظفينهم يجون يسالون تبي مساعدة :yolks00320: الشاهد جيت بطلع من المطار وخفت قلت لا اضيع يوم قريت ورقت الحجز حق السيارة حصلته مكتوب انه بيستقبلك في المطار مالهم مكتب المهم سالت العسكري الي عند الباب ولا يعرف انجليزي مره وريته الورقة وطلع جواله وكلمهم وقالي انتظر جوا بيجونك تشكرت منه وجلست الشاهد طولوا ماجوني رجعت وجلست ادور احد يكلمهم مالقيت الا واحد اظاهر سوري من ضمن الي يساعدون في المطار وخليته يكلمهم وكلمهم وقالهم تراه بيحتريكم في مكان معياً خارج المطار وانلطعنا لنا ثلث ساعه وجاني وناظر الحجز وقال فيه مشكله قلت اشلون قال ملغي حجزك قلت كيف وذا الورقة كلم التلفون وقالي ان المندوب جاء الساعة وحدة ولا حصلك والغاء الحجز لكن انت الان موجود طيب وش رايك في هالسياره تاخذها عشان ما نتاخر عليك وهي وصخه يبي لها ربع ساعه ولا تاخذها وصخه :20: قلت هات وبس .. وطلع هذي الشركة ماتقبل التامين الي انا مشترك فيه يوم احجز من الموقع فقالوا لي انت لازم تامن معنا او ما تامن بكيفك لكن لو صار شئ بتدفع لنا وتاخذ الفواتير وتتفاهم مع الموقع يرجعونها لك قلت يصير خير ودفعت لهم التامين لان سيارتهم محككه وثلج قلت الله يستر تتزحلق علي ولا شئ:e433: رحت لسبانجا خط ووصلت الى الفندق استقبلوني بحفاوه ......واليوم الثاني تمشيت فيها ورحت لمعشوقة وثم طلعت لبورصا وبحثت في قوقل عن الشجرة المعمرة وطلعت لي في الطريق بين سبانجا وبورصا وتوجهت طبعاً اكتشفت بعدين ان فيه اكثر من شجرة معمره عندهم وفي هالقرية الي بروح لها موجود شجره لكنها محوطه موب مقهى زي الي في بورصا .. الشاهد في الموضوع وصلت للشجرة هذي بعد مشوارنا طبعاً انا ما اعرفها ماقد جيتها لكن اعرف ان فيه كراسي وجلسات تحتها وتختلف عن الي انا جالس عندها قلت خلني اسال احد ماشي واوريه صورتها يمكني حولها ، لقيت شايب عند بقاله سالته طلع مايتكلم الا تركي وريته الصورة ناظرها وكانه يقول بورصا ثم يوم شافني ما فهمت ولا اعرف اتكلم تركي قام يدور احد يشرح لي وسال وحده في مكتب وطلعت بعد ماتعرف فقام يشرح لي بالاشاره ولا فهمت ومروا شباب صغار يمكن في الثنوي او الجامعة فسالهم تعرفون فاظاهر قاول ايه يطقطقون كلمه كلمتين انجليزي لكن يقولون الي يمين ليفت والارقام يلخبطون فيها فما عرفت الوصف يوم شافوني ما فهمت واحد منهم نقز وجاب دبابه وقالي الشايب الحقه بيوصلك :20: هنا كانت ثاني صدمه لي يقولون اخلاق الاتراك زباله !! طبعاً انا قلت خلاص بروح لبورصا وبس دام يومي راح بس وتشكرت منهم صراحه احرجوني ليتهم بس كانوا يفهمون لغتي عشان يفهمون اني شكرتهم في تنقلاتي كنت ماشي على قوقل ماب وصراحه وداني مع خطوط عجيبه :(155): يقاله بيختصر بس اكتشفت ان خرائط قوقل توها ما تحدثت لان فيه اماكن يقول خذ منعطف يمين ثم يسار وفي الواقع يكون الطريق جديد سيده هذا ثاني موقف احتك مع اتراك واشوف تعاملهم يختلف عن كلام الناس !! في بورصا جيت اركب التلفريك على طول التركي يتكلم عربي يشرح لي ويقول لي اسعار التذاكر ويرحب فينا وحتى يوم جينا نركب التلفريك يضحكون ورحنا للمطعم الي في جبل اولداغ حق الشوي ونفس المعامله طبعاً بورصا يكفيها يوم اذا انت تبي تمرها مرور الكرام وعلى السريع اذا انت والله ماتبي توفر شئ وتشوف كل معالمها يمكن يومين كافيه رحت جبل اولداغ وتغديت فيه والقرية التراثيه والكهف ما امداني عليه وصلت الليل والشجرة التاريخية فيه الشلالات ما رحت لها ويقولون مصنع الحلقوم وفيه محل شاورما مشهور كلها ما رحت لها ثم رجعت من بورصه وتوجهت الى اقفا شمال اسطنبول كانوا يقولون ماتصلح في الشتاء الشاهد اني قلبت رالي في الريف البين بورصا واقفا صراحه يوسع الصدر وفي الصيف احلا وصلنا لاقفا وهي على الي شفته عباره عن مدينة صغيره مطله على البحر الاسود وفيها نهر وعلى النهر فيه منتجعات رايقه اكواخ دخلنا واحد من هالمنتجعات نتقهوى فيه ونريح عقب الخط وكان المنتجع شبه فاضي حتى المقهى انا جلست ادور احد يجي يقهوينا ثم قلنا بنصلي سالت حق المقهى فيه مصلى راح يسال وجاني عقب قال بنفتح لك كوخ وعطاني مفرش وقال توض وصل وخذ راحتك اذا خلصت عط الاستقبال المفتاح هذا موقف ثالث بخصوص التعامل :(57): ثم سلمت السياره في المطار وخذت لي "اوبير" من المطار للفندق قلت العب على المضمون شركة وما يلعبون علي حقين التكاسي بمزور وخرابيطهم وكنت متفق مع سواق تركي يتكلم عربي لمدة خمس ايام اليوم ب 110$ تبدأ المدة من ثاني يوم اوصل فيه لاسطنبول السواق يبي له فقره لحاله انا من الاساس ماكنت مرتاح لفكرة اخذ سواق :yolks00160: بس من كلام الي يروحون لتركيا لازم سواق واريح لك متى ماتطلع تحصله عند الباب ومدري وشو وعارف كل الاماكن ..الخ قلت اتفق معه كم يوم اجربه اذا جاز لي مددت ولا خلاص ، فعليا جلست مع السواق ثلاث ايام فقط بالاتفاق فيما بينا لانه ثاني يوم قالي تسمح لي صديق عزيز علي جاي وعنده مشوار الى العصر قال انت اذا تبي تكنسل يوم خلاص لاني كنسلت يوم بس اذا ماتبي عادي اجيك وانا اصلا ابي الفكه منه بس لاني متفق معه الخلاصة لو جيت مره ثانيه لتركيا منيب ماخذ سواق السواق فيه اماكن ما يعرفها او يسوي نفسه ما يعرفها عشان مايروح مشاوير بعيده السواق يفضل انه هو الي يسوي لك الجدول عشان يريح راسه السواق في بعض الاماكن يوقف في مواقف بفلوس ويقولك ادفعها السواق يحاول يروح مع طرق بعيده اوقات عشان تتاخر في الطريق وتمل وتقول خلاص ارجع لان كنت اتابعه في قوقل ماب السواق ملقوف مثال رحت لنصرت نزل معي وراح يكلم المنسق ويقوله هذولا شخصين وزين انهم جلسونا في جلسات الدور الثاني ولا كان جلس يتابعنا من بعيد وش نطلب ولا وش ناكل يوم طلعنا سالني بكم طلبتوا اكيد غالي في مطعم ثاني قصر عادله جيناه الساعه 11 على اساس بنفطر طلع مافيه فطور وجانا يقالك يترجم وانا فاهم انجليزي ان مافيه فطور يبينا نطلع، رحنا نفطر في مطعم لقمه اظاهر وجلس مقابل البوفيه وكل ما نزلت يناظر السواق كان يدخن فاذا ركب السياره تطلع ريحة السيارة دخان انا كنت احتريه بس يقولي اطلب لي معك اكل ولا يطلب ولا يشاورني زي الي سولفوا لي عنهم يقوولون يجلس ويطلب له طلب ثم يضيفونه على الفاتوره على كل حال هالسواق يمكن يصلح لبعض الناس خاصه الي تبي توفر لان سعره حلو بالمقارنه بغيره اغلبهم 130 وطالع وفيه شركه واحد مدحها لنا قالوا السواق ب 250$ ومحدد الوقت الي يبي رقمه يعلمني ارسله له احس اني طولت في هالقسم في الرد الجاي بتكلم عن بقية الملاحظات :yolks00260: |
من بعد ما تركت السواق صارت كل تنقلاتي عن طريق برنامج اوبير وصار لي موقف معهم سواق اوبير ضيع الفندق وخذ بي لفه طويله طبعاً بعد ما شغلت قوقل ماب وجلست اوصف له عشان يوصل لباب الفندق فاول ما وصلت الفندق ارسلت لاوبير رساله ترى سواقكم ضيع وانا دليته بقوقل ماب وخذ بي لفه وحسبتوها علي ردو علي اليوم الثاني ان البرناج توه جديد في اسطنبول وانا نشكرك انك ساعدت سواقنا وبنرجع لك الزيادة :25: سيارات اوبير اغلبها فان مرسيدس طبعا تختلف داخليتها بعضها فخمه وبعضها عاديه مره واحد حاط مكينة قهوه وموية ومناديل واضاءه خافته ومره مافيها شيء طبعا تعامل سواقين اوبير تعاملهم يعاملونك كانهم سواقين خاصين يرحب فيك ويفتح الباب لك طبعا يوبير اريح من السواق ليش لاني قبل انزل من الفندق ابحث واحط مشواري وخمس دقايق الا هو عند الباب يحتريك تنزل خلاص لاتعرفه ولا يعرفك خلصت من مشواري قبل اطلع اطلبه وتتابعه على الخريطه الزحمه صادفتنا بشكل رهيب كانت في ليلة الثلج تقفلت الشوارع فاتوقع في الصيف تكون الزحمه اعظم الجسر كثير من السواقين مايحبون يروحون معه مدري عشان الزحمه او عشان الضريبه والترام كنت اشوفه مليان والباصات بعد تكون مليانه خاصه اخر اليوم اول يوم خذت تذكرة الباص السياحي وكان فيه عرض يومين بسعر يوم وكان حلو مر فينا اغلب الاماكن وخنا عنها فكره عامه ميدان تقسيم وشارع الاستقلال :11: طبعا ما دخلت الدواعيس الي بين العماير والسكك لكن ميدان تقسيم فيه شرط وشارع الاستقلال زحمه امة محمد وعادي مدري وش فكرة هذي الزحمه ؟؟ وتعشينا في مطعم المدينة كنت متوقعه شئ خورافي وكله خليجيين خذنا لنا دجاجه بالملح طبعا دجاجتهم اظاهر مقاسها 1000 احسها تكفي اربع اشخاص او ثلاثه وكان تعامل الي في المطعم عادي زي المطاعم الي عندنا مافيهم شوفة نفس ولا نفوسهم في خشمهم والسعر جلست اناظر الفاتوره عشر مرات ابي اشوف الزيداه لقيت كلمه غريبه وفيه خدمة سالته قال هذي حقت الخبز والموية طبعا اجباري تاخذها لاني سالت مطعم الملك عنها وقالي كلهم يدفعونها موب انت لحالك وتشرب ولا ماتشرب بتدفعها ولا يشاورك يجي يصب مويه على طول حتى لو ما تبي طبعا سالفة المويه والخبز هذي تقريبا في جميع المطاعم والمقاهي وياخذون بعد رسوم خدمة ومسجله في الفاتوره اللعب الي صار لي مع واحد من المطاعم Kuleli Yakamoz Restoran حلو مكانه لكن اكله وسط الشاهد اول ما دخلنا جاب لي المنيوم وذكرت تحذيرات بعض الناس من المنيو المكتوب باليد وجلست اقلب واخترنا لنا الطلبات وبعد ما طلبنا شفت فيه اجهزه تابلت موزعه على الطاولات قلت خل اشوف وشي وطلعت منيو لكن بالتركي وجلست اضغط وفيه صور ولقيت طلبي الشوربه قلت خل اسال بكم وجلست اصور الشاشه بجوالي ويوم شافوني اصور جلسو يتساسرون من بعيد ويوم رجعته مكانه جاء الجرسون ومسك التابلت وقفله << حركته غبيه ثبت على نفسه انه مسوي شئ غلط :32: المهم يوم جاء قلت بكم هذا الطلب قام راح نقز وجاب المنيو حقنا وقال هذا 15 ليره تركي قمت ناظرت الصوره الا هي ب 10 ليره طبعا ماتفرق معي فرق تافه لكن بس ببين له اننا صاحين ترى موب استغفال طبعا كنت متوقع وش بيقولي لان سبق وسوها في مكان ثاني وقريت عن هالحركه انهم يقولون لك ان هذا منيو قديم وما تحدث طبعا هذا جلس يقول مطر ومدري وشو وماسوينا ابديت للجهاز قلت زين زين اما باقي المطاعم ماشفتهم زودو علينا طلبات ولا شئ حتى نصرت نفس السعر بس اظاهر بعض الناس من كثر طلباتهم يلخبطونهم زي عائله جمبي عباره عن زوج وزوجته وبنت وولد طلبوا لكل واحد طلب طبعا اغلب الطلبات تكفي لشخصين ويوم خلصو طلبوا لكل واحد كنافه بالعافيه عليهم اذا انهم بياكلونه لكن بس تجميع وفي الاخير يرمى في الزباله التكمله في الرد القادم ان شاء الله بكره او الاسبوع الجاي :yolks00230: |
الحمدالله اخوي على السلامة توني قريت الفقرة الاولى وبعد شوي اكمل ان شاء الله بس لو تحط الصور شوية كل الود |
الحمد لله على السلامة يبدو انكم استمتعتوا بالرحلة ماشاء الله ملاحظاتك ايجابية عن الاتراك واضح صرت خبير بالتعامل معهم برافو عليك |
وعليكم السلام حمدلله علي السلامه من اسطنبول الي بورصا ما جربت تطلع علي العباره الطريق كم أخذ منك وقت الشركه اللي استأجرت ذكرت سمعت أن تعاملها سيئ وش رأيك |
تقرير رائع يعطيك العافيه تفاصيل رائعه ودقيقه تفيد الجميع |
تفصيلاتك جميلة جداً .. وسردك للمواقف أشوف فيها إيجابية للسفر لتركيا .. |
شكرا لك لنقل تجربتك ... والحمدلله على السلامه |
الحمد لله على السلامة تقرير رائع يعطيك العافيه |
يازين هرجك شعبي كانه تقرير ماشاء الله تبارك الله شكلك مدرس :7: والحمدلله على السلامه متابع معك :58: |
| الساعة الآن 04:58 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO