|
هااااام يا حبايب بخصوص استئجار سيارة يا أصحاب الخبرة سلام عليكم ورحمة الله وبركاته .. في نية إن شاء الله أخطف رجلي لأسطنبول . بس لحد يبلغ عن الخطف . أرجوووووكم .:42: وهادي المرة قلت أبغى أجرب استأجر سيارة . عشان أسوقها بنفسي وأتنقل براحتي بعيدا عن غلبة المواصلات بشكل عام . وبحثت كتير عن الشركات وخاصة في موقع rentalcars . ومن خلال البحث برضو في فوقل طلعتلي شركة إسمها cizgi طبعا شركة منفردة لحالها ولاتخضع لأي وسيط . عندهم بصراحة سيارات جيدة وكمان أسعار مش بطالة .. سؤالي وهو الأهم في الموضوع كله هل أحد جرب هالشركة cizgi أو أي معلومة تفيد عن تعاملهم . لأني بحثت في النت ماحصلت أي تجارب من ناس أتعاملوا معاهم . أنا أتصلت عليهم وأتواصلت معاهم ولهم مكتب في المطار هل سبق أحد اتعامل معاهم ؟؟ أرجوا الإفادة وللجميع الشكر والتقدير |
حياك وبياك يالغالي ... تعليقي فقط ... بأن تعيد النظر بتجربة القيادة في اسطنبول ... الأمر الآخر .. إذا عزمت على التجربة نصيحتي لك بالشركات العالمية بدجت ،، آفيس ،، يوروكار ،، وغيرها ... حتى وإن زاد السعر قليلاً .. راحة البال أحياناً تستحق كل ليرة يندفع لها ... |
عليكم السلام خذ نصيحة استاذنا كتكات ابتعد عن ايجار السيارة في اسطنبول تراها غثا انت في غنى عنه فالرجال ما قال لك هذا الكلام من واقع خبرة اذا عزمة على ايجار السيارة فالافضل هي الشركات العالمية كما وضح استاذنا كتكات و اما الشركات المحلية كن حذر منها ولا تقع في خطأ وقع فيه الكثير قبلك وفي النهاية انوع الابتزاز على هذا الكلام ينطبق على الكثير من الشركات المحلية والقليل جداً منها محترم |
اكرر واقول ابتعد عن القياده في اسطنبول تجربة القياده ممتعه لكن في اسطنبول مرعبه اذا كنت بتروح بورصه او صبانجا انا اقولك لاتروح الا بسياره لماذا لاننصحك بالقياده في اسطنبول ؟؟ من الواضح انك رحت اسطنبول من قبل انت شفت الزحمه؟؟ زحمة لدرجة ان الحركه متوقفه او شبه متوقفه خصوصا مع ضيق الشوارع عند السلطان احمد وتقسيم وحتى شيشلي ماتفك الزحمه الا من الساعه 8:30 فالليل بقولك موقف صارلي ( ادري طولت عليك .. تحملني شوي ) قلت لراعي التاكسي ابغى اروح المطار الساعه 7 المغرب قالي متى رحلتك؟؟ قلت له الساعه 1 فالليل بس ابغى اروح بدري لاني ابغى اتمشى هناك جنب المطار فيه محلات (اقصد مطار صبيحه) قالي بجيك على الساعه 10 فالليل قلت له ليه؟؟ قال اذا طلعنا الساعه 7 المغرب بنوصل مطار صبيحه الساعه 11 فالليل واذا طلعنا الساعه 10 فالليل بنوصل الساعه 11 فالليل انت بتوصل على الساعه 11 في كلا الحالتين بس لانه الساعه 7 مابعد تفك الزحمه فبنتاخر وبيحسب عليك العداد اكثر وفعلا طلعت الساعه 9 تقريبا وكانت الزحمه قد خفت كثير ومشت الشوارع فيه شغله ثانيه ومهمه شوارع اسطنبول فيها مرتفعات تروع انا كنت ماخذ قير عادي بس عشان انزل الشنط في الفندق وبعدها برجع السياره لاني كنت جاي من صبانجا تخيل مع ذا الزحمه وكل سياره لاصقه في السياره اللي قدامها واللي وراها وعندك قير عادي وانت على شارع مرتفع ... يعني اذا تترك البريك بتصدم في اللي وراك ... يعني لازم تقوم السياره بسرعه ولاتخليه ترجع ولا سانتيمتر واحد ( الا اذا بتاخذ قير اوتوماتيك هذا شي ثاني) اسف على الاطاله بس المترو افضل خيار في اسطنبول |
السادة الأفاضل كتكات783 alradadi رائد بومريم بداية أشكر لكم هادا التفاعل . وليس بغريب عليكم فأنتم أهل الفضل بعد الله عز وجل . وما نزلت الموضوع إلا عشان آخد بنصائحكم ومقترحاتكم . بس حابب أوضح نقطة . سبب إختياري لإستئجار سيارة . لأني ناوي أسكن بعيد عن وسط البلد والزحمة . وتاني شي أبغى أروح بعض المناطق خارج إسطنبول . ونصائحكم على عيني وراسي . وبناءا عليه اتواصلت مع شركة rentalcars وسألتهم إيش أفضل شركة من الشركات اللي هما يتعاملوا معاها . قالوا الأفضل هي . garenta وسبب آخر تعرفوا إحنا قرنبعنا كتيييير . فوجود سيارة تحت اليد أفضل بدل ما تنسى شي في تاكسي ولا مترو .....الخ بالإضافة إلى إنك توقف وقت ما تبغى على الطرقات . والواحد يحاول قدر المستطاع يتحاشى أوقات الذروة وخاصة في إسطنبول . ولا سيما هيا رحلة إستجمام يعني ماني مرتبط بمواعيد ؟؟ وبكدا إن شاء الله أكون أحترمت رأيكم ومشاركتكم الجميلة ربي لايحرمنا أمثالكم .:18: |
garenta شركة محترمه وربما تكون هي افضل شركة محلية هناك لكن تضل خلف الشركات العالمية من حيث احترامها للعميل فيما لو حصلت لك مشكلة بالسيارة اتمنى لك التوفيق |
سيدي alradadi أشكر لك تعقيبك وتنبيهك . وسآخذ بالنصيحة . علما بأن سيارات avis خياراتها محدودة جدا ز ومعظمها بنزين .:23: |
|
فعلا الزحمة هناك غير طبيعية وشوراع ضيقة ومتفرعة والمشوار بتاخذ فيه مدة طويلة من الزحمة احنا اجرنا سيارة على اساس بنستلمها في الفندق اول مانوصل وجابوها لنا ودفعنا مبلغ يوم وما اخذناها بعد ماشفنا الوضع اول ماوصلنا ، افضل شي المواصلات العامة |
شركة تاجير السيارات بدجت الموقع داخل فندق بارك ديدمان ليفنت بجوار كانيون مول المطلوب الجواز والرخصة وبطاقة الفيزا التامين 300 ليرة ترجع بعد 24 ساعة تماما من تسليمك للسيارة التعامل وسياراتهم رائع جدا وسيارات جديدة وحديثة من واقع تجارب اخرها الاسبوع الماضي لاكثر من ثلاثة سنوات كلمة راقيين لا تكفيهم الاسعار من 150 الى 170ليرة السيارات المتوسطة تكفي لخمسة اشخاص بالراحة مكيفة اتوماتيك ديزل فقط احجز بدري لضمان التوافرافضل او روح لهم مباشرة كيفك وغالبا موجود ف غير موسم الصيف طبعا رؤية خاصة : السيارة مهمة لمن معاه عائلة ويرغب ف الذهاب لاطراف وضواحي اسطنبول او المدن القريبة كبورصة وسبانجا وغيرها شوارع اسطنبول مخدومة للغاية والله يرضى ع قوقل ماب واللوحات تكفي كثيرلانها واضحة ومرتبة وحتتعود عليها بعد مدة بسيطة ويازين الضياع ف اسطنبول ههههههه الزحمة نعم موجودة مثل جده والرياض تقريبا وتتغلب عليها بالخروج ف غير اوقات الدوام المعروفة طبعا اغلب المولات والحدائق والمطاعم توفر مواقف مجانية وهناك مواقف مدفوعة ف حدود عشرة وخمسة عشر ليرة لعدد معين من الساعات والخصوصية بالسيارة كما ذكرت جميلة بدل زحمة المترو والترام والباصات المزعجة للعائلة وما يصاحبها من قلق وسؤال عن المخارج والمداخل ووقت النزول والطلوع ومناسبة للشباب اكثر والله اعلم وهذه رؤية خاصة غير ملزمة لحدا وسلامتك |
| الساعة الآن 01:58 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO